“རང་ལུས་མེ་རུ་བསྲེགས་ཏེ་སེམས་ཀྱི་ན་ཟུག་སྟོན་གྱི་ཡོད”

བོད་ནས་གསར་དུ་འབྱོར་བའི་དགེ་འདུན་པ་ཞིག་གིས་བརྗོད་ན། དེང་སྐབས་རྔ་པ་ས་ཆའི་སྐྱ་སེར་མང་པོ་ཞིག་གིས་རང་ལུས་མེར་བསྲེགས་གཏོང་གི་ཡོད་པ་དེ། ༢༠༠༨ ལོའི་ཞི་རྒོལ་ལ་རྒྱ་གཞུང་གིས་དྲག་གནོན་བྱས་པ་དང་། སྐབས་དེ་ནས་བཟུང་རྒྱ་དམག་གིས་ཀིརྟི་དགོན་པར་དམ་དྲག་བྱས་པའི་ན་ཟུག་ཕྱིར་སྟོན་གྱི་ཡོད་པ་རེད་ཟེར། 

མདོ་སྨད་རྔ་པ་རྫོང་ཇོ་ནང་བསེ་དགོན་པའི་གྲྭ་བདེ་ལེགས་ལགས། རྒྱ་གཞུང་གིས་ ༢༠༠༨ ལོར་ས་གནས་ཉེན་རྟོག་ལས་ཁུངས་གཏོར་བཅོམ་དང་མེར་བསྲེཊ་གཏོང་མཁན་ཡིན་པའི་ཉེས་མིང་འོག་འཛིན་བཟུང་བཀའ་རྒྱ་སྔ་རྗེས་བཏང་མཐར། ལོ་ ༤ ལྷག་རིང་མདོ་དབུས་ཁམས་གསུམ་གྱི་ས་ཆ་མང་པོར་བྲོས་བྱོལ་བྱས་ཏེ་ཉེ་ཆར་ངྷ་རམ་ས་ལའི་དབུས་སྣེ་ལེན་ཁང་དུ་འབྱོར་འདུག ཕྱི་ཚེས་ ༢༥  ཉིན་འདི་གའི་གསར་འགོད་པས་ཁོང་ལ་ཐུག་འཕྲད་ཀྱིས་སྐབས་དེའི་ལས་འགུལ་གྱི་བརྒྱུད་རིམ་དང་རྔ་པ་ཁུལ་གྱི་གནས་སྟངས་སྐོར་ལ་བཅར་འདྲི་བྱས་ཡོད།  

གྲྭ་བདེ་ལེགས་ལགས་ཀྱིས་བརྗོད་དོན་ལྟར་ན།  ལོ་དེའི་ཕྱི་ཟླ་ ༣ པའི་ཚེས་  ༡༦ ཉིན་གྱི་ཉིན་གུང་ཆུ་ཚོད་ ༡༢།༣༠ ཡས་མས་སུ་བསེ་དགོན་པའི་རྒྱབ་ཕྱོགས་ནས་གྲྭ་པ་མང་པོ་ཞིག་རྔ་པ་རྫོང་གི་ཕྱོགས་སུ་གོམ་བགྲོད་ཀྱིས་༧རྒྱལ་དབང་བསྟན་འཛིན་རྒྱ་མཚོ་སྐུ་ཚེ་ཁྲི་ལོ་བརྟན་པར་ཤོག  ང་ཚོ་ལ་འགྲོ་བ་མིའི་ཐོབ་ཐང་དགོས། མི་རིགས་འདྲ་མཉམ་དགོས། ༸རྒྱལ་དབང་བསྟན་འཛིན་རྒྱ་མཚོ་བོད་ལ་གདན་འདྲེན་ཞུ་དགོས། ཞེས་སྐད་འབོད་བྱེད་བཞིན་རྫོང་གི་ཕྱོགས་སུ་བསྐྱོད་ཡོད་ཅིང་། སྐབས་དེར་རྒྱ་ནག་གི་དྲག་ཆས་ཉེན་རྟོག་པ་དང་དམག་མི་མང་པོ་བསླེབས་ཏེ། ཉིན་དེར་ཁོང་གི་མཐོང་ས་ནས་སྣང་ཞིག་བོན་དགོན་གྱི་མི་སྐྱ་ཞིག་མེ་མདས་བརྒྱབ་སྟེ་དམར་གསོད་དང་། བསེ་དགོན་པའི་རང་ལོ་ ༢༡ ཡས་མས་ཡིན་པའི་གྲྭ་བསང་དོན་ལགས་འཛིན་བཟུང་བྱས་ཡོད་པ་མ་ཟད། དྲག་ཆས་ཉེན་རྟོག་པས་གྲྭ་བ་དང་མི་མང་གི་དཀྱིལ་དུ་གང་བྱུང་མེ་མདའ་བརྒྱབ་པ་དང་གཅར་རྡུང་བྱས་ཏེ་སྐྱ་སེར་མང་པོ་ཞིག་ལ་རྨས་སྐྱོན་བཟོས་ཡོད་འདུག

