རྒྱ་ནག་གི་སྡིགས་ར་དང་ངོ་རྒོལ་ལ་མ་ལྟོས་པར་སྲིད་འཛིན་ཨོ་བྷ་མ་མཆོག་གིས་༧གོང་ས་མཆོག་ཕོ་བྲང་དཀར་པོའི་ནང་གདན་ཞུས་ཀྱིས་མཇལ་འཕྲད་གནང་ཡོད་པ་མ་ཟད། ཁོང་གིས་བོད་མི་ཚོའི་ཆོས་རིག་སྲུང་སྐྱོབ་དང་བོད་ནང་གི་བོད་མི་ཚོའི་འགྲོ་བ་མིའི་ཐོབ་ཐང་སྲུང་སྐྱོབ་ཐད་རྒྱབ་སྐྱོར་ཤུགས་ཆེན་པོ་གནང་གི་ཡོད་སྐོར་གསུངས་ཡོད་པ་རེད།
ཕྱི་ཚེས་ ༡༨ ཉིན་སྲིད་འཛིན་ཨོ་བྷ་མ་དང་༧གོང་ས་མཆོག་རྣམ་གཉིས་ཨ་རིའི་ཕོ་བྲང་དཀར་པོའི་ནང་མཇལ་འཕྲད་གནང་ཡོད་ལ། ཁོང་གཉིས་ཀྱི་མཇལ་འཕྲད་ཀྱི་ཁང་བ་ནི་ཕོ་བྲང་དཀར་པོའི་ཁང་བརྩེགས་འོག་མའི་ནང་གི་ས་ཁྲའི་ཁང་ཆེན་ནང་དུ་མཇལ་འཕྲད་གནང་ཡོད་པ་རེད། དེ་ནི་ཨ་རིའི་སྲིད་འཛིན་མཆོག་གི་གཞུང་འབྲེལ་གྱི་ཁྱིམ་ཡིན་འདུག ས་ཁྲའི་ཁང་བ་ཞེས་མིང་ཐོགས་དོན་ནི་འཛམ་གླིང་དམག་ཆེན་གཉིས་པའི་སྐབས་དེ་དུས་ཀྱི་ཨ་རིའི་སྲིད་འཛིན་ཧྥུ་རན་ཁུ་ལིན་རོ་སུ་ཝེལ་ཊི་མཆོག་གིས་ཁང་བ་འདིའི་ནང་དུ་དམག་འཁྲུག་གི་གཡུལ་སའི་ས་ཁྲར་ལྟ་ས་ཡིན་སྟབས་དེ་ལྟར་དུ་བཏགས་འདུག
མཇལ་འཕྲད་གནང་གྲུབ་རྗེས་ཨ་རིའི་ཕོ་བྲང་དཀར་པོས་གསར་འགོད་གལ་བསྒྲགས་སྤེལ་དོན། སྲིད་འཛིན་གྱིས་དེ་རིང་ཞོགས་པར་ཕོ་བྲང་དཀར་པོའི་ནང་དུ་༧གོང་ས་ཏཱ་ལའི་བླ་མ་སྐུ་ཕྲེང་བཅུ་བཞི་པར་མཇལ་འཕྲད་གནང་སོང་། སྲིད་འཛིན་གྱིས་སྐབས་དེར། ཁོང་གིས་བོད་ཀྱི་ཐུན་མོང་མ་ཡིན་པའི་ཆོས་ལུགས་དང་རིག་གཞུང་། སྐད་ཡིག་བཅས་ཀྱི་ངོ་རྟགས་གཅེས་འཛིན་ཡོང་བ་དང་། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ནང་དུ་བོད་མི་རིགས་ཀྱི་ཐོབ་ཐང་སྲུང་སྐྱོབ་བྱ་རྒྱུ་བཅས་ཀྱི་ཐད་ཤུགས་ཆེའི་རྒྱབ་སྐྱོར་ཡོད་སྐོར་གསུངས་སོང་། དེ་བཞིན་དུ་སྲིད་འཛིན་གྱིས། ཏཱ་ལའི་བླ་མ་མཆོག་གི་དབུ་མའི་ལམ་གྱི་སྲིད་བྱུས་དང་། ཁོང་གི་འཚེ་མེད་ཞི་བའི་ལྟ་བ་གཞིར་བཟུང་རྒྱ་ནག་གཞུང་དང་མཉམ་དུ་གྲོས་མོལ་ཡོང་ཐབས་ལ་བློ་བརྟེན་འགྱུར་བ་མེད་ངང་གནས་པ་དེར་རྗེས་སུ་ཡི་རངས་ཞུས་སོང་། སྲིད་འཛིན་གྱིས་ནན་གྱིས་གསུངས་དོན། ཁོང་གིས་དུས་རྒྱུན་དུ་ཕྱོགས་གཉིས་ཀས་ཐད་ཀའི་བཀའ་མོལ་གནང་སྟེ་འགལ་བ་གང་ཡོད་སེལ་ཐབས་བྱ་དགོས་པ་དང་། ཉེ་ཆར་འབྲེལ་བ་བསྐྱར་མཐུད་ཀྱིས་བཀའ་མོལ་གནང་བ་གོ་བས་དགྱེས་ཚོར་བྱུང་ཚུལ་གསུངས་སོང་། སྲིད་འཛིན་དང་ཏཱ་ལའི་བླ་མ་རྣམ་གཉིས་ཀྱིས་ཨ་རི་དང་རྒྱ་ནག་གི་བར་དུ་བཟང་ཕྱོགས་དང་མཉམ་ལས་ཀྱི་འབྲེལ་བ་འཛུགས་དགོས་སྐོར་ལ་ཐུགས་མཐུན་གནང་གི་འདུག་ཅེས་གསར་འགོད་གསལ་བསྒྲགས་སྤེལ་ཡོད་པ་རེད།
མཇལ་འཕྲད་གནང་གྲུབ་རྗེས་༧གོང་ས་མཆོག་གིས་གསར་འགོད་པ་རྣམས་ལ་གསུངས་དོན། ཁོང་ཉིད་རླབས་ཆེ་བའི་དམངས་གཙོའི་རྒྱལ་ཁབ་ཅིག་གི་དབུ་ཁྲིད་ལ་མཇལ་བར་དགའ་སྤྲོ་བྱུང༌ཅེས་དང་། སྲིད་འཛིན་ཀྱིས་བོད་དོན་དང་འཛམ་གླིང་སྟེང་གི་དཀའ་རྙོག་མང་པོ་ཞིག་ལ་སེམས་ བསམ་པའི་སྟེང་ནས་ཐུགས་བསམ་བཞེས་ཀྱི་འདུག ངས་ཀྱང་འགྲོ་བ་མིའི་རིན་ཐང་དར་ཁྱབ་གཏོང་རྒྱུའི་ཆོད་སེམས་སྐོར་ཁོང་ལ་བཤད་པ་ ཡིན།དེ་བཞིན་རྒྱ་བོད་འབྲེལ་མོལ་ཐད་དབུ་མའི་ལམ་གྱི་སྲིད་ཇུས་བཟུང་ནས་བོད་ རྒྱ་གཉིས་བར་མུ་མཐུད་གྲོས་མོལ་བྱེད་རྒྱུར་སྲིད་འཛིན་གྱིས་རྒྱབ་སྐྱོར་བྱེད་ ཀྱི་འདུག་ཞེས་གསུངས་བྱུང༌།
ཕྱི་ཚེས་ ༡༩ ཉིན་གྱི་ཞོགས་པར་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་མཱ་ཀྲའོ་ཞོའུ་ཡིས་རྒྱུན་ལྡན་གྱི་གསར་འགོད་འདུ་འཛོམས་ཤིག་གི་སྟེང་སྲིད་འཛིན་ཨོ་བྷ་མ་དང་༧གོང་ས་མཆོག་རྣམ་གཉིས་ཀྱི་མཇལ་འཕྲད་སྐོར་ལ་བཤད་དོན། ཨོ་བྷ་མས་ཏཱ་ལའི་བླ་མར་མཇལ་འཕྲད་གནང་བ་དེར་ཀྲུང་གོའི་ཕྱོགས་ནས་མོས་མཐུན་རྩ་བ་ནས་བྱེད་ཀྱི་མེད་ལ། མཇལ་འཕྲད་དེས་ཨ་རིའི་གཞུང་གིས་ཐེངས་མང་པོར་བོད་ནི་རྒྱ་ནག་གི་ཆ་ཤས་ཡིན་པ་དང་། ཨ་རིས་བོད་རང་བཙན་ལ་རྒྱབ་སྐྱོར་མི་བྱེད་པ་ཡོངས་བསྒྲགས་བྱས་པའི་རྩ་དོན་རྣམས་རྡོག་རོལ་དུ་བཏང་ཡོད་པ་རེད། ཀྲུང་གོའི་ཕྱོགས་ནས་མཇལ་འཕྲད་འདི་ལ་མོས་མཐུན་རྩ་ནས་མེད་ལ། དེར་མཐའ་གཅིག་ཏུ་ངོ་རྒོལ་བྱེད་ཀྱིན་ཡོད། ཨ་རིའི་ངོས་ནས་ཀྲུང་གོའི་ལངས་ཕྱོགས་ལ་བསམ་བློ་ནན་ཏན་བཏང་སྟེ་མགྱོགས་པོར་བྱེད་ཐབས་ནུས་ལྡན་སྤྱད་དེ་ཤུགས་རྐྱེན་ངན་པ་མེད་པར་གཏོང་བ་དང་། བོད་རང་བཙན་ལ་རྒྱབ་སྐྱོར་དང་དེ་རྒྱ་ཡན་ཏུ་གཏོང་མཚམས་འཇོག་པ། ཀྲུང་གོའི་ནང་སྲིད་ལ་ཐེ་གཏོགས་བྱེད་མཚམས་བཞག་སྟེ། བྱ་སྤྱོད་དངོས་ལ་བརྟེན་ནས་ཨ་རྒྱའི་འབྲེལ་བར་གནོད་སྐྱོན་མེད་པར་བཟོ་བ་དང་། བརྟན་པོའི་ངང་གོང་དུ་འཕེལ་བར་སྲུང་སྐྱོབ་བྱེད་དགོས་སྐོར་བཤད་འདུག
༧གོང་ས་མཆོག་གིས་སྲིད་འཛིན་ཨོ་བྷ་མར་མཇལ་འཕྲད་གནང་གྲུབ་པ་དང་། ཉིན་རྒྱབ་དེར་ཨ་རིའི་རྒྱལ་དོན་དྲུང་ཆེ་ལྕམ་ཧ་ལ་རེ་ཁུ་ལིན་ཊོན་མཆོག་ལའང་མཇལ་འཕྲད་གནང་ཡོད་པ་རེད།
སྲིད་འཛིན་ཨོ་བྷ་མ་དང་༧གོང་ས་མཆོག་རྣམ་གཉིས་མཇལ་འཕྲད་གནང་བ་འདི་བོད་ནང་ནས་གོ་སྟབས། མདོ་སྨད་ཀྱི་རྔ་པ་དང་མགོ་ལོག རེབ་གོང་། ཐེ་བོ་སོགས་ནས་བོད་མི་ཚོས་དགའ་སྟོོན་གྱི་རྟེན་འབྲེལ་ཞུ་ཆེད་རྒྱས་སྟོན་བཤམས་པ་དང་། ཤོག་སྦག་བརྒྱབས་པ་སོགས་དགའ་སྤྲོའི་རྣམ་འགྱུར་མངོན་གསལ་གྱིས་བསྟན་ཡོད་འདུག
དེ་བཞིན་༧གོང་ས་མཆོག་ཨ་རིར་ཕེབས་པའི་སྐབས་སུ་ཨ་རིའི་སི་་ཨེན་ཨེན་གསར་ཁང་གིས་མང་ཚོགས་ཁྲོད་བསམ་ཤོག་བསྡུས་སྐབས། ཨ་རིའི་མི་དམངས་ཕལ་ཆེ་བས་བོད་ནི་རང་བཙན་གྱི་རྒྱལ་ཁབ་ཅིག་ཡིན་འོས་པའི་བསམ་ཤོག་འཕངས་ཡོད་འདུག
