༧གོང་ས་མཆོག་གི་ཆིབས་བསྒྱུར།

༧གོང་ས་མཆོག་ཨ་རི་དང་ཁེ་ན་ཌ་གཉིས་ཀྱི་ནང་ཆིབས་བསྒྱུར་གནང་སྟེ། བདུན་ཕྲག་གཉིས་རིང་མཛད་འཕྲིན་བསྐྱང་མགོ་བཙུགས་ཡོད་པ་རེད།

ཕྱི་ཚེས་ ༢༡ ཉིན་གྱི་སྔ་དྲོ་༧གོང་ས་མཆོག་བཞུགས་སྒར་ནས་ཆིབས་ཐོན་གྱིས་ཨ་རི་དང་ཁེ་ན་ཌའི་ནང་ཆིབས་བསྒྱུར་གནང་ཡོད་ལ།  ཐེངས་འདིར་༧གོང་ས་མཆོག་གིས་ཨ་རིའི་མངའ་སྡེ་མོན་ཧྥེ་སུ་ཁྲེན་ནེ་སི་  Memphis, Tennessee  རུ་ཡོད་པའི་རིག་གཞུང་བསྟི་གནས་ཁང་སྟེ་ཁཱན་ནོན་ལྟེ་གནས་  Cannon Center དུ་ཆིབས་བསྒྱུར་གནང་སྟེ། དེར་ཡོད་མི་མང་ལ་ཞི་བདེ་དང་འཆམ་མཐུན་གྱི་བརྗོད་གཞིའི་ཐོག་བཀའ་སློབ་གནང་རྒྱུ་ཡིན་འདུག་ལ།  ཕྱི་ཚེ་ ༢༥ དང་ ༢༦ ཉིན་གྲངས་གཉིས་རིང་ལོ་སེ་ཨན་རྗེ་ལི་སི་ Los Angeles  དགའ་ལྡན་ཤར་གླིང་རིག་གཞུང་བསྟི་གནས་ཀྱིས་གསོལ་འདེབས་གནང་བ་ལྟར། དེར་ཡོད་མི་དམངས་ལ་བདེན་པ་བཞི་གཙོས་པའི་སངས་རྒྱས་དང་སངས་རྒྱས་སྨན་བླའི་སྐོར་ཀྱི་བརྗོད་གཞིའི་ཐོག་གསུང་ཆོས་དང་བཀའ་སློབ་གནང་གཏན་འཁེལ་ཡོད་པ་རེད།

ཕྱི་ཚེས་ ༢༧ ནས་ ༢༩ བར་༧གོང་ས་མཆོག་ཨ་རི་ནས་ཁེ་ན་ཌའི་ནང་ཆིབས་བསྒྱུར་གནང་རྒྱུ་ཡིན་པ་དང་།  ཁེ་ན་ཌའི་ནང་འཛམ་གླིང་ཆེས་མཐོའི་མི་སྣའི་ཚོགས་འདུའི་སྟེང་ཆིབས་བསྒྱུར་གྱིས་ནོ་སྦེལ་ཞི་བདེ་གཟེངས་རྟགས་བཞེས་མཁན་གྱི་མི་སྣ་དང་ལྷན་དུ་ཇི་ལྟར་འཛམ་གླིང་མི་དམངས་ལ་ཞི་བདེའི་འདུ་ཤེས་སླེབས་པར་བྱ་རྒྱུ་དང་མ་འོངས་སྐུལ་འདེད་བྱ་དགོས་པའི་ཐད་བགྲོ་གླེང་གོ་བསྡུར་གནང་རྒྱུ་ཡིན་འདུག་ལ། ཕྱི་ཚེས་ ༣༠ ཉིན་ནས་འཆར་ཟླའི་ཚེས་ ༡ བར་གྱི་ཉིན་གཉིས་རིང་ཁེ་ན་ཌའི་ཁེལ་གྷ་རི་ University of Calgary  སློབ་ཆེན་དུ་དགེ་སློབ་མཉམ་འཛོམས་ཀྱི་བྱ་འགུལ་ཁྲོད་མཉམ་ཞུགས་གནང་འཆར་ཡོད་པ་དང་།  ཕྱི་ཚེས་ ༣   ཉིན་མོན་ཁྲི་རེལ་ཁེ་བྷེ་ཁི་ Montreal, Quebec  དུ་ཆིབས་བསྒྱུར་གནང་སྟེ། དེར་ཡོད་མི་དམངས་ལ་ནང་སེམས་ཀྱི་སློབ་གསོའི་བརྗོད་གཞིའི་ཐོག་གསུང་ཆོས་དང་བཀའ་སློབ་གནང་རྒྱུ་ཡིན་པ་རེད། ཁོང་གིས་ཐེངས་འདིའི་ཁེ་ན་ཌའི་མཛད་འཕྲིན་ལེགས་པར་གྲུབ་རྗེས་ཕྱི་ཚེས་ ༤ ཉིན་ཕྱིར་ཨ་རིའི་རྒྱལ་ས་ཝ་ཤིན་ཊོན་དུ་ཆིབས་བསྒྱུར་གནང་སྟེ་དེར་ཡོད་དད་ལྡན་པ་རྣམས་ལ་བྱང་ཆུབ་སེམས་འགྲེལ་གྱི་གསུང་ཆོས་གནང་རྒྱུ་ཡིན་འདུག་ལ། འཆར་ཟླའི་ཚེས་ ༨ ནས་ ༩ གཉིས་རིང་ཝ་ཤིན་ཊོན་དུ་ཆོས་ལུགས་དང་ཚན་རིག་གི་སྟེང་ནས་མིའི་འདུ་ཤེས་དང་འཚོ་གནས་སྐོར་ལ་བརྟག་དཔྱད་དང་ཞིབ་འཇུག་བྱས་ཏེ།  ཡིད་འཛིན་དང་དངོས་ཡོད་རྟོག་ཞིབ་རིག་པའི་ཐོག་བརྡ་འཕྲིན་མ་ལག་བསྡུ་སྒྲིག་སོགས་ཀྱི་ཐད་བགྲོ་གླེང་གོ་བསྡུར་དང་། ཕྱི་ཚེས་ ༡༠ ཉིན་བོད་ཀྱི་སྒྱུ་རྩལ་རིག་གནས་སྲུང་སྐྱོབ་ལྟེ་གནས་ཀྱི་གདན་ཞུའི་ཐོག་ཝ་ཤིན་ཊོན་དུ་ཉིན་ཕྱེད་རིང་ནང་སེམས་ཀྱི་འགྱུར་བའི་ཐོག་བཀའ་སློབ་གནང་འཆར་ཡོད་པ་རེད།