ཁྱེད་ལ་དམ་བཅའ་ཡོད་དམ།

བོད་ཀྱི་དུས་བབ་སྤྱིའི་འདོན་ཐེངས་ ༤༣༥ པའི་སྟེང་གི་རྩོམ་སྒྲིག་པའི་གཏམ།

༢༠༠༩ ལོ་ནས་བཟུང་ང་ཚོར་སླར་ཡང་ལོ་གཅིག་སར་བ་མ་རེད། ལོ་ ༥༠ པ་དེ་སར་པ་རེད། དུས་རབས་ཤིག་གི་ཕྱེད་ཀ་ཚང་བ་རེད། དེ་བས་ཁྱེད་ལ་དམ་བཅའ་འདྲ་ཡོད་དམ། ལོ་གཅིག་གི་དམ་བཅའ་མིན་པར། མ་འོངས་པའི་ལོ་ ༥༠ རིང་གི་དམ་བཅའ།

ང་ཚོས་འདི་ལྟར་མིག་རྒྱང་ཇེ་རིང་དུ་གཏོང་དགོས་པར་འདུག ང་ཚོའི་ཤེས་རིག་ཟབ་མོ་དེའི་ཆུ་མགོ་སྐམ་གྱིན་འདུག ང་ཚོའི་གདེང་སྤོབས་མཐོན་པོ་དེའི་རྨང་རྡོ་ཆག་གིན་འདུག དོན་དམ་དུ་ང་ཚོའི་འདས་ཟིན་པའི་ལོ་ ༥༠ ནི་ས་མཐའི་ཉམས་མྱོང་ཙམ་ལས་གཞི་འཇོག་ས་མེད་པར་གྱུར་འདུག ཡིན་ཡང༌། མ་འོངས་པའི་ལོ་ ༥༠ དེ་ཉམས་མྱོང་འདི་དག་གཞི་ལ་བཞག་སྟེ། ང་ཚོས་དོན་དམ་གྱིས་མི་རིགས་ཀྱི་རིག་གཞུང་དང་ངོ་བོ་སྲུང་སྐྱོབ། མི་རིགས་ཀྱི་འཐབ་རྩོད་ལ་ཆོད་སེམས་ཡོད་པ་དང༌། འཆར་གཞི་ཡོད་པའི་ཐོག་སྙུགས་སྲིང་ནས་ལས་དོན་སྒྲུབ་དགོས་པར་འདུག

ང་ཚོའི་ལས་དོན་མཐའ་དག་གི་དང་པོ་ནི་བོད་མིའི་ནུས་པ་གསོ་རྒྱུ་དེ་ཡིན་ངེས། ནུས་པ་གང་གསོས་པ་དེ་དག་ཁ་འཐོར་མིན་པར་དབུས་ཀྱི་ནུས་པ་གཅིག་གི་སྟེང་སྤུངས་དགོས་པར་འདུག འདིའི་མཐར་ཐུག་གི་གོ་དོན་ནི་བོད་མི་ཚང་མས་འགྲོ་བ་མིའི་རྣམ་དཔྱོད་དང་དངོས་པོའི་གནས་ལུགས་ཀྱི་སྟེང་ནས་བོད་དོན་འཐབ་རྩོད་ཀྱི་ཆོད་སེམས་བརྙེད་དགོས་པ་དང༌། ཆོད་སེམས་དེ་ཡང་ཆིག་སྒྲིལ་གྱི་ངོ་བོར་གནས་དགོས་པ་དེ་ཡིན། རྨང་གཞི་འདི་ལྟ་བུ་ཞིག་གི་སྟེང་ནས་ང་ཚོས་འབྱུང་འགྱུར་གྱི་ལོ་ ༥༠ དེ་མགོ་འཛུགས་དགོས་པ་ནི་བོད་མི་རིགས་ཀྱི་དམ་བཅའ་ཡིན་འོས།

