མོན་རྟ་དབང་དགའ་ལྡན་རྣམ་རྒྱལ་ལྷ་རྩེ་དགོན།

སྤྱི་ ནོར་༧གོང་ས་སྐྱབས་མགོན་ཆེན་པོ་མཆོག་ཕྱི་ཚེས་ ༨ ནས་ ༡༥ བར་རྒྱ་གར་བྱང་ཤར་བོད་དང་རྒྱ་གར་གྱི་ས་མཚམས། ༧རྒྱལ་དབང་དྲུག་པ་རིག་འཛིན་ཚངས་དབྱངས་རྒྱ་མཚོའི་སྐུའི་འཁྲུངས་ཡུལ་མོན་རྟ་ དབང་ཁུལ་དུ་ཆིབས་སྒྱུར་ཐེངས་ ༥ བ་དེ་བསྐྱང་འཆར་ཡོད་སྟབས། ཕྱི་ཚེས་ ༥ ཉིན་ནས་འདི་གའི་གསར་འགོད་པ་དོན་འགྲུབ་བཀྲ་ཤིས་ཁུལ་དེར་ཆེད་སྐྱོད་ཀྱིས་གནས་ ཚུལ་རྒྱུས་ལོན་བྱེད་ཀྱིན་ཡོད་ལ། ཕྱི་ཚེས་ ༦ ཉིན་༧གོང་ས་མཆོག་ལ་ཆིབས་སྒྱུར་གོ་སྒྲིག་གནང་མཁན་གཙོ་བོ་མོན་རྟ་དབང་དགོན་ པའི་དགོན་བདག་མི་ར་བླ་མའི་ཡང་སྲིད་སྐུའི་ཕྲེང་བ་བཅུ་གཉིས་པ་མཁན་པོ་གུ་རུ་སྤྲུལ་སྐུ་རིན་པོ་ཆེ་མཆོག་གི་དྲུང་དུ་བཅར་ཏེ། ཐེངས་འདིའི་༧གོང་ས་མཆོག་གི་མཛད་འཕྲིན་སྤྱི་དང་། མོན་རྟ་དབང་དགོན་པའི་གནས་ཚུལ་སྐོར་བཅར་འདྲི་ཞུས་ཡོད།

དྲི་བ། ཐེངས་འདིར་༧གོང་ས་མཆོག་མོན་རྟ་དབང་ཁུལ་དུ་ཆིབས་སྒྱུར་གནང་དོན་གཙོ་བོ་གང་ཡིན་པ་དང་། ས་གནས་མི་མང་གི་ངོས་ནས་དད་གུས་དང་ཕེབས་བསུ་ཞུ་ཕྱོགས་གང་འདྲ་ཡོད་དམ།
ལན། ༧གོང་ས་མཆོག་གི་མཛད་འཆར་སྐོར་ལ་ཨ་རུ་ན་ཅལ་གཞུང་ཕྱོགས་ནས་གསལ་བསྒྲགས་ཤིག་སྤེལ་བའི་ནང་། ཐེངས་འདིར་༧གོང་ས་མཆོག་མོན་རྟ་དབང་ཁུལ་དུ་ཆིབས་སྒྱུར་གནང་དོན་གཙོ་བོ་སྨན་ཁང་ཞིག་སྒོ་འབྱེད་ཆེད་ཡིན་སྐོར་བརྗོད་འདུག སྔོན་མ་ ༢༠༠༣ ལོར་༧གོང་ས་མཆོག་ཁུལ་འདིར་ཆིབས་སྒྱུར་བསྐྱངས་སྐབས། འདིར་སྨན་ཁང་ཐེབས་ཆག་ཅིག་ཡོད་པ་དེ་ཡར་རྒྱས་གཏོང་ཆེད་ཧིན་སྒོར་འབུམ་ ༢༠ བསྩལ་ཡོད་པ་རེད། ད་ཆར་སྨན་ཁང་ལེགས་པར་གྲུབ་ཡོད་སྟབས། མངའ་སྡེ་སྤྱི་ཁྱབ་བློན་ཆེན་དང་མོན་རྟ་དབང་ས་གནས་སྤྱི་འཐུས་རྣམ་པས་གསོལ་བ་བཏབས་ པ་ལྟར་༧གོང་ས་མཆོག་ཆེད་ཕེབས་ཀྱིས་སྒོ་འབྱེད་གནང་རྒྱུ་ཞལ་བཞེས་ཐོབ་ཡོད་པ་རེད། གཞན། ཆོས་ཕྱོགས་ཀྱི་མཛད་འཕྲིན་ཁག་ནི། ༧གོང་ས་མཆོག་གིས་ཐེངས་སྔོན་ཕེབས་སྐབས་རྟ་དབང་མི་མང་ལ་རྗེས་མ་ཡང་བསྐྱར་ཕེབས་རྒྱུ་ཞལ་བཞེས་གནང་ཡོད་པ་མ་ཟད། སྐབས་དེར་སྤྱོད་འཇུག་གི་གསུང་ཆོས་གནང་རྒྱུའང་ཞལ་བཞེས་གནང་ཡོད་སྟབས། ཐེངས་འདིར་གྲྭ་བཙུན་ཚོ་དང་ས་གནས་མི་དམངས་ཀྱིས་སྐྱབས་འཇུག་ཞུས་པ་ལྟར། སྤྱོད་འཇུག་དང་སྤྱན་རས་གཟིགས་ཀྱི་བཀའ་དབང་སོགས་གནང་རྒྱུ་རེད། ༧གོང་ས་མཆོག་ཐེངས་འདིར་མོན་རྟ་དབང་ཁུལ་དུ་ཞབས་སོར་འགོད་རྒྱུ་གསལ་བསྒྲགས་བྱས་མ་ཐག་མི་མང་ཡོངས་ཧ་ཅང་དགའ་བོ་བྱུང་ཡོད་པ་མ་ཟད། ཆིབས་སྒྱུར་ལ་བར་ཆད་མི་འབྱུང་ཆེད་རིམ་གྲོ་སྒྲུབ་པ་དང་། མ་ཎི་གསོག་སྒྲུབ་ཀྱི་གྲངས་ཐོ་མང་པོ་ཞིག་ཉིན་འདི་འགར་དགོན་པར་འབྱོར་ཡོང་གིན་འདུག 

དྲི་བ། ༧གོང་ས་མཆོག་གི་མོན་རྟ་དབང་ཁུལ་གྱི་ཉིན་ལྔའི་རིང་གི་མཛད་རིམ་སྐོར་རགས་བསྡུས་ཤིག་ངོ་སྤྲོད་གནང་རོགས།
ལན། ཕྱི་ཚེས་ ༨ ཉིན་གྱི་མཛད་རིམ་ཐོག་མར་༧གོང་ས་མཆོག་རྟ་དབང་དགོན་པར་ཞབས་སོར་འཁོད་དེ་དགོན་པའི་འགྲེམས་སྟོན་ཁང་གསར་པ་ཞིག་སྒོ་འབྱེད་གནང་རྒྱུ་རེད། ང་ཚོའི་དགོན་པར་སྔར་འགྲེམས་སྟོན་ཁང་ཞིག་ཡོད་ནའང་། དེར་དགོན་པའི་རིག་དངོས་རིམ་པ་གཉིས་པ་དང་གསུམ་པའི་གྲས་མ་གཏོགས་བཤམ་སྟོན་བྱས་ཡོད་པ་མ་རེད། རྟ་དབང་དགོན་པར་གནའ་སྔ་མོའི་རིག་དངོས་རྩ་ཆེན་ཞེ་དྲག་མང་པོ་ཡོད། སྔོན་མ་རྟ་དབང་དགོན་པ་དང་འབྲུག་ཡུལ་གཉིས་མ་འཆམ་པའི་ལོ་རྒྱུས་ཤིག་ཡོད། སྐབས་དེའི་དམག་ཆས་དང་གོ་མཚོན་མང་པོ་ཞིག་ད་ལྟའང་དགོན་པར་ཉར་ཡོད། དེ་མིན་མང་ཆེ་བ་ཆོས་ཕྱོགས་དང་འབྲེལ་བའི་སྐུ་གསུང་ཐུགས་རྟེན་གྱི་རིག་དངོས་ཡིན་སྟབས། དེ་དག་འགྲེམས་སྟོན་བྱས་ན་ཡག་པོ་མི་འདུག་སྙམ་སྟེ་ད་བར་ཕྱིར་བཏོན་ཡོད་པ་མ་རེད། འོན་ཀྱང་། ལོ་རེ་བཞིན་ས་འདིར་རྒྱལ་ཁབ་འདྲ་མིན་གྱི་ཡུལ་སྐོར་སྤྲོ་འཆམ་པ་མང་དུ་འགྲོ་བཞིན་ཡོད་སྟབས། ས་གནས་དཔོན་རིགས་ཚོས་རིག་དངོས་དེ་དག་འགྲེམས་སྟོན་བྱ་རྒྱུ་གལ་ཆེན་ཡིན་སྐོར་ཡང་ཡང་བཤད་དེ། ཐེངས་འདིར་རིག་དངོས་དེ་དག་ཕྱིར་བཏོན་ཏེ་འགྲེམས་སྟོན་ཁང་གསར་པ་ཞིག་སྒོ་འབྱེད་བྱ་རྒྱུ་རེད། གཞན། དགོན་པའི་སློབ་གྲྭའི་དཔེ་མཛོད་ཁང་སྒོ་འབྱེད་གནང་རྒྱུ་རེད། དེ་ཧ་ཅང་གལ་ཆེན་པོ་ཞིག་ཆགས་ཡོད། སྔོན་མ་ནས་དགོན་པའི་མདུན་འདིར་དཔར་ཁང་རྙིང་བ་ཞིག་ཡོད། དེར་གསེར་བྲིས་དང་དངུལ་བྲིས་ཀྱི་དཔེ་རྙིང་ ༧༠༠ ལྷག་ཡོད་ལ། ཐེངས་འདིའི་དཔེ་མཛོད་ནང་བོད་ཡིག་དང་ཧིན་རྡི། དབྱིན་ཡིག་སོགས་ཀྱི་དཔེ་དེབ་སྣ་ཚོགས་དང་༧གོང་ས་མཆོག་གི་གསུང་ཆོས་ཀྱི་བརྙན་སྡེར་སོགས་ཡོད།

དེའི་རྗེས་དགོན་པའི་སློབ་གྲྭར་གདན་ཞུས་ཀྱིས་སློབ་གྲྭའི་ལས་བསྡོམས་དང་གྲྭ་ཚང་གི་ལས་བསྡོམས་སྙན་སྒྲོན་ཞུ་རྒྱུ་ཡིན། དེ་དང་མཉམ་དུ་མཚན་ཉིད་རྩོད་པ་ཞིག་ཀྱང་ཡོད། དེ་ནི་༧གོང་ས་མཆོག་གིས་དུས་རྒྱུན་སློབ་གྲྭ་ཁག་དུ་མཚན་ཉིད་གལ་ཆེན་དུ་གཟིགས་ཀྱིན་ཡོད་པ་ལྟར། ང་ཚོའི་འདི་གར་ཡང་མཚན་ཉིད་ཚུགས་ཏེ་ལོ་གཅིག་འགྲོ་བཞིན་ཡོད་ལ། མ་འོངས་པར་མུ་མཐུད་ཤུགས་སྣོན་རྒྱག་ཕྱིར་ཐེངས་འདིར་༧གོང་ས་མཆོག་ལ་སྤྱན་འབུལ་ཞུ་རྒྱུ་ཡིན། ཕྱི་ཚེས་ ༩ ཉིན་ལྷ་བབ་དུས་ཆེན་དང་བསྟུན་ཏེ་གསུང་ཆོས་དབུ་འཛུགས་དང་། སྨན་ཁང་སྒོ་འབྱེད་གནང་རྒྱུ་རེད། ཕྱི་ཚེས་ ༡༠ ཉིན་སྤྱན་རས་གཟིགས་ཀྱི་བཀའ་དབང་དང་། ཚེས་ ༡༡ ཉིན་རྒྱལ་བ་ཚངས་དབྱངས་རྒྱ་མཚོའི་འཁྲུངས་ཡུལ་ཨོ་རྒྱན་གླིང་དུ་ཆིབས་སྒྱུར་དང་མི་མང་ལ་བཀའ་སློབ་གནང་རྒྱུ་རེད། ཉིན་དེར་མོན་རྟ་དབང་གཙོས་པའི་ཨ་རུ་ན་ཅལ་དང་རྒྱ་གར་བྱང་ཤར་ཀྱི་ནང་པ་ཡོངས་ནས་༧གོང་ས་མཆོག་ལ་བརྟན་བཞུགས་རྒྱས་པ་ཞིག་བསྟར་འབུལ་ཞུ་རྒྱུ་དང་། ས་གནས་སོ་སོའི་མི་མང་གིས་རིག་གཞུང་འཁྲབ་སྟོན་བྱ་རྒྱུ་རེད། ཉིན་རྒྱབ་རྟ་དབང་མི་མང་གིས་༧གོང་ས་མཆོག་ལ་དྲན་རྟེན་ཞིག་བཞེངས་ཡོད་པ་དེ་སྤྱན་འབུལ་ཞུ་རྒྱུ་རེད། དེ་གང་ཡིན་ཟེར་ན། ༧གོང་ས་མཆོག་མོན་ཡུལ་དུ་ཕྱི་ལོ་ ༡༩༥༩ དང་ ༡༩༨༣ ། ༡༩༩༧ ། ༢༠༠༣ ། ༢༠༠༩ བཅས་ཐེངས་ ༥ ལ་ཕེབས་པའི་བཀའ་དྲིན་རྗེས་དྲན་མཚོན་ཕྱིར་ཡིན།

དྲི་བ། ཐེངས་སྔོན་མ་དག་ལ་༧གོང་ས་མཆོག་མོན་ཁུལ་དུ་ཆིབས་སྒྱུར་སྐབས་དགོན་པ་དང་ས་གནས་མི་དམངས་ཀྱིས་གདན་ཞུ་གནང་གིན་ཡོད་ཀྱང་། ཐེངས་འདིར་མངའ་སྡེའི་གཞུང་གི་ངོས་ནས་གདན་ཞུ་གནང་ཡོད་སྟབས། དེ་གཉིས་ལ་ཁྱད་པར་གང་ཡོད་དམ།
ལན། དེ་ལ་ཁྱད་པར་ཡོད་པ་རེད། ཐེངས་ འདིར་༧གོང་ས་མཆོག་གཙོས་པའི་སྐུ་འཁོར་ཡོངས་མངའ་སྡེ་གཞུང་གི་སྐུ་མགྲོན་གྱི་ཐོག་ཕེབས་བསུ་གནང་གིན་ཡོད་པ་རེད། དེ་ནི་༧གོང་ས་མཆོག་ལ་སྔར་དང་མ་འདྲ་བའི་ཆེ་མཐོང་གནང་བ་རེད། སྔོན་མ་བླ་ཆེན་མང་པོ་ཞིག་འདིར་ཕེབས་མྱོང་ཡང་། སྐབས་དེ་དག་ལ་གཞུང་གི་སྐུ་མགྲོན་དུ་ངོས་ལེན་བྱས་ཡོད་པ་མ་རེད། དེར་མ་ཟད། ཐེངས་འདིར་གསུང་ཆོས་སྐབས་ས་གནས་དམག་དཔོན་ཆེ་ཁག་དང་། མངའ་སྡེ་སྤྱི་ཁྱབ་བློན་ཆེན། ཉེ་ཆར་གསར་དུ་བསྐོས་པའི་བཀའ་བློན་ལྷན་ཚོགས་བཅས་ཀྱང་ཕེབས་རྒྱུ་རེད། ང་ཚོས་ཆོས་ཞུ་བ་གསུམ་ཁྲི་ ༣༠༠༠༠ ཙམ་ལ་རྩིས་བརྒྱབས་ཏེ་གསུང་ཆོས་ཕྱག་དཔེ་གོ་སྒྲིག་བྱས་ཡོད་ཀྱང་། ཉིན་འདི་འགར་འབྲུག་ཡུལ་ནས་མང་པོ་ཞིག་ཕེབས་རྒྱུ་ཡིན་པའི་བརྡ་ཐོན་འདུག་ལ། དེ་དག་ལ་ས་གནས་རྫོང་གི་ངོས་ནས་ཀྱང་དགའ་བསུ་བྱེད་ཀྱིན་འདུག  ཟ་འབྲུ་དང་སྣུམ། བཞུགས་གནས་གུར་དང་བཅས་པ་གྲ་སྒྲིག་ཨང་གསར་ཞུ་རྒྱུ་ཡིན་པ་ཁས་ལེན་བྱས་འདུག
 

དྲི་བ། རིན་པོ་ཆེ་མཆོག་གིས་མི་མང་ལ་མཁྱེན་རྟོགས་ཡོང་སླད། ལོ་རྒྱུས་ཀྱི་བཞུར་རྒྱུན་རིང་ཞིང་སྲིད་དོན་གྱི་གནད་འགག་ཆེ་བའི་མོན་རྟ་དབང་དགོན་པའི་བྱུང་རབས་སྙིང་བསྡུས་ཤིག་ངོ་སྤྲོད་གནང་རོགས།
ལན། ད་ཆར་མོན་རྟ་དབང་རྫོང་གི་འོག་ཏུ་མི་འབོར་བཞི་ཁྲི་ ༤༠༠༠༠ ཙམ་ཡོད། དེ་དག་ཚང་མ་ནང་པ་གཙང་མ་རེད། མོན་ཡུལ་ཁུལ་གྱི་མི་རྒྱུད་བྱུང་རབས་ཐད་བོད་བཙན་པོའི་སྐབས་སུ་བོད་ནས་མཆེད་ཚུལ་གྱི་ལོ་རྒྱུས་ཡོད་ལ། བཤད་ཚུལ་གཞན་ཡང་འདུག ས་འདིར་རྒྱང་མཁར་ཟེར་བ་སོགས་མཁར་མིང་མང་པོ་ཡོད། དེ་དག་སྔོན་ཆོས་རྒྱལ་སྐབས་ཀྱི་གཞུང་གི་མཁར་རེད་ཟེར། རིམ་གྱིས་རི་བོ་དགེ་ལུགས་པའི་བསྟན་པ་དར་འདུག ༧རྒྱལ་དབང་སྐུ་ཕྲེང་གཉིས་པ་དང་ཆོས་འབྲེལ་བྱུང་སྟེ། ཆོས་རྗེ་བླ་མ་བསྟན་པའི་སྒྲོན་མེ་དང་ཆོས་རྗེ་བློ་བཟང་བསྟན་པའི་ཉིན་བྱེད་སོགས་བྱོན་པ་རེད། དེ་ནས་སོག་པོའི་རྒྱལ་བོ་གུ་ཤྲཱི་བསྟན་འཛིན་ཆོས་རྒྱལ་དང་འབྲེལ་བ་བྱུང་ཞིང་། སྐབས་དེའི་ལོ་རྒྱུས་ད་ལྟ་འདུ་ཁང་གི་གཡོན་ངོས་ལྡེབས་རིས་སུ་ཡོད། ༧རྒྱལ་དབང་ལྔ་བ་ཆེན་པོ་མོན་ཡུལ་དང་འབྲེལ་བ་བྱུང་ཞིང་ལྔ་བ་ཆེན་པོའི་དངོས་སློབ་མི་ར་བླ་མ་བློ་གྲོས་རྒྱ་མཚོ་བྱོན། མི་ར་བླ་མ་བློ་གྲོས་རྒྱ་མཚོ་མཆོག་གིས་ཐོག་མར་འབྲུག་ཡུལ་གྱི་མི་ར་