རང་སྐྱོང་གི་དམིགས་ཡུལ་ལ་སེམས་འཚབ་ཡོང་གི་འདུག

གལ་སྲིད་མ་འོངས་པར་བོད་ལ་རང་སྐྱོང་ཙམ་རག་སྲིད་ཀྱང་། རྒྱ་གཞུང་ལ་ཡིད་ཆེས་བློ་གཏད་བྱེད་ས་ཉན་གི་མ་རེད། ཧོང་ཀོང་ནི་དཔེ་མཚོན་གསལ་ཤོས་རེད། སྔོན་མ་རྒྱ་ནག་གིས་ཁས་ལེན་དམ་བཅའ་མང་པོ་བྱས་ཡོད། རྗེས་སུ་རིམ་གྱིས་ཁ་དན་ལ་མ་གནས་སྟབས། ཧོང་ཀོང་མི་དམངས་ཀྱི་འདོད་པ་ལྟར་སྒྲུབ་ན་རྒྱ་གཞུང་ལ་མ་འགྲིག རྒྱ་གཞུང་གི་འདོད་བློ་ལྟར་སྒྲུབ་ན་ཧོང་ཀོང་མི་དམངས་ལ་མ་འགྲིག་པ་ཆགས་ཏེ། མཐར་ཧོང་ཀོང་གི་ཆེས་མཐོའི་འཛིན་སྐྱོང་བས་དགོངས་པ་ཞུ་དགོས་པ་ཆགས་སོང་ཟེར།

ཉེ་ཆར་དབུས་སྣེ་ལེན་ཁང་ལ་གསར་དུ་འབྱོར་བའི་ཨ་མདོ་རྔ་པ་གཉན་རྩེ་དགོན་པའི་དགེ་འདུན་པ་བློ་བཟང་ཤེས་རབ་ལགས་ཀྱིས་ཕྱི་ཚེས་ ༥ ཉིན་འདི་གའི་གསར་འགོད་པར་ཁོའི་ཁྱིམ་རྒྱུད་ཀྱི་ཡ་ང་བའི་ལོ་རྒྱུས་དང་འབྲེལ་ཏེ། སྔར་ལོའི་ཞི་རྒོལ་གྱི་སྔ་ཕྱིའི་གནས་ཚུལ་ཁག་ཅིག་ངོ་སྤྲོད་གནང་དོན། སྔོན་མ་སྤྱི་ལོ་ ༡༩༣༧ ཡས་མས་ཤིག་ལ་དམར་དམག་རྒྱང་སྐྱོད་ཀྱིས་ངའི་ཞང་བོ་བ་ཁོ་ཟེར་བ་དེ་བསད་སོང་ལ། དེའི་རྗེས་ཁོའི་བུ་བ་སྐར་གྱི་ཀླད་པ་གཏོར་ཏེ་དབང་བོ་སྐྱོན་ཅན་བཟོས་སོང་། སྐབས་དེར་རྒྱ་དམག་གིས་བཙན་འཛུལ་བྱས་ཏེ་སྔ་ལོ་ཕྱི་ལོ་ཐེངས་གཉིས་ལ་ང་ཚོའི་ས་ཆའི་ཡུལ་མི་ཚང་མ་རྨ་ཆུའི་ཝ་གཡོན་ལ་བྲོས་བྱོལ་དུ་ཕྱིན་པ་རེད། སྤྱི་ལོ་ ༡༩༥༨ ལོར་རྒྱ་དམག་ཐོག་མར་སླེབས་སྐབས་འགོག་རྒོལ་བྱས་ཏེ་ངའི་ཞང་བོ་ཨ་ཁོ་ཟེར་བ་དེ་བསད་སོང་། དེའི་རྗེས་རྔ་བ་སྒོ་མང་སྒར་གྱི་ངེད་ཚང་གི་གྲྭ་པ་འཕྲིན་ལས་རྒྱ་མཚོ་འཛིན་བཟུང་བྱས་ཏེ་མི་དམངས་ཁྲིམས་ཁང་ནས་ལྟོག་ཤི་ཐེབས་སོང་། ཅེས་དང་།

