དབྱིན་ཇིས་བོད་བཙོང་བ་མ་རེད།

ཉེ་ལམ་ཨ་རིའི་བོད་དོན་མཁས་དབང་རོ་བྷེར་ཊི་བྷེར་ནེ་ཡིས། དབྱིན་ཇིས་བོད་རང་དགར་བཙོང་བ་རེད་དམ།ཅེས་དབྱིན་ཇིའི་གཞུང་གིས་བོད་དོན་ལངས་ཕྱོགས་ལ་འགྱུར་བ་བཏང་བའི་ཐད་སྐྱོན་བརྗོད་བྱས་ཡོད་ལ། དབྱིན་ཇིའི་ལངས་ཕྱོགས་དེས་ཐ་ན་རྒྱ་གར་དང་རྒྱ་ནག་གཉིས་ཀྱི་ས་མཚམས་རྩོད་རྙོག་ལའང་ཤུགས་རྐྱེན་ཐེབས་ངེས་པའི་སྐོར་བརྗོད་ཡོད་ལ། ཁོང་གི་རྩོམ་ཡིག་དེ་ཕྱི་ཟླ་ ༡༡ པའི་ཚེས་ ༢༥ ཉིན་ནེའུ་ཡོག་དུས་བབ་གསར་ཤོག་སྟེང་སྤེལ་ཡོད་པ་རེད།

ཕྱི་ཟླ་ ༡༢ ཚེས་ ༡ ཉིན་དབྱིན་ཇིའི་ཕྱི་སྲིད་ལས་ཁུངས་ཀྱིས། དབྱིན་ཇིའི་བོད་དོན་ལངས་ཕྱོགས། རང་སྐྱོང་དང་འགྲོ་བ་མིའི་ཐོབ་ཐང་། ཅེས་པ་ཞིག་བཀོད་དེ་རོ་བྷེར་ཊི་བྷེར་ནེ་ཡི་རྩོམ་ཡིག་དེར་ལན་འདེབས་བྱས་དོན། སྐུ་ཞབས་ རོ་བྷེར་ཊི་བྷེར་ནེ་ ཡི་སྐྱོན་བརྗོད་དེ་ནི་དྲང་པོ་མ་རེད། དབྱིན་ཇི་དང་ཨ་རི། དེ་བཞིན་འཛམ་གླིང་གང་དུའང་བོད་ནང་གི་འགྲོ་བ་མིའི་ཐོབ་ཐང་དེ་ནི་ངོས་ལེན་བྱེད་མི་ཐུབ་པ་ཞིག་ལ་ངོས་འཛིན་བྱེད་གི་ཡོད་ལ། སྲིད་བློན་ གྷོར་ཌོན་ བྷུ་རོན་མཆོག་གིས་ཀྱང་འདིའི་ཐད་མུ་མཐུད་ནས་རྒྱ་ནག་གཞུང་ལ་མཇུག་གནོན་བྱེད་གི་རེད་ཅེས་དང་། བོད་ཀྱི་གནད་དོན་འདིར་རྒྱུན་ཐུབ་པའི་ཐག་གཅོད་ཅིག་འཚོལ་དགོས་ན་འབྱུང་འགྱུར་ལ་ཁ་ཕྱོགས་དགོས་པ་ལས། འདས་ཟིན་པར་ཁ་ཕྱོགས་ན་འགྲིག་གི་མ་རེད། ཏཱ་ལའི་བླ་མ་མཆོག་གིས་ཀྱང་ཁོང་ལ་རྒྱ་ནག་གི་འོག་ནས་རང་སྐྱོང་དགོས་ཞེས་པ་ལས། རང་བཙན་རྩོད་གི་མི་འདུག ང་ཚོས་ཀྱང་རང་གི་ལངས་ཕྱོགས་ལ་གསར་བཅོས་བྱས་པ་ཡིན་ལ་འདི་ནི་ལམ་ཁ་ཡག་ཤོས་ཀྱང་རེད། འདིའི་གོ་དོན་ནི་ང་ཚོས་བོད་ནི་རྒྱ་ནག་གི་ཆ་ཤས་ཤིག་ཡིན་པར་བསམ་བློ་གཏོང་གི་ཡོད། འདི་ནི་ང་ཚོས་རང་སྐྱོང་དང་འགྲོ་བ་མིའི་ཐོབ་ཐང་གི་ཐད་རྒྱབ་སྐྱོར་མཚམས་འཇོག་བྱས་པ་མིན། དྲང་མོར་བཤད་ན་ང་ཚོས་མཚམས་འཇོག་གི་མ་རེད། ཅེས་བཀོད་འདུག

