ངའི་བུའི་ཞི་བའི་ཐབས་ལམ་དཔར་མ་ཐུབ་ཀྱང་ཞི་བའི་འཐབ་རྩོད་དཔར་སྐྲུན་ཐུབ་སོང་བར་དགའ་ཡོད།

དེ་རིང་སྤྱི་འཐུས་ཚོགས་གཙོ་མཆོག་གིས་གླིང་ཚ་ཚེ་བརྟན་རྡོ་རྗེ་ལགས་ཀྱི་ཆོད་སེམས་དང་སྙིང་སྟོབས་ཧ་ཅང་རླབས་ཆེན་ཡིན་པའི་བསྔགས་བརྗོད་གནང་སོང་ལ། གླིང་ཚའི་ཨ་མ་སྡོམ་པོ་སྐྱིད་ལགས་ཀྱིས་ཀྱང་ངའི་བུ་ལ་སྤྱི་དོན་ཐོག་བསམ་པ་རྣམ་དག་ཅིག་དང་ཀུན་སློང་གཙང་མ་ཞིག་ཡོད་པའི་ཡིད་ཆེས་བརྟན་པོ་ཡོད་ཅེས་བརྗོད་བྱུང་།

དེ་རིང་ཕྱི་དྲོའི་ཆུ་ཚོད་ ༣།༣༠ སྟེང་། དྷ་ས་ནོར་བུ་གསོལ་མགྲོན་ཁང་གི་ཚོགས་ཁང་དུ། བོད་དོན་ཞི་བའི་འཐབ་རྩོད་པ་གླིང་ཚ་ཚེ་བརྟན་རྡོ་རྗེ་ལགས་ཀྱིས་བལ་ཡུལ་བཙོན་ཁང་ནས་བྲིས་པའི་རྩོམ་ཡིག་ཕྱོགས་བསྡུས་<<བོད་ཀྱི་ཞི་བའི་འཐབ་རྩོད་>>ཅེས་པ་དེ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་དབུ་འབྱེད་གནང་སོང་། དཔེ་དེབ་དེ་དཔར་སྐྲུན་ཞུ་མཁན་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ཡིན་པ་དང་། མཛད་སྒོའི་སྟེང་གླིང་ཚའི་ཨ་མ་སྡོམ་པོ་སྐྱིད་ལགས་དང་། མདོ་སྨད་དབུས་རྒྱུན་ཚོགས་གཙོ་གངས་རི་ལགས། དེ་བཞིན། འགྲོ་བ་མིའི་ཐོབ་ཐང་འགན་འཛིན་ཚེ་རིང་མཚོ་མོ་ལགས་སོགས་ཕེབས་འདུག


ཚེ་རིང་མཚོ་མོ་ལགས་ཀྱིས་ངོ་སྤྲོད་གནང་དོན། ང་ཚོ་སྤོབས་པ་སྐྱེ་དགོས་པ་ཞིག་ནི། ཐེངས་འདིར་དཔར་སྐྲུན་བྱས་པའི་དེབ་འདི་གླིང་ཚ་ཚེ་བརྟན་རྡོ་རྗེ་ལགས་བལ་ཡུལ་བཙོན་ཁང་དུ་ཡོད་དུས་བྲིས་པ་དང་། དེབ་འདིའི་ནང་ཁོ་རང་གིས་ཞི་བའི་གོམ་བགྲོད་གནང་དགོས་པའི་རྒྱུ་མཚན་དང་། ཁོང་གི་ཕ་མ་གཉིས་དང་མཉམ་དུ་བཀའ་མོལ་ག་རེ་བྱུང་བ། དེ་བཞིན། ཁོ་རང་གི་སྐྱེས་དམན་དང་ཕྲུ་གུ་གཉིས་སོགས་ཀྱི་སྐོར་གསལ་བོར་བྲིས་ཡོད་པ་རེད། དེབ་འདི་མ་འོངས་པར་བོད་ཀྱི་འཐབ་རྩོད་ཀྱི་ཁ་ཕྱོགས་ཐད་ཡིག་ཆ་གལ་ཆེན་ཞིག་ལ་ངོས་འཛིན་ཞུ་བཞིན་ཡོད། ཚེ་བརྟན་རྡོ་རྗེ་ལགས་ཀྱིས་བསམ་བློ་དང་དམིགས་ཡུལ་འདི་འདྲ་ཞིག་གི་ཐོག་ནས་གོམ་བགྲོད་གནང་བ་དེས་བཙན་བྱོལ་བོད་མི་ཚོར་འབོད་སྐུལ་ཆེན་པོ་ཞིག་ཞུས་ཡོད་པ་རེད། དེར་བརྟེན། ཁོ་རང་ངེས་པར་ཕྱིར་བདེ་འཇགས་ཀྱིས་ཕེབས་ཐུབ་པའི་རེ་བ་དང་སྨོན་འདུན་ཞུ་རྒྱུ་ཡིན། ཞེས་སོགས་བརྗོད་བྱུང་།

