འཛམ་གླིང་དཔལ་འབྱོར་ཉམས་རྒུད་ཆེན་མོ།

ཕྱི་ཚེས་ ༡༧ ཉིན་འདི་གའི་གསར་འགོད་

པ་དོན་འགྲུབ་བཀྲ་ཤིས་བོད་གཞུང་དཔལ་འབྱོར་ལས་ཁུངས་སུ་བསྐྱོད་དེ། དེང་གི་འཛམ་གླིང་དཔལ་འབྱོར་ཉམས་རྒུད་དུ་འགྲོ་བཞིན་པའི་སྐོར་དང་འབྲེལ་ཏེ། རྒྱ་དཀར་ནག་གཙོས་པའི་བོད་ཀྱི་ཁྱིམ་མཚེས་རྒྱལ་ཁབ་ཁག་གི་དཔལ་འབྱོར་གནས་བབ། དེ་བཞིན་བོད་ནང་དང་བཙན་བྱོལ་སྤྱི་ཚོགས་ནང་འཛམ་གླིང་དཔལ་འབྱོར་ཉམས་ཉེས་ཀྱི་ཤུགས་རྐྱེན་ཐེབས་མིན་བཅས་བཀའ་འདྲི་ཞུས་སྐབས། བོད་གཞུང་དཔལ་འབྱོར་ལས་ཁུངས་ཀྱི་དྲུང་འཕར་ཟླ་བ་ལགས་ཀྱིས། ང་ཚོའི་དཔལ་འབྱོར་ལས་ཁུངས་སུ་དཔལ་འབྱོར་ཆེད་མཁས་པ་དང་གནད་དོན་འདི་རིགས་ཐད་ཉམས་ཞིབ་པ་དེ་འདྲ་མེད་སྟབས། ཁྱེད་ཀྱི་དྲི་བར་ལན་རྒྱག་ཐུབ་མཁན་མེད་མོད། ཉེ་ཆར་ཨ་རི་ནས་གསར་དུ་ཕེབས་པའི་དཔལ་འབྱོར་སྲིད་བྱུས་ཉམས་ཞིབ་པ་ཚེ་དབང་རྟ་མགྲིན་ཞུ་བ་ཞིག་ཡོད། ཁོང་སྐད་བཏང་སྟེ་ང་ཚོས་བགྲོ་གླེང་གི་ཚུལ་དུ་བཀའ་མོལ་གནང་ཆོག་ཟེར། དེ་ནས་དཔལ་འབྱོར་ཉམས་ཞིབ་པ་ཚེ་དབང་རྟ་མགྲིན་ལགས་ཕེབས་ཏེ། དྲུང་འཕར་ཟླ་བ་ལགས་དང་ཉམས་ཞིབ་པ་ཚེ་དབང་རྟ་མགྲིན་གཉིས་དང་ལྷན་དུ་འཛམ་གླིང་སྤྱིའི་དཔལ་འབྱོར་ཉམས་རྒུད་དང་འབྲེལ་ཏེ། བོད་ཕྱི་ནང་གི་དཔལ་འབྱོར་ལ་འགྱུར་བ་འགྲོ་མིན་ཐད་སྐད་ཆ་བྱུུང་བ་དག་གཤམ་དུ་དྲི་བ་དྲིས་ལན་གྱི་ཚུལ་དུ་བཀོད་ཡོད།

དྲི་བ། ཐོག་མར་ཉམས་ཞིབ་པ་ཚེ་དབང་རྟ་མགྲིན་ལགས་ཀྱིས་ཉིད་ཀྱི་སློབ་སྦྱོང་དང་དཔལ་འབྱོར་ཉམས་ཞིབ་ཀྱི་བརྒྱུད་རིམ་དང་འབྲེལ། འཛམ་གླིང་དཔལ་འབྱོར་ཉམས་རྒུད་ཀྱི་བྱུང་རིམ་ངོ་སྤྲོད་ཅིག་གནང་རོགས།

ལན། ང་རང་རྒྱ་གར་ནས་འཚར་ལོངས་བྱུང་ཞིང༌། འཛིན་གྲྭ་གཉིས་པ་ནས་དགུ་བའི་བར་སིམ་ལ་སློབ་གྲྭ་དང༌། འཛིན་གྲྭ་བཅུ་པ་ནས་བཅུ་གཉིས་བར་མཱ་སུ་རི་བོད་ཁྱིམ་ནས་ཚན་རིག་ཆེད་སྦྱོང་དང༌། དེའི་རྗེས་གྷོ་རཱ་པུར་མཐོ་སློབ་ནས་ལོ་བཞིའི་རིང་གློག་གི་སྐོར་ལ་ཆེད་སྦྱོང་ཐོན་རྗེས་ངྷ་སྟེང་བོད་ཁྱིམ་གྱི་འཛིན་གྲྭ་བརྒྱད་པ་དགུ་བ་བཅུ་བ་བཅས་ཀྱི་དངོས་ལུགས་དགེ་རྒན་བྱས་པ་ཡིན། སྐབས་དེར་གཞུང་གི་སློབ་ཡོན་རག་སྟེ་ཨ་རིའི་ནའེ་ཡོག་ཏུ་ལོ་གཉིས་ལ་ཚོང་ལས་སྐོར་ལ་ཆེས་མཐོའི་རིག་གནས་རབ་འབྱམས་པར་སློབ་སྦྱོང་བྱས་ཤིང༌། ༡༩༩༨ ལོ་ནས་ ༢༠༠༨ ལོའི་བར་གྲོང་ཁྱེར་ནའེ་ཡོག་གི་དངུལ་ཁང་ཆེ་ཤོས་སེ་ཊེ་ནས་ལས་ཀ་བྱས་པ་ཡིན། ད་ལོའི་སྤྱི་ཟླ་ ༧ པའི་ནང་རྒྱ་གར་དུ་ཡོང་སྟེ། བོད་གཞུང་དཔལ་འབྱོར་ལས་ཁུངས་ནས་དང་བླངས་ཐོག་ལས་ཀ་བྱེད་མུས་ཡིན།

