དྲང་བདེན་མིན་པའི་ཁྲིམས་ཆད་དང་མི་མང་གི་ངོ་རྒོལ།

ཉེ་ཆར་འཇོ་མདའ་རྫོང་མི་དམངས་ཁྲིམས་ཁང་གིས་ལྡན་ཆོས་འཁོར་དགོན་པའི་དགེ་འདུན་པ་དྲུག་ལ་ཉེས་མེད་ཉེས་འཛུགས་ཀྱིས་དྲང་བདེན་མིན་པའི་ཁྲིམས་ཐག་བཅད་འདུག་པར། ལྡན་ཆོས་འཁོར་ཞང་གི་བོད་རིགས་མི་དམངས་ཚོས་གདུང་སེམས་མཉམ་ཆེད། དབྱར་རྩྭ་དགུན་འབུ་བརྐོ་རྒྱུ་མཚམས་འཇོག་བྱས་ཤིང༌། མང་ཚོགས་ ༦༠༠ ཙམ་འཇོ་མདའ་རྫོང་དུ་བསྐྱོད་དེ་ངོ་རྒོལ་གྱི་རྣམ་འགྱུར་བསྟན་ཡོད་འདུག

ཟླ་ ༥ ཚེས་ ༢༢ ཉིན་འཇོ་མདའ་རྫོང་མི་དམངས་ཁྲིམས་ཁང་གིས་ལྡན་ཆོས་འཁོར་དགོན་པའི་གྲྭ་བ་དྲུག་ལ་དྲང་བདེན་མིན་པའི་ཁྲིམས་ཐག་བཅད་ཡོད་སྟབས། ཕྱི་ཚེས་ ༢༥ ཉིན་ལྡན་ཆོས་འཁོར་དགོན་པའི་ལྷ་སྡེ་ཁག་གི་མི་དམངས་འདུ་འཛོམས་བྱས་ཤིང༌། མི་ཚང་རེ་ནས་མི་རེ་ངེས་པར་དུ་འཇོ་མདའ་རྫོང་ཐོག་ལ་གཏུགས་བཤེར་བྱེད་དུ་འགྲོ་རྒྱུ་ཐག་གཅོད་བྱས་ཏེ། བསྡོམས་པའི་མི་དྲུག་བརྒྱ་ ༦༠༠ ལྷག་འཇོ་མདའ་རྫོང་ལ་ཕྱིན་ཡོད་ཀྱང༌། སྐབས་དེར་དྲག་ཆས་ཐོགས་པའི་དམག་མི་དང་ཉེན་རྟོག་པ་ཕོན་ཆེན་ཡོང་སྟེ། བཀག་འགོག་གིས་ཉེས་རྡུང་ཚབས་ཆེན་བཏང་ཡོད་པ་མ་ཟད། མྱུར་དུ་ཕྱིར་ལོག་མ་བྱས་ཚེ་དྲག་ཆས་བཀོལ་རྒྱུ་ཡིན་པའི་འཇིགས་སྐུལ་ཡང་བྱས་ཡོད་འདུག ད་ལོ་ལྡན་ཆོས་འཁོར་ཞང་གི་བོད་རིགས་མི་དམངས་ཚོས་དྲང་བདེན་མིན་པའི་ཁྲིམས་ཆད་བཅད་པའི་གྲྭ་བ་དེ་དག་ལ་གདུང་སེམས་མཉམ་སྐྱེད་ཆེད། དབྱར་རྩ་དགུན་འབུ་བརྐོ་རྒྱུ་མཚམས་འཇོག་བྱས་ཏེ། ས་གནས་ཁག་གི་དབྱར་རྩ་དགུན་འབུ་བརྐོ་ཡུལ་ནས་ཕྱིར་ལོག་བྱས་ཡོད་འདུག