བོད་མི་མང་སྤྱི་འཐུས་ཚོགས་གཙོ་བསོད་ནམས་བསྟན་འཕེལ་མཆོག་གིས་གསུངས་དོན། གླིང་ཚ་ཚེ་བརྟན་རྡོ་རྗེ་ལགས་ཀྱིས་བོད་དོན་ཞི་བའི་འཐབ་རྩོད་གནང་བའི་ཐོག་མའི་ཀུན་སློང་དང་ཕྱག་ལས་གནང་སྟངས། འཐབ་རྩོད་ནང་དངོས་སུ་ཞུགས་པའི་རྒྱབ་ལྗོངས་སོགས་བརྒྱུད་ལམ་ཁག་ཏུ་རྒྱུས་ལོན་བྱས་པ་ཡིན། ཁོ་རང་གིས་ཞི་བའི་འཐབ་རྩོད་གནང་བའི་ཐོག་མའི་ཀུན་སློང་དེ་ཕྱི་ལོ་ ༡༩༩༣ ལོ་ཡས་མས་ཤིག་ལ་བོད་ནང་རྒྱ་མིས་བཙན་འཛུལ་བྱས་པའི་དངོས་བྱུང་གློག་བརྙན་ཞེས་པ་ཞིག་ལ་གཟིགས་ཡོད་པ་དང་། སྐབས་དེ་དུས་ཁོ་རང་གྲྭ་བ་ལོ་ ༡༦ ལ་སོན་པ་ཞིག་ཡིན་འདུག ང་ཚོའི་མི་རིགས་འདིས་དཀའ་ངལ་འདི་འདྲ་ཞིག་མྱངས་འདུག་བསམ་པའི་ཐོག་ནས་ཁོ་རང་ལ་བོད་དོན་ཞི་བའི་འཐབ་རྩོད་ཀྱི་ཀུན་སློང་དེ་འདྲ་ཞིག་སྐྱེས་ཡོད་པ་དང་། ཀུན་སློང་དེ་འདྲ་ཞིག་གི་འོག་ནས་ཁོ་རང་བཙན་བྱོལ་ནང་བསླེབས་རྗེས། ཁོ་རང་གིས་བོད་མིའི་རང་དབང་དང་རྒྱལ་བ་རིན་པོ་ཆེ་བོད་ལ་ཕེབས་མ་ཐུབ་པར་དུ་ཞི་བའི་འཐབ་རྩོད་གནང་རྒྱུའི་དམིགས་ཡུལ་བཅངས་ཡོད་འདུག

