ས་གནས་ཁྲིམས་ཞིབ་ཁང་ལ་ལས་ཀ་མི་འདུག

གསར་འགོད་པ། ཨ་རིག་འགྱུར་མེད་ཀྱིས་ལྷོ་ཕྱོགས་ནས་སྤེལ།

སྤྱི་ཚོགས་ནི་དུས་རྒྱུན་ནས་ཉོག་འཛིང་གིས་གྲུབ་པ་ཞིག་ཡིན་ལ། གྱོད་དང་ཁ་མཆུ་ཡང་གཏན་ནས་མེད་པ་ཞིག་ག་ལ་ཡིན། ཡིན་ནའང་། ང་ཚོའི་སྤྱི་ཚོགས་ཁྲོད་མཚམས་རེར་མང་ཚོགས་ལ་བདེ་སྡུག་ཅིག་ཞུ་ས་མི་རག་པར་ལྷག་གི་ཡོད་ལ། ཡང་སྐབས་རེར་བདེ་སྡུག་ཞུ་ས་དང་གྱོད་སྣ་ཁ་མཆུ་གཏུགས་ས་ཚོ་བེད་མེད་དུ་ལྷག་གི་ཡོད། དེ་གཉིས་བར་ན་ནམ་རྒྱུན་ནས་ལྷུ་ལག་ཅིག་བསྒྲིག་མ་ཐུབ་པར་ལུས་ཡོད།

སྦེལ་ ཀོབ་ས་གནས་བོད་ཀྱི་དུས་བབ་ཡན་ལག་ལས་ཁུངས་ཀྱི་མདུན་ངོས་སུ་མེ་སོར་ས་གནས་བོད་ ཀྱི་ཁྲིམས་ཞིབ་ཁང་ཡོད་ལ། དེ་རུ་ཉིན་ལྟར་ལས་བྱེད་བཞི་རེས་ཕྱག་ལས་གནང་གིན་ཡོད། འོན་ཀྱང་། མང་ཚོགས་ཁྲོད་ས་གནས་ཁྲིམས་ཞིབ་ཁང་ནི་སྦེལ་ཀོབ་ཀྱི་ལས་མེད་ལས་ཁུངས་ཤིག་གམ། ཡང་ན་དུས་རྒྱུན་སྒོ་བརྒྱབས་ཡོད་པའི་ལས་ཁུངས་ཤིག་ལ་ངོས་འཛིན་བྱེད་ཀྱིན་ཡོད། དེ་ཡང་ལོས་ཡིན། ས་གནས་ཁྲིམས་ཞིབ་ཁང་འདི་ཕྱི་ལོ་ ༢༠༠༢ ལོར་གསར་འཛུགས་གནང་བ་དང་། འདིའི་ཁྱབ་ཚད་ནི་ལྷོ་གཞིས་ལྔ་ཡིན་མོད། ས་གནས་ཁྲིམས་ཞིབ་ཁང་འདི་བཙུགས་ནས་ད་བར་གྱོད་གཏུགས་བྱེད་མཁན་ཐེངས་བཞིར་བྱུང་ བ་ནས། གཅིག་ཁྲིམས་བཤེར་བྱས་ཏེ་ཁྲིམས་ཐག་ཆོད་པ་ཙམ་ལས། གཞན་གསུམ་ཁྲིམས་གཏུགས་ཀྱི་ཆ་རྐྱེན་མ་ཚང་བ་དང་། འགྲོ་ལུགས་བསྒྲུབས་མེད་པ་སོགས་ཀྱི་གནས་སྟངས་འོག་དང་ལེན་བྱས་མེད། ཕྱི་ཚེས་ ༡༦ ཉིན་འདི་གའི་གསར་འགོད་པ་ས་གནས་ཁྲིམས་ཞིབ་ལས་ཁུངས་སུ་བསྐྱོད་དེ། ཁྲིམས་ཞིབ་པ་མཚོ་སྣ་གཡུ་ཐོག་ལྷག་པ་ལགས་སུ་ལས་ཁུངས་འདིའི་སྐོར་གྱི་གནས་ཚུལ་ འགའ་བཅར་འདྲི་ཞུས་པར་ཁོང་གིས་གསུངས་དོན། ད་ལྟ་ང་ཚོ་བཙན་བྱོལ་ནང་ཡོད་སྟབས་ཆ་རྐྱེན་སོགས་ཀྱིས་འདང་གི་མ་རེད་མ་གཏོགས། ཁྲིམས་དེབ་ལྟར་ན་ས་གནས་ཁྲིམས་ཞིབ་པ་དང་བསྐོར་སྐྱོད་ཁྲིམས་ཞིབ་པ། ཆེས་མཐོའི་ཁྲིམས་ཞིབ་པ་སོགས་གསུམ་ཡོད་ནའང་། ང་ཚོའི་སྤྱི་ཚོགས་ནང་ས་གནས་ཁྲིམས་ཞིབ་པ་མ་གཏོགས་འཛུགས་ཐུབ་ཡོད་པ་མ་རེད།

