༡༩༦༨ ལོའི་གསུམ་བཅུའི་དུས་དྲན་གྱི་གསུང་འཕྲིན།

    ད་རིང་ང་ཚོས་དུས་དྲན་བྱེད་པ་འདི་ནི། བོད་མི་ཡོངས་རྫོགས་ཀྱི་ཤིན་ཏུ་རྩ་ཆེའི་དུས་ཚེས་ཤིག་ཡིན་ཏེ། བཙན་འོག་ཏུ་ཚུད་པའི་བོད་མི་མང་ནས་རང་དབང་གི་དོན་དུ་བཙན་གནོན་བྱེད་པོར་ལོ་རྒྱུས་དང་ལྡན་པའི་འཐབ་འཛིངས་བྱེད་པ་འདི་བཞིན་རྒྱལ་རབས་ཐོག་གལ་གནད་ཆེན་པོའི་ལེའུ་ཞིག་ཆགས་ཡོད། གང་ལགས་ཤེ་ན། ལོ་ངོ་དགུའི་སྔོན་གྱི་ཉི་མ་འདི་ཉིན་བོད་ཀྱི་མི་མང་ཚོས་རྒྱ་དམར་དབང་བསྒྱུར་བའི་འོག་ནས་རང་དབང་ཐོབ་ཆེད་དཔའ་མཛངས་ལྷག་པར་ཆེ་བའི་འབད་བརྩོན་ཤུགས་ཆེ་ཞིག་བྱས་ཡོད།

     རྒྱ་མིས་ནི་རྒྱུ་མཚན་ཁུངས་ལུང་གང་ཡང་མེད་པའི་གདོང་འབག་གྱོན་ཏེ། ང་ཚོའི་རྒྱལ་ཁབ་ཐོག་ཁོ་པ་ཚོའི་བདག་དབང་ཡོད་ལུགས་གསལ་བསྒྲགས་ཀྱིས་དྲག་ཤུགས་ཀྱི་སྒོ་ནས་བཙན་འཛུལ་བྱས་ཏེ་བསྡད་ཡོད་པ་དང༌། ང་ཚོས་རྒྱ་དམར་དྲག་ཤུགས་ཆེ་བར་རྒོལ་ལངས་བྱས་པའི་ཉིན་དེར་བསམ་དོན་ཇི་བཞིན་འགྲུབ་པ་མ་བྱུང་བའི་ཁར། འདིའི་རྐྱེན་གྱིས་ང་ཚོ་ཡུལ་མི་སྟོང་ཕྲག་མང་པོ་རྒྱ་དམར་ནས་སྡེབ་གསོད་བཏང་བའི་གནས་ཚུལ་ཐབས་རྡུགས་བྱུང༌། གང་ལྟར་ཡང༌། མིའི་རིགས་སུ་འདྲ་ཞིག་ཡིན་རུང༌། འགྲོ་བ་མིའི་ཆེ་མཐོང་དང༌། རྒྱལ་ཁབ་ཆེ་ཆུང་ཇི་ལྟར་ཡིན་ཡང་དེའི་རང་དབང་ལ་ཡིད་ཆེས་ཡོད་པའི་སེམས་སྟོབས་དེ་ནི་བཙན་དབང་བྱེད་པོའི་ནུས་ཤུགས་ཀྱིས་གནོན་འགོག་ནམ་ཡང་བྱེད་མི་ཐུབ། ལོ་རྒྱུས་དང་ལྡན་པའི་ཉི་མ་དེར་རྒྱ་མི་ལ་ངོ་རྒོལ་བྱས་ནས་བོད་རྒྱལ་ཁབ་ཡོངས་རྫོགས་གཅིག་སྒྲིལ་དུ་གྱུར། འཛམ་གླིང་ཐོག་ང་ཚོའི་རྒྱལ་ཁབ་རང་བཙན་མཚན་ཉིད་ཚང་བ་ཞིག་ཡིན་ཞེས་བསྐྱར་དུ་གསལ་བསྒྲགས་ཀྱང་བྱས་ཡོད། བོད་ཕྱི་ནང་གང་དུ་ཡིན་ཡང་རུང༌། ང་ཚོ་མི་རིགས་ཤིག་ཡིན་པའི་ཐོབ་ཐང་ཡོད་ཅེས་པའི་འཐབ་རྩོད་དེ་ད་དུང་ཡང་ང་ཚོས་མུ་མཐུད་དེ་བྱེད་བཞིན་པ་ཡིན།

    བོད་ནང་ལུས་པའི་ང་ཚོའི་མི་མང་ཚོས་ལུས་སེམས་གཉིས་ཀའི་ཐོག་ནས་འཐབ་འཛིངས་བྱེད་ཀྱི་ཡོད། རྒྱ་མིས་བོད་མི་མང་གི་འཐབ་འཛིངས་དེ་དྲག་ཤུགས་ཅི་རིགས་དང༌། མིང་འདོགས་སྣ་ཚོགས་ཀྱི་སྒོ་ནས་འགོག་བསྡོམས་བྱེད་ཀྱི་ཡོད་ཀྱང༌། ཁོ་པ་ཚོའི་བྱེད་ངན་དེ་ལ་གྲུབ་འབྲས་ཇི་བཞིན་མ་ཐོན་པ་ནི་རྒྱ་མི་རང་ཉིད་ནས་ཀྱང་ངོས་ལེན་བྱས་འདུག རྒྱ་མི་དམར་པོས་ས་མཚམས་ཁག་ཏུ་དམ་བསྒྲགས་ཇེ་ཆེ་ཇེ་ཆེར་བཏང་བ་ཡིན་རུང༌། བོད་མི་མང་ཚོ་ནི་རྒྱ་གར་དང་ཁྱིམ་མཚེས་ཡུལ་ཁག་ནང་ལོ་ལྟར་བཙན་བྱོལ་དུ་ཡོང་མུས་འདིས་ཀྱང་བོད་ནང་བོད་མི་མང་གི་འཐབ་འཛིངས་ལས་འགུལ་བཀག་འགོག་མ་ཐུབ་པའི་རྟགས་མཚན་གསལ་པོར་མངོན་ཡོད། ཉེ་དུས་བོད་མི་ ༥༠༠ སྐོར་ཞིག་རྒྱ་གར་ཕྱོགས་སུ་བྲོས་བྱོལ་ཡོང་སྐབས་ལམ་བར་རྐྱེན་འདས་སོང་འདུག དེ་ནི་ཁོང་ཚོས་ཐར་ཐབས་ཤིན་ཏུ་དཀའ་བའི་གནས་ཚུལ་གསལ་པོར་ཤེས་བཞིན་རང་མོས་བློ་ཐག་གཅིག་ཏུ་བཅད་དེ་ཡོང་བ་ཞིག་ཡིན་མོད། རྒྱ་དམར་གྱིས་ད་ལྟ་ཁོ་པ་ཚོས་འདི་ལྟ་བུའི་ཉེན་ཁ་ཅན་གྱི་ཐབས་ལམ་འཚོལ་བ་འདི་ནི་ཧ་ལས་ཡ་མཚན་ཆེ་བའི་གནས་ཚུལ་ཞིག་མ་ཡིན་ནམ།