ཉེ་ཆར་ཕྱི་ཟླ་ ༡༠ ཚེས་ ༡༡ ཉིན་ཨ་མ་སྡོམ་པོ་སྐྱིད་དང་མཉམ་དུ་ཁོ་རང་གི་སྐུ་ཟླ་དང་ཕྲུ་གུ་གཉིས་ལ་ཐུག་པ་ཡིན། སྐབས་དེར་ང་ཚོས་སྐད་ཆ་མང་པོ་ཞིག་བཤད་ཡོང་སྐབས་རང་བཞིན་གྱིས་སེམས་ནང་སྟོང་སང་སང་འདྲ་བོ་ཞིག་ཆགས་སོང་། སྐབས་དེར་ངས་ཁོང་ཚོར་གླིང་ཚ་ཚེ་བརྟན་རྡོ་རྗེ་ལགས་ནི་དམིགས་ཡུལ་ཆེན་པོ་ཡོད་མཁན་ཞིག་དང་བློ་སྤོབས་ཆེན་པོ་ཡོད་མཁན་ཞིག་ཡིན་སྟབས། ཁྱེད་རང་གིས་སེམས་འཁྲལ་གནང་དགོས་པ་མ་རེད། ཁྱེད་ཚོ་ནང་མི་ལྷན་འཛོམ་ཡོང་གི་རེད། ལྷག་པར་དུ་ཁྱེད་རང་གིས་ཕྲུ་གུ་གཉིས་ཀྱི་སློབ་སྦྱོང་དང་འཕྲོད་བསྟེན་ཐོག་ལ་འགན་འཁུར་རྒྱུ་གལ་ཆེན་པོ་རེད་ཅེས་ཞུས་པ་ཡིན་མོད། ད་ལྟ་བལྟས་ཡོང་ན་ངའི་སྐད་ཆ་དེ་ནོར་འདུག་སྙམ་པའི་ཚོར་བ་ཞིག་ཡོང་གི་འདུག ཚེ་བརྟན་རྡོ་རྗེ་ལགས་ཀྱི་དམིགས་ཡུལ་ཞེ་དྲགས་ཆེན་པོ་རེད་འདུག བོད་མིའི་རང་དབང་མ་ཐོབ་བར་དུ་དང་སྐྱབས་མགོན་རིན་པོ་ཆེ་མཆོག་བོད་ནང་གདན་འདྲེན་ཞུ་མ་ཐུབ་པར་དུ། ཁོ་རང་གིས་ཞི་བའི་འཐབ་རྩོད་གནང་རྒྱུའི་དམ་བཅའ་དང་དམིགས་ཡུལ་ཞིག་བཟུང་སྟེ། ལས་འགུལ་འདིའི་ནང་ཞུགས་པ་ཞིག་རེད་འདུག

གླིང་ཚ་ལགས་ཀྱི་ཞི་བའི་འཐབ་རྩོད་དེ་ཁོ་རང་སྒེར་ངོས་ནས་ཐག་ཆོད་གནང་བ་ཞིག་ཡིན་པ་དང་། དེ་ཡང་སོ་སོའི་དམིགས་ཡུལ་མ་འགྲུབ་པར་དུ་ཞི་བའི་འཐབ་རྩོད་གནང་རྒྱུའི་དམ་བཅའ་གནང་ཡོད་པ་མ་ཟད། ཁོ་རང་གི་ཞི་བའི་འཐབ་རྩོད་ལ་ཀུན་སློང་རྣམ་དག་དང་ཆོད་སེམས་བརྟན་པོ་ཡོད་པ་གསལ་བོར་རྟོགས་ཐུབ་ཀྱི་འདུག དཔེར་ན། ཁོ་རང་བལ་ཡུལ་བཙོན་ཁང་ནང་ཟླ་བ་ ༩ ཙམ་རིང་བཞུགས་དུས་ཀྱང་། ཁོས་ང་རང་ཉེས་པ་བསགས་ནས་བཙོན་ཁང་དུ་བསླེབས་པ་མིན། ངས་མི་རིགས་ཀྱི་འཐབ་རྩོད་ཐོག་ལས་ཀ་བྱས་ནས་ང་བཙོན་ཁང་ནང་ཡོང་བ་ཡིན་སྟབས། ང་ལ་སེམས་ཀྱི་དཀའ་ངལ་གང་ཡང་མེད་ཅེས་བཤད་ཡོད་པ་རེད། དེར་བརྟེན། ཁོ་རང་གི་ཀུན་སློང་དང་དམིགས་ཡུལ་དེ་ཚོ་ཧ་ཅང་གི་རླབས་ཆེན་པོ་རེད།