སྐབས་དེའི་ལས་འགུལ་ནང་བསེ་དགོན་པའི་གྲྭ་བ་ཁག་ཅིག་ལས་མཉམ་ཞུགས་བྱས་མེད་ཀྱང་། ཉིན་རྒྱབ་ཆུ་ཚོད་ ༣ ཙམ་ནས་ཉེན་རྟོག་པ་དང་དྲག་ཆས་དམག་མིས་དགོན་པའི་མཐའ་ཡོངས་སུ་བསྐོར་ཏེ། གྲྭ་དཔལ་ལྡན་དང་ཐུབ་དགའ། རྒྱུགས་ཁམ། རྟེན་མགོན་བཅས་གྲྭ་བ་བཞི་འཛིན་བཟུང་དང་། དགོན་པའི་ཕྱོགས་བཞིར་ལྐོག་མིག་བརྙན་ཆས་བཙུགས་ཏེ་ལྟ་རྟོག་བྱས་ཡོད་ཅིང་། དུས་དེ་ནས་གྲྭ་བ་མང་པོ་རི་བྱོལ་དང་སོ་སོའི་ནང་དུ་ལོག་དགོས་བྱུང་འདུག ལྷག་པར་དུ་ལོ་དེའི་ཕྱི་ཟླ་ ༨ པར་དགོན་པའི་སྒོམ་ཁང་དུ་ཡོད་པའི་གྲྭ་བ་རྣམས་བཙན་གྱིས་ཕྱིར་འཕུད་བཏང་ཡོད་ཅིང་། གནས་ཚུལ་དེ་དག་གི་རྐྱེན་པས་དགོན་བདག་བླ་མ་སྲས་ཀུན་བཟང་གཞན་ཕན་མཆོག་གི་ནད་གཞི་རྙིང་པ་འཕར་ཏེ་སྨན་ཁང་དུ་བསྟེན་གཏུག་བྱས་ཀྱང་ཕན་སྐྱེད་མ་བྱུང་བར་དགོངས་པ་རྫོགས་ཡོད་འདུག དེའི་རྗེས་གྲྭ་པ་ཚོས་རྒྱ་ནག་གཞུང་ལ་བཟང་ཕྱོགས་ཀྱི་འགྱུར་བ་མ་བཏང་ཚེ་ངོ་རྒོལ་རྒྱག་རྒྱུ་ཡིན་སྐོར་བརྗོད་སྟབས། གནས་སྐབས་རིང་བཙོན་འཇུག་བྱས་ཡོད་པའི་གྲྭ་བ་རྣམས་ཀློད་གྲོལ་དང་བྲོས་བྱོལ་བ་རྣམས་ཕྱིར་སྐད་གཏོང་དགོས་བྱུང་ཡོད་ཀྱང་། ད་ཆར་སླར་ཡང་ལས་བྱེད་མི་སྣ་མངགས་གཏོང་གིས་གྲྭ་མང་ལ་སུན་གཙེར་བཟོ་བཞིན་ཡོད་འདུག   

གསར་འགོད་པས་ཁོང་ལ་སྐབས་དེར་བྲོས་བྱོལ་བྱ་དགོས་པའི་རྒྱུ་རྐྱེན་ཅི་ཡིན་དྲིས་པར་ཁོང་གིས། “ ང་ ༢༠༠༨ ལོར་ངོ་རྒོལ་ལས་འགུལ་ནང་ཞུགས་ཏེ། ཉེན་རྟོག་པས་ཁང་པ་དང་རྒྱ་ནག་ཉེན་རྟོག་པར་གཅར་རྡུང་བྱེད་སྤྱད་ཀྱི་ལག་ཆ་བཙོང་མཁན་བོད་མི་ཞིག་གི་ཁང་པ་གཏོར་བཅོམ་དང་མེར་བསྲེཊ་བཏང་བ་རེད། སྐབས་དེར་རྒྱ་ནག་གི་ཉེན་རྟོག་པས་པར་བརྒྱབ་ཡོད་པ་མ་ཟད། ལས་འགུལ་སྐབས་ང་རང་གསལ་བོར་ཡོད་པའི་པར་ཞིག་ཨ་རིའི་རླུང་འཕྲིན་དུའང་བསྟན་སོང་། རྗེས་སུ་ཉེན་རྟོག་པས་མི་སྐོར་ཞིག་འཛིན་བཟུང་གིས་འདྲི་རྩད་བྱས་ཤིང་། གཅིག་ལ་ལོ་ ༤ ཡི་ཁྲིམས་ཐག་ཀྱང་བཅད་སོང་། དེ་ནས་ངས་དགོན་པར་དགོངས་པ་ཞུས་ཏེ་ཁམས་སྡེ་དགེ་དང་དཀར་མཛེས། རྫ་ཆུ་ཁ། ཨ་མཆོག་མཚན་ཉིད་དགོན་བཅས་སུ་ལོ་ ༤ ཙམ་ལ་བྲོས་བྱོལ་བྱས་པ་ཡིན། ང་སོང་རྗེས་ཉེན་རྟོག་པ་ངའི་ཁྱིམ་དུ་ཡོང་སྟེ། ང་རང་རྩིས་སྤྲོད་བྱ་དགོས་པའི་བཙན་བཀའ་ཐེངས་མང་བཏང་འདུག” ཞེས་བརྗོད་བྱུང་།

