བོད་རྒྱ་འབྲེལ་མོལ་ཐེངས་བརྒྱད་པའི་སྐབས། བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་རྒྱ་གཞུང་ལ་སྤྲད་རྗེས། རྒྱ་གཞུང་གིས་མི་རིགས་ས་ཁོངས་རང་སྐྱོང་དང་གྲངས་ཉུང་མི་རིགས་ཀྱི་སྲིད་ཇུས་ལ་དོ་སྣང་། རྩ་ཁྲིམས་དང་བཅའ་ཁྲིམས་གྱི་ནང་དོན་ལ་འགྲེལ་བཤད་གསར་དུ་བཟོས་ཏེ་དྲིལ་བསྒྲགས་སྔར་ལས་ཆེ་རུ་བཏང་ཡོད་ལ། ཁྲིམས་གཞི་གསར་བ་དང་སྲོལ་ཡིག་གསར་བ་སོགས་ཀྱང་སྔ་རྗེས་སུ་བཏོན་ཡོད།
ཕྱི་ཚེས་ ༢༧ ཉིན་རྒྱ་ནག་མི་དམངས་སྤྱི་མཐུན་རྒྱལ་ཁབ། རྒྱལ་སྲིད་སྤྱི་ཁྱབ་ཁང་གཞུང་སྒྲུབ་གསར་འགྱུར་སྡེ་ཚན་ནས་ཕྱིར་བསྒྲགས་བྱས་པའི་གནས་ཚུལ་ལྟར་ན། ཟླ་འདིའི་ནང་༼ ཀྲུང་གོའི་མི་རིགས་སྲིད་ཇུས་དང་མི་རིགས་སོ་སོ་མཉམ་དུ་དར་རྒྱས་གོང་སྤེལ་གཏོང་བ། ༽ ཞེས་པའི་རྒྱབ་ཤ་དཀར་པོའི་དཔེ་དེབ་ཅིག་ཁྱབ་བསྒྲགས་བྱས་ཡོད་པ་དང་། དཔེ་དེབ་དེའི་ནང་མི་རིགས་དང་རྒྱལ་ཁབ་མཐུན་སྒྲིལ་སྐོར་དང་མི་རིགས་ནང་ཁུལ་མཐུན་སྒྲིལ། མི་རིགས་འདྲ་མཉམ། མི་རིགས་ས་ཁོངས་རང་སྐྱོང་ལམ་ལུགས་འཐུས་ཚང་དུ་གཏོང་རྒྱུ། གྲངས་ཉུང་མི་རིགས་ས་ཁུལ་གྱི་དཔལ་འབྱོར་དང་སྤྱི་ཚོགས་གོང་སྤེལ། གྲངས་ཉུང་མི་རིགས་ཀྱི་རིག་གནས་སྲུང་སྐྱོབ་དང་མི་སྣ་སྐྱེད་སྲིང་བྱ་རྒྱུ་བཅས་ཀྱི་སྐོར་ཡིན་འདུག
དཔེ་དེབ་དེའི་དཀར་ཆག་ནང་བཀོད་དོན། དང་པོ། གཅིག་གྱུར་ཡིན་པའི་མི་རིགས་མང་པོའི་རྒྱལ་ཁབ་དང་ཀྲུང་ཧྭ་མི་རིགས་ཀྱི་ཉེར་ལེན་གྱི་རྒྱུ་གཉིས་གཞི་གཅིག་ཏུ་གྲུབ་པ། གཉིས་པ། མི་རིགས་ཡོངས་རྫོགས་འདྲ་མཉམ་ཡིན་པའི་རྩ་དོན་རྒྱུན་འཁྱོངས་བྱེད་པ། གསུམ། རྒྱལ་ཡོངས་ཀྱི་རིགས་སོ་སོའི་མི་དམངས་ཀྱི་མཐུན་སྒྲིལ་ཆེན་པོ་སྲ་བརྟན་དང་གོང་དུ་སྤེལ་བ། བཞི། མི་རིགས་ས་ཁོངས་ཀྱི་རང་སྐྱོང་ལམ་ལུགས་རྒྱུན་འཁྱོངས་དང་འཐུས་ཚང་དུ་གཏོང་བ། ལྔ། མི་རིགས་གྲངས་ཉུང་དང་མི་རིགས་ས་ཁུལ་གྱི་དཔལ་འབྱོར་དང་སྤྱི་ཚོགས་གོང་དུ་སྤེལ་བའི་ལས་དོན་ཇེ་མགྱོགས་སུ་གཏོང་བ། དྲུག མི་རིགས་གྲངས་ཉུང་གི་རིག་གནས་སྲུང་སྐྱོབ་དང་གོང་དུ་སྤེལ་བ། བདུན། མི་རིགས་གྲངས་ཉུང་གི་ལས་བྱེད་པ་དང་འཇོན་མིའི་རུ་ཁག་འཛུགས་སྐྲུན་བྱེད་པར་ཤུགས་རྒྱག་པ་བཅས་ཡིན་འདུག
ཕྱི་ཚེས་ ༢༧ ཉིན་རྒྱ་ནག་རྒྱལ་སྲིད་སྤྱི་ཁྱབ་ཁང་གཞུང་སྒྲུབ་གསར་འགྱུར་སྡེ་ཚན་གྱིས་གསར་འགོད་ལྷན་ཚོགས་བསྐངས་ཏེ། རྒྱལ་ཁབ་མི་རིགས་དོན་གཅོད་ཁང་གི་འགན་འཛིན་དབྱང་ཅཱེན་གྱིས་ཀྲུང་གོའི་མི་རིགས་སྲིད་ཇུས་ཀྱི་ཁྱད་ཆོས་ལྔ་ཟེར་བའི་བསྒྲགས་གཏམ་ཞིག་སྤེལ་ཡོད། སྐབས་དེར་ཁོས་བརྗོད་དོན། ཀྲུང་གོའི་མི་རིགས་སྲིད་ཇུས་ལ་ཁྱད་ཆོས་གསལ་བོ་ཡོད། དང་པོ། མ་ལག་ཆ་འགྲིག་འཐུས་ཚང་ཡོད། ཀྲུང་གོའི་སྲིད་གཞུང་གིས་ཐོག་མཐའ་བར་གསུམ་དུ་འཐབ་ཇུས་དང་ཁྱོན་ཡོངས་ཀྱི་ཚད་མཐོ་ནས་མི་རིགས་གནད་དོན་ལ་ཞིབ་འཇུག་དང་མི་རིགས་སྲིད་ཇུས་གཏན་འབེབས་བྱས་ཏེ། ཀྲུང་དབྱང་སྲིད་གཞུང་དང་ས་གནས་སྲིད་གཞུང་། སྲིད་གཞུང་སྡེ་ཁག་བཅས་ཀྱིས་མི་རིགས་སྲིད་ཇུས་གཏན་འབེབས་བྱ་རྒྱུའི་མ་ལག་ཆ་འགྲིག་འཐུས་ཚང་གྲུབ་ཡོད། གཉིས་པ། དངོས་ཐོག་བདེན་འཚོལ། དོན་དངོས་དང་བསྟུན་ཏེ་མི་རིགས་སྲིད་ཇུས་གཏན་འབེབས་བྱ་རྒྱུ་མཐའ་འཁྱོངས་བྱས་ཏེ། རྒྱལ་ཁབ་ཀྱི་གནས་ཚུལ་དངོས་དང་མི་རིགས་འཕེལ་རྒྱས་འགྲོ་བའི་ཆོས་ཉིད་དང་མཐུན་པར་བྱས་ཏེ། མི་རིགས་ཁག་གི་ཐུན་མོང་གི་རེ་འདུན་མཚོན་པར་བྱས་ཡོད།