༸གོང་ ས་མཆོག་གིས་ག་དུས་ཡིན་ནའང་། སྤྱིར་ས་གནས་སུ་བོད་གཞུང་གི་སྐུ་ཚབ་ས་གནས་མགོ་འཛིན་ཡོད་ནའང་། ཁག་ཅིག་གིས་ས་གནས་མགོ་འཛིན་ལ་ཁྲིམས་གཏུགས་བྱས་ཚེ་ཕྲུ་གུའི་སྐྱོབས་གསོ་དང་ སློབ་ཡོན། ཉམ་ཐག་རོགས་རམ་སོགས་གཅོད་སྲིད་པའི་ཞེད་སྣང་བྱེད་ཀྱིན་ཡོད། དེར་བརྟེན་ཁྲིམས་ཁང་ཞིག་ཡོད་ཚེ་ཁྲིམས་ཁང་དེ་འཛིན་སྐྱོང་བཀའ་ཤག་དང་། སྤྱི་འཐུས་ལྷན་ཁང་སོགས་གཅིག་ལའང་འཁྱོག་མི་དགོས་པར་ཁྲིམས་མགོ་རང་ཐོན་ཞིག་ ཡིན་སྟབས། ཉམ་ཐག་འགྲོ་ཆོག་སའི་ལམ་ཞིག་རེད་ཅེས་གསུང་གི་ཡོད་ལ། དེ་ནི་༸གོང་ས་མཆོག་གི་དགོངས་གཞི་རེད། བཅའ་ཁྲིམས་དང་ཁྲིམས་དེབ་ནང་དུའང་བཟོས་ཡོད་པ་རེད།

དེ་ བཞིན་ང་ཚོའི་སྤྱི་ཚོགས་ནང་བཟའ་མི་ཕན་ཚུན་བར་དང་གྲོང་པ་ཁྱིམ་མཚེས་བར། གྲོགས་པོ་གྲོགས་མོའི་བར་སོགས་ནམ་རྒྱུན་རྩོད་ཉོག་གཏན་ནས་མེད་པ་མིན་ནའང་།  ང་ཚོ་བོད་མི་ཚོའི་གོམས་གཤིས་སུ་ཁྲིམས་ལ་གཏུགས་ཟེར་དུས། རྣམ་རྟོག་ཟོས་ཏེ། དེ་ནི་ཐབས་སྐྱོ་བ་དང་གནས་ཚུལ་ཛ་དྲག་པོ་ཞིག་ཡིན་པའི་ངོས་འཛིན་བྱེད་པ་རེད།

