ཨབ་གྷན་གྱི་དབྱར་ཟླ་དྲུག་པའི་ཉོག་ཤ

ཨ་རིས་སྣེ་ཁྲིད་པའི་བྱང་དམག་དོན་སྒྲིག་འཛུགས་ཀྱིས་ཨབ་གྷན་ནང་བཙན་འཛུལ་བྱས་ཏེ་ཊ་ལི་བྷན་གྱི་གཞུང་མགོ་རྟིང་བསླགས་པ་ནས་ད་བར་དུ། ཟླ་གཅིག་གི་ནང་དུ་ཨ་རིའི་དམག་མི་བསད་གྲངས་མང་ཤོས་ནི་ལོ་འདིའི་ཕྱི་ཟླ་དྲུག་པ་ཡིན་འདུག
༢༠༠༡ གི་ལོ་ནས་བཟུང་ཨ་རི་དང་བྱང་དམག་དོན་སྒྲིག་འཛུགས་ཀྱིས་ཊ་ལི་བྷན་གྱི་གཞུང་མགོ་རྟིང་བསླགས་ཡོད་ནའང་། ཊ་ལི་བྷན་གྱི་དྲག་སྤྱོད་དམག་མིས་ལོ་ནས་ལོར་བསྟུད་དེ་ཚུར་རྒོལ་རབ་དང་རིམ་པར་བྱས་ཡོད་ལ། དེའི་ཁྲོད་ཨ་རིའི་དམག་མི་མང་པོ་ཞིག་གི་ཚེ་སྲོག་ཤོར་ཡོད། ཡིན་ནའང་། ལོ་འདིའི་ཟླ་དྲུག་པ་ནི་འདས་པའི་ལོ་བདུན་གྱི་རིང་ཟླ་གཅིག་གི་ནང་དུ་ཨ་རིའི་དམག་མི་བསད་པ་མང་ཤོས་ཆགས་ཡོད་ཅིང་། ཁྱོན་སྡོམ་ཟླ་སྔོན་མའི་ནང་དུ་ཨ་རིའི་དམག་མི་ ༤༦ བསད་ཡོད་ཅིང་། ཨི་རག་གི་ནང་ནས་བསད་གྲངས་ཅུང་ཇེ་ཉུང་དུ་ཕྱིན་པ་དང་བསྟུན། ཨབ་གྷན་དུ་བསད་གྲངས་འཕར་གྱིན་ཡོད་འདུག་ལ། ད་ཆར་ཊ་ལི་བྷན་གྱི་སུམ་འཛུལ་དང་སྟོབས་ཤུགས་མངོན་སུམ་གྱིས་རྒྱས་ཏེ། ཨབ་གྷན་གྱི་ལྷོ་ཕྱོགས་དང་ཤར་ཕྱོགས་ཀྱི་ས་ཁུལ་མང་པོ་ཞིག་ཁོང་ཚོའི་ལག་ལ་ཤོར་ཡོད་འདུག
ཨ་རིའི་དམག་མིའི་བཀོད་འདོམ་པ་ཞིག་གིས་བརྗོད་པ་ལྟར་ན། ལོ་འདིའི་ཕྱི་ཟླ་དང་པོ་ནས་ལྔ་པ་བར་ཊ་ལོ་བྷན་འཇབ་དམག་གིས་ཚུར་རྒོལ་བྱས་དེ་ན་ནིང་གི་དུས་ཚིགས་གཅིག་མཚུངས་འདིར་བསྡུར་ན་བརྒྱ་ཆ་ ༤༠ འཕར་ཡོད་འདུག རགས་རྩིས་ལྟར་ན། ཨབ་གྷན་དུ་ཨ་རིའི་དམག་མི་ ༣༢༠༠༠ ལྷག་ཡོད་ཅིང་། ༢༠༠༥ ལོར་ཨ་རིའི་དམག་མི་ ༢༥༠༠༠ ཡོད་ཚུལ་འདུག ཨ་རིའི་དབུས་དམག་སྒར་གྱིས་ད་དུང་དམག་མི་ ༧༠༠༠ འཕར་སྣོན་བྱས་ཏེ་དྲག་རྒོལ་གྱི་ས་ཁུལ་ཁག་ནང་འབུར་འཇོམས་བྱེད་ཀྱི་ཡིན་ཚུལ་བརྗོད་ཀྱིན་ཡོད།