ང་ཚོའི་བསྒྲགས་གཏམ་དེས་ཉེ་ཆར་གྱི་བོད་རྒྱའི་གྲོས་མོལ་དེ་བཟང་ཕྱོགས་ཀྱི་རྣམ་པར་འཕེལ་དགོས་པ་གསལ་བོར་བསྟན་ཡོད་ལ། འབྲེལ་མོལ་གྱི་སྔོན་དེར་ང་ཚོས་བསྒྲགས་གཏམ་སྤེལ་བའི་རྒྱུ་མཚན་ཡང་འདི་ཡིན། ཏཱ་ལའི་བླ་མ་མཆོག་གི་སྐུ་ཚབ་རྣམ་པས་གྲོས་འཆར་པུལ་བ་གཞིར་བཟུང་གྲོས་མོལ་ནི་ཛ་དྲག་གི་ངང་ད་ཆ་ངེས་པར་བསྐྱར་མཐུད་བྱེད་དགོས་གི་འདུག རྒྱ་ནག་གིས་བསམ་བློ་གུ་ཡངས་པོའི་སྒོ་ནས་གྲོས་འཆར་འདི་དག་ལ་གཟིགས་དགོས་པ་རེད་ཅེས་བཀོད་འདུག

བསྐྱར་བཅོས།: ༢༠༠༨/༡༢/༠༢

Leave a Reply

2 thoughts on “དབྱིན་ཇིས་བོད་བཙོང་བ་མ་རེད།

  1. དེ་ངོ་མ་རེད། དབྱིན་ཇིས་ཀྱང་ཏཱ་ལའི་བླ་མ་དགག་ལན་རྒྱག་བྱེད་དུ་བཟུང་ཡོད་པས་མཚོན་ལ། མ་འོངས་པར་རྒྱ་མིས་ཀྱང་རང་བཙན་འགོག་བྱེད་ཀྱི་ལག་ཆར་འཛིན་ངེས་ཡིན་པར་མ་ཟད། བོད་མིས་ཀྱང་དོན་དག་མ་འགྲུབ་པ་ཆ་ཚང་ཁོང་གི་སྒང་ལ་གཡོགས་རྒྱུ་ཡིན་པ་གསལ་བོ་ཡིན། དེ་བས། འདི་དག་ཚང་མ་ཏཱ་ལའི་བླ་མར་དུས་རབས་ཀྱིས་བཏོན་པའི་དྲི་བ་ཡིན་ལ། རྣམ་དཔྱོད་ཀྱི་ལྕི་ཚད་གཞལ་བའི་རྒྱ་མའང་ཡིན།

  2. མི་ནག་ཚང་ལུང་རིགས་རྒྱལ།

    རྗེས་ཕྱོགས་བོད་ཀྱི་གནད་དོན་ཀྱི་ཕྱོགས་ནས་འགྲིག་དང་མི་འགྲིག་གི་སྐད་ཆ་ཅི་ཞིག་བྱུང་ནའང་༧གོང་ས་མཆོག་གི་མཚན་གནས་ལ་འབྲེལ་རྒྱུ་ཡིན་པ་ནི་གོར་མ་ཆག དཔེར་ན། ཕྱི་རྒྱལ་བ་ཚོ་ལོས་ཀྱང་ཡིན། ཐ་ན་བོད་པ་རང་གི་ཕྱོགས་ནས་ཀྱང་གནས་སྟངས་གང་ལ་ཐུག་ནའང་རྒྱལ་བ་རིན་པོ་ཆེ་མཆོག་གིས་ཐག་གཅོད་རོགས་ཞེས་དང་། འདི་རྒྱལ་བ་རིན་པོ་ཆེ་མཆོག་གི་དགོངས་གཞི་རེད། ཅིག་ཤོས་དེ་དགོངས་གཞི་ལ་འགལ་བ་རེད་ཅེས་བོད་དོན་ཐད་བསམ་ཚུལ་གསར་པ་དང་མ་འདྲ་བ་འཛིན་མཁན་ཚོ་ཡང་གནོན་ཅི་ཐབས་བྱས་པ་རེད། བཙན་བྱོལ་བོད་གཞུང་གི་ཕྱོགས་ནས་རང་སྲིད་རང་སྐྱོང་གི་དགོས་འདུན་འདོན་གི་ཡོད་སྟབས། དབྱིན་ཇིའི་གཞུང་ལ་ བཤད་བདེ་བོ་མེད་ནའང་། མི་སྒེར་དང་ཚོགས་པ་ཁག་གིས་ལན་འདེབས་རེ་བྱེད་དགོས་པར་འདོད། ལར་ནས་ཉེ་ཆར་གྱི་དམིགས་བསལ་ཚོགས་ཆེན་གྱི་རྗེས་ནས་ང་ཚོའི་སྤྱི་ཚོགས་ཧྲིལ་བོར་ལབ་རྒྱུ་གླེང་རྒྱུ་མེད་པ་ཞིག་བཟོས་འདུག་སྙམ།