ཟེར་བའི་ཉེ་འཁྲིས་རྟ་དབང་ཐང་ལ། དགོན་པ་ཞིག་འདེབས་རྒྱུའི་དགོངས་པ་བཞེས་ཀྱང་། སྐབས་དེར་འབྲུག་པ་བཀའ་བརྒྱུད་དང་དགེ་ལུགས་པའི་བར་རྙོག་འཛིང་བྱུང་ཡོད་སྟབས། མི་ར་བླ་མ་འབྲུག་ནས་བཞུགས་མ་ཐུབ་པར་བྲོས་བྱོལ་གྱིས་མོན་ཡུལ་དུ་ཕེབས་འདུག ཉིན་ཞིག་ཁོང་གི་བཅིབས་རྟ་བོར་ཏེ་ད་ལྟའི་རྟ་དབང་དགོན་པའི་ཤུལ་འདི་ནས་བརྙེད་ཡོད་ས་རེད། དེ་ནས་ཁོང་གིས་ངའི་དགོན་པ་རྒྱག་ས་འདི་ཡིན། རྟ་ཡིས་དབང་བའི་ས་ཡིན་ཞེས་ས་མིང་ལ་རྟ་དབང་ཐོགས་པ་རེད་ཟེར་བའི་བཤད་སྲོལ་འདུག ཡང་གཏེར་སྟོན་པད་མ་གླིང་བས་ས་འདི་ནས་རྟ་མགྲིན་གྱི་དབང་གནང་སྟེ། ས་མིང་ལ་རྟ་དབང་ཐོགས་པ་རེད་ཟེར་བ་ཞིག་ཀྱང་འདུག སྐབས་དེར་དགོན་པ་འདེབས་རྒྱུར་དཀའ་ངལ་མང་པོ་འཕྲད་དེ། མི་ར་བླ་མ་དང་སློབ་མ་རྣམས་ཀྱིས་གྲོས་བྱས་ཏེ། ༧གོང་ས་ལྔ་བ་ཆེན་པོར་མགོ་འབུལ་ལུས་འབུལ་ཞུས་འདུག སྐབས་དེར་གྲོས་བསྡུར་གནང་མཁན་དག་གི་མཚན་ཐོ་ད་ལྟ་དགོན་པའི་ཡིག་རྙིང་ནང་འདུག ལྔ་བ་ཆེན་པོས་དགོན་པ་འདེབས་རྒྱུར་རྒྱབ་སྐྱོར་གཙང་མ་གནང་སྟེ། ཕྱི་ལོ་ ༡༦༨༡ ལོར་རྟ་དབང་དགའ་ལྡན་རྣམ་རྒྱལ་ལྷ་རྩེ་དགོན་པ་འདི་ཕྱག་འདེབས་གནང་འདུག རྗེས་སུ་དགོན་པ་འདིར་ཉམས་གསོ་ཐེངས་ལྔ་ཙམ་བྱས་འདུག ད་ཆར་དགེ་འདུན་པ་ ༤༥༠ ལྷག་ཡོད་ལ། ལྷོ་ཕྱོགས་གདན་ས་ཁག་དང་མཐོ་རིམ་སློབ་གྲྭར་སློབ་གཉེར་གནང་བཞིན་པ་ ༨༠ ཙམ་ཡོད། 

དྲི་བ། སྤྱིར་ མོན་རྟ་དབང་ཁུལ་དུ་དགོན་པ་ག་ཚོད་ཡོད་པ་དང་། རྟ་དབང་དགའ་ལྡན་རྣམ་རྒྱལ་ལྷ་རྩེ་དགོན་པ་དང་གྲྭ་ས་སེ་འབྲས་དགའ་གསུམ་བར་འབྲེལ་བ་གང་འདྲ་ཡོད་དམ།