ང་རང་གི་སྤུན་ཚང་མ་མི་དམངས་ཁྲིམས་ཁང་ལ་སོང་སྟེ་དཀའ་སྡུག་མ་མྱངས་པ་གཅིག་ཀྱང་མེད། ངའི་ཨ་ཁུ་ཁྲིམས་ཁང་ནས་གཤེགས་སོང་ལ། གྲྭ་པ་གཞན་ཞིག་སྐབས་དེར་རྒྱ་གར་ལ་འབྲོ་གྲབས་སྐབས་རྒྱ་ལག་ཏུ་ཤོར་ཏེ། ཁྲིམས་ཁང་གི་འཐབ་རྩོད་འོག ཤ་ཟད་རུས་ཐུག རུས་ཟད་རྐང་ལ་ཐུག་མཐར་གྲོངས་སོང་། འདི་དག་ཡོངས་རྫོགས་ཁྱིམ་ཚང་གཅིག་གི་གོད་ཆག་རེད། གོད་ཆག་དེ་འདྲ་ངེད་ཚང་གཅིག་པུ་མ་རེད། བོད་མི་ཕལ་ཆེ་བའི་མགོར་ཡོང་ཡོད་ལ། བོད་ཙམ་དུ་མ་ཟད་མི་རིགས་གཞན་དང་། རྒྱ་མི་རིགས་ཚོས་ཀྱང་མྱངས་ཡོད་པ་རེད། འདི་དག་ཡོད་ཚད་དྲང་བཞག་གིས་བཤད་ས་ཞིག་དང་། ཉན་མཁན་ཞིག་ཡོད་ན་བདག་པོ་རྒྱག་ཚད་རེད། འཛམ་གླིང་མི་དམངས་དང་རྒྱ་རིགས་མི་དམངས། ལྷག་པར་དུ་མི་རབས་རྗེས་མ་ཚོས་ཤེས་དགོས་པ་ཞིག་རེད་སྙམ། ཞེས་བརྗོད་སོང་།

ཡང་ཁོང་གིས་སྔར་ལོའི་ཞི་རྒོལ་དང་འབྲེལ་བའི་གནས་ཚུལ་བརྗོད་དོན། སྔར་ལོའི་ཟླ་ ༩ བར་རྔ་པ་སྒོ་མང་སྒར་གྱི་ཕྱི་ནང་གསང་གསུམ་དམག་གིས་བསྐོར་ཅིང་། གྲྭ་ཤག་ཡོངས་རྫོགས་སྔོག་བཤེར་བྱས་ཏེ་དངུལ་དང་བཅའ་དངོས་མང་པོ་རྐུ་འཁྱེར་བྱས་ཡོད། སྐབས་དེར་ངེད་ཚང་གི་ལེགས་ཚོགས་ཞུ་བའི་གྲྭ་པ་བགྲེས་པོ་དགུང་ལོ་ ༧༥ ཅན་ཞིག་འབྲོག་ཁྱིམ་ལ་ཕྱིན་ཏེ་ཕྱིར་ཡོང་བའི་ལམ་ཁར་རྒྱ་དམག་གིས་འཇུས་ཏེ་ཉེས་རྡུང་ཚབས་ཆེན་བཏང་ཞིང་། ཕྱི་ཉིན་ཡང་དམག་སྒར་དུ་ཡོང་དགོས་པའི་བཀའ་བཏང་ཡོད་སྟབས། ཁོང་གྲྭ་ཤག་ཏུ་ལོག་སྟེ་བན་ཕྲུག་ཅིག་ཡོད་པ་དེ་སྤུན་ཉེ་སར་མངགས་རྗེས་རང་ཤི་བརྒྱབས་པ་རེད། སྐབས་དེར་ནང་མི་ཚོ་རྫོང་སྲིད་གཞུང་དང་རྫོང་ཉེན་རྟོག་ལས་ཁུངས་ལ་བཅར་ཏེ། གྲྭ་པ་བགྲེས་སོང་ཞིག་ལ་དེ་འདྲའི་ཉེས་རྡུང་མནར་གཅོད་གཏོང་དོན་ཅི་ཡིན་དང་། ནག་ཉེས་གང་ཡོད་བརྩད་གཅོད་བྱས་སྐབས། ང་ཚོར་ཐེངས་འདིའི་གནད་དོན་ལ་འབྲེལ་བ་གང་ཡང་མེད། གོང་རིམ་རྒྱལ་སྲིད་སྤྱི་ཁྱབ་ཁང་གི་གོ་སྒྲིག་འོག དམག་ཁུལ་ཁང་གིས་ལག་བསྟར་བྱས་པའི་བྱ་འགུལ་ཞིག་རེད་ཟེར་ནས་རྫོང་སྲིད་གཞུང་དང་སྤྱི་བདེ་ཉེན་རྟོག་ཚན་པས་ཡ་ལན་སྤྲད་མེད། ཅེས་ཧ་ཅང་བློ་ཕམ་དང་ཡིད་ཆད་ཀྱིས་བརྗོད་སོང་།

སྐབས་དེར་གསར་འགོད་པས་ཁོང་ལ་ཐེངས་འདིར་བཙན་བྱོལ་དུ་ཡོང་བའི་སྐོར་གླེང་མོལ་བྱས་པར་ཁོས་བརྗོད་དོན། ༢༠༠༧ ལོར་༧རྒྱལ་དབང་རིན་པོ་ཆེ་དགུང་གྲངས་ ༧༣ བཞེས་པའི་རང་ལོར་འཁེལ་ཡོད་སྟབས། ཞབས་བརྟན་ཞིག་གི་ཚུལ་དུ་ལོ་དེའི་བོད་ཟླ་ ༡༠ ཚེས་ ༨ ཉིན་སྲིང་མོ་གསུམ་དང་ཚ་བོ་གཅིག་བཅས་ང་ཚོ་མི་བཞི་ཕ་ཡུལ་ནས་རྐང་པ་བརྒྱབས་ཏེ། ལྷོ་ཁ་བརྒྱུད་ལྷ་སར་མཇལ་སྐོར་དུ་ཕྱིན་པ་ཡིན། སྲིང་མོ་གཅིག་ལོ་བདུན་ཅུར་སླེབས་ཡོད་སྟབས་ལམ་བར་ནས་གང་འཚམ་འགོར་སོང་། སྐབས་དེར་ལྷ་སའི་མགྲོན་ཁང་དང་ཟ་ཁང་། ཐ་ན་སྲིང་བར་དང་དགོན་མཐའ་ཚང་མ་ཨ་མདོའི་མཇལ་སྐོར་བས་ཁེངས་འདུག ལོ་དེ་ལྟ་བུའི་ཨ་མདོའི་མཇལ་སྐོར་བ་མང་པོ་ཞིག་སྔར་མཐོང་མ་མྱོང་། ཞེས་དབུས་པ་ཚོས་བཤད་ཀྱིན་འདུག དེ་དག་ཚང་མས་༧རྒྱལ་དབང་རིན་པོ་ཆེའི་ལོ་སྐེགས་ཀྱི་ཞབས་བརྟན་ལ་དམིགས་ཏེ་ཡོང་བ་ཤ་སྟག་རེད། སྐབས་དེར་ང་ཚོས་ཟླ་གཅིག་ལྷག་ལ་ལྷོ་བྲག མཁར་ཆུ་སོགས་ཀྱི་རི་ཁྲོད་ཁག་ནས་བསྙེན་མཚམས་རེར་བསྡད་ཅིང་། གཙང་། ས་སྐྱ། བསམ་ཡས་བཅས་སུ་མཇལ་སྐོར་རེ་བྱས་པ་ཡིན།