དེང་གི་འཛམ་གླིང་དཔལ་འབྱོར་ཉམས་རྒུད་ཀྱི་མགོ་འཛུགས་ས་གཙོ་བོ་ཨ་རི་ཆགས་ཡོད། སྤྱིར་བཏང་འཛམ་གླིང་གི་དཔལ་འབྱོར་དེ་ལོ་བཅུ་གྲངས་རེའི་མཚམས་སུ་དར་རྒུད་ཡང་ཡང་ཡོང་གིན་ཡོད། འོན་ཀྱང༌། ཐེངས་འདིའི་དཔལ་འབྱོར་ཉམས་རྒུད་དེ་མི་ཚང་མས་དམིགས་བསལ་ཞིག་ཏུ་རྩི་བཞིན་ཡོད། དགུ་བཅུ་གོ་གྲངས་ལ་གློག་ཀླད་ཤུགས་ཆེན་དར་སྐབས། གློག་ཀླད་སྡེ་ཚན་མང་པོ་བཙུགས་ཏེ་ཉམས་རྒུད་ཐེངས་གཅིག་བྱུང་ཡོད། སྤྱིར་ཨ་རིའི་དཔལ་འབྱོར་དར་བའི་སྐབས་སུ་ལས་མེད་བརྒྱ་ཆ་ ༤ ཙམ་རེད། ཐེངས་འདི་ཨ་རིའི་ལོ་རྒྱུས་ཐོག་གི་དཔལ་འབྱོར་ཉམས་རྒུད་ཆེ་ཤོས་ཨང་གཉིས་པ་དེ་ཆགས་ཡོད། ཨ་རིའི་དཔལ་འབྱོར་ཉམས་རྒུད་ཨང་དང་པོའི་སྐབས་སུ་ལས་མེད་བརྒྱ་ཆ་ ༣༥  ཙམ་བྱུང་ཡོད། ཐེངས་འདིར་ལས་མེད་བརྒྱ་ཆ་ ༧ དང་ཕྱེད་བྱུང་ཡོད།

དྲི་བ། ཐེངས་འདིར་ཨ་རིར་དཔལ་འབྱོར་ཉམས་ཉེས་སུ་འགྲོ་བའི་རྒྱུ་རྐྱེན་གང་ཡིན་དང༌། ཨ་རིའི་དཔལ་འབྱོར་ཉམས་ཉེས་དེ་རྒྱལ་སྤྱིའི་དཔལ་འབྱོར་ཉམས་ཉེས་སུ་གྱུར་དོན་ཅི་ཡིན་ནམ།

ལན། ཨ་རིའི་དཔལ་འབྱོར་ཉམས་ཉེས་ཀྱི་འབྱུང་ཁུངས་གཙོ་བོ་ནི་ཁང་པ་ཉོ་ཚོང་ལས་བྱུང་བ་རེད། ཁང་བ་ཉོ་མཁན་མང་པོ་བྱུང་བ་དང་བསྟུན་ཏེ་ཁང་བའི་གོང་ཚད་མཐོན་པོར་ཕྱིན་སྟབས། དཔེར་ན། དགུ་བཅུ་གོ་གྲངས་ལ་ཁང་པ་ཞིག་ལ་ཨ་སྒོར་ཁྲི་ ༦ ཡིན་ན། ༢༠༠༧ ལོར་ཁང་བ་དེར་ཨ་སྒོར་ཁྲི་ ༡༧ ལ་འཕར་བ་རེད། མང་པོ་ཞིག་གིས་ཁང་བའི་ཉོ་ཚོང་ཐོག་ནས་ཁེ་སྤོགས་ཆེན་པོ་བླངས་ཡོད། དངུལ་ཁང་དག་གིས་ཀྱང་ཁེ་སྤོགས་དེའི་ཆ་ཤས་ལེན་ཆེད། ཡོང་འབབ་དང་མ་རྩ་ཡོད་མེད་ལ་མ་ལྟོས་པར་དངུལ་གཡར་ཡོད། དངུལ་ཁང་གིས་དངུལ་གང་འདོད་དུ་གཡར་དོན་ནི་རྗེས་མ་གལ་སྲིད་དངུལ་བུན་ཕྱིར་སྤྲོད་མ་ཐུབ་ན། དངུལ་གཡར་མཁན་ཚོའི་ཁང་པ་གཏའ་མར་ལེན་པ་དང་གཞུང་བཞེས་བྱས་ན། སྐབས་དེར་ཁང་བའི་གོང་ཚད་ལྡབ་འགྱུར་གྱིས་འཕར་ཡོད་སྟབས། ཁེ་སྤོགས་ཆེན་པོ་རག་པར་རྩིས་བརྒྱབས་ཡོད། ཐོག་མར་མང་པོ་ཞིག་ལ་ཁེ་སྤོགས་དེ་རག་ཡོད། དེར་བརྟེན། རྒྱལ་ཁབ་གཞན་གྱི་དངུལ་ཁང་མང་པོས་ཀྱང་འཁྲུག་ཆ་དོད་པོའི་ཁང་བའི་ཁེ་སྤོགས་ལེན་རྒྱུར་ཧམ་སེམས་བཅངས་ཏེ། ཨ་རིའི་དངུལ་ཁང་ཆེ་ཁག་དང་ལག་འབྲེལ་བྱས་ཡོད་སྟབས། ཁང་པའི་རིན་གོང་མར་ཆགས་མ་ཐག རྒྱལ་ཁབ་དེ་དག་ལའང་རང་བཞིན་གྱིས་གྱོང་གུད་ཚབས་ཆེན་ཕོག་ཡོད།