    རྒྱ་དམར་གྱིས་ད་ཕན་འདས་པའི་ལོ་རེ་རེའི་ནང་བོད་ཕྲུག་སྟོང་ཕྲག་མང་པོ་ཕ་མའི་ས་ནས་བཙན་དབང་གིས་ཁ་འཕྲལ་ཏེ་རྒྱ་ནག་ཏུ་བཏང༌། ཁོང་ཚོའི་ཀླད་པ་འཁྲུ་བའི་ཐབས་ཤེས་ལུ་གུ་བརྒྱུད་དུ་བྱེད་པ་དང༌། རྒྱ་ནག་ཏུ་བཏང་བའི་བོད་རིགས་ཚང་མ་གང་དུའང་འབྲེལ་བ་བྱེད་དུ་མི་འཇུག་པ། ཁོང་ཚོས་མའོ་གི་རིང་ལུགས་དང༌། མའོ་གི་སློབ་སྟོན་ཟེར་བ་དེ་རིགས་ཤ་སྟག་སློབ་སྦྱོང་སྤྲད་ཐོག བོད་རང་གི་འཚོ་བའི་གོམས་གཤིས་ལ་དམའ་འབེབས་དང༌། སྡང་ཟུག་ཚད་མེད་པ་ཞིག་བྱེད་ཀྱི་ཡོད་འདུག ཡིན་ནའང་རྒྱ་མིའི་རེ་ངན་སྟོང་ཟད་དུ་གྱུར་ཡོད། རྒྱུ་མཚན་ཇི་ཡོད་ཅེ་ན། འདི་འདྲའི་སློབ་གསོ་ཐོབ་པའི་བོད་ཕྲུག་མང་ཆེ་བས་རྒྱ་མིས་བོད་ལ་དབང་བསྒྱུར་བྱེད་པ་དེ་ལ་ཞེ་ནས་ངོ་རྒོལ་བྱེད་ཀྱི་ཡོད་ཅིང༌། ཇི་སྲིད་འགྲོ་བ་མི་ཞེས་པའི་བསམ་བློ་གཏོང་ཐུབ་རྒྱུའི་ནུས་པ་དངོས་ཡོད་ཀྱི་བར་དང༌། ཇི་སྲིད་འཇིག་རྟེན་འདི་དྲང་བདེན་གྱི་རྗེས་སུ་འགྲོ་བའི་གནས་ཚུལ་དངོས་ཡོད་ཀྱི་བར་རྒྱ་དམར་ནས་ང་ཚོའི་བོད་ཕྲུག་ཚོའི་ཀླད་པ་འཁྲུ་བའི་ལས་འགུལ་དེ་མཐར་ཕྱིན་པ་ཞིག་རྩ་བ་ནས་ཡོང་མི་ཐུབ།

    རྒྱ་མིས་གྲངས་ཉུང་མི་རིགས་ཀྱི་རྒྱལ་ཁབ་ཁག་ལ་བཙན་འཛུལ་བྱེད་པའི་སྲིད་བྱུས་ལག་ལེན་བསྟར་བ་དེ་ནི་ཧཱན་རྒྱ་རིགས་རང་མཐོངས་རིང་ལུགས་ཤིག་ཡིན་པ་ཐག་བཅད་ཆོག་པ་ཡིན། དོན་ཐོག་ཏུ་འདི་འདྲའི་སྲིད་བྱུས་ལ་ནུས་འབྲས་ཐོན་རྒྱུ་ཕར་བཞག དེ་ལས་ལྡོག་སྟེ་མི་རིགས་སྒེར་ལངས་ལས་འགུལ་གྱི་མེ་ཆེན་ནང་དུ་སྣུམ་རྫས་བཏབ་པ་ལྟ་བུ་ཞིག་བྱུང་ཡོད། རྒྱུ་མཚན་དེ་ལ་བརྟེན་ནས་དམར་པོའི་སྒྲིག་འཛུགས་ནང་ཞུགས་པའི་བོད་མི་ན་གཞོན་ཚོ་ཡང་རང་ཡུལ་མི་མང་གི་ཕྱོགས་སུ་ལངས་ནས་རྒྱ་མིར་མཐའ་གཅིག་ཏུ་ངོ་རྒོལ་བྱེད་བཞིན་ཡོད།