འདས་ཟིན་པའི་ལོ་ ༥༠ རིང་ང་ཚོས་རང་ཉིད་ཀྱི་ནུས་པ་སྐྲུན་མ་ཐུབ་པ་དང༌། ནུས་པ་གང་འཚམ་ཡོད་པ་དེའང་དབུས་ཀྱི་ནུས་པ་གཅིག་གི་སྟེང་སྤུངས་མ་ཐུབ་པའི་རྐྱེན་གྱིས་ཤེས་ཡོན་འཐུས་ཤོར་དང་ལས་དོན་གང་ཅིར་ཚགས་ཚུད་མེད་པའི་རྣམ་པ་བྱུང་བར་འདོད། ང་ཚོར་རང་དབང་དང་དམངས་གཙོ་དགོས་པ་རེད། ཡིན་ཡང་འདི་དག་ནི་ང་ཚོའི་ཐུན་མོང་གི་མངོན་འདོད་དང་གོང་བུའི་ནུས་པར་མི་གནོད་པ་ཞིག་དགོས་པ་རེད། ང་ཚོར་དཔལ་འབྱོར་འཚོལ་སྒྲུབ་ཀྱི་གོ་སྐབས་དགོས་པ་རེད། འོན་ཀྱང་དཔལ་འབྱོར་གྱི་འཚོལ་སྒྲུབ་ཀྱི་དོན་དུ་མི་རིགས་ཀྱི་འཐབ་རྩོད་བློས་གཏོང་བྱེད་པ་ནི་ག་ལ་རུང༌། དེས་ན། ང་ཚོས་འཆར་ལོར་བཙན་བྱོལ་གྱི་མི་ལོ་ ༥༠ སྲུང་གཙོ་བྱེད་སྐབས་ཀྱང་ཁ་ཕྱོགས་འདི་འདྲ་ཞིག་ལ་བསམ་བློ་བཏང་སྟེ། གཞུང་སྒེར་གྱི་སྒྲིག་འཛུགས་ཁག་དང་མི་སྒེར་རེ་རེ་ནས་དམ་བཅའ་འདི་འདྲ་ཞིག་ལེན་པའི་དུས་ལ་བབ་ཡོད་པར་འདོད་དོ།།

བསྐྱར་བཅོས།: ༢༠༡༤/༠༣/༢༦

Leave a Reply

3 thoughts on “ཁྱེད་ལ་དམ་བཅའ་ཡོད་དམ།

  1. བོད། ཤ་ཁྲག་རུས་གསུམ།

    བོད་ཀྱི་དུས་བབ་ཚང་ལ་སྙིང་ཐག་པ་ནས་བཀའ་དྲིན་ཆེ་ཞུ་རྒྱུ་ཡིན། མི་མང་ནི་ཁ་རྫུན་བཤད་རྒྱུར་དགའ་བས་དཀའ་གནད་དེ་དག་ཁྱེད་ཅག་གིས་འབྲེལ་ཡོད་ཀྱི་མི་སྣ་དག་ལ་ཞིབ་འདྲི་བྱས་དེ་༧གོང་ས་མཆོག་གི་སྐུའི་བདེ་ཐང་བསྐོར་འདིར་བཀོད་གནང་བ་ལ་སླར་ཡང་སེམས་གཏིང་ནས་ཐུགས་རྗེ་ཆེ་ཞུ་རྒྱུ་ཡིན།

  2. མི་རེ་རེར་དམ་བཅའ་རེ།
    ཁྱིམ་ཚང་རེ་རེར་དམ་བཅའ་རེ།
    ཚོགས་པ་རེ་རེར་དམ་བཅའ་རེ།
    དེ་རིང་ནས་ང་ཚོས་དམ་བཅའ་ཞིག་འཇོག་དགོས་པ་ནི་ཐུན་མོང་གི་འོས་འགན་ལགས།
    གནད་དོན་ཅི་ཞིག་གི་ཐོག་ཏུ་དམ་བཅའ་འཇོག་དགོས་སམ།
    ཐབས་ཚུལ་ཅི་འདྲ་ཞིག་སྤྱད་དེ་དམ་བཅའ་འཇོག་དགོས་སམ།
    འདི་ལྟར་ད་དུང་མི་ལོ་ལྔ་བཅུའི་རིང་འདུག་མི་དགོས་པར་དམ་བཅའ་འཇོག་དགོས་སམ།
    ཡང་ན།
    ད་དུང་མི་ལོ་ལྔ་བཅུའི་རིང་འདི་ལྟར་ཡུལ་གྱར་ནས་ཡུལ་གྱར་དུ་གྱེས་པའི་དམ་བཅའ་འཇོག་དགོས།
    དེའི་ཐོག་ང་ཚོས་མནོ་བསམ་བཏང་ནས་ཉིས་སྟོང་དགུ་ལོའི་ཉིན་དང་པོ་འདིར་དམ་བཅའ་ཞིག་དགོས།
    མདོར་ན།
    རང་དང་གཞན།
    ཁྱིམ་ཚང་དང་སྤྱི་ཚོགས།
    མི་རིགས་དང་རྒྱལ་ཁབ།
    འཛམ་གླིང་གི་ཆེད་དུའང་དམ་བཅའ་ཞིག་ང་ཚོས་འཇོག་ཐུབ་མིན་ལ་འབད་བརྩོན་བྱ་དགོས།