གོང་གི་གནས་ཚུལ་དེའི་སྐོར་ལ་ཁ་པར་བརྒྱུད། ལྷོ་ཕྱོགས་འབྲས་སྤུངས་བློ་གསལ་གླིང་གི་དགེ་འདུན་པ་འཇམ་གཅེས་ལེགས་སུ་བཅར་འདྲི་ཞུས་པར་ཁོང་གིས་བརྗོད་དོན། སྤྱིར་ཉིན་འདི་འགར་ང་ཚོའི་ཕ་ཡུལ་འཇོ་མདའ་ས་ཁུལ་དུ་དབྱར་རྩ་དགུན་འབུ་བརྐོ་བའི་དུས་ཚིགས་ལ་འཁེལ་ཡོད་སྟབས། མི་མང་པོ་འདུ་འཛོམས་བྱེད་ཀྱིན་ཡོད། ཉེ་ཆར་འཇོ་མདའ་རྫོང་མི་དམངས་ཁྲིམས་ཁང་གིས་ལྡན་ཆོས་འཁོར་དགོན་པའི་གྲྭ་བ་དྲུག་ལ་མ་ཉེས་ཁ་གཡོགས་ཀྱིས་དྲང་བདེན་མིན་པའི་ཁྲིམས་ཐག་བཅད་ཡོད་སྟབས། མང་ཚོགས་ཚོས་གནས་སྐབས་འདི་འདྲ་ཞིག་ལ་དབྱར་རྩ་དགུན་འབུ་བརྐོས་ནས་འདུག་རྒྱུའི་དུས་ཚོད་མ་རེད། ཅེས་ཕྱི་ཚེས་ ༢༥ ཉིན་ལྡན་ཆོས་འཁོར་དགོན་འོག་གི་གྲོང་སྡེ་བདུན་གྱི་མི་ཚང་རེ་ནས་མི་རེ་འཇོ་མདའ་རྫོང་ལ་བསྐྱོད་དེ། གྲྭ་བ་དེ་དག་ལ་གུ་ཡངས་དང་བསྐྱར་དུ་ཁྲིམས་བཤེར་ཡོང་རྒྱུར་ཞུ་བ་བྱེད་དུ་བསྐྱོད་འདུག སྐབས་དེར་བསྡོམས་པའི་མི་ ༦༠༠ ལྷག་ཡོད་ས་རེད། ཁོང་ཅག་སྐོར་ཁག་གསུམ་བྱས་ཏེ་ཕྱིན་ཡོད་པ་ལས་སྐོར་ཁག་གཉིས་པ་དང༌། གསུམ་པ་འཇོ་མདའ་རྫོང་དང་སྡེ་དགེ་གཉིས་བར་གྱི་འབྲི་ཆུའི་ཟམ་པའི་ཁ་ནས་བཀག་འགོག་བྱས་འདུག སྐོར་ཁག་དང་པོ་དེ་ཕྱི་ཚེས་ ༢༩ ཉིན་གྱི་ཞོགས་པ་འཇོ་མདའ་རྫོང་ལ་འབྱོར་ཙམ་བྱུང་ཡོད་ཀྱང༌། དེ་མ་ཐག་རྒྱ་གཞུང་གི་དྲག་ཆས་མཚོན་ཆ་ཐོགས་པའི་ཉེན་རྟོག་པ་དང་དམག་མི་ཕོན་ཆེན་ཡོང་སྟེ་ཉེས་རྡུང་ཚབས་ཆེན་བཏང་སྟེ། ཁྱེད་ཅག་ལམ་སང་ཕྱིར་ལོག་མ་བྱས་ཚེ། དྲག་ཆས་བཀོལ་རྒྱུ་ཡིན་པའི་འཇིགས་སྐུལ་ཡང་བྱས་འདུག 