ལན། མོན་རྟ་དབང་ཁུལ་དུ་དགེ་འདུན་གྱི་སྡེ་ཡོད་པའི་དགོན་པ་མོན་རྟ་དབང་དགོན་པ་འདི་དང་། དགོན་པ་འདི་ནས་ལོ་གསུམ་རེར་གཟིགས་རྟོགས་གནང་མཁན་དགེ་འདུན་པ་གཏོང་གིན་ཡོད་པའི་རྟ་དབང་དགོན་པའི་དགོན་ལག་བཅོ་ལྔ་བཅུ་དྲུག་ཅིག་ཡོད། སྔ་འགྱུར་རྙིང་མའི་དགོན་པ་མཁྱེན་རབ་གླིང་། སེར་བྱེས་འཇམ་དབྱངས་ཆོས་འཁོར་གླིང་། བཙུན་དགོན་ཆེ་ཆུང་ ༤ བཅས་ཡོད། མོན་པ་མི་མང་དང་རྟ་དབང་དགོན་པའི་བར་གནའ་སྔ་མོ་ནས་འབྲེལ་ལམ་ཧ་ཅང་ཟབ་མོ་ཞིག་ཡོད། ས་གནས་མི་མང་གི་བདེ་སྡུག་ཡོད་ཚད་དགོན་པར་ཞུ་བཞིན་ཡོད་ལ། དགོན་པའི་མཁན་པོ་ས་གནས་ཁག་ལ་ཕེབས་ཏེ་ནང་ཆོས་ངོ་སྤྲོད་སོགས་ཀྱི་ལས་དོན་མང་པོ་ཞིག་སྒྲུབ་ཀྱིན་ཡོད། ས་གནས་མི་མང་གི་དབང་ཆ་ཡོངས་རྫོགས་དགོན་པར་ཡོད་པ་ལྟ་བུ་ཡིན།
མོན་རྟ་དབང་དགོན་པ་དང་གདན་ས་ཁག་གི་འབྲེལ་བའི་སྐོར་ལ། སྔོན་མ་ང་བརྒྱད་གོང་དུ་མོན་རྟ་དབང་དགོན་པའི་དགེ་འདུན་པ་ཚོ་ལྷ་སའི་གདན་ས་ཁག་ལ་སློབ་གཉེར་ལ་ཕེབས་ཀྱིན་ཡོད་ལ། སྐབས་དེའི་དགེ་འདུན་པ་བགྲེས་པ་འགའ་རེ་ད་ལྟའང་དགོན་པ་འདིར་བཞུགས་ཡོད། ང་བརྒྱད་ལོར་བོད་ནང་དུས་འགྱུར་བྱུང་རྗེས་རྒྱ་གར་ནང་གི་གདན་ས་ཁག་ཏུ་སློབ་གཉེར་ལ་གཏོང་གིན་ཡོད་ཅིང་། དྲུག་ཅུ་རེ་གྲངས་ནང་འབྲས་སྤུངས་དགོན་པ་ནས་སྔ་ཕྱིར་དགེ་འདུན་པ་གསུམ་རྟ་དབང་དགོན་པའི་མཁན་པོར་བསྐོ་བཞག་གནང་འདུག ད་ལྟ་མོན་ཁུལ་ནས་གདན་ས་ཁག་ཏུ་སློབ་གཉེར་གནང་བཞིན་པ་གྲྭ་བ་ཕལ་ཆེར་དྲུག་བརྒྱ་ ༦༠༠ ལས་བརྒལ་ཡོད། དགོན་པ་འདིའི་ཆོས་ཕྱོགས་ཀྱི་བྱེད་སྒོ་ཆེ་ཁག་༧གོང་ས་མཆོག་ལ་དགོངས་སྐོར་ཞུ་བཞིན་ཡོད་ལ། ལྷག་པར་དུ་དགོན་པའི་མཁན་པོ་༧གོང་ས་མཆོག་རང་གིས་བསྐོ་བཞག་གནང་གིན་ཡོད། དེ་བཞིན། དགེ་རྒན་གདན་ཞུ་སོགས་ལའང་གདན་ས་ཁག་ནས་འགན་ལེན་བཞིན་ཡོད།