    ང་ཚོའི་ཡུལ་དུ་མི་མང་རང་རང་གི་དད་མོས་ཡིད་ཆེས་ལྡན་པའི་ཆོས་དང་རིག་གཞུང་རྣམས་ཀྱང་རྒྱ་མིས་བཙན་གནོན་བྱེད་པའི་དམིགས་ཡུལ་ལྟེ་བ་ཞིག་ཆགས་ཡོད། རྒྱ་དམར་གྱིས་ཐོག་མར་བཙན་འཛུལ་བྱས་པ་ནས་བཟུང་དགོན་སྡེ་གཙུག་ལག་སློབ་གྲྭ་ཆེ་མོ་ཁག་དང༌། ཤེས་རིག་གི་སྒྲིག་འཛུགས་ཁག་རྩ་མེད་གཏོང་བའི་ལས་འགུལ་བཙུགས་པ་དེ་ནི། ཉེ་བའི་ལོ་ནང་རིག་གཞུང་གསར་བརྗེ་དང༌། སྲུང་དམག་དམར་པོའི་ལས་འགུལ་ཟེར་བའི་ཐོག་ནས་གདུག་རྩུབ་ཇེ་ཆེར་བཏང་སྟེ་དགོན་ཁག་དང༌། ཤེས་རིག་སྒྲིག་འཛུགས་ཁག་ནང་ལྷག་བསྡད་མཁས་པ་དང༌། དགེ་འདུན། གྲུབ་བཙུན་ཡོད་ཚད་ཕྱིར་འབུད་ཀྱིས་ས་གནས་སོ་སོའི་ཡུལ་མི་སྐྱ་བོ་ཚོ་དང་མཉམ་དུ་བོད་དང་ས་འདྲེས་ཀྱི་ཁྱིམ་མཚེས་རྒྱལ་ཁབ་ཁག་གི་ས་མཚམས་ཁག་ཏུ་དམག་གི་འགྲོ་ལམ་བཟོ་བའི་ལས་རྩོལ་ནང་བཙན་འཇུག་བྱས་ཡོད་པ་དང༌། ཁྱིམ་མཚེས་ཡུལ་ཁག་གི་ཞི་བདེར་འཇིགས་སྣང་ཆེན་པོ་བཟོས་ཡོད་པ་མ་ཟད། ང་ཚོ་བོད་རྒྱལ་ཁབ་དེ་ནི་དེང་སང་རྒྱ་དམར་གྱི་དམག་གི་རྟེན་གཞི་ལྟེ་བ་ཞིག་ཏུ་གྱུར་ཡོད་པ་རེད།

    ༡༩༦༦ ལོ་ནས་བཟུང་བོད་ནང་འགྱུར་བ་ཆེན་པོ་བྱུང་ཡོད་པ་སྟེ། རྒྱ་དམར་ནས་བོད་མི་མང་ལ་བཙན་གནོན་དང༌། གནོད་འཚེ་མུ་མཐུད་བྱེད་ཀྱི་ཡོད་པའི་ཐོག རྒྱ་མི་ཁོ་ཚོ་རང་ཉིད་ནང་ཁུལ་ལའང་ནང་འཁྲུག་རྒྱུན་དུ་ཡོད་མུས་རེད། བོད་རང་སྐྱོང་ལྗོངས་ལྷན་ཁང་ནང་མི་མང་ནས་འདེམས་བསྐོས་ཟེར་བའི་འཐུས་མི་ ༣༠༡ ཡོད་པ་ཚང་མ་ལས་འཁུར་ཕྱིར་འཐེན་བྱས་ཏེ་བོད་ཐོག་རྒྱ་མིས་ལག་ལེན་བསྟར་བའི་སྲིད་བྱུས་དེ་ནི་ད་ཆ་ཕྱོགས་གང་ས་ནས་ཁུངས་མ་འཁྱོལ་བའི་ར་སྤྲོད་གསལ་པོ་ཐོན་ཡོད། དེ་བཞིན་བོད་རིགས་ལས་བྱེད་པའི་མིང་ཙམ་ཡང་གླེང་ཐོན་གོ་འཚོར་ཡོད་པ་མ་རེད། རྒྱ་ནག་ལ་ལོ་མང་སློབ་སྦྱོང་བྱས་པའི་བོད་མི་ཚོར་ས་གནས་མི་རིགས་རིང་ལུགས་འདུག་ཅེས་སྐྱོན་བཙུགས་ནས། བཙན་དབང་ངལ་རྩོལ་རྭ་བའི་ནང་བསྐྱར་དུ་སློབ་གསོ་བྱེད་དགོས་ཞེས་བཏང་འདུག སྔ་ལོ་ཟླ་ ༩ ནས་བཟུང་ཆབ་སྲིད་ཀྱི་ལས་དོན་ཚང་མ་རྒྱ་དམག་གིས་འཛིན་སྐྱོང་བྱས་ཏེ་དེང་སང་བོད་ཡོངས་རྫོགས་རྒྱ་དམར་དབང་བསྒྱུར་དྲག་པོ་ཁོ་ནས་བཙན་བཟུང་བྱེད་པ་དང༌། ཞི་བའི་མི་ཚོར་ཆབ་སྲིད་འཛིན་སྐྱོང་གི་མིང་ཙམ་ཡང་ཡོད་པ་མ་རེད།