ཕྱི་ལོ་ ༢༠༡༢ ལོའི་སུམ་བཅུའི་དུས་དྲན་ཉིན་ཁོ་རང་གིས་ལས་འགུལ་འདི་ཐོག་དང་པོར་མགོ་བརྩམས་ཡོད་པ་དང་། སྐབས་དེ་དུས་ཁོ་རང་གི་ཐག་ཆོད་གཞིར་བཟུང་གི་ཐོག་ནས་དར་ཆ་རིགས་ཁ་ཤས་འཁྱེར་ཏེ། སྤྱི་ཚོགས་ནང་གླེང་སློང་གང་འཚམ་བྱུང་ཡོད་ཀྱང་། ཁོ་རང་གིས་གླེང་སློང་དེ་ཚོར་བཟང་སྤྱོད་ཀྱི་ཐོག་ནས་གདོང་ལེན་བྱས་ཡོད་པ་རེད། ༢༠༡༣ ལོའི་སུམ་བཅུའི་དུས་དྲན་ཉིན་གོམ་བགྲོད་ཐེངས་གཉིས་པ་མགོ་བཙུགས་ཡོད་པ་དང་། སྐབས་དེར་ཁོ་རང་གིས་མང་ཚོགས་ཀྱི་བསམ་ཕྱོགས་དང་བསྟུན་ཏེ་རྒྱལ་དར་རིགས་མི་འདྲ་བ་དེ་དག་མ་འཁྱེར་བར་བཟང་སྤྱོད་ཀྱི་ཐོག་ནས་ཞི་བའི་འཐབ་རྩོད་མུ་མཐུད་གནང་བ་སོགས་ལ་བལྟས་ཡོང་ན། ཁོ་རང་གི་ཆོད་སེམས་སྙིང་སྟོབས་དེ་ཚོ་ཧ་ཅང་གི་རླབས་ཆེན་པོ་རེད།

ང་ཚོ་བོད་པའི་ཞི་བའི་འཐད་རྩོད་ནང་དེ་འདྲའི་ཀུན་སློང་དང་དམིགས་ཡུལ་འཛིན་མཁན་མི་མང་པོ་འཐོན་ཐུབ་དགོས་པ་དང་། ལྷག་པར་དུ་ང་ཚོ་དེ་འདྲའི་ཞི་བའི་འཐབ་རྩོད་ནང་ཞུགས་ཐུབ་དགོས་པ་གལ་ཆེན་པོར་མཐོང་གི་ཡོད། གླེང་ཚ་ལགས་གར་སོང་ཆ་མེད་དུ་གྱུར་ནས་ལོ་གསུམ་ལྷག་ཕྱིན་ཡོད་སྟབས། དེའི་ཐོག་ལ་འབྲེལ་ཡོད་སོ་སོ་ནས་དོ་སྣང་གནང་གི་ཡོད་པ་རེད་ལ། ལྷག་པར་དུ་བོད་མིའི་སྒྲིག་འཛུགས་དང་འཛིན་སྐྱོང་གི་ངོས་ནས་ཀྱང་དོ་སྣང་གནང་དགོས་པ་གལ་ཆེན་པོ་རེད། ཅེས་སོགས་གསུངས་སོང་།