ཡང་ཁོང་ལ་རྔ་པ་ཁུལ་དུ་རང་ལུས་མེར་བསྲེཊ་ཀྱི་ལས་འགུལ་བསྟུད་མར་བྱུང་སྐབས་དམ་དྲག་གང་འདྲ་ཡོད་མེད་དང་ད་ལྟའི་གནས་སྟངས་ཀྱི་སྐོར་ལ་སྐད་ཆ་དྲིས་པར་ཁོང་གིས། “རྔ་པ་ཁུལ་ལ་མཚོན་ན་ ༢༠༠༨ ལོའི་ཞི་རྒོལ་ལ་རྒྱ་གཞུང་གིས་དྲག་གནོན་བྱས་པ་དང་། དེ་ནས་བཟུང་ཀིརྟི་དགོན་པ་རྒྱ་དམག་གིས་དམ་དྲག་བྱས་པ་བཅས་ལ་བརྟེན་ཏེ། བོད་ཚོའི་སེམས་ནང་ན་ཟུག་བཟོད་ཐབས་མེད་པ་བྱུང་ཡོད། ༢༠༠༩ ལོ་ནས་བཟུང་སྐྱ་སེར་མང་པོ་ཞིག་གིས་སྔ་རྗེས། རང་ལུས་མེ་རུ་བསྲེགས་ཏེ་སེམས་ཀྱི་ན་ཟུག་སྟོན་གྱི་ཡོད། ཉེ་ཆར་ང་རང་འདིར་མ་བསླེབས་པའི་སྔོན་ཙམ་ལ་རྔ་པ་རྫོང་དུ་དམག་མིས་མི་སེར་དཀྱུས་མ་ལྟར་བོད་ལྭ་གོན་ཏེ་མི་མང་འདུ་འཛོམས་བྱེད་ས་དང་ཇ་ཁང་དང་ཟ་ཁང་སོགས་སུ་ལྟ་རྟོག་བྱེད་པ་དང་། ངས་རང་ལུས་མེར་བསྲེགས་འཆར་ཡོད་པ་ཧ་གོ་མཁན་ལ་རྒྱ་སྒོར་ཁྲི་ ༡༠ ཡིས་རྔན་པ་སྤྲོད་བཞིན་ཡོད་པ་དང་། མེར་བསྲེགས་གཏོང་གི་ཡིན་ཟེར་མཁན་ལ་ལོ་ ༡༠ ཡི་ཁྲིམས་ཐག་གཅོད་རྒྱུ་ཡིན་པའི་ཐག་གཅོད་ཀྱང་བྱས་ཡོད་འདུག” ཅེས་བརྗོད་བྱུང་།

མཐའ་མར་ཁོང་གིས་བོད་ནང་བོད་མི་ཚོས་རྒྱ་ནག་གི་དྲག་གནོན་བྱས་མིན་ལ་མ་ལྟོས་པར་ ༸རྒྱལ་བ་རིན་པོ་ཆེ་བོད་ལ་ཕེབས་ཆེད་དང་བོད་གཞིས་བྱེས་ལྷན་འཛོམས་ཡོང་ཆེད་རང་སྲོག་བློས་གཏོང་གིས་རྒྱ་གཞུང་ལ་ངོ་རྒོལ་བྱས་ཡོད་སྟབས།  ང་ཚོ་ཤུལ་དུ་ཡོད་པའི་བོད་ཕྱི་ནང་གཉིས་ཀྱི་བོད་མི་ཚང་མས་མཉམ་རུབ་ཀྱིས་ཁོང་རྣམ་པས་ཁ་ཆེམས་ལྟར་འགྲུབ་ཐབས་ལ་འབད་བརྩོན་བྱ་དགོས་པའི་རེ་བ་དང་འབོད་སྐུལ་ཡང་གནང་སོང་།

རྔ་པ་ཇོ་ནང་བསེ་དགོན་པ་ནི། རྔ་པ་བོད་རིགས་རང་སྐྱོལ་ཁུལ་རྔ་པ་རྫོང་དང་སྤྱི་ལེ་ ༢ ཙམ་གྱི་སར་ཡོད་འདུག ད་ལྟའི་ཆར་དགོན་པ་འདིར་གྲྭ་པ་ ༧༠༠ ཡས་མས་ཤིག་ཡོད་པ་དང་། སྔགས་ཕྱོགས་ནས་དུས་འཁོར་ལུགས་ཀྱི་སྦྱོར་དྲུག་ཉམས་ལེན་དང་མཚན་ཉིད། ཆོ་ག་ཕྱག་ལེན་སོགས་ཀྱི་རྒྱུན་སྲོལ་འཛིན་སྐྱོང་སྤེལ་གསུམ་གནང་བཞིན་ཡོད་འདུག

གསར་འགོད་པ། དོན་གོ