དྲི་བ། ཐེངས་འདིའི་འཛམ་གླིང་དཔལ་འབྱོར་ཉམས་ཉེས་དེ་ཨ་རིའི་ཁང་པ་ཉོ་ཚོང་ལས་བྱུང་བ་ཡིན་ན། ཨ་རིའི་ཁང་པའི་རིན་གོང་མར་ཆག་པའི་རྒྱུ་རྐྱེན་གང་ལ་ཐུག་ཡོད་དམ།

ལན། སྤྱིར་བཏང་དཔལ་འབྱོར་རིག་པའི་ཐོག་ནས་བཤད་ན། དངོས་པོ་ཅི་ཞིག་ཡིན་རུང་ཉོ་མཁན་དང་བཙོང་མཁན་གྱི་བར་ཁྱད་ལ་ཐུག་ཡོད། དཔེར་ན། ངྷ་སར་མཚོན་ན། ཁང་བ་ཉོ་མཁན་མང་པོ་ཡོད་སྟབས། ངྷ་སའི་ཁང་བའི་རིན་གོང་མཐོན་པོ་ཆགས་ཡོད་པ་བཞིན། ཨ་རིར་ཁང་བ་ཉོ་མཁན་མང་དུ་བྱུང་སྟེ། ཡོང་འབབ་དང་མ་རྩ་ཡོད་མེད་གཉིས་ཀར་དངུལ་ཁང་ནས་དངུལ་གང་འདོད་གཡར་ཏེ། སོ་སོའི་གནས་བབ་ལས་རྒལ་བའི་ཁང་བ་ཉོས་ཤིང༌། ཁང་བའི་རིན་གོང་ཚད་ངེས་ཅན་དུ་འཕར་བའི་སྐབས་དེར་ཕྱུག་པོ་མང་ཆེ་བས་ཁང་བ་ཉོས་ཟིན་ཞིང༌། དཔལ་འབྱོར་སྐྱོ་བོའི་རིགས་ཀྱིས་ཉོ་མ་ཐུབ་པ་ཆགས་ཏེ། ཁང་བའི་རིན་གོང་བསྐྱར་དུ་ལྷུང་མགོ་ཚུགས་ཤིང༌། དངུལ་ཁང་མང་ཆེ་བར་དངུལ་མེད་པ་ཆགས་ཏེ། ཁྲོམ་ར་དང་ཚོང་པ། བཟོ་གྲྭ དཔལ་འབྱོར་འདུ་འགོད་ཀྱི་སྡེ་ཚན་ཚང་མར་དངུལ་མ་རག་པར་ཚོང་ལས་ཀྱི་མ་རྩ་ཆུང་ཆུང་ལས་འཁོར་སྐྱོད་བྱེད་མ་ཐུབ་པ་ཆགས་ཤིང༌། དངུལ་ཁང་མང་པོ་ཞིག་གི་སྒོ་རྒྱག་དགོས་པ་བྱུང་ཡོད། སྐབས་དེར་ཨ་རི་དང་ཡུ་རོབ་སོགས་ཀྱི་དངུལ་ཁང་ཆེ་ཁག་རྒྱལ་ཁབ་གཞུང་གིས་ཉོ་དགོས་པ་ཆགས་པ་རེད།

དྲི་བ། འཛམ་གླིང་དཔལ་འབྱོར་ཉམས་རྒུད་ཀྱིས་བོད་ཀྱི་ཁྱིམ་མཚེས་རྒྱལ་ཁབ་ཁག་དང༌། ལྷག་པར་དུ་རྒྱ་དཀར་ནག་ལ་དཔལ་འབྱོར་ཉམས་རྒུད་ཐེབས་ཀྱིན་ཡོད་མེད་དང༌། ཡོད་ན་ཇི་ལྟར་ཐེབས་ཀྱིན་ཡོད་དམ།