    རྒྱ་དམར་གྱི་འོག་ནས་ཐར་བའི་ང་ཚོ་སྐལ་ལྡན་མི་མང་ཚོས་རྒྱལ་གཅེས་རང་རིགས་བོད་མི་ཧ་ཅང་མང་པོས་དེ་རིང་གི་ཉིན་དེར་རང་སྲོག་བཏང་བའི་གཟི་བརྗིད་ཅན་གྱི་ལས་འགན་ཆེན་པོ་འདི་སྒྲུབ་ཐབས་བྱེད་དགོས་པ་སྟེ། ཚང་མས་དུས་གཏན་དུ་བློ་རྩེ་གཅིག་ཏུ་སྒྲིམ་བཞིན་རང་དབང་ལྡན་པའི་བོད་དུ་ལོག་རྒྱུའི་གྲ་སྒྲིག་འབད་བརྩོན་ཆེ་བསྐྱེད་བྱེད་བཞིན་པ་ཡིན། དཔེར་ན། བོད་ཕྲུག་ཚོ་མ་འོངས་པའི་རང་དབང་རང་བཙན་བོད་ཀྱི་གཞི་རྩ་ལྟ་བུ་ཡིན་པར་ལྟ་སྐྱོང་ཐོག་ནས། ཁོང་ཚོར་ཕྱོགས་གཅིག་ནས་རང་གི་རིག་གཞུང་དང༌། ཆོས་དད། གོམས་གཤིས་བཟང་པོའི་རྩ་བ་གཏིང་ཟབ་འཛུགས་པ་དང༌། ཕྱོགས་གཞན་ནས་དེང་རབས་ཡར་ཐོན་གྱི་ཤེས་ཡོན་དང༌། འཛམ་གླིང་གི་རིག་གཞུང་ཤེས་ཡོན་མཐོ་ཚད་ཀྱིས་ཕྱུག་པ་ཞིག་ཡོང་བར་བྱེད་པ་སོགས་བསམ་བློ་དང༌། སྤྱོད་བཟང་གཉིས་ཀ་ནས་ཡར་རྒྱས་འགྲོ་ཐུབ་པའི་གོ་སྐབས་བཟང་པོ་སྤྲོད་ཀྱི་ཡོད། ཁོང་ཚོ་གནས་སྟངས་འདི་ཐོག་ནས་འཚར་ལོངས་བྱུང་བ་ཡིན་ན། རྗེས་སུ་བོད་ཀྱི་ཆབ་འབངས་ཤེས་ནུས་ཅན་ཞིག་ཡོང་རྒྱུ་མ་ཟད། རང་གི་རྒྱལ་ཁབ་དང་འགྲོ་བ་མིའི་རིགས་ལ་ལེགས་ཆའི་ཞབས་འདེགས་ཞུ་མཁན་ཞིག་ཀྱང་འབྱུང་ཐུབ་པ་ཡིན།