བོད་ མི་ཚོས་ད་ལྟའི་བར་དུ་ཁྲིམས་གཏུགས་བྱེད་ཚུལ་དེ་རྩ་ནས་ཤེས་ཀྱི་ཡོད་པ་མ་རེད། དྲང་མོར་ཞུས་ན་བོད་པའི་སྤྱི་ཚོགས་འདི་ཆབ་སྲིད་གནས་སྟངས་ཐད་སྐྱོ་བོ་ཞེ་དྲག་ རེད། དཔེར་ན་ད་ལྟའི་བོད་མི་ཚོས་བཙན་བྱོད་གཞུང་ཟེར་དུས། དེའི་ངོ་བོ་གང་ཡིན་པ་དང་དེའི་ནང་དུ་ནང་སྲིད་ལས་ཁུངས་དང་ཤེས་རིག་ལས་ཁུངས། ཆོས་དོན་ལས་ཁུངས་སོགས་ནང་གསེས་སྡེ་ཙན་གང་དག་ཡོད་མེད་ཤེས་ཀྱི་མེད་པར། གཞུང་ཟེར་དུས་སྡེ་ཚན་གཅིག་རང་ཡིན་པར་ངོས་འཛིན་བྱེད་མཁན་ཡོད།

དེ་ མིན་ཁྲིམས་གཏུགས་བྱེད་པར་ཆ་རྐྱེན་མང་བོ་ཚང་དགོས་པ་རེད། གྲོགས་པོ་ནང་ཁུལ་དང་སྤྱི་མི། གཞིས་མགོ་སོགས་ཀྱིས་འདུམ་སྒྲིག་ཐད་བྱ་ཐབས་ཅི་ཡོད་བྱས་ཏེ། དེ་ནས་ཐག་གཅོད་མ་བྱུང་ཚེ་ཁྲིམས་གཏུགས་བྱེད་དགོས་པ་ལས། ཐད་ཀར་ཁྲིམས་གཏུགས་བྱས་ཚེ་ལེན་གི་ཡོད་པ་མ་རེད།

