སྤྱི་ལོ་ ༢༠༠༩ ཟླ་ ༡༠ ཚེས་ ༡༣ ཉིན་གདན་ས་བཀྲ་ཤིས་ལྷུན་པོའི་སྔགས་ཆེན་ཞལ་སྔ་ནས་རྗེ་བཙུན་བློ་བཟང་ཆོས་གྲགས་དཔལ་བཟང་པོ་མཆོག་བོད་ཀྱི་རྒྱལ་ས་ལྷ་སར་དགོངས་པ་ཞི་དབྱིངས་སུ་ཐིམས་འདུག
སྔགས་ཆེན་ཞལ་སྔ་ནས་མཆོག་ནི། གཞིས་རྩེ་གྲོང་ཁྱེར་དང་ཁད་ཉེ་བའི་ལྷོ་ཕྱོགས་ལྕགས་ཞེས་པའི་ལུང་པར་སྐུ་འཁྲུངས་ཤིང་། མཚན་ལ་སྤེན་པ་ཞེས་ཞུ། སྐུ་ན་ཆུང་དུས་ནས་གདན་ས་བཀྲ་ཤིས་ལྷུན་པོར་རབ་ཏུ་བྱུང་ཞིང་ཚད་ལྡན་དགེ་བའི་བཤེས་གཉེན་དུ་མ་བསྟེན་ནས་ཐོས་བསམ་དཔྱིས་ཕྱིན་པར་མཛད་དེ་མཁས་པའི་གྲགས་པ་ཐོབ། དམངས་གཙོའི་བཅོས་བསྒྱུར་དང་རིག་གསར་སྐབས་སྐུ་ངལ་ཚད་མེད་བྱུང་ཞིང་ལྷག་པར་རིག་གསར་སྐབས་བཙོན་དུ་བཅུག་དགོས་བྱུང་།
སྤྱི་ལོ་ ༡༩༨༥ ལོར་༧པཎ་ཆེན་སྐུ་ཕྲེང་བཅུ་བ་ཆེན་པོ་མཆོག་ནས་སྔགས་ཆེན་དུ་བསྐོ་བཞག་གནང་བ་ནས་གདན་སའི་བཤད་སྒྲུབ་ཀྱི་ཁུར་ལོ་མང་བཞེས་ཤིང་། དགེ་ལྡན་བསྟན་པའི་བདག་པོའི་སྐུར་བཞེངས་ནས་རིས་མེད་དད་ལྡན་སྐྱེ་བོ་རྣམས་ལ་ཟབ་རྒྱས་ཆོས་ཀྱི་འཁོར་ལོ་རྒྱུན་ཆད་མེད་པར་བསྐོར། ༧པཎ་ཆེན་སྐུ་ཕྲེང་བཅུ་བ་ཞིང་ལ་ཕེབས་རྗེས་ཡང་སྲིད་རྩད་གཅོད་ཚོགས་ཆུང་གི་ཚོགས་མིའི་གྲས་ཡིན་པ་དང་། སྤྱི་ལོ་ ༡༩༩༥ ལོར་པཎ་ཆེན་རིན་པོ་ཆེའི་ཡང་སྲིད་ཀྱི་དོན་རྐྱེན་སྐབས་དགེ་འདུན་ཆོས་ཀྱི་ཉི་མ་༧པཎ་ཆེན་རིན་པོ་ཆེའི་ཡང་སྲིད་ཡིན་པའི་སྒྲུབ་བྱེད་མཐར་བཀག་གནང་རྐྱེན། རྒྱ་གཞུང་གིས་སྔགས་པ་གྲྭ་ཚང་གི་ཁྲི་ཐོག་ནས་ཕུད་དེ་གཞིས་རྩེར་བཀག་ཉར་བྱས། གཞིས་རྩེའི་སེར་སྐྱ་མི་མང་གིས་གསང་བའི་ཐོག་གསུང་ཆོས་དང་བཀའ་སློབ་ཞུ་བ་སོགས་ལ་བརྟེན། གཞིས་རྩེར་ཡང་བཞུགས་མ་བཅུག་པར་ལྷ་སར་གདན་དྲངས་ཏེ་ར་མོ་ཆེར་བཞུགས་ནས། སྔར་བཞིན་བསྟན་པའི་བྱ་བ་རྒྱ་ཆེར་མཛད་དེ་ལྷ་ས་ཁུལ་དུ་གསུང་ཆོས་གནང་མཁན་མེད་པའི་སྟོང་ཆ་ཁ་གསབ་མཛད།
