ཝ་རཱ་ཎཱ་སིར་གསུང་ཆོས་བསྩལ་བཞིན་པ།

༧གོང་ས་མཆོག་གིས་ཉིན་ ༦ རིང་ལ་ཝ་རཱ་ཎཱ་སིར་རྒྱལ་ཁབ་ ༣༠ ལྷག་ནས་ཕེབས་པའི་མི་མང་ཁྲི་ ༢ ལྷག་ལ་སྤྱོད་འཇུག་ཆེན་མོ་དང༌། མངོན་པ་ཀུན་བཏུས་ཀྱི་གསུང་ཆོས་གནང་གིན་ཡོད་པ་རེད།

ྋགོང་ས་མཆོག་ཟླ་འདིའི་ཚེས་ ༦ སྔ་དྲོ་བཞུགས་སྒར་རྡ་ས་ནས་ཆིབས་ཐོན་གྱིས་གུ་ཇུ་རཱ་ཏི་མངའ་སྡེ་བྷའུ་ནཱ་གྷལ་རྫོང་གི་ཀེ་ལཱ་ཤ་གྷུའུ་རོའུ་ཁེལ་དུ་འཛམ་གླིང་ཆོས་ལུགས་རིས་མེད་ཀྱི་ལྷན་ཚོགས་ཤིག་ཚེས་ ༦ ནས་ཚེས་ ༡༡ བར་འཚོགས་བཞིན་པ་དབུ་འབྱེད་གནང་བར་ཕེབས་ཡོད་པ་དང༌། དབུ་འབྱེད་སྐབས་༧གོང་ས་མཆོག་གིས་ཆོས་ལུགས་ཕན་ཚུན་བར་གྱི་མཛའ་མཐུན་ནི་ངེད་རང་གིས་རྒྱུན་དུ་གལ་ཆེ་བའི་གནད་དོན་གསུམ་བརྗོད་བཞིན་པ་ལས་གཅིག་ཡིན་ལ་དེ་ནི་ཧ་ཅང་གིས་གལ་ཆེན་པོ་རེད། ཆོས་ལུགས་གང་ཡང་རུང་བས་འཛམ་གླིང་ཞི་བདེ་ཡི་ཆེད་དུ་བཟོད་སྒོམ་གནང་དགོས་པ་དང༌། ཆོས་ལུགས་ཐམས་ཅད་ཀྱི་དམིགས་ཡུལ་གཅིག་པ་རེད་ཅེས་གསུངས་ཡོད་འདུག ལྷན་ཚོགས་དེ་ནི་སྐུ་ཞབས་ཤཱི་རི་རཱམ་ཁཱ་ཐཱ་ཁཱར་མཱོ་རཱ་རི་བྷ་བྷོའུ་ནས་འཛམ་གླིང་གི་སྣ་ཚོགས་ཆོས་ལུགས་ཚང་མ་མཛའ་མཐུན་མཉམ་གནས་ཡོང་སླད་གོ་སྒྲིག་ཞུས་པ་ཞིག་ཡིན་པ་དང༌། ལྷན་ཚོགས་དེའི་ཁྲོད་དུ་ཆོས་ལུགས་འདྲ་མིན་གྱི་དབུ་ཁྲིད་དང་སྐུ་ཚབ་ཕེབས་ཡོད་ལ། བཙན་བྱོལ་བོད་གཞུང་གི་བཀའ་བློན་ཁྲི་པ་ཟམ་གདོང་རིན་པོ་ཆེ་ཡང་མཉམ་ཕེབས་ཀྱིས་གསུང་བཤད་གནང་ཡོད་འདུག   ཚེས་ ༧ ཉིན་༧གོང་ས་མཆོག་ཝ་རཱ་ཎཱ་སིར་ཞབས་སོར་འཁོད་ཡོད་ཅིང༌། ཚེས་ ༨ ནས་ཚེས་ ༡༤ བར་ཝར་ཎཱ་ཆེས་མཐོའི་སློབ་གྲྭར་སྤྱོད་འཇུག་དང༌། མངོན་པ་ཀུན་བཏུས་ཀྱི་གསུང་ཆོས་གནང་གིན་ཡོད་པ་དང༌། ཐེངས་འདིའི་གསུང་ཆོས་གོ་སྒྲིག་ཞུ་མཁན་ནི་མདོ་སྨད་ཆོལ་ཁ་དང་བྱང་རྩེ་བླ་སྤྲུལ་ལྷན་ཚོགས། ཨ་མདོ་འཕེལ་རྒྱས་འདས་པོའི་ནང་མི།  བལ་ཡུལ་ཏྲེ་ཧོར་ཐུབ་བསྟན་དཔལ་འབྱོར་ཁྱིམ་ཚང༌། རྡ་ས་བློ་གྲོས་དཔལ་འབྱོར་ཁྱིམ་ཚང་བཅས་ཡིན་པ་དང༌། གསུང་ཆོས་ཞུ་མཁན་རྒྱལ་ཁབ་ ༣༠ ལྷག་ནས་མི་མང་ ༢༠༠༠༠ ཙམ་ཕེབས་ཡོད་འདུག གསུང་ཆོས་གོ་སྒྲིག་ཚོགས་ཆུང་གི་ཚོགས་གཙོ་བཀའ་ཟུར་ཨ་ལག་འཇིགས་མེད་ཐུབ་བསྟན་ལྷུན་གྲུང་ལགས་ཀྱིས་གནས་ཚུལ་གསུངས་པ་ལྟར་ན། རྒྱ་གར་གྱི་ས་གནས་གང་སའི་མཁན་པོ་བླ་སྤྲུལ་གཙོས་པའི་བོད་མི་སེར་སྐྱ་ ༦༠༠༠ ལྷག་དང༌། ཧི་མ་ལ་ཡའི་རི་རྒྱུད་ཀྱི་ནང་པ་ ༣༠༠༠ ལྷག ཕྱི་རྒྱལ་ཁག་ནས་མི་གྲངས་ ༡༥༠༠ ལྷག་དང་བོད་ནས་བོད་མི་ ༡༥༠ ལྷག་ཙམ་ཆོས་ཞུ་བར་སླེབས་ཡོད་འདུག་ལ། ཚེས་ ༨ ཉིན་༧གོང་ས་མཆོག་གིས་ཆོས་ཞུ་བ་ཚོར་ཝ་རཱ་ཎཱ་སི་རུ་སངས་རྒྱས་ཀྱིས་ཆོས་མཁོར་དང་པོ་བསྐོར་བའི་བདེན་བཞི་ངོ་སྤྲོད་དང༌། སྒོམ་རིམ་གྱི་ངོ་སྤྲོད་སྐོར་བཀའ་ཆོས་བསྩལ་ཡོད་པ་དང༌། ཚེས་ ༡༣ བར་དུ་༧གོང་ས་མཆོག་གིས་སྤྱོད་པ་འཇུག་མོ་དང༌། སྒོམ་རིམ་གྱི་གསུང་ཆོས་བཀའ་དྲིན་བསྩལ་རྒྱུ་ཡིན་འདུག ཚེས་ ༡༣ ཉིན་གྱི་ཞོགས་པ་སྤྱན་རས་གཟིགས་ཀྱི་བཀའ་དབང་བསྩལ་རྒྱུ་ཡིན་པ་དང༌། ཉིན་དེའི་ཕྱི་དྲོ་ཨ་རུ་ན་ཅལ་མངའ་སྡེ་ཡི་བློན་ཆེན་གཞོན་དང་མཉམ་དུ་ཝ་རཱ་ཎཱ་སིའི་མཆོད་རྟེན་གྱི་མདུན་དུ་མང་ཚོགས་དང་མཉམ་དུ་༧གོང་ས་མཆོག་གིས་སྤྱི་ལོ་ ༢༠༠༨ ལོར་བོད་ནང་དུ་བྱུང་བའི་ཞི་རྒོལ་ཁྲོད་རང་སྲོག་ཤོར་བའི་དཔའ་བོ་དཔའམོ་ཚོ་གཙོས་པའི་འཛམ་གླིང་ཞི་བདེའི་ཆེད་འབུམ་ཚོགས་འཚོགས་ཀྱིན་ཡོད་པ་དང༌། ཚེས་ ༡༤ ཉིན་གྱི་སྔ་དྲོ་གོང་གི་གསུང་ཆོས་གོ་སྒྲིག་ཞུ་མཁན་རྣམས་དང༌། བོད་ཀྱི་གཞོན་ནུ་ལྷན་ཚོགས། སི་ལི་གྷུའུ་རི་ཡི་སཱ་ལོའའུ་གྷ་རཱ་རུ་ཡོད་པའི་སྲད་རྒྱུད་གྲྭ་ཚང་གི་མ་དགོན་བཅས་ནས་༧གོང་ས་མཆོག་ལ་བརྟན་བཞུགས་འབུལ་གྱིན་ཡོད་པ་དང༌། དེའི་རྗེས་༦གོང་ས་མཆོག་གིས་མི་མང་ལ་ཚེ་དབང་གནང་རྒྱུ་ཡིན་འདུག ཉིན་གྲངས་བདུན་གྱི་གསུང་ཆོས་གནང་གྲུབ་རྗེས་ཚེས་ ༡༥ ཉིན་༧གོང་ས་མཆོག་གིས་ཝ་རཱ་ཎཱ་སིར་ནང་པ་དང་ཆོས་ལུགས་གཞན་པའི་བར་གྱི་བགྲོ་གླེང་ཞིག་གཙོ་སྐྱོང་གནང་རྒྱུ་དང༌། ཚེས་ ༡༦ ཉིན་ནང་ཆོས་དང་ཚན་རིག་བར་འབྲེལ་བ་གང་ཡོད་སྐོར་གྱི་རྒྱལ་སྤྱིའི་ཚོགས་འདུ་ཞིག་དབུ་འབྱེད་གནང་རྒྱུ་ཡིན་འདུག་ལ།  ཚེས་ ༡༧ ཉིན་ལྡི་ལིར་ཛཱ་མི་ཡ་གཙུག་ལག་སློབ་གཉེར་ཁང་དུ་དགུ་པའི་བཅུ་གཅིག་རྗེས་ཀྱི་འཛམ་གླིང་ཆོས་ལུགས་ཞེས་པའི་ཚོགས་ཆེན་དུ་ལྷན་ཞུགས་ཀྱིས་བཀའ་སློབ་བསྩལ་རྒྱུ་ཡིན་པ་དང༌། ཚེས་ ༢༠ ཉིན་ལྡི་ལི་ནས་ཅེ་ནེལ་དང་བར་ཐག་ཀི་ལོ་མི་ཌར ༡༦༠ ཡོད་པའི་ཨོ་རོ་ཝེ་ལཱར་ཕེབས་ཏེ་ས་ཁུལ་དེ་གའི་བོད་ཁང་ཞེས་པ་ཞིག་དབུ་འབྱེད་བཀའ་དྲིན་བསྐྱང་རྒྱུ་དང་དེ་གྲུབ་རྗེས་ཨཱོ་རཱོ་ཝེལཱའི་མི་མང་ལ་བཀའ་སློབ་བསྩལ་རྒྱུ་ཡིན་འདུག དེའི་རྗེས་ཚེས་ ༢༡ ཉིན་ཨོ་རོ་ཝེ་ལཱ་ནས་ཅེ་ནེལ་ཏུ་ཆིབས་སྒྱུར་བསྐྱང་སྟེ་མ་ངྡི་རཱ་སིེ་གཙུག་ལག་སློབ་གཉེར་ཁང་གི་སློབ་ཕྲུག་ཚོར་བཀའ་སློབ་བསྩལ་རྒྱུ་དང་དྲི་བ་ཁག་ལ་བཀའ་ལན་གནང་རྒྱུ་ཡིན་ཞིང་ཕྱི་ཚེས་ ༢༢ ཉིན་ཅེ་ནེལ་ནས་ལྡི་ལི་དང་དེ་ནས་བཞུགས་སྒར་རྡ་སར་ྋཞབས་སོར་འཁོད་རྒྱུ་ཡིན་འདུག