ཕྱིར་ལྷ་སར་འབྱོར་བའི་ཉིན་མོ་དེ་ནི་སྤྱི་ཟླ་ ༣ ཚེས་ ༡༤ ལ་འཁེལ་འདུག མི་གསོད་ཁྲག་སྦྱོར་གྱི་དོན་རྐྱེན་ཆེན་པོ་བྱུང་འདུག་ལ། ལྷ་ས་གྲོང་ཁྱེར་ཧྲིལ་བོ་དམག་གིས་མནན་འདུག ང་ཚོའི་རོགས་པ་ཞིག་གིས་ས་གཅིག་ན་མི་དྲུག་བསད་ཡོད་པ་མཐོང་སོང་ཟེར། ཚེས་ ༡༨ ཉིན་གང་མགྱོགས་ཕྱིར་ཕ་ཡུལ་དུ་ལོག་རྒྱུར་གྲྭ་སྒྲིག་བྱས་པ་ཡིན། སྐབས་དེར་གེ་སར་མགྲོན་ཁང་དང་མེ་འཁོར་འབབ་ཚིགས་བར་དམག་མིའི་ཞིབ་བཤེར་ཉི་ཤུ་ལྷག་འདུག ལམ་བར་དུ་ཕོན་ཆེ་བའི་དམག་མི་དང་དྲག་ཆས་མཚོན་ཆ། ལྕགས་ཁྲབ་འཁོར་ལོ་སོགས་ལྟ་མི་བཟོད་པ་ཞིག་རེད། སྤྱིར་སྐབས་དེར་ང་རང་ལྷ་སའི་རི་ཁྲོད་ཅིག་ནས་སྡོད་རྩིས་ཡོད་ཀྱང་། རྙོག་ཟིང་དེའི་དབང་གིས་ཕྱིར་ཕ་ཡུལ་དུ་མི་ལོག་ཀ་མེད་བྱུང་སོང་། ༢༠༠༨ ལོའི་ཟླ་ ༩ ཙམ་ལ་ང་རང་བསྐྱར་དུ་ལྷ་སར་ཡོང་བ་ཡིན། བསམ་ཡས་མཆིམས་ཕུ་ནས་ཟླ་དགུ་ཙམ་བསྡད་པ་ཡིན། དེར་སྒོམ་སྒྲུབ་པ་ ༣༠༠ ཡས་མས་འདུག་ལ། གནས་དབེན་པ་ཁོར་ཡུག་ཧ་ཅང་སྐྱིད་པོ་ཞིག་རེད། དེ་ནས་འབྲུག་ཡུལ་དུ་ཡོང་སྟེ་ཟླ་གཅིག་ལྷག་བསྡད་རྗེས་རྒྱ་གར་ལ་ཡོང་བ་ཡིན། ཞེས་བརྗོད་སོང་།

ཡང་ཁོང་ལ་བོད་དོན་འཐབ་རྩོད་བྱེད་ཕྱོགས་ཐད་དགོངས་ཚུལ་གང་ཡོད་དྲིས་པར། དམངས་གཙོའི་སྲིད་ཇུས་འདི་ཧ་ཅང་ཡག་པོ་རེད་དྲན་ཡོད། འོན་ཀྱང་། ང་ཚོའི་དམིགས་ཡུལ་རང་སྐྱོང་ཡིན་པར་སེམས་འཚབ་ཅིག་ཡོང་གིན་འདུག སྤྱིར་རྒྱ་གཞུང་གིས་ཀྱང་། ང་ཚོ་ནི་མི་མང་དམངས་གཙོའི་རྒྱལ་ཁབ་ཅིག་ཡིན། ཞེས་སྒྲོག་གིན་ཡོད་མོད། ཁ་ནས་བཤད་པ་དང་ལག་ནས་སྒྲུབ་པ་འགལ་བ་ཡིན། ནམ་ཞིག་ཉེན་ཁར་ཐུག་གི་རེད། རྒྱལ་རབས་ལོ་རྒྱུས་གང་ལ་བལྟས་ཀྱང་། དམངས་ཀྱི་རེ་འདོད་མི་བསྒྲུབ་པའི་གཞུང་དེ་རྒྱུན་རིང་གནས་ཐབས་མེད། གཞུང་གི་སྲིད་ཇུས་མང་ཚོགས་ཀྱི་རེ་འདུན་ལ་བསྟུན་དགོས་ལ། མང་ཚོགས་ཀྱི་ཁེ་ཕན་གཞུང་གི་ལག་ལེན་ལ་བསྟུན་དགོས། རྔ་པ་ཁུལ་དུ་དེ་ལྟ་བུའི་ཞི་རྒོལ་ཚབས་ཆེན་ཞིག་བྱུང་དོན་ཡང་། གཉའ་གནོན་དང་བརྙས་བཅོས་རྒྱུན་རིང་མྱངས་པའི་བཟོད་པའི་མཐའ་ཟད་སོང་བ་རེད། ཐོག་མ་ཞི་བ་ཁོ་ན་ཡིན་རུང་རིམ་གྱིས་སེམས་ཁུང་གི་ཞེ་སྡང་དང་སྡུག་བསྔལ་གནོན་མ་ཐུབ་པར་དྲག་པོའི་ངོ་བོར་གྱུར་སོང་། དེ་ལ་སྦེད་གསང་བྱ་རྒྱུ་ཡོད་པ་མ་རེད། ཕ་མ་སྤུན་ཟླ། ཕུ་ནུ་མིང་སྲིང་དེ་ཙམ་ཞིག་དམར་གསོད་བཏང་ཟིན་པ་རེད། མ་འོངས་པར་རྐྱེན་དང་འཕྲད་ན་སྔར་བས་ཉེན་ཁ་ཆེན་པོ་ཆགས་གི་རེད་སྙམ།

༧རྒྱལ་དབང་རིན་པོ་ཆེ་མཆོག་གིས་ཀྱང་བོད་རང་བཙན་བཞག་སྟེ། རང་སྐྱོང་བརྩོན་ལེན་བྱེད་ཀྱིན་ཡོད་ཀྱང་། བོད་ནང་གི་བོད་མི་རྒན་དར་གཞོན་གསུམ་ཚང་མའི་སེམས་ནང་བོད་དེ་རྒྱལ་ཁབ་རང་བཙན་པ་ཞིག་དང་། རྒྱལ་བོ་རང་མགོ་མ་ཞིག་ཡིན་པའི་འདུ་ཤེས་བརྟན་པོ་ཡོད། གལ་སྲིད་མ་འོངས་པར་བོད་ལ་རང་སྐྱོང་ཙམ་རག་སྲིད་ཀྱང་། རྒྱ་གཞུང་ལ་ཡིད་ཆེས་བློ་གཏད་བྱེད་ས་ཉན་གི་མ་རེད། ཧོང་ཀོང་ནི་དཔེ་མཚོན་གསལ་ཤོས་རེད། སྔོན་མ་རྒྱ་ནག་གིས་ཁས་ལེན་དམ་བཅའ་མང་པོ་བྱས་ཡོད། རྗེས་སུ་རིམ་གྱིས་ཁ་དན་ལ་མ་གནས་སྟབས། ཧོང་ཀོང་མི་དམངས་ཀྱི་འདོད་པ་ལྟར་སྒྲུབ་ན་རྒྱ་གཞུང་ལ་མ་འགྲིག རྒྱ་གཞུང་གི་འདོད་བློ་ལྟར་སྒྲུབ་ན་ཧོང་ཀོང་མི་དམངས་ལ་མ་འགྲིག་པ་ཆགས་ཏེ། མཐར་ཧོང་ཀོང་གི་ཆེས་མཐོའི་འཛིན་སྐྱོང་བས་དགོངས་པ་ཞུ་དགོས་པ་ཆགས་ཡོད། ཅེས་བརྗོད་སོང་།