ལན། རྒྱ་ནག་ལ་མཚོན་ན། ཐོན་སྐྱེད་བྱས་པའི་ཅ་དངོས་རིགས་ཕྱིར་བཙོང་བྱ་དགོས་པ་རེད། ལྷག་པར་དུ་ཨརིར་འབོར་ཆེན་འཚོང་གིན་ཡོད། ཨ་རིའི་དཔལ་འབྱོར་ཉམས་རྒུད་དུ་སོང་བ་དང་བསྟུན་ཏེ། རྒྱ་ནག་གི་ཅ་དངོས་ཕྱིར་གཏོང་གི་ལམ་ཁ་ཆེ་ཤོས་གཅིག་འགག་ཡོད། དེང་སྐབས་རྒྱ་ནག་གི་བཟོ་གྲྭ་མང་པོ་སྒོ་བརྒྱབས་ཏེ། ལས་ཤོར་བ་ས་ཡ་མང་པོ་འབྱུང་གིན་ཡོད། དེ་བཞིན་ཉི་ཧོང་ལ་མཚོན་ན། ཊོ་ཡོ་ཊ་རླངས་འཁོར་ལས་ཁུངས་ཀྱི་ལོ་ངོ་ ༧༠ ལྷག་གི་ལོ་རྒྱུས་ནང་གྱོང་གུད་ཐོག་མ་དེ་བྱུང་ཡོད། དེ་མིན་གྱི་རླངས་འཁོར་བཟོ་གྲྭ་ཁ་ཤས་སྒོ་རྒྱག་དགོས་བྱུང་ཡོད། ཨ་རི་དང་རྒྱ་གར་བར་གློག་ཀླད་ཀྱི་འབྲེལ་བ་ཤུགས་ཆེན་ཡོད་པ་རེད། འཛམ་གླིང་རྒྱལ་ཁབ་ཁག་གི་གློག་ཀླད་སྡེ་ཚན་ཆེ་ཤོས་དག་རྒྱ་གར་གྲོང་ཁྱེར་མུམ་བྷེ་རུ་ཡོད་ལ། རྒྱ་གར་གྱིས་གློག་ཀླད་མ་ལག་མང་པོ་ཞིག་ཕྱིར་གཏོང་བྱེད་ཀྱིན་ཡོད་ལ། ལས་ཀ་བྱེད་མཁན་མང་པོ་ཞིག་རྒྱ་གར་བ་རེད། དེ་དག་ལ་གླ་ཆ་ཨ་རི་ནས་སྤྲོད་ཀྱིན་ཡོད། ཨ་རིའི་དཔལ་འབྱོར་ཉམས་རྒུད་དུ་སོང་བ་དང་བསྟུན་ཏེ། རྒྱ་གར་གྱི་ཨེན་ཧཕོ་སེ་བཟོ་གྲྭའི་འཕེལ་རྒྱས་བརྒྱ་ཆ་ ༧ མར་ལ་ཆགས་འདུག སྔོན་མ་ལོ་རེར་བརྒྱ་ཆ་ ༡༥ འཕེལ་གྱིན་ཡོད། དེ་བཞིན་ལྕགས་ཀྱི་བཟོ་གྲྭ་མང་པོར་གྱོང་གུད་ཐེབས་གིན་ཡོད། རྒྱལ་ཁབ་གང་ཡིན་རུང་ཕྱིར་གཏོང་ཅ་དངོས་ཀྱི་བཟོ་གྲྭ་ཚང་མར་གྱོང་གུད་ཐེབས་ཀྱི་རེད།

དྲི་བ། གལ་སྲིད་འཛམ་གླིང་དཔལ་འབྱོར་ཉམས་རྒུད་ཁྲོད་རྒྱ་ནག་ལ་གྱོང་གུད་ཚབས་ཆེན་ཐེབས་པ་ཡིན་ན། བོད་ནང་གི་དཔལ་འབྱོར་གནས་བབ་ལ་ཤུགས་རྐྱེན་དང་འགྱུར་ལྡོག་ག་འདྲ་ཡོང་གི་རེད།