སྤྱིར་ ཁྲིམས་ཞིབ་ཁང་གིས་གོ་སྒྲིག་བྱས་ཏེ་མང་ཚོགས་ཁྲོད་ཟབ་སྦྱོང་མང་བོ་སྤྲད་ཡོད་ ནའང་། བོད་མིའི་གོམས་གཤིས་ནང་ཟབ་སྦྱོང་སྤྲོད་ས་དང་བཀའ་སློབ་ལམ་སྟོན་གནང་སར་ཡོང་ མཁན་དཀོན་པོ་རེད། དེ་ལས་ཕ་གི་ཞིག་ཏུ་གཞས་སྣ་འཁྲབ་སྟོན་བྱེད་ཀྱིན་འདུག རྩེད་མོ་འགྲན་བསྡུར་བྱེད་ཀྱིན་འདུག ལྷོ་མོ་འཁྲབ་ཀྱིན་འདུག་ཟེར་དུས་མང་བོ་ཞིག་འཛོམས་གི་ཡོད་པ་རེད། དེར་བརྟེན་གཞུང་ངོས་ནས་ཟབ་སྦྱོང་སྤྲད་ནའང་མང་ཚོགས་ཀྱིས་ཤེས་རྟོགས་གོང་འཕེལ་ དུ་འགྲོ་ཐུབ་ཀྱི་མེད་པ་རེད་ཅེས་ས་གནས་ཁྲིམས་ཞིབ་ཁང་དུ་ཁྲིམས་གཏུགས་བྱེད་ མཁན་ཡོང་གི་མེད་པའི་རྒྱུ་རྐྱེན་ནི་སྤྱི་ཚོགས་ཁྲོད་ཉོག་དྲ་མེད་པས་མིན་པར་ བོད་མི་ཚོའི་གོམས་གཤིས་དང་། ཤེས་ཡོན་གྱི་གནས་ཚད་དམའ་བས་ཡིན་སྐོར་གསུངས་ཡོད། དེ་བཞིན་ཁོང་ལ་མང་ཚོགས་ཁྲོད་ས་གནས་ཁྲིམས་ཞིབ་ཁང་ནི་ལས་མེད་ལས་ཁུངས་ཤིག་རེད་ ཟེར་མཁན་ཡོང་གི་ཡོད་ལ། དོན་ལའང་ནམ་རྒྱུན་ཁྲིམས་གཏུགས་བྱེད་མཁན་མེད་སྟབས། ད་ལྟའི་ཆར་ལས་མེད་ལས་ཁུངས་ཤིག་གི་ངོ་བོར་ཡོད་པ་རེད། འདིའི་ཐད་དུ་གཟིགས་སྟངས་གང་འདྲ་ཡོད་ཅེས་བཀའ་འདྲི་ཞུས་པར་ཁོང་གིས་གསུངས་དོན།
སྐད་ ཆ་དེ་བདེན་པ་རེད། ང་འདིར་མ་སླེབས་སྔོན་དུ་ངས་ཀྱང་གོ་མྱོང་། ཁྲིམས་ཞིབ་ཁང་ག་དུས་ཡིན་ནའང་སྒོ་བརྒྱབས་བརྒྱབས་པ་རེད་ཟེར་མཁན་ཡོང་གི་འདུག སྤྱིར་མང་གཙོ་ཟེར་བ་འདིའི་ནང་དུ་ག་རེ་བཤད་ནའང་འགྲིག་གི་ཡོད་པ་རེད། ཤར་ནུབ་རེད་ཟེར་བ་དང་ནུབ་ཤར་རེད་ཟེར་ནའང་ཆོག་གི་རེད། མང་གཙོ་རེད། བཤད་ཆོག་གི་མ་རེད་ཟེར་བ་ཞིག་མང་གཙོའི་ཚིག་གི་ནང་དུ་ཡོད་པ་མ་རེད། ཡིན་ནའང་། ང་ཚོའི་བོད་མི་ཚོས་གནད་འགག་དང་དགོས་དབང་དེ་རྩ་བ་ཉིད་ནས་ཤེས་རྟོགས་ཐུབ་ཀྱི་ ཡོད་པ་རེད། ཁྲིམས་ཞིབ་ཁང་སྒོ་བརྒྱབས་ཡོད་ཚེ་ཁག་ཡོད་པ་མ་རེད། ང་ཚོ་འགྲོ་ས་མི་འདུག་ཟེར་ས་ཡོད་པ་རེད། འོན་ཀྱང་ཁྲིམས་ཞིབ་ཁང་ཆུ་ཚོད་ཉེར་བཞིར་སྒོ་ཕྱེས་ཡོད་པ་ལྟ་བུ་རེད་མོད། ཁྲིམས་ཞིབ་པ་དང་ཁྲིམས་དྲུང་སྤྱི་ཚོགས་ནང་ཕར་ཁྲིམས་རྩོད་བྱེད་ས་འཚལ་དུ་འགྲོ་ གི་མ་རེད། དེ་ནི་མང་གཙོ་ཚད་ལྡན་གྱི་སྤྱི་ཚོགས་ནང་དུའང་དེ་ལྟར་རེད། ཚུར་མ་ཡོང་ན་གང་ཡང་བྱེད་ཀྱིན་ཡོད་པ་མ་རེད། གལ་སྲིད་ཁྲིམས་ལ་གཏུགས་ན་ཁྲིམས་ཞིབ་ཁང་སྒོ་འབྱེད་འབྱེད་པ་རེད། ཅེས་གསུངས་ཡོད།

འདིའི་ དཔེ་མཚོན་བཟང་ཤོས་ནི་སྦེལ་ཀོབ་ལུགས་ཟུང་བསམ་འགྲུབ་གླིང་གཞིས་གྲོང་ལྔ་བའི་ས་ཞིང་རྩོད་ཉོག་གི་ཉོག་དྲ་དེ་ཡིན་ལ། རྩོད་ཉོག་དེ་ནི་གཞིས་མགོ་སྐབས་གསུམ་རིང་ཐག་གཅོད་མ་བྱུང་བ་མ་ཟད། ད་ལྟའང་ས་གནས་མགོ་འཛིན་གྱིས་ཐག་གཅོད་ཅི་བྱས་ལ་འདོད་བློ་ཁེངས་ཀི་མེད་སྐོར་ཉེ་ཆར་བོད་ཀྱི་དུས་བབ་དྲ་ཤོག་དང་བོད་ཀྱི་བང་ཆེན་གཉིས་སུ་བཀོད་ཡོད།