གསུམ་པ། དུས་བསྟུན་མཉམ་བསྐྱོད་ལག་ལེན་བྱེད་བཞིན་དུ་མི་རིགས་སྲིད་ཇུས་འཕེལ་རྒྱས་དང་འཐུས་སྒོ་ཇེ་ཚང་དུ་གཏོང་རྒྱུ་གཙིགས་ཆེན་དང་ཐོག་མཐའ་བར་གསུམ་དུ་གཅིག་རྒྱུན་གཅིག་འཛིན་བྱེད་པ་མ་ཟད། རྒྱུན་མི་ཆད་པར་དུས་རབས་ཀྱི་འགྱུར་ལྡོག་གསར་པ་དང་མཐུན་པར་མི་དམངས་བློ་འཐད་ཡིད་ཚིམ་བྱེད་ཀྱིན་ཡོད། བཞི་པ། ངེས་པར་དུ་ཕྱོགས་ཡོངས་ནས་མི་རིགས་སྲིད་ཇུས་དོན་འཁྱོལ་མཐར་ཕྱིན་བྱ་རྒྱུ་ནན་བཤད་བྱས་ཏེ། དྲིལ་བསྒྲགས་དང་སློབ་གསོ་ཤུགས་ཆེ་རུ་གཏོང་བ་དང་། ལྟ་སྐུལ་དང་ཞིབ་བཤེར་ཤུགས་ཆེ་རུ་གཏོང་བ་སོགས་ཀྱི་ཐབས་ལམ་སྤྱད་དེ། མི་རིགས་སྲིད་ཇུས་དོན་འཁྱོལ་ཡོང་བར་ཁག་ཐེག་བྱས་ཡོད། ལྔ་བ། ཀྲུང་གོའི་ཁྱད་ཆོས་ལྡན་པ། ཀྲུང་གོའི་གནས་ཚུལ་དངོས་དང་བསྟུན་ཏེ་ལོ་རྒྱུས་ཀྱི་ཉམས་མྱོང་བསྡུ་ལེན་བྱེད་པར་དོ་སྣང་དང་། མི་རིགས་ཀྱི་སྤྱི་ཚོགས་དཔལ་ཡོན་དར་རྒྱས་སུ་ཕན་པ། ཐུན་མོང་ལ་དབང་བའི་བསམ་པའི་རྒྱུ་ནོར་ཐམས་ཆད་དཔྱད་གཞིའི་མེ་ལོང་དུ་བཟུང་སྟེ། ཀྲུང་གོའི་མི་རིགས་སྲིད་ཇུས་འདིས་མིའི་རིགས་ཡར་རྒྱས་གཏོང་བའི་ཐུན་མོང་གི་འདོད་འདུན་སྔར་ལས་ལེགས་པར་མཚོན་ཐུབ་པར་བྱས་ཡོད། ཅེས་བརྗོད་ཡོད་འདུག
དེར་མུ་མཐུད་བཀོད་པ་ལྟར་ན། རྒྱ་ནག་རྒྱལ་སྲིད་སྤྱི་ཁྱབ་ཁང་གི་གཙོ་སྒྲུབ་འོག ཀྲུང་གོ་གསར་བ་དབུ་བརྙས་ཏེ་ལོ་ངོ་ ༦༠ འཁོར་བའི་མཛད་སྒོ་དང་བསྟུན་ཏེ། མི་རིགས་མཐུན་སྒྲིལ་དང་ཡར་ཐོན་གཟེངས་བསྟོད་ཚོགས་ཆེན་ཐེངས་ལྔ་བ་ཟེར་བ་དེ་འཚོགས་རྒྱུ་ཡིན་སྐོར་དང་། སྤྱི་ལོ་ ༡༩༤༧ ལོའི་ཟླ་ ༥ ཚེས་ ༡ ཉིན་ནང་སོག་རང་སྐྱོང་ལྗོངས་གསར་དུ་བཙུགས་པ་དེ་ནི། ཀྲུང་གོའི་ཞིང་ཆེན་རིམ་པའི་གྲངས་ཉུང་མི་རིགས་རང་སྐྱོང་ལྗོངས་དང་པོ་དེ་ཆགས་ཡོད་པ། སྤྱི་ལོ་ ༡༠༤༩ ལོར་ཀྲུང་གོ་གསར་བ་དབུ་བརྙས་རྗེས་ཡི་གུར་རང་སྐྱོང་ལྗོངས་དང་། ཉིང་ཞཱ་ཧེ་རིགས། ཀུང་ཞིས་ཀྲོང་རིགས། བོད་རང་སྐྱོང་ལྗོངས་སོགས་རིམ་པ་བཞིན་བཙུགས་པ། མི་རིགས་ས་ཁོངས་རང་སྐྱོང་དེ་རྩ་ཁྲིམས་ཀྱི་ཆ་རྐྱེན་འོག་བཙུགས་སྐོར་བཅས་བཀོད་འདུག