ལན། བོད་ལ་ཐད་ཀར་ཤུགས་རྐྱེན་ཆེན་པོ་ཐེབས་གི་མ་རེད་སྙམ། གང་ཡིན་ཟེར་ན། བོད་པ་རང་ལ་ཕྱིར་གཏོང་བྱེད་བཞིན་པའི་ཅ་དངོས་དང་བཟོ་གྲྭ་ཆེན་པོ་ཡོད་པ་མ་རེད། དེ་བཞིན་བོད་པ་ཚོང་བྱེད་མཁན་ཉུང་ཉུང་རེད། བོད་པ་ཕལ་ཆེ་བ་ཞིང་ལས་དང་འབྲོག་ལས་རེད། འོན་ཀྱང༌། ཤུགས་རྐྱེན་གང་ནས་ཐེབས་ཀྱི་རེད་ཟེར་ན། རྒྱ་ནག་ནང་ལ་སྐྱེལ་འདྲེན་བྱེད་བཞིན་པའི་བོད་ནང་གི་འབྲོག་པ་ཚོའི་ཐོན་རྫས་རིགས་ཀྱི་རིན་གོང་ཅུང་མར་ཆགས་སྲིད་པ་དང༌། ཡུལ་སྐོར་སྤྲོ་འཆམ་པ་ཉུང་དུ་འགྲོ་གི་རེད། བོད་ནང་ཡོང་མཁན་གྱི་ཡུལ་སྐོར་སྤྲོ་འཆམ་པ་མང་ཆེ་བ་རྒྱ་རིགས་གཞོན་སྐྱེས་དག་རེད། ལས་ཀ་ཤོར་བ་དང་ཚོང་ལས་བརྡིབས་ན་དངུལ་ཡོད་པ་མ་རེད། དེར་བརྟེན། བོད་ནང་ཡུལ་སྐོར་སྤྲོ་འཆམ་པ་ཉུང་དུ་འགྲོ་གི་རེད། དེ་བཞིན། བོད་ཡུལ་གྱི་ཐོན་དངོས་རྩ་ཆེན་རིགས་ཀྱི་རིན་གོང་ཆགས་འགྲོ་གི་རེད་སྙམ།

དྲི་བ། བོད་བཙན་བྱོལ་གཞུང་དམངས་གཉིས་ཕྱི་རྒྱལ་གྱི་རོགས་ཚོགས་ཁག་ལ་བརྟེན་ཡོད་སྟབས། འཛམ་གླིང་དཔལ་འབྱོར་ཉམས་རྒུད་ཀྱི་ཤུགས་རྐྱེན་བཙན་བྱོལ་ནང་ཐེབས་སྲིད་དམ།

ལན། བཙན་བྱོལ་བོད་གཞུང་དང་གཞུང་འབྲེལ་མ་ཡིན་པའི་ཚོགས་པ་སྐྱིད་སྡུག་མང་པོ་ཞིག་ཕྱི་རྒྱལ་གྱི་རོགས་དངུལ་ལ་བརྟེན་ཡོད་པ་རེད། ཨ་རི་དང་ཡུ་རོབ་ལ་མཚོན་ན་དཔལ་འབྱོར་ཅི་ཙམ་ཡར་རྒྱས་སུ་སོང་བ་དེ་ཙམ་གྱིས་རྒྱལ་ཁབ་སྐྱོ་བོའི་རིགས་ལ་རོགས་རམ་དང༌། ཆབ་སྲིད་ཀྱི་དཀའ་རྙོག་ཐད་དངུལ་གཏོང་གིན་ཡོད། དེ་བཞིན་ཨ་རིའི་ཕྱུག་བདག་སྒེར་བ་ཕལ་ཆེ་བས་སོ་སོའི་མིང་ཐོག་ལ་ཐེབས་རྩ་བཙུགས་ཡོད། དེར་དམིགས་ཡུལ་གཉིས་ཡོད། དང་པོ། སོ་སོའི་ཆེད་ཡིན། ཐེབས་རྩ་བཙུགས་ན་གཞུང་ལ་ཁྲལ་ཉུང་དུ་འགྲོ་གི་རེད། གཉིས་པ། ཆ་རྐྱེན་སྐྱོ་བོའི་རིགས་ལ་རོགས་རམ་བྱས་ན་མིང་གྲགས་ཐོབ་གི་རེད། རྒྱལ་ཁབ་སྤྱིའི་དཔལ་འབྱོར་ཉམས་རྒུད་དུ་ཕྱིན་ན། ཐེབས་རྩ་ཁག་དངུལ་དང་ཐད་ཀར་འབྲེལ་བ་ཡོད་སྟབས་རང་བཞིན་གྱིས་དཀའ་ངལ་འཕྲད་ཀྱིན་ཡོད། དེར་བརྟེན། རྒྱལ་ཁབ་གཞུང་མ་ཡིན་པའི་སྒེར་གྱི་རོགས་ཚོགས་ཁག་ལ་བརྟེན་པའི་བཙན་བྱོལ་བོད་པའི་དཔལ་འབྱོར་ཡོང་ཁུངས་ཁག་ལ་ཏན་ཏན་ཤུགས་རྐྱེན་ཐེབས་གི་རེད་སྙམ། གོ་ཐོས་ལྟར་ན། དཔེ་མཛོད་ཁང་གི་ཉི་ཧོང་གི་རོགས་ཚོགས་ཤིག་གིས། ད་ལོའི་དཔལ་འབྱོར་ཉམས་རྒུད་ཀྱིས་ང་ཚོར་དཀའ་ངལ་སྤྲད་ཡོད་སྟབས། རོགས་སྐྱོར་མཚམས་འཇོག་བྱ་རྒྱུ་ཡིན་ཞེས། རོགས་དངུལ་བཀག་འདུག་ཟེར། ཨ་རི་དང་ཁེ་ན་ཌར་ཁྱིམ་བདག་གི་བུ་ཕྲུག་ལྟ་སྐྱོང་བྱེད་མཁན་བོད་པ་མང་པོ་ཡོད། ལོ་འདི་འགར་ཁོང་ཚོའི་ལས་ཀ་ཤོར་གྱིན་འདུག་ཟེར། དེ་ནི་ཁོང་ཚོའི་ཁྱིམ་བདག་གི་ལས་ཀ་ཤོར་ཏེ་ནང་དུ་བསྡད་ཡོད་སྟབས། བུ་ཕྲུག་ལ་ལྟ་སྐྱོང་བྱེད་མཁན་མ་དགོས་པ་རེད།