དྲི་བ། ད་ ལྟའི་ཆར་དགོན་པ་འདིའི་ཆོས་ཕྱོགས་ཀྱི་བསླབ་པ་སློབ་གཉེར་གནང་སྟངས་གང་འདྲ་ཡིན་པ་དང་། སློབ་གྲྭ་སོགས་དེང་རབས་ཀྱི་ཤེས་བྱ་རིགས་ཁྲིད་སྤེལ་གྱི་ཁོར་ཡུག་ཡོད་དམ།
ལན། དགོན་པ་འདིར་སྔོན་མ་ནས་ཕྱག་དཔེ་བློ་འཛིན་རིགས་མང་པོ་ཞིག་ཡོད་ལ། དེ་ལ་དགེ་འདུན་པ་ཚོ་ཧ་ཅང་ཐུགས་ཉེ་བོའང་ཡོད། ཕྱིས་སུ་དགོན་པར་སློབ་གྲྭ་གསར་འཛུགས་གནང་རྗེས་དགེ་འདུན་པ་མང་ཆེ་བ་སློབ་གྲྭའི་ནང་ཞུགས་ཡོད་པ་རེད། ཐོག་མར་སློབ་གྲྭ་དེར་འཛིན་གྲྭ་བརྒྱད་པ་བར་ཡོད། སློབ་མ་ཚོས་ལོ་རེ་རེའི་དགོན་པའི་ཆོ་ག་ཕྱག་ལེན་ཏག་ཏག་འགྲོ་དགོས་པའི་ཐོག་ལ། དེང་རབས་དང་མཐུན་པའི་འཛིན་རིམ་བརྒྱད་པ་བར་བོད་ཡིག་དབྱིན་ཡིག ཧིན་རྡི། ཨང་རྩིས། སྤྱི་ཚོགས་ཚན་རིག་སོགས་སློབ་ཚན་ཆ་ཚང་བ་ཞིག་ཡོད། ལོ་རེ་རེའི་སློབ་མ་རྩེ་ཕུལ་གཉིས་རེ་ཝ་རཱ་ཎ་སི་མཐོ་སློབ་ཏུ་གཏོང་གིན་ཡོད། ད་ལྟ་ཝར་ན་ཐོན་པའི་ཨཀྱ་རྱ་དང་ཤཱ་སྟྲི་མང་པོ་ཡོད། རྗེས་སུ་དགེ་འདུན་པའི་ཞལ་གྲངས་འཕར་བ་དང་བསྟུན་ཏེ་འཛིན་གྲྭ་བཅུ་བའི་བར་སྤར་ཡོད། འཛིན་གྲྭ་མཐོ་བའི་རིགས་ལ་མདོ་སྔགས་གཉིས་གཙོ་བོར་གྱུར་བའི་གྲྭ་ཚང་གི་ཕྱག་ལེན་རིགས་ཀྱི་སློབ་ཚན་གཏན་འབེབས་བྱས་ཡོད། དེ་ལྟར་རིམ་པ་བཞིན་དགེ་བསྐོས་དང་དབུ་འཛད། སློབ་དཔོན་བཅས་སུ་ཕེབས་དགོས་ལ། དགེ་བཤེས་གཏོང་རྒྱུ་དང་མཐོ་རིམ་སློབ་གྲྭར་འགྲིམ་རྒྱུའི་ལམ་ཁ་ཡང་ཡོད། སྔོན་མ་དགེ་འདུན་པ་ཚོར་སྤྱི་ཐབ་ཡོད་པ་མ་རེད། གྲྭ་ཚང་གཞུང་གི་འབྲུ་ཕོགས་རེ་ཡོད་པ་ཙམ་ལས་འཚོ་བ་རང་མགོ་རེད། རིམ་གྱིས་དེ་དག་ལ་འགྱུར་བ་བཏང་ཞིང་སྤྱི་ཐབ་བཟོས་ཏེ། ད་ཆར་དགེ་འདུན་པ་ཚོའི་སློབ་གཉེར་གྱི་མཐུན་རྐྱེན་ཇེ་ཡག་ཏུ་བཏང་ཡོད།