མདོ་སྨད་དབུས་རྒྱུན་ཚོགས་གཙོ་གངས་རི་ལགས་ཀྱིས་བརྗོད་དོན། སྤྱི་ཡོངས་ནས་ང་ཚོའི་སྤྱི་ཚོགས་ནང་གླིང་ཚ་ཚེ་བརྟན་རྡོ་རྗེ་སྐོར་ལ་ལབ་གླེང་མང་པོ་བྱུང་ཡོད་པ་རེད་དེ། གང་ལྟར་གླིང་ཚ་ཁོ་རང་གི་ངོས་ནས་བོད་མི་རིགས་བསྟན་སྲིད་ཀྱི་དོན་ལ་ཕ་མ་དང་ནང་མི། ཐ་ན་རང་གི་ཚེ་སྲོག་ཡན་ཆད་བློས་བཏང་ཡོད་པ་རེད། སྤྱིར་ང་ཚོ་བོད་ལ་ཁ་བཤད་ཆུ་ཡི་ཝུ་བ་དང་ལག་ལེན་གསེར་གྱི་ཐིགས་པ་ཟེར་བའི་ཁ་དཔེ་ཞིག་ཡོད་པ་ལྟར། འགྲོ་བ་མིའི་ཐོབ་ཐང་གི་ངོས་ནས་ཁ་ཡོད་ལག་ཡོད་ཀྱིས་གླིང་ཚ་ལགས་ཀྱི་དཔེ་དེབ་པར་སྐྲུན་ཞུས་པར་ཧ་ཅང་དགའ་བོ་བྱུང་། རྒྱ་གར་གྱི་མཁས་པ་ཞིག་གིས། མི་གཅིག་ལ་ཚེ་སྲོག་གཅིག་ལས་མེད་སྟབས། མི་དེས་ནོར་འཁྲུལ་ག་འདྲ་ཞིག་བཟོས་པ་ཡིན་ནའང་དེ་ལ་སྲོག་ལན་སྲོག་གི་འཇལ་བའི་ཉེས་ཆད་གཅོད་མི་རུང་ཞེས་གསུངས་ཡོད་པ་རེད། དེས་བསྟན་དོན་གཙོ་བོ་མིའི་ཚེ་སྲོག་ལས་ལྷག་པའི་རིན་ཐང་ལྡན་པ་ཞིག་མེད་པ་སྟོན་གྱི་ཡོད་པ་རེད། ཡིན་ནའང་སྤྱི་ཚོགས་ནང་ལ་ཁ་ཚུར་འཁོར་ནས་བཤད་ན། གླིང་ཚ་ཚེ་བརྟན་རྡོ་རྗེ་ལགས་ཀྱིས་རྒྱ་མིའི་རྒྱལ་དར་འཕྱར་བ་ཙམ་གྱིས་ཁོ་རང་གི་རླབས་ཆེན་གྱི་ལས་ཀ་མང་པོ་ཞིག་དང་བྱས་རྗེས་མང་པོ་ཞིག་ལ་ང་ཚོའི་སྤྱི་ཚོགས་ནང་གླེང་སློང་འདྲ་མིན་བྱུང་ཡོད་པ་རེད། དེས་ག་རེ་མཚོན་གྱི་འདུག་ཅེ་ན། ང་ཚོས་མིའི་ཚེ་སྲོག་གི་རིན་ཐང་ངོ་མ་དེ་རྟོགས་ཀྱི་མེད་པ་དང་། གླིང་ཚ་ལགས་ནས་རང་ཉིད་ཀྱི་ཕ་མ་ནང་མི་ཚང་མ་བློས་གཏོང་བྱས་པའི་རླབས་ཆེན་གྱི་བྱས་རྗེས་དེའང་མ་དྲན་པ་རེད་བསམ་གྱི་འདུག