དྲི་བ། བཙན་བྱོལ་གཞུང་དམངས་ཀྱི་ངོས་ནས་འཛམ་གླིང་དཔལ་འབྱོར་ཉམས་རྒུད་ཀྱི་ཤུགས་རྐྱེན་སྔོན་འགོག་བྱེད་ཐབས་དང༌། ཡང་ན་དེ་ལ་འབབ་པའི་གྲ་སྒྲིག་དང་ལས་འཆར་བཟོ་རྒྱུ་ཡོད་དམ།

ལན། དཔལ་འབྱོར་ཉམས་རྒུད་དེར་ལམ་སེང་ཁ་གཏད་གཅོག་པ་དང་སྔོན་འགོག་བྱ་རྒྱུ་ཁག་པོ་རེད། གང་ཡིན་ཟེར་ན། ང་ཚོར་རང་དབང་མེད་པར་གཞན་ལ་བརྟེན་ཡོད། གཞན་བརྟེན་གྱི་དཔལ་འབྱོར་ཡོང་ཁུངས་ལ་ཡིད་རྟོན་ཡོད་པ་མ་རེད། འོན་ཀྱང༌། ད་ལྟ་གཞུང་གི་འགྲོ་གྲོན་གྱི་བརྒྱ་ཆའི་ལྔ་བཅུ་རོགས་ཚོགས་ལ་བརྟེན་ཡོད་ན། མ་འོངས་པར་བརྒྱ་ཆའི་དྲུག་ཅུ་ནས་བདུན་ཅུ་བོད་རང་གི་མི་དམངས་ཀྱི་དཔྱ་ཁྲལ་དང་ཞལ་འདེབས་སོགས་ཀྱི་ལམ་ནས་འཚོལ་ཐབས་བྱ་དགོས་པ་རེད་སྙམ། ལྷག་པར་དུ་ཕྱི་རྒྱལ་ཁག་ཏུ་ཡོད་པའི་བོད་རིགས་ཚོས་དང་བླངས་དཔྱ་ཁྲལ་གཙང་འབུལ་བྱ་ཐུབ་ན། ཕན་ཐོགས་ཆེན་པོ་ཡོང་གི་རེད་སྙམ། དེ་ལ་དངུལ་གྱི་གྲངས་ཚད་མཐོ་དགོས་པ་མ་རེད། སྤྲོད་མཁན་གྱི་གྲངས་འབོར་མང་དགོས་པ་རེད། ཚོད་དཔག་བྱས་ན། ད་སྔ་ཨ་རིར་བོད་མི་དཔྱ་ཁྲལ་སྤྲོད་མཁན་བརྒྱ་ཆ་ ༣༠ ཙམ་ཡང་འདང་གིན་ཡོད་པ་མ་རེད་སྙམ། དེ་ཚོ་གྲ་སྒྲིག་བྱ་དགོས་པའི་གྲས་རེད། དེ་བཞིན། གཞུང་གི་ལམ་སྟོན་འོག་གཞིས་ཆགས་ཁག་དང་མང་ཚོགས་རང་ངོས་ནས་དཔལ་འབྱོར་འཚོལ་སྒྲུབ་ཀྱི་ལས་གཞི་འཛུགས་དགོས་པ་རེད། ད་ལོ་བཞིན་འཛམ་གླིང་གི་དཔལ་འབྱོར་ལ་འགྱུར་ལྡོག་ཆེན་པོ་བྱུང་ན་སྦྱིན་བདག་རླག་སྲིད་པ་རེད། ལྷག་པར་དུ་སྒེར་གྱི་རོགས་ཚོགས་ཁག་བརྟན་པོ་ཡོད་པ་མ་རེད།

དྲི་བ། སྐུ་ཉིད་དཔལ་འབྱོར་རིག་པར་སློབ་སྦྱོང་བྱས་མྱོང་མཁན་ཞིག་ཡིན་པའི་ཆ་ནས། ཐེངས་འདིའི་འཛམ་གླིང་དཔལ་འབྱོར་ཉམས་ཉེས་དེ་ག་དུས་ཤིག་ལ་མཇུག་སྒྲིལ་ཐུབ་པར་ཚོད་དཔག་བྱེད་ཀྱིན་ཡོད་དམ།

ལན། དེའི་ཐད་སུས་ཀྱང་བརྟན་པོ་ཞིག་བཤད་ཐུབ་ཀྱིན་ཡོད་པ་མ་རེད། དཔལ་འབྱོར་རིག་པའི་མཁས་པ་ཁག་ཅིག་གིས། ད་དུང་མུ་མཐུད་དུ་དཔལ་འབྱོར་གྱི་གནས་སྟངས་སྡུག་ཏུ་ཕྱིན་ཏེ། གཞུང་དམངས་གཉིས་ཀར་དངུལ་གྱི་དཀའ་ངལ་འཕྲད་དེ། གནས་ཚུལ་འདྲ་མིན་ཡོང་སྲིད་པ་རེད། གང་ཡིན་ཟེར་ན། ཨ་རི་གཙོས་པའི་རྒྱལ་ཁབ་མང་པོ་ཞིག་གི་དཔལ་འབྱོར་ཉམས་རྒུད་ཀྱིས་འཛམ་གླིང་ཡོངས་ཟང་ཟིང་བཟོས་ཡོད་ལ། བཟོ་གྲྭ་དང་ཁྲོམ་ར། ཚོང་ཁང་མང་པོ་སྒོ་རྒྱག་དགོས་བྱུང་སྟེ། ལས་ཤོར་བ་ཧ་ཅང་མང་པོ་ཆགས་ཡོད་ཟེར། ཡང་ཁག་ཅིག་གིས། ཉིས་སྟོང་དགུ་ཧྲིལ་བོ་དང་ཉིས་སྟོང་བཅུའི་ལོ་ཕྱེད་ཙམ་ནས་མཇུག་སྒྲིལ་གི་རེད་ཟེར་གྱིན་འདུག འོན་ཀྱང་དེ་རེ་སྨོན་ཙམ་རེད། དངོས་ཡོད་ཐོག་ད་དུང་ལོ་ཁ་ཤས་འགོར་སྲིད་པའི་ཉེན་ཁ་ཞིག་མཐོང་གི་འདུག དེ་ང་རང་སྒེར་གྱི་བསམ་ཚུལ་ཡིན།

དྲི་བ། ཐེངས་འདིའི་འཛམ་གླིང་དཔལ་འབྱོར་ཉམས་རྒུད་ཆེན་མོ་འདི་རྒྱུ་བྱས་ཏེ། ད་ལྟའི་འཛམ་གླིང་གི་དཔལ་འབྱོར་ལམ་ལུགས་ལ་འགྱུར་བ་འདྲ་འགྲོ་སྲིད་དམ།

ལན། འཛམ་གླིང་སྤྱིའི་དཔལ་འབྱོར་ལམ་ལུགས་ལ་འགྱུར་བ་དམིགས་བསལ་འགྲོ་གི་མ་རེད་སྙམ། ཨ་རི་དང་ཡུ་རོབ་སོགས་དམངས་གཙོའི་རྒྱལ་ཁབ་ཁག་གི་དཔལ་འབྱོར་འགྲོ་སྟངས་ལ་འགྱུར་བ་འགྲོ་སྲིད་པ་ཞིག་རེད། ལྷག་པར་དུ་ཨ་རིའི་སྤྱི་མཐུན་ཚོགས་པས་ད་བར། དཔལ་འབྱོར་ལམ་ལུགས་ལ་གཞུང་གིས་ཐེ་གཏོགས་བྱས་ན་མི་འགྲིག སྒེར་བདག་བྱས་ན་སྒེར་གྱི་ཁེ་སྤོགས་ཆེད་འཐུས་ཤོར་ལ་གཏོང་གི་མ་རེད། ཕྱུག་པོ་ཚོའི་ཁྲལ་ཉུང་དུ་གཏོང་དགོས་ཟེར་གྱིན་ཡོད། ཨ་རིའི་ཕྱུག་བདག་མང་ཆེ་བ་སྤྱི་མཐུན་ཚོགས་པའི་ནང་ཡོད། དམངས་གཙོ་ཚོགས་པས། དཔལ་འབྱོར་སྡེ་ཚན་ལ་གཞུང་གིས་སྟངས་འཛིན་མ་བྱས་ན། མང་ཚོགས་དཀྱུས་མར་གྱོང་རག་འགྲོ་བ་རེད། ཕྱུག་བདག་ཚོའི་ཁྲལ་སྤར་ཏེ། མང་ཚོགས་དཀྱུས་མའི་ཁྲལ་ཉུང་དུ་གཏོང་དགོས་ཟེར་གྱིན་ཡོད། ཐེངས་འདིའི་དཔལ་འབྱོར་ཉམས་རྒུད་ཁྲོད། ནུབ་ཕྱོགས་རྒྱལ་ཁབ་ཁག་གི་མང་ཚོགས་ཀྱིས་གཞུང་གིས་དཔལ་འབྱོར་ལ་དོ་དམ་སྟངས་འཛིན་བྱ་དགོས་ཀྱིན་འདུག ཅེས་སྐད་རྒྱག་གིན་ཡོད། དེར་བརྟེན། ཨ་རི་དང་ཡུ་རོབ་རྒྱལ་ཁབ་ཁག་ཅིག་གི་དཔལ་འབྱོར་ལམ་ལུགས་ལ་འགྱུར་བ་འགྲོ་སྲིད་པ་ཞིག་རེད།

