བོད་དོན་ཐོག་འཛིན་པའི་སྲིད་བྱུས་གསར་པའི་ཡིག་ཆ།

ཕྱི་ཚེས་ ༢༠ ཉིན་ཡུ་རོབ་མཐུན་ཚོགས་དང་རྒྱ་ནག་གི་བར་མཐོ་རིམ་ཚོགས་འདུ་སྐོང་འཆར་གྱི་སྐབས་འདིར། བྷུ་རུ་སེལ་དུ་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་སྲིད་ཇུས་གསར་བའི་ཡིག་ཆ་ཞིག་འགྲེམས་སྤེལ་བྱས་ཡོད་པ་དང་། དེའི་ནང་ཡུ་རོབ་མཐུན་ཚོགས་ཀྱིས་བོད་དོན་ཐད་ལངས་ཕྱོགས་གསར་བ་དང་བརྟན་པོ་འཛིན་དགོས་པའི་འབོད་སྐུལ་གནང་ཡོད་འདུག

ཕྱི་ཚེས་ ༡༨ ཉིན་རྒྱལ་སྤྱིའི་བོད་དོན་ལས་འགུལ་ཁང་གིས་སྲིད་ཇུས་གསར་པའི་ཡིག་ཆ་དེ་འགྲེམས་སྤེལ་བྱས་ཡོད་པ་དང་། ཡིག་ཆ་གསར་བ་དེ་ནི་ཟླ་འདིའི་ཚེས་ ༢༠ ཉིན་ཡུ་རོབ་མཐུན་ཚོགས་དང་རྒྱ་ནག་དབུས་གཞུང་གི་བར་དུ་ཚོགས་འདུ་ཆེན་པོ་ཞིག་འཚོགས་འཆར་ཡོད་པ་དེར་དམིགས་ཏེ།  རྒྱལ་སྤྱིའི་བོད་དོན་ལས་འགུལ་ཁང་གིས་བོད་ཀྱི་གནད་དོན་འདིས་ཡུ་རོབ་དང་རྒྱ་ནག་གཞུང་གི་འབྲེལ་བ་ལ་ཤུགས་རྐྱེན་ངེས་ཅན་ཞིག་ཐེབས་ཀྱིན་ཡོད་སྟབས། ཡུ་རོབ་མཐུན་ཚོགས་ཀྱི་ངོས་ནས་བོད་དོན་ཐད་ལངས་ཕྱོགས་གསར་བ་ཞིག་དང་བརྟན་པོ་ཞིག་འཛིན་དགོས་པའི་འབོད་སྐུལ་ཞུས་ཡོད་འདུག སྔར་ལོའི་སྤྱི་ཟླ་ ༡༢ བའི་ནང་ཡུ་རོབ་མཐུན་ཚོགས་དང་རྒྱ་ནག་བར་གྱི་ཚོགས་ཆེན་དེ་འཚོགས་ཐུབ་མེད་པ་དང་། དེ་ནི་སྐབས་དེའི་ཡུ་རོབ་མཐུན་ཚོགས་ཀྱི་ཚོགས་གཙོ་ཧྥ་རན་སིའི་སྲིད་འཛིན་སར་ཁོ་རྫི་མཆོག་དང་༧གོང་ས་མཆོག་མཇལ་འཕྲད་གནང་བར་རྒྱ་ནག་དབུས་གཞུང་མ་དགའ་བའི་རྣམ་འགྱུར་གྱིས་ཚོགས་ཆེན་དེ་ནས་ཕྱིར་འཐེན་བྱས་པ་རེད། དེ་ནས་བཟུང་རྒྱ་ནག་གིས་ཡུ་རོབ་རྒྱལ་ཁབ་ཁག་གི་མགོ་ཁྲིད་དང་སྲིད་གཞུང་གི་མི་སྣ་ཚོ་༧གོང་ས་མཆོག་དང་མཇལ་འཕྲད་གནང་བར་བཀག་འགོག་དང་། གསར་ལམ་ཁག་ཏུ་རྒྱལ་ཁབ་སུ་ཞིག་གིས་༧གོང་ས་མཆོག་དང་འབྲེལ་བ་བྱུང་ན་རྒྱ་ནག་གིས་མཐའ་གཅིག་ཏུ་ངོ་རྒོལ་བྱ་རྒྱུ་ཡིན་ཚུལ་བསྒྲགས་ཡོད།

རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་མཐུན་ཚོགས་ཀྱི་སྲིད་བྱུས་འགན་འཛིན་པ་ཝེན་སེན་ཌི་མི་ཌན་གྱིས། སྔ་ལོར་རྒྱ་ནག་གིས་ཡུ་རོབ་མཐུན་ཚོགས་དང་རྒྱ་ནག་བར་གྱི་ཚོགས་ཆེན་མེད་པར་གཏོང་དོན་ནི་ཕྱོགས་གཉིས་ཆར་བོད་དོན་འདི་འབྲེལ་བ་ཆགས་ཡོད་པ་དང་། ཕྱོགས་གཉིས་ཀས་བོད་དོན་འདི་གལ་ཆེན་པོར་བཟུང་བས་རེད། རྒྱ་ནག་གིས་བོད་ཀྱི་གནད་དོན་ལ་འབྲེལ་བ་ཆགས་མ་དགོས་པ་བྱེད་ཀྱིན་ཡོད་པ་དང་ཡུ་རོབ་མཐུན་ཚོགས་ཀྱི་ངོས་ནས་བོད་དོན་ལ་འགན་བླངས་པས་རེད། བོད་དོན་ཐད་གནད་དོན་མང་པོ་ཞིག་གླེང་སློང་འབྱུང་གི་ཡོད་པའི་རྐྱེན་གྱིས་རྒྱ་ནག་དང་ཡུ་རོབ་མཐུན་ཚོགས་ཀྱི་འབྲེལ་ལམ་ལ་འགག་རྐྱེན་ཡོང་གི་ཡོད། བོད་དོན་འདི་རྒྱ་ནག་གི་དཀའ་ངལ་ལ་ཆགས་ནས་ལོ་ངོ་ ༥༠ འགོར་གྱིན་ཡོད་པ་དང་འབྱུང་འགྱུར་བཀའ་ངལ་འདི་སེལ་ཆེད་ཡུ་རོབ་མཐུན་ཚོགས་ཀྱིས་རྒྱ་བོད་ཕྱོགས་གཉིས་ཀར་ཁེ་ཕན་ལྡན་པའི་ལངས་ཕྱོགས་གསར་བ་ཞིག་དང་བརྟན་པོ་ཞིག་འཛིན་དགོས་ཞེས་གསུངས་ཡོད་འདུག

རྒྱལ་སྤྱིའི་བོད་དོན་ལས་འགུལ་ཁང་གི་སྲིད་ཇུས་གསར་བའི་ཡིག་ཆ་དེའི་ནང་དུ་ཡུ་རོབ་མཐུན་ཚོགས་ཀྱིས་ཡུ་རོབ་ཁག་ཏུ་༧གོང་ས་མཆོག་ཕེབས་ཐུབ་པར་རྒྱ་ནག་གི་གནོན་ཤུགས་དང་ཐེ་གཏོགས་མི་ཡོང་བར་འབོད་སྐུལ་ཞུ་དགོས་པ་དང་། ལག་ལེན་དངོས་ཀྱི་ཁྲོད་རྒྱ་བོད་ཞི་མོལ་ཡོང་བར་འབད་བརྩོན་གནང་དགོས་པ། དེ་བཞིན་རྒྱ་ནག་གིས་བོད་ཐོག་ལ་འཛིན་པའི་སྲིད་བྱུས་ལ་འགྱུར་བ་གཏོང་དགོས་པའི་འབོད་སྐུལ་ཞུ་དགོས་པ། བོད་དོན་ཐད་རྒྱལ་སྤྱིའི་ཚོགས་སྡེ་གཞན་གྱི་རྒྱབ་སྐྱོར་དང་མཉམ་འབྲེལ་ཡོང་བར་འབད་བརྩོན་གནང་དགོས་པ་སོགས་ཀྱི་དགོས་འདུན་བཏོན་ཡོད་འདུག་ལ། སྲིད་ཇུས་གསར་པའི་ཡིག་ཆ་འདི་ཡུ་རོབ་མཐུན་ཚོགས་ཀྱི་ཚོགས་གཙོ་དང་། ཡུ་རོབ་སྲིད་དོན་ལྷན་ཁང་གི་ཚོགས་གཙོ། ཡུ་རོབ་མཐུན་ཚོགས་ཀྱི་ཆེས་མཐོའི་ཚན་པའི་ཕྱི་འབྲེལ་སྤྱི་ཁྱབ་ལྷན་ཁང་དང་བདེ་འཇགས་སྤྱི་ཁྱབ་ལྷན་ཁང་སོགས་སུ་ཕུལ་ཡོད་འདུག