ཨབ་གྷན་ནང་ཨ་རིའི་དམག་མིའི་ཕན་ནས་རྒྱལ་ཁབ་གཞན་པ་དག་གི་དམག་མིའང་ ༣༨༠༠༠ ལྷག་ཡོད་ལ། དེ་དག་ནི་བྱང་དམག་དོན་སྒྲིག་འཛུགས་ཀྱི་འོག་ནས་ཨབ་གྷན་གྱི་ཡུལ་ལུང་སོ་སོར་བཀྲམས་ནས་ཡོད་འདུག ཝ་ཤིན་ཊོན་གྱི་དམག་སྒར་དང་ཨབ་གྷན་ནང་ཡོད་པའི་ཨ་རིའི་དམག་སྒར་གྱི་མགོ་ཁྲིད་ཚོས་ཨབ་གྷན་ནང་རྒྱལ་ཁབ་མཉམ་འབྲེལ་གྱི་དམག་མི་བཞག་པའི་གྲངས་འབོར་ཉུང་དྲག་ཡོད་ཚུལ་གླེང་གི་ཡོད། ཨ་རིའི་དམག་མི་འཕར་སྣོན་དང་སྦྲགས་ཝ་ཤིན་ཊོན་གྱིས་བྱང་དམག་དོན་སྒྲིག་འཛུགས་ཀྱི་ཁོངས་གཏོགས་རྒྱལ་ཁབ་རྣམས་ལ་ཨབ་གྷན་ནང་དམག་མི་འཕར་སྣོན་བྱེད་དགོས་པའི་སྐུལ་མ་བྱེད་ཀྱིན་ཡོད།
ཨ་རིའི་སེམས་ཁྲལ་འདི་ནི་གསང་བའི་ལས་ཁུངས་ནས་ཨབ་གྷན་ནང་གི་ངོ་ལོག་པའི་གནས་སྟངས་སྐོར་ལ་སྙན་ཐོ་བཏོན་པ་དང་བསྟུན་ནས་སླེབས་ཡོད། བདུན་ཕྲག་སྔོན་མའི་ནང་གསང་བའི་ལས་ཁུངས་ཀྱིས་སྙན་ཐོ་བཏོན་པ་ལྟར་ན། ཨབ་གྷན་ནང་དུ་ངོ་ལོག་ཤོག་ཁག་རིགས་གཉིས་ཡོད་ཅིང་། གཅིག་ནི་ཊ་ལི་བྷན་གྱིས་སྣེ་ཁྲིད་དེ་ཨབ་གྷན་ལྷོ་ཕྱོགས་ཀྱི་ཁན་ཌ་ཧར་ས་ཁུལ་དུ་ཡོང་གི་ཡོད་ལ། གཞན་དེ་ནི་ཨབ་གྷན་ཤར་ཕྱོགས་ཀྱི་འཇབ་དམག་ཁག་མཉམ་འབྲེལ་གྱིས་གྲུབ་ཡོད་འདུག་ལ། ཤོག་ཁག་འདི་གཉིས་ཀྱི་ཐུན་མོང་གི་དམིགས་ཡུལ་ནི་ཨབ་གྷན་ནང་ཡོད་པའི་ཕྱི་རྒྱལ་གྱི་དམག་མིའི་བསྟི་གནས་ཚང་མ་གཏོར་ཏེ་རྩད་རྫོགས་བྱེད་རྒྱུ་དེ་ཡིན་ཚུལ་བཀོད་ཡོད་པ་རེད།

བསྐྱར་བཅོས།: ༢༠༡༧/༠༢/༡༦

Leave a Reply