དྲི་བ། ཕྱི་རྒྱལ་རོགས་ཚོགས་ཁག་གིས་བོད་ཀྱི་འགྲོ་བ་མིའི་ཐོབ་ཐང་དང་དམངས་གཙོ། ཤེས་ཡོན། འཕྲོད་བསྟེན་བཅས་སུ་རོགས་སྐྱོར་བྱེད་ཀྱིན་ཡོད། གལ་སྲིད་དཔལ་འབྱོར་ཉམས་རྒུད་ཀྱི་ཤུགས་རྐྱེན་བསླེབ་ན་ཕྱོགས་གང་ལ་ཐེབས་སྲིད་དམ།

ལན། ལས་གཞི་འདིའི་ཐད་ཀྱི་རོགས་ཚོགས་ལ་འགྱུར་བ་འགྲོ་རྒྱུ་རེད་ཅེས་བཤད་ཐུབ་པ་མི་འདུག་མོད། སྲིད་དོན་ཐད་རོགས་སྐྱོར་བྱེད་མཁན་ཕལ་ཆེ་བ་གཞུང་ཡིན་སྟབས། འགྱུར་ལྡོག་ཞེ་དྲག་ཨེ་ཡོད་དྲན་ཡོད། དེ་མ་ཡིན་པའི་ལས་གཞི་གཞན་དག་ཕལ་ཆེ་བ་གཅིག་མཚུངས་ཡིན་རྒྱུ་རེད། སྤྱིར་ཕྱི་རྒྱལ་ཡུལ་གྲུ་ཁག་གི་གཞུང་ངོས་ནས་བོད་པའི་གཞུང་དམངས་ལ་རོགས་དངུལ་སྤྲོད་ཀྱིན་ཡོད་པའི་དངུལ་འབོར་ཧ་ཅང་ཉུང་ཉུང་རེད། དཔེར་ན། ཨ་རི་ལྟ་བུར་མཚོན་ན། ཨི་སི་རེལ་དང་ཁ་ཆེ་ལུང་པ་ཁག་ལ་ལོ་རེར་ཨ་སྒོར་དུང་ཕྱུར་བརྒྱ་ཉིས་བརྒྱ་སྤྲོད་ཀྱིན་ཡོད། རྒྱལ་ཁབ་གཞུང་གིས་སྲིད་དོན་ཐད་རོགས་སྐྱོར་བྱེད་ཀྱིན་ཡོད་པ་དག་ལ་འགྱུར་བ་ཆེན་པོ་འགྲོ་གི་མ་རེད། འོན་ཀྱང༌། སྒེར་གྱི་རོགས་ཚོགས་རེ་ཟུང་གི་གནས་སྟངས་ལ་འགྱུར་བ་འགྲོ་སྲིད་པ་ཞིག་རེད། དེ་ལ་ང་ཚོར་གྲ་སྒྲིག་དགོས་པ་རེད་སྙམ།

དེ་ལྟར་དྲི་བ་མང་ཆེ་བར་ཉམས་ཞིབ་པ་ཚེ་དབང་རྟ་མགྲིན་ལགས་ཀྱིས་ལན་འདེབས་གནང་སོང་ལ། མཇུག་མཐར། དྲུང་འཕར་ཟླ་བ་ལགས་ཀྱིས་གསུངས་དོན། སྔོན་མ་ནས་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས། བཙན་བྱོལ་བོད་མི་ཚང་མས་དཔལ་འབྱོར་རྒྱས་སྤྲོས་མི་བྱེད་པར། མི་རེ་ངོ་རེ་ནས་དངུལ་བསྲི་ཚགས་དང༌། བོད་མིའི་རྩ་དོན་ཐད་གསོག་འཇོག་བྱ་རྒྱུ་གལ་ཆེན་རེད་ཅེས་ཡང་ཡང་གསུང་གིན་ཡོད། ལྷག་པར་དུ་ད་ལོ་བོད་ནང་དོན་རྐྱེན་བྱུང་རྗེས་ཤུགས་ཆེན་པོས་གསུངས་ཡོད། འོན་ཀྱང༌། འཛམ་གླིང་དཔལ་འབྱོར་ཉམས་རྒུད་ཀྱིས་བཙན་བྱོལ་བོད་གཞུང་གི་དཔལ་འབྱོར་གནས་བབ་ཐད་ཤུགས་རྐྱེན་ཞེ་དྲག་ཐེབས་རྒྱུ་མ་རེད་སྙམ། གང་ཡིན་ཟེར་ན། རོགས་དངུལ་གྱི་བརྒྱ་ཆ་མང་ཆེ་བ་ཨ་རི་སོགས་རྒྱལ་ཁབ་གཞུང་ནས་བརྒྱུད་ལམ་འདྲ་མིན་སྤྱད་དེ་གནང་གིན་ཡོད་པ་ཞིག་ཆགས་ཡོད་ཅེས་བཙན་བྱོལ་བོད་མིར་སེམས་གསོ་དང་ང་ཚོའི་བགྲོ་གླེང་ལ་མཇུག་སྡོམ་གྱི་ཚུལ་དུ་གསུངས་བྱུང༌།