སྤྱི་ལོ་ ༢༠༠༩ ལོ་མགོར་རང་གི་གདན་སར་ཐེངས་གཅིག་ཕེབས་བཅུག སྐུ་གཤེགས་སྐབས་དགུང་གྲངས་བརྒྱད་ཅུ་ལྷག་ཙམ་ལ་ཕེབས་ཡོད་པ་རེད། སྔགས་ཆེན་ཞལ་སྔ་ནས་མཆོག་ནི། ཐུགས་དྲངས་ཚུགས་ལྡན་ཞིང་ཐུགས་ལ་གང་དགོངས་གསུང་ཕོད་པའི་སྙིང་སྟོབས་ལྡན་པ་དང་། ༧པཎ་ཆེན་རིན་པོ་ཆེའི་ཡང་སྲིད་རྩད་འཚོལ་གནང་སྐབས་ནགས་ཆུ་ལྷ་རིར་༧དགེ་འདུན་ཆོས་ཀྱི་ཉི་མ་དང་མཇལ་ཏེ། སྐུ་ཚེ་སྔོན་མའི་བག་ཆགས་ཀྱིས་ཕན་ཚུན་ཐུགས་འདྲིས་ཡོད་པ་ལྟ་བུས་གསུང་གླེང་དུ་མ་གནང་ཞིང་། སྔགས་ཆེན་རིན་པོ་ཆེའི་སྐུ་པང་དུ་བཞུགས་ཏེ་ཡུད་ཙམ་གཟིམ་པ་སོགས་ཐུགས་སྣང་དགེ་བའི་རྟགས་མཚན་བསམ་གྱིས་མི་ཁྱབ་པ་བྱུང་ཡོད། མདོར་ན་ཁོང་ནི་པཎ་ཆེན་སྐུ་ཕྲེང་བཅུ་གཅིག་པ་རྩད་འཚོལ་གནང་མཁན་་དང་མཇལ་མྱོང་མཁན་གྱི་མི་ཆེས་ཉུང་ངུའི་ནང་ནས་གཅིག་ཡིན་པ་བཅས་ཀྱི་ངོ་སྤྲོད་མདོར་བསྡུས་སུ།
རེ་ཞིག་སྐུའི་བཀོད་པ་ཆོས་དབྱིངས་སུ་འཐིམས་ཚུལ་བསྟན་པའི་སྔགས་ཆེན་བསྟན་པའི་མཛེས་བརྒྱན་མཆོག་གིས་རིང་ནས་སྐུ་ངལ་འཛེམས་མེད་ཀྱི་བསྟན་སྲིད་མཛད་རྗེས་དག་རང་ཅག་གངས་ཅན་པ་རྣམས་སུ་ལེགས་སྐྱེས་སུ་གནང་བར་སྤྱན་མིག་ཡར་བལྟ་དགོས་པ་ལས་བླ་མའི་མིང་འཛིན་གྱིས་རྒྱུ་ནོར་ཁོ་ནར་དབྱིངས་བ་ནི་ངོ་མ་ཐབས་སྡུག་ཞིག་མ་རེད་པས།་་་་་་་་་་་་་་་་་་་་་་་་་གང་ལྟར་མགོན་པོ་གང་ཉིད་སླར་ཡང་བསྟན་འགྲོའི་མགོན་དུ་ཡང་སྲིད་འཁྲུལ་བྲལ་མྱུར་བ་ཉིད་དུ་བྱོན་པའི་མཆོག་གསུམ་ལ་གསོལ་འདེབས་ཡང་ཡང་ཞུ།