ང་ཚོའི་འཐབ་རྩོད་འདི་ང་ཚོའི་མི་རབས་འདི་གཅིག་པུ་མིན་པར་མི་རབས་ནས་མི་རབས་བར་མུ་མཐུད་དགོས་པ་རེད། ང་ཚོའི་མི་རབས་འདིས་བོད་དོན་འཐབ་རྩོད་པ་དང་ཤེས་ཡོན་པ། ལྷག་པར་དུ་ད་ལྟའི་ཆབ་སྲིད་ཀྱི་སྡེ་ཁག་འདིའི་ཕྱོགས་སུ་ལངས་ཏེ་དཔུང་རོགས་གནང་དགོས་པ་ཧ་ཅང་གལ་ཆེན་པོ་རེད། ཕྱི་ལོ་ ༢༠༡༦ ཟླ་ ༧ ནང་ང་ཚོ་གཞུང་འབྲེལ་མིན་པའི་ཚོགས་སྡེ་ཁག་བོད་ཀྱི་གསོལ་མགྲོན་ཁང་དུ་འཛོམས་པ་རེད། སྐབས་དེར་གཞོན་ནུ་ལྷན་ཚོགས་མ་གཏོགས་ཚོགས་པ་གཞན་ཚང་མས་གླེང་ཚ་ལགས་ཀྱི་ཞི་བའི་འཐབ་རྩོད་ལ་རྒྱབ་སྐྱོར་དང་དཔུང་རོགས་ཧ་ཅང་ཡག་པོ་གནང་ཡོད་པ་རེད། མ་འོངས་པར་ཡང་བོད་དོན་འཐབ་རྩོད་པ་སུ་དང་སུ་ཡིན་ནའང་དེ་ལ་གཞུང་འབྲེལ་མ་ཡིན་པའི་ཚོགས་པ་ཁག་གིས་ངེས་པར་དུ་རྒྱབ་སྐྱོར་གནང་རོགས་ཞུ་རྒྱུ་ཡིན། གཞུང་འབྲེལ་མ་ཡིན་པའི་ཚོགས་པ་ཁག་གིས་གཞུང་ངོས་ནས་སྒྲུབ་མི་ཐུབ་པའི་ལས་དོན་མང་པོ་ཞིག་བསྒྲུབ་དགོས་ཀྱི་ཡོད་པ་རེད། ཅེས་སོགས་བརྗོད་སོང་།

མཇུག་ཏུ་ཨ་མ་སྡོམ་པོ་སྐྱིད་ལགས་ཀྱིས་བརྗོད་དོན། དེ་རིང་ཚེ་བརྟན་རྡོ་རྗེ་ཡི་དཔེ་དེབ་འདི་དཔར་སྐྲུན་ཞུས་ཏེ་འགྲེམ་སྤེལ་བྱེད་བཞིན་ཡོད་པ་རེད། ངས་ཚེ་བརྟན་རྡོ་རྗེ་ཡི་ཚབ་བྱས་ཏེ་དཔེ་དེབ་དཔར་སྐྲུན་གནང་མཁན་དང་ཞུ་དག་གཏོང་མཁན་ཚང་མ་ལ་ཐུགས་རྗེ་ཆེ་ཞུ་རྒྱུ་ཡིན། ཚེ་བརྟན་རྡོ་རྗེ་ལ་<<བོད་ཀྱི་ཞི་བའི་ཐབས་ལམ།>> ཞེས་པ་ཞིག་དང་། <<བོད་ཀྱི་ཞི་བའི་འཐབ་རྩོད།>>ཞེས་པའི་དེབ་གཉིས་གྲ་སྒྲིག་ཡོད་ཀྱང་། ཐེངས་འདིར་དཔར་སྐྲུན་བྱས་པའི་དེབ་འདི་<<བོད་ཀྱི་ཞི་བའི་འཐབ་རྩོད།>> ཟེར་བ་དེ་རེད། དེབ་འདི་ཚེ་བརྟན་རྡོ་རྗེ་བལ་ཡུལ་བཙོན་ཁང་དུ་ཡོད་སྐབས་བྲིས་པ་རེད། <<བོད་ཀྱི་ཞི་བའི་ཐབས་ལམ།>>ཞེས་པ་དེའི་མ་ཟིན་མཐེབ་སྡེར་ནང་བཅུག་སྟེ་སྲིད་སྐྱོང་བློ་བཟང་སེང་གེ་མཆོག་གི་ཕྱག་ཏུ་བཞག་ཡོད་པ་དང་། བར་སྐབས་ཤིག་ལ་དེབ་དེ་དཔར་སྐྲུན་མ་ཐུབ་པར་བོར་བརླག་ཕྱིན་སོང་ལབ་པ་རེད། ཕྱིས་སུ་སྲིད་སྐྱོང་མཆོག་གིས་ཨ་ཁུ་རྨོག་རི་བསྟན་པ་དང་མི་གཞན་ཞིག་ངའི་སར་མངགས་ཏེ་མཐེབ་སྡེར་དེ་ཕྱིར་རྙེད་སོང་ཡང་ཁ་འབྱེད་ཐུབ་ཀྱི་མི་འདུག་ཟེར། ངས་མཐེབ་སྡེར་དེ་བསྐྱར་དུ་ཨ་ཁུ་རྨོག་རི་བསྟན་པའི་ལག་ཏུ་བཞག་སྟེ་ཁ་འབྱེད་ཐབས་གནང་རོགས་ཞུས་པ་ཡིན། ཨ་ཁུ་རྨོག་རིས་ཐབས་ཤེས་ག་འདྲ་བྱས་ཀྱང་ཁ་འབྱེད་ཐུབ་ཀྱི་མི་འདུག་ཟེར་ནས་དེབ་དེ་ད་བར་དཔར་སྐྲུན་ཐུབ་ཡོད་པ་མ་རེད།