    དེ་འབྲེལ་བོད་ནས་བཙན་བྱོལ་དུ་ཐར་བ་མི་མང་བརྒྱད་ཁྲི་ལྔ་སྟོང་གི་ནང་ནས་རྒྱ་གར་དང༌། འབྲུག འབྲས་ལྗོངས། སུད་སི་བཅས་སུ་ཁྱོན་བསྡོམས་བོད་མི་ ༢༠༠༤༠ སྐོར་ཞིག་ཞིང་ལས་དང༌། འབྲོག་ལས། བཟོ་ལས། ལག་ཤེས་བཟོ་གྲྭ་ཁག་ཏུ་གཞིས་ཆགས་བྱས་དང་བྱེད་བཞིན་པ་ཡིན་ཞིང༌། འདི་དག་ནི་གཙོ་ཆེ་བ་རྒྱ་གར་གཞུང་གིས་དབུས་གོང་གསལ་ཡུལ་ཁག་སོ་སོའི་གཞུང་དང༌། རོགས་རམ་ཚོགས་པ་ཁག་ནས་གཏོང་ཕོད་ཆེ་བའི་རོགས་རམ་མ་བྱུང་བ་ཡིན་ན་འདི་འདྲ་ལག་ལེན་འཁེལ་ཐབས་མེད། དེས་ན་སྐབས་འདིར་ངོས་ནས་བོད་མི་མང་ཡོངས་ཀྱི་ཚབ་དང༌། རང་ངོས་སྒེར་བཅས་ནས་ཚང་མར་ཐུགས་རྗེ་ཆེ་ཞུ་རྒྱུ་དང༌། ད་དུང་གཞིས་ཆགས་བྱེད་དགོས་ངེས་བོད་མི་གྲངས་ ༢༠༠༠༠ ཙམ་ཞིག་ཡོད་པར་བརྟེན་ང་ཚོས་ད་བར་དཀའ་ངལ་ལ་མ་འཛེམས་པའི་ལས་དོན་ཇི་བྱས་འདི་ཐོག་མུ་མཐུད་ཡར་རྒྱས་རྒྱ་ཆེར་གཏོང་རྒྱུར་ཤུགས་སྣོན་རྒྱག་དགོས་པ་ནི་ང་ཚོ་རང་ཉིད་ལ་རག་ལུས་པ་ཞིག་ཡིན། ང་ཚོས་ཤུགས་སྣོན་བརྒྱབ་ཐུབ་པ་ཡིན་ན། སྦྱིན་བདག་རྒྱ་གར་གྱིས་མཚོན་པའི་རང་རེ་གནས་སྡོད་ཡུལ་ཁག་གི་རྩ་བའི་ཡར་རྒྱས་ལའང་ཕན་ནུས་ཐོན་པ་ཡོང་རྒྱུ་མ་ཟད། ང་ཚོ་བོད་དུ་ལོག་རྒྱུའི་ཉི་མ་མ་ཤར་གྱི་བར་དུ་ང་ཚོས་བོད་མིན་པའི་རྒྱལ་ཁབ་ཅིག་ནང་བོད་ཀྱི་རིག་གཞུང་ངོ་མ་དེ་རྩ་འཛུགས་ཐུབ་པ་ཡོང་རྒྱུ།

    རང་ཡུལ་བོད་རྒྱལ་ཁབ་ཏུ་ཕྱིར་ལོག་བྱ་རྒྱུ་དེ་ང་ཚོའི་རེ་བ་གཙོ་བོ་ཡིན། རེབ་ཆེན་པོ་དེ་ང་ཚོས་རྒྱུན་དུ་སྙིང་ལ་བཅང་ནས། དེའི་དོན་དུ་དུས་དང་རྣམ་པ་ཀུན་ཏུ་དཀའ་སྤྱད་འབད་བརྩོན་བྱེད་དགོས་པ་ཡིན། མཉམ་སྦྲེལ་རྒྱལ་ཚོགས་ནང་རྒྱལ་ཁབ་མང་པོས་ང་ཚོའི་བོད་དོན་ཐོག་རྒྱབ་སྐྱོར་གནང་ཡོད་ལ། དེ་བཞིན་རྒྱ་མིས་བོད་དུ་བཙན་འཛུལ་བྱས་པར་སྐྱོན་འཛུགས་ཀྱང་གནང་ཡོད། ང་ཚོས་ཁོང་ཚོར་ཐུགས་རྗེ་ཆེ་ཞུ་རྒྱུ་དང༌། མཉམ་སྦྲེལ་རྒྱལ་ཚོགས་ནས་ཡིན་ཡང་རུང༌། དེ་མིན་གཞན་དག་གང་ནས་ཡིན་ཡང་ང་ཚོས་རྒྱབ་སྐྱོར་གཙང་མ་ཡོང་རྒྱུར་མུ་མཐུད་དེ་རེ་བ་ཞུ་གི་ཡོད།