གོ་ལོག་དོན་ལོག་ཆེས་ཕྱིན་ཅི་ལོག་ཏུ་སོང་བའི་ལུང་བཤུ་དང་དཔེ་བཤུ་མི་བྱེད་པའི་རེ་བ།
མ་རྩོམ་ལྟར་ན་བདག་ནི་སྐྱེ་ཞིང་སྐྱེ་བ་ཐམས་ཅད་དུ། །ཞེས་གསུངས་ཡོད། ངན་སོང་ངན་འགྲོར་ལེགས་པར་ལྟུང་རྒྱུ་ཞིག་མེད་ངེས་ཡིན་པས་ལོག་པར་ལྟུང་བ་ཞེས་འབྲི་དགོས།
དེ་བཞིན་རྗེ་བཙུན་བྱམས་མགོན་སྒྲིབ་གཉིས་བག་ཆགས་དང་བཅས་པ་ཟད་ཟིན་པས་མྱོས་པའི་རྒྱུ་མེད་ཕྱིར་མཉེས་བྱས་ནས་ཞེས་འབྲི་དགོས།
དེ་བཞིན་སྐྱེས་གནས་ཞེས་པ་མ་དག སྐྱེ་གནས་ཞེས་འབྲི་དགོས་འོན་ཀྱང་ཁྱད་པར་འདི་གོམས་པའི་དབང་གིས་འདི་འདྲ་ཞིག་ཆགས་སོང་བ་ཙམ་མ་གཏོགས་པ་རྒྱུ་མཚན་འཆད་རྒྱུ་ཡོད་པ་ཞིག་མ་ཡིན།
རིན་པོ་ཆེ་དགོངས་པ་རྫོགས་པས་ཤིན་ཏུ་བློ་ཕམ་བྱུང་།
རྩད་གཅོད་ཅེས་པ་ལས་རྩད་འཚོལ་ཞེས་བརྗོད་སྲོལ་མེད། གལ་ཏེ་འཚོལ་བེད་སྤྱོད་བྱེད་འདོད་ན། 《༧པཎ་ཆེན་རིན་པོ་ཆེའི་ཡང་སྲིད་རྩད་འཚོལ་གནང་སྐབས་》ཞེས་པ་དང་། 《པཎ་ཆེན་སྐུ་ཕྲེང་བཅུ་གཅིག་པ་རྩད་འཚོལ་གནང་མཁན་》ཞེས་པའི་རྩད་འཚོལ་ཞེས་པའི་ཚིག་ལས་རྩད་གཅོད་ཅེས་པ་བརྗོད་བདེ་བ་མ་ཟད། སྲོལ་རྒྱུན་བརྗོད་སྲོལ་ལའང་དེ་ལྟར་སྣང་། གལ་ཏེ་འཚོལ་ཞེས་པའི་བྱ་ཚིག་བེད་སྤྱོད་བྱེད་འདོད་ན། རྩད་ཅེས་པའི་ཚིག་མེད་པའི་ཐོག་ནས་བརྗོད་བདེ།
མི་ལུས་སྐྱེས་ཤིང་སྐྱེ་བ་ཐམས་ཅད་དུ།།
ངན་སོང་ངན་འགྲོ་ལེགས་པར་ལྟུང་བ་ཡི།།
སྐྱེས་གནས་རྣམས་སུ་ནམ་ཡང་མི་སྐྱེ་ཞིང་།།
དལ་འབྱོར་ཚང་བའི་མི་ལུས་ཐོབ་པར་ཤོག།
འདི་ནས་ཤི་འཕོས་གྱུར་མ་ཐག།
དགའ་ལྡན་སྐྱེས་གནས་ཡིད་དགའ་བར།།
མྱུར་དུ་བྱམས་མགོན་མྱོས་བྱས་ནས།།
བྱང་ཆུབ་ལུང་བསྟན་ཐོབ་པར་ཤོག།།
དངོས་གནས་ཡིད་སྐྱོ་དགོས་པ་ཞིག་རེད།
དྲངས་ཚུགས། དྲང་ཚུགས།
ནགས་ཆུ། ནག་ཆུ།