ཚེ་བརྟན་རྡོ་རྗེ་བོར་ནས་ད་བར་ལོ་གསུམ་དང་ཟླ་བ་བདུན་འགོར་ཟིན་པ་རེད། ང་རང་ཨ་མ་ཞིག་ཡིན་པའི་ཆ་ནས་རང་སེམས་ན་དཀའ་སྡུག་མང་པོ་ཞིག་ཡོད་པ་ཚང་མས་ཤེས་གསལ་རེད། དེ་རིང་འདིར་ཡོང་མཁན་ཚོའི་གྲས་སུ་ཨ་མ་ཡིན་མཁན་ཚོས་སོ་སོའི་ཕྲུ་གུར་བསམ་བློ་བཏང་ན་ཧ་ལམ་ངའི་སེམས་ཀྱི་དཀའ་སྡུག་བསྔལ་དེ་ཤེས་པ་རེད། ངས་རང་གི་བུ་ལ་ངོ་བསྟོད་བྱས་པ་མིན་ཡང་ངའི་བུ་ལ་སྤྱི་དོན་ཐོག་བསམ་པ་རྣམ་དག་ཅིག་དང་ཀུན་སློང་གཙང་མ་ཞིག་ཡོད་པའི་ཡིད་ཆེས་བརྟན་པོ་ཡོད། དེ་ལ་ང་རང་གིས་བརྩི་བཀུར་དང་རྒྱབ་སྐྱོར་བྱེད་ཀྱིན་ཡོད། ད་ཆར་ཁོ་རང་གི་ཤི་གསོན་མི་ཤེས་ནའང་ང་རང་གིས་ད་དུང་ངའི་བུས་བོད་སྤྱི་བའི་དོན་ལ་ཕན་ཞིག་ཐོགས་པར་སྨོན་ལམ་རྒྱག་གི་ཡོད། ཅེས་བརྗོད་སོང་།

གསར་འགོད་པ། པདྨ་རྒྱལ།

འབྲེལ་ཡོད་གསར་གནས། 

༡༽ གླིང་ཚའི་ཆུང་མ་སྲིད་སྐྱོང་དང་སྤྱི་འཐུས་ཚོགས་གཙོར་མཇལ།

༢ ༽  གླིང་ཚ་ཚེ་བརྟན་རྡོ་རྗེ་ལགས་ཀྱི་ཆུང་མ་དང་ཕྲུ་གུ་གཉིས་དྷ་རམ་ས་ལར་འབྱོར།

༣ ༽   ཨ་ཕ་བོད་དོན་དུ་བོར་ནས་ལོ་གཉིས་ཕྱིན་ཐལ།

༤ ༽ Twenty First Century Renunciation:Lingtsa T. Dorjee’s mother talks about her son