དེ་རིང་ནི་རྒྱ་དམར་པོ་ཚང་གི་”རྒྱལ་བཙུགས་”དུས་ཆེན་རེད། ལྷ་ས་དང་མཚོ་སྔོན་སི་ཁྲོན། ཀྲུང་དབྱང་སོགས་རྒྱ་དམར་གྱི་སྟངས་འཛིན་འོག་ཏུ་ཡོད་པའི་ཚགས་ཤོག་དང་རླུང་འཕྲིན། བརྙན་འཕྲིན་སོགས་གསར་འགྱུར་བརྒྱུད་ལམ་གང་སར་གོང་གི་དུས་ཆེན་འདི་སྲུང་གཙིའི་མཛད་སྒོ་ཟབ་རྒྱས་ངང་འཚོགས་བཞིན་པའི་རྣམ་པ་མཐོང་ཐུབ་ཀི་འདུག གཞིས་ལུས་སྤུན་ཟླ་ཚོར་ཡང་བཙན་སྐུལ་གྱིས་རྣམ་པ་འདྲ་མིན་ཐོག་དུས་ཆེན་འདི་སྲུང་གཙི་བྱེད་དུ་འཇུག་གི་ཡོད། འོན་ང་ཚོ་སྟེ་”བཙན་བྱོལ་གཞུང་”ཚང་ནི་ཁ་ཁུ་སིམ་པོར་བཞུགས་འདུགས་ལ། ད་ནངས་ཞོགས་པར་བུད་མེད་ལྷན་ཚོགས་ཀྱི་ཚོགས་མི་འགའ་ཁ་བརྡའི་ཅ་ཅོ་འདྲ་མིན་སྒྲོག་བཞིན་གཙུག་ལག་ཁང་གི་ཕྱོགས་སུ་ཕེབས་སོང་། ཕལ་ཆེ་མར་མེ་ཁྲོམ་སྐོར་”གཞི་རྒྱ་ཆེ་བ་”ཞིག་གནང་རྩིས་ཡིན་ནམ་ཅི། ད་དུང་ངའི་བསམ་ཚུལ་ཞིག་ལ། དྲ་ཐོག་གི་ཟིན་བྲིས་པ་ཚོས་འདིའི་ཕྱོགས་ལའང་རྩོམ་ཐུང་རེ་ཨེ་ཕྲིས་བལྟས་ན་བཟང་གི་སྙམ། ང་ནི་ཆབ་སྲིད་ཟེར་ན་ཅི་ཡིན་ཡང་མི་ཤེས་མཁན་གྱི་བླུན་རྒན་ཞིག་ཡིན། དེ་བས་དྲ་གྲོགས་ཚོར་རེ་སྐུལ་ལྟ་བུ་བྱས་པ་ཡིན་ལགས། “རྣོ་ངར་རལ་གྲིའི་སོ་ཁ་ཕྱི་ལ་སྐོརད།།”ཅེས་པ་འདི་སྐུ་ཞབས་ཧོར་གཙང་འཇིགས་མེད་ལགས་ཀྱི་(སྤངས་འོས་པའི་གཤིས་ལ)ཞེས་སྙན་ངག་དེའི་ནང་གི་ཚིག་ཅིག་རེད། ང་ཚིག་འདི་ལ་ཧ་ཅང་དགའ། འོན་ཀྱང་ངའི་རལ་གྲི་ལ་རྣོ་མེད་ཀི དེ་བས་ཕྱི་ལ་བསྐོར་ཀྱང་ཅང་སོད་རྒྱུ་མ་རེད། ཧ་ཧ་ཧ ཡང་ཉོག་གཏམ་བཤད་འགོ་བཙུགས་སོང་། དགོངས་པ་མ་ཚོམས་ལོ།