    རྒྱ་དམར་གྱིས་བོད་དུ་བཙན་འཛུལ་བྱས་པ་དེ་ནི། ཨེ་ཤ་ཡ་གླིང་ཆེན་ལ་འཇིགས་ཉེན་ཆེན་པོ་བཟོས་པ་སྨོས་ཅི། ང་ཚོ་བོད་དང་ས་འདྲེས་ཁྱིམ་མཚེས་ཡུལ་ཁག་ལ་ཉེན་ཁ་ལྷག་པར་ཆེ་བ་ཡིན་ངེས་ང་ཚོས་རྟག་ཏུ་ངོས་འཛིན་བྱེད་ཀྱི་ཡོད། འདི་ལྟ་བུའི་གནས་ཚུལ་གྱི་འོག་དང༌། འགྲོ་བ་མིའི་རིགས་ཀྱི་སྣང་ཚུལ་གྱི་ཐོག་ནས་ཡིན་ཡང་རུང༌། སྙིང་པོ་དྲང་བདེན་གྱི་གནད་དོན་ལ་རྒྱབ་སྐྱོར་གནང་དགོས་པ་ཡིན་ཚེ། ང་ཚོས་རྒྱ་གར་གཞུང་ལ་སྲིད་དོན་རྒྱབ་སྐྱོར་ཤུགས་ཆེར་གཏོང་གནང་ཞེས་སླར་ཡང་འབོད་བསྐུལ་ཞུ་རྒྱུ། ཡང་ང་ཚོས་རྒྱ་གར་ཁོ་ནའི་འབོད་བསྐུལ་ལ་བརྟེན་ནས་བོད་དོན་ཕན་འབྲས་ཡོང་བའི་ནུས་ཤུགས་ཐོན་ཐུབ་རྒྱུར་ངོས་འཛིན་བྱེད་ཀྱི་ཡོད། རྒྱ་གར་ནི་ཨེ་ཤ་ཡའི་ནང་གལ་གནད་ཅན་གྱི་གནས་སྟངས་ཤིག་ཐོག་གནས་ཡོད་པ་དང༌། དེ་བཞིན་རྒྱ་གར་ནི་བོད་དང་རིག་གཞུང༌། ཡུལ་ལུང་ས་འདྲེས་ཕྱོགས་གང་སའི་འབྲེལ་བ་དམ་ཟབ་ཡོད་པའི་ཐོག བོད་མི་སྟོང་ཕྲག་མང་པོ་རང་ཡུལ་ནས་བཙན་བྱོལ་དུ་ཡོང་དགོས་ལ་རོགས་རམ་གནང་བ་འདི་ལྟར་ལ་སོང༌། ཇི་སྲིད་མིའི་རང་དབང་ལ་ཡིད་ཆེས་བྱས་པ་དེ་སྲིད་དུ་བདེན་དོན་ལ་རྒྱབ་སྐྱོར་གནང་རྒྱུར་ང་ཚོས་ཡིད་ཆེས་ཞུ་བཞིན་ཡོད། ང་ཚོ་བོད་མི་ཚོས་དོན་གནད་འདི་ཐོག་འཁུར་བརྩོན་ཆེ་བསྐྱེད་དགོས་པ་དང༌། ང་ཚོས་རྒྱུད་འཛིན་གྱི་ལས་འགན་དེ་རྒྱ་གར་ནང་འགྲུབ་ཐུབ་པའི་ཆེད་དུ་མུ་མཐུད་འབད་བརྩོན་བྱ་རྒྱུར་སེམས་ཐག་གཙང་མར་བཅད་ཡོད། མཆོག་གསུམ་ཐུགས་རྗེས་འགྲོ་བ་མ་ལུས་པར་བདེ་སྐྱིད་འབྱུང་བའི་སྨོན་ལམ་བཅས།།     །།

བསྐྱར་བཅོས།: ༢༠༡༧/༠༥/༠༢

Leave a Reply