བོད་དོན་ལ་ལྟ་སྟངས །

རྒྱ་ནག་གི་དཔོན་རིགས་ཚོའི་ངོ་གདོང་ལྕགས་ཀྱིས་གྲུབ་ཅིང་། རྒྱལ་སྤྱིའི་སྲིད་དོན་པ་དག་གི་ཨ་འབྱོག་རྡོ་ཡིས་གྲུབ་སྟེ་མི་རིགས་འདི་ཁྱུར་ མིད་ལ་གཏོང་སྐབས་བག་མི་ཚ་ལ ། མི་རིགས་འདིའི་ཞི་བདེའི་འབོད་སྐུལ་དག་མི་གོ་བར་གྱུར་འདུག འདིའི་ཁར་ང་ཚོར་ད་དུང་ནང་ཁུལ་གྱི་གླེང་རྙོག་ཙག་ཙིག་རེ་དང་ །     བོད་སྤྱིའི་རྩ་དོན་ཐོག་རང་རང་གི་འདོད་ཕྱོགས་མཁྲེགས་པོ་རེ་ཡོད་སྟབས། ང་ཚོའི་གོང་བུའི་ནུས་པ་ཇེ་ཞན་དང་མདུན་སྐྱོད་ཀྱི་གོམ་ཁ་ཇེ་དལ་དུ་ཕྱིན་ཡོད།
ཉིན་འདི་དག་གི་རིང་༧གོང་ས་མཆོག་དང་ས་སྐྱ་བདག་ཁྲི་རིན་པོ་ཆེ། བཀའ་ཁྲི་ཟམ་གདོང་རིན་པོ་ཆེ་སོགས་བོད་མི་རིགས་ཀྱི་རྩ་བའི་བླ་མ་དང་གཙུག་གི་ནོར་བུ་རྣམ་པས་བོད་ཀྱི་གནད་དོན་འདི་དབུ་མའི་ལམ་ནས་མ་གཏོགས་སེལ་ཐབས་མེད་སྐོར་གྱི་བཀའ་སློབ་རིམ་པར་ཕེབས་ཡོད། དབུ་མའི་ལམ་གྱི་ལས་འགུལ་གོ་སྒྲིག་བྱེད་མཁན་དག་གིས་མ་འོངས་པར་བོད་ཀྱི་ཆོས་རྒྱུད་ཁག་གི་བླ་ཆེན་རྣམ་པས་དབུ་མའི་ལམ་གྱི་དགོངས་བཞེད་འདིར་རྒྱབ་སྐྱོར་གནང་རྒྱུའི་འབོད་སྐུལ་ཞུ་གིན་ཡོད་ལ། འདི་ནི་མང་ཚོགས་ཀྱིས་རང་འགུལ་ལྟར་སྤེལ་བའི་ལས་འགུལ་ཞིག་ཡིན་ཚུལ་བརྗོད་ཀྱིན་ཡོད། ལར་ནས་བོད་ཀྱི་བླ་སྤྲུལ་དག་ལའང་བོད་ཀྱི་གནད་དོན་སེལ་ཕྱོགས་ཐད་ཐུགས་འགན་ཡོད་པ་ནང་བཞིན། ད་བར་འདིའི་ཐད་མཛད་པ་འཕྲིན་ལས་བསྐྱངས་ཡོད་པ་རེད། ཡིན་ནའང་ལས་འགུལ་ངེས་ཅན་རིགས་ལ་གཏད་ནས་བླ་ཆེན་ཆེ་གྲས་དག་གི་མཚན་དྲངས་ཡོང་ན་མི་དམངས་ཀྱི་མགོར་གནོན་ཤུགས་ལྟ་བུར་མི་འགྲོ་བའི་ངེས་པའང་མེད་སྟབས་ང་ཚོས་ཆོས་ཀྱི་དབུ་ཁྲིད་དག་སྲིད་ཀྱི་སྣེ་མོར་གདན་འདྲེན་སྐབས་དམངས་གཙོའི་ལྟ་གྲུབ་དང་ལག་ལེན་ལ་བསྟུན་གང་ཐུབ་བྱེད་རྒྱུ་ནི་གལ་ཆེ་བར་འདོད།
དེ་དང་མཉམ་དུ། བཞུགས་སྒར་ཁུལ་གྱི་གཞུང་འབྲེལ་མ་ཡིན་པའི་ཚོགས་པ་ཁག་གིས་མི་དམངས་སྒེར་ལངས་ཆེན་མོའི་གོམ་བགྲོད་ཅེས་པའི་ལས་འགུལ་ཞིག་གོ་སྒྲིག་བྱེད་ཀྱིན་ཡོད་ལ། ལས་འགུལ་ཆེན་པོ་འདི་སྤེལ་བའི་ཆེད་དུ་ཟླ་ངོ་མང་པོར་གྲོས་བསྡུར་རིམ་པར་བྱས་ཤིང་། འདིའི་ཐད་ཟབ་སྤྱོང་ཡང་སྤྲད་ཡོད། སྤྱིར་བཏང་དབུ་མའི་ལམ་གྱི་ལས་འགུལ་དང་མི་དམངས་སྒེར་ལངས་ཆེན་མོའི་ལས་འགུལ་འདི་གཉིས་ཀ་བོད་སྤྱིའི་རྩ་དོན་ཆེད་ཡིན་ནའང་། དམིགས་ཚད་ཀྱི་སྟེང་ནས་མི་འདྲ་སྟེ། བཀའ་ཁྲི་མཆོག་གིས་བོད་ཀྱི་གནད་དོན་འདི་སེལ་བར་ངང་སྒུག་བྱེད་ཐུབ་དགོས་སྐོར་དང་།  ད་དུང་ལོ་བརྒྱ་ཕྲག་གཅིག་འགོར་ནའང་དེ་ལ་དཔག་པའི་གྲ་སྒྲིག་བྱེད་དགོས་སྐོར་གསུང་གི་ཡོད་ལ། ཚོགས་པ་ལྔས་བོད་དོན་སེལ་བར་ངང་སྒུག་གི་དུས་ཚོད་མེད་ལ། ལྷག་པར་དུ་ལོ་ཕྱི་ནང་འདི་ནི་བོད་དོན་སེལ་ཐབས་ཀྱི་གོ་སྐབས་ཡག་ཤོས་དང་ཛ་དྲག་ཆེ་ཤོས་ཤིག་ཡིན་སྐོར་བརྗོད་ཀྱིན་ཡོད་ལ། ད་དུང་ལོ་མང་པོ་འགོར་ཚེ་བོད་མི་རིགས་རིག་གཞུང་དང་བཅས་པ་རྩ་མེད་དུ་འགྲོ་རྒྱུའི་བསམ་ཚུལ་འདོན་གྱིན་ཡོད། འདི་ལྟར་རྡ་སའི་རི་ངོགས་འདིར་ང་ཚོའི་གཞུང་དང་གཞུང་འབྲེལ་མ་ཡིན་པའི་ཚོགས་པ་ཁག་གིས་བོད་དོན་ལས་འགུལ་གྱི་ཐིག་རིས་འཐེན་སྟངས་ཏོག་ཙམ་མི་འདྲ་བར་འདུག་ལ། ལྷག་པར་དུ་ཉིན་ཤས་སྔོན་བཀའ་ཁྲི་མཆོག་གིས་གསུང་བཤད་གནང་སྐབས། བར་ལམ་ཞིག་ལ་དབུ་མའི་ལམ་གྱི་སྲིད་བྱུས་དེ་གཞུང་འཛིན་གྱི་སྲིད་བྱུས་ཤིག་ལས་མང་ཚོགས་ཀྱི་རྒྱབ་སྐྱོར་དེ་ཙམ་མེད་པའི་རྣམ་པ་སྟོན་མཁན་བྱུང་ཡོད། གཞུང་འབྲེལ་མ་ཡིན་པའི་ཚོགས་པ་ཁག་ཅིག་གིས་དབུ་མའི་ལམ་ལ་རྒྱབ་སྐྱོར་བྱེད་ཀྱིན་ཡོད་ཟེར་ཡང་། དངོས་སུ་ལས་འགུལ་སྤེལ་སྐབས་རྒྱབ་སྐྱོར་གྱི་རྣམ་པ་ཐོན་མེད་ཅེས་ཐུགས་ཕམ་ལྟ་བུའི་གསུང་བཤད་ཀྱང་གནང་ཡོད།  འདི་ལྟར་ང་ཚོའི་གཞུང་དང་གཞུང་འབྲེལ་མ་ཡིན་པའི་ཚོགས་པ་ཁག རྒྱ་ཆེ་མི་དམངས་བཅས་ཀྱི་བར་དུ་མངོན་གསལ་མ་ཡིན་པའི་འགལ་ཟླའམ། ཡང་ན ། བོད་ཀྱི་རྩ་དོན་ཐད་འགན་ལེན་བྱེད་ཕྱོགས་ཀྱི་རྣམ་པ་མི་འདྲ་བ་རེ་མཐོང་རྒྱུ་འདུག་པས། འདི་དག་ཀྱང་སྦྱངས་བཤད་བྱེད་དགོས་པའི་གྲས་ཡིན་པར་འདོད།།

བསྐྱར་བཅོས།: ༢༠༡༤/༠༣/༢༦

Leave a Reply