ཉིན་འདི་འགར་ལྡན་ཆོས་འཁོར་ཞང་གི་བོད་རིགས་ཚོས་དབྱར་རྩ་དགུན་འབུ་བརྐོ་རྒྱུ་མཚམས་འཇོག་བྱས་ཏེ། མདན་ཁོག་སོགས་དབྱར་རྩ་དགུན་འབུ་བརྐོ་ཡུལ་དག་ནས་བོད་རིགས་ཚང་མ་ཕྱིར་ལོག་བྱས་ཡོད་འདུག ཟླ་བ་སྔ་ཕྱིའི་ནང་འཇོ་མདའ་རྫོང་ཁོངས་སུ་གནས་ཚུལ་འདྲ་མིན་བྱུང་ཡོད་སྟབས། ཉེན་རྟོག་པ་དང་དམག་མི་འབོར་ཆེན་སླེབས་ཏེ། དམ་དྲག་ཤུགས་ཆེན་བྱེད་ཀྱིན་ཡོད་པའི་ཁར། ཕྱི་ཚེས་ ༢༨ ཉིན་བསྐྱར་དུ་དྲག་ཆས་ཐོགས་པའི་དམག་མི་ཉིས་སྟོང་ ༢༠༠༠ ཙམ་དང༌། ལྕགས་ཁྲབ་འཁོར་ལོ་མང་པོ་སླེབས་ཏེ། ཉིན་འདི་འགར་འཇོ་མདའ་རྫོང་ཧ་ཅང་ཛ་དྲག་ཆགས་ཡོད་འདུག ཅེས་བརྗོད་བྱུང༌།

ཁོང་གིས་མུ་མཐུད་དུ་ཁྲིམས་ཐག་བཅད་ཟིན་པའི་ལྡན་ཆོས་འཁོར་དགོན་པའི་གྲྭ་བ་དག་གི་སྐོར་བརྗོད་དོན། ཉེ་ཆར་ཟླ་ ༥ བའི་ཚེས་ ༢༢ འཇོ་མདའ་རྫོང་མི་དམངས་ཁྲིམས་ཁང་གིས་ལྡན་ཆོས་འཁོར་དགོན་པའི་གྲྭ་བ་དྲུག་ལ་ཁྲིམས་ཐག་བཅད་སྐབས། གཞན་དང་མ་འདྲ་བ་ཞིག་བྱས་ཡོད་པ་རེད། ནམ་རྒྱུན་བཙོན་པ་ཞིག་ལ་ཁྲིམས་ཐག་གཅོད་སྐབས། སྔོན་ལ་གསལ་བསྒྲགས་བྱེད་པ་དང། ཁྲིམས་ཐག་དངོས་སུ་གཅོད་སྐབས་མི་མང་པོ་འདུ་འཛོམས་ཐོག བཙོན་པ་རེ་རེ་ཁྲིད་ཡོང་སྟེ། ཁོང་ཚོའི་ནག་ཉེས་དང༌། ཁྲིམས་གང་ལ་འགལ་ཡོད་པ་སོགས་གསལ་བཤད་བྱེད་པ་མ་ཟད། ཁྲིམས་དཔོན་དང་ཁྲིམས་རྩོད་པའི་བར་དྲི་བ་དྲིས་ལེན་བྱས་ཏེ། ཁྲིམས་ཐག་གཅོད་སྲོལ་ཡོད་མོད། ཐེངས་འདིར་དེ་འདྲ་གང་ཡང་མ་བྱས་པར། ཉིན་འགའི་སྔོན་ལ་རྒྱ་གཞུང་གི་ལས་བྱེད་ཁ་ཤས་ལྡན་ཆོས་འཁོར་དགོན་པར་ཡོང་ནས་ཚོགས་འདུ་འཚོགས་ཤིང་ཡིག་ཆ་རེ་སྤྲད་དེ། གྲྭ་བ་དེ་དག་གིས་ནག་ཉེས་འདི་བཟོས་པ་དང་ལོ་འདི་ཙམ་ལ་ཐག་གཅོད་བྱས་ཚུལ་བསྒྲགས་ཡོད་འདུག གྲྭ་བ་ཁོང་ཚོའི་ངོས་ནས་སྐད་ཆ་གང་བཤད་ཡོད་པ་དང༌། ངོས་ལེན་གང་འདྲ་བྱས་ཡོད་མེད་སོགས་ཀྱི་གནས་སྟངས་ཚིག་གཅིག་ཀྱང་ཤེས་རྟོགས་བྱུང་ཡོད་པ་མ་རེད། ཅེས་བརྗོད་སོང༌།