གལ་སྲིད་ང་རང་སྔོན་འགྲོའི་འོས་གཞིའི་ནང་སླེབས་པ་ཡིན་ན། མང་ཚོགས་ཀྱི་རེ་འདོད་བཞིན་བཀའ་ཁྲིའི་འོས་གཞིར་འདུག་རྒྱུ་ཡིན་ཞེས་བཀའ་ཟུར་བཀྲ་ཤིས་དབང་འདུས་མཆོག་གིས་གསུངས་འདུག
འདས་པའི་ཟླ་གཉིས་ཀྱི་གོང་དུ་བོད་ཀྱི་གཞུང་འབྲེལ་མིན་པའི་ཚོགས་པ་ཁག་གིས་བཀའ་ཟུར་བཀྲ་ཤིས་དབང་འདུས་མཆོག་ཚུད་པའི་མི་སྣ་འགའ་ཕྱི་ལོ་ ༢༠༡༡ ལོའི་བཀའ་བློན་ཁྲི་པའི་འོས་མིའི་ཁོངས་སུ་ཕྱིར་བསྒྲགས་བྱས་ཡོད་ཀྱང་། སྐབས་དེར་ཁོང་གིས་ངོས་བཞེས་མ་གནང་པར་གནས་སྐབས་རིང་དགོངས་པ་ཞུས་ཡོད་ཀྱང་། ཕྱིས་སུ་ཡུ་རོབ་ཀྱི་བོད་རིགས་ཚོགས་སྡེ་ཁག་གི་སྐུ་ཚབ་དང་མང་ཚོགས་བཅས་ནས་ཡང་ཡང་རེ་སྐུལ་ཞུས་ཡོད་སྟབས། བཀའ་ཟུར་བཀྲ་ཤིས་དབང་འདུས་མཆོག་གིས་མང་ཚོགས་ཀྱི་རེ་འདོད་ལྟར། ཁོ་རང་ཕྱི་ལོ་ ༢༠༡༡ ལོའི་བཀའ་ཁྲིའི་འོས་གཞིར་བཞེངས་རྒྱུ་ཡིན་པའི་ཁས་ལེན་བྱས་ཡོད་པ་རེད།
བཀྲ་ཤིས་དབང་འདུས་ལགས་ཀྱིས་རང་ཉིད་བཀའ་ཁྲིར་བཞེངས་འདོད་ཡོད་མེད་སྐོར་ལ། ཉེ་སྔོན་ཚོགས་པ་ཁག་ཅིག་གིས་ང་རང་བཀའ་ཁྲིའི་འོས་གཞིར་ལངས་རྒྱུ་ཡིན་མིན་སྐོར་དྲིས་སྐབས་ངས་ལངས་རྒྱུ་མིན་ཞེས་ཞུས་པ་ཡིན། ཡང་ཁ་ཤས་ཀྱིས་ང་ལ་ཁྱེད་རང་འོས་གཞིར་ལངས་འདོད་མེད་ཀྱང་མང་ཚོགས་ཀྱིས་འོས་བླུགས་པ་ཡིན་ན་ཅི་ཞིག་བྱེད་རྩིས་ཡོད་ཟེར་ནས་བཀའ་འདྲི་གནང་གི་འདུག དེ་འདྲ་བྱུང་བ་ཡིན་ན། སྐབས་ཐོག་དེ་ལ་བསམ་བློ་གཏོང་དགོས་རྒྱུ་ཡིན། འོས་སུ་ལ་ལྡུག་མིན་དེ་མང་གཙོའི་སྤྱི་ཚོགས་ཀྱི་གཞི་རྩའི་ཐོབ་ཐང་ཞིག་ཡིན་སྟབས། མི་མང་གི་ངོས་ནས་འོས་སུ་ལ་ལྡུག་མིན་རིམ་བཞིན་གསལ་པོ་ཆགས་ཡོང་གི་རེད། གལ་སྲིད་ང་རང་སྔོན་འགྲོའི་འོས་གཞིའི་ནང་སླེབས་པ་ཡིན་ན། མང་ཚོགས་ཀྱི་རེ་འདོད་བཞིན་བཀའ་ཁྲིའི་འོས་གཞིར་འདུག་རྒྱུ་ཡིན། ཞེས་དང་།
ཡང་ཁོང་གིས་སྔོན་མ་ཚོགས་པ་སྒྲིག་འཛུགས་ཁག་གི་རེ་འདོད་དང་ལེན་མ་བྱས་པའི་སྐོར་བརྗོད་དོན། སྔོན་མ་ང་བཀའ་ཁྲིའི་འོས་གཞིའི་ནང་མ་ཞུགས་པའི་རྒྱུ་མཚན་གང་ཡིན་ཟེར་ན། ང་ལ་སེམས་ཤུགས་མེད་པ་དང་ལས་ཀ་བྱ་འདོད་མེད་པ་སོགས་གང་ཡང་མིན། ངས་མི་ལོ་ ༤༠ རིང་གཞུང་ཞབས་ནང་ལས་ཀ་བྱས་པ་རེད། ལྷག་པར་དུ་ལོ་ ༡༧ ཙམ་བཀའ་ཤག་ཏུ་བསྐྱལ་བ་རེད། དེའི་སྟབས་ཀྱིས་ལས་ཀ་བྱ་རྒྱུ་ཞིག་ཡོད་ན་གོ་སྐབས་ཚང་མ་ཐོབ་ཚར་བ་རེད། ད་ཆར་ལོ་ན་རྒན་པ་ཆགས་ཡོང་དུས་སྡུག་ཏུ་འགྲོ་རྒྱུ་མ་གཏོགས་དེ་ལས་ལྷག་པ་ཞིག་ཡོང་ཁག་པོ་རེད། ཡིན་ནའང་མི་མང་གི་ཐོབ་ཐང་དང་རང་དབང་། ཐག་གཅོད་བཅས་ལ་ང་ཚོས་བརྩི་བཀུར་དགོས་པ་རེད་ཅེས་གསུངས་འདུག
བཀའ་ཟུར་བཀྲ་ཤིས་དབང་འདུས་ལགས་ནི་ཕྱི་ལོ་ ༡༩༤༧ ལོར་བོད་དུ་འཁྲུངས་ཤིང་། ང་དགུ་ལོར་ཁོང་གི་ཕ་མ་དང་ལྷན་དུ་བཙན་བྱོལ་དུ་འབྱོར་ཏེ་མ་སུ་རི་སློབ་གྲྭར་ཞུགས། ཕྱི་ལོ་ ༡༩༧༠ ལོར་དབྱིན་ཇིར་ཕྱིན་ཏེ་སྲིད་དོན་རིག་པའི་ཐོག་སློབ་སྦྱོང་བྱས་ཤིང་། ཕྱི་ལོ་ ༡༩༧༣ ལོར་གཞུང་ཞབས་ཁོངས་སུ་འཛུལ་ཞུགས་བྱས་ཏེ་ལོ་མང་རིང་བཀའ་བློན་དང་སྐུ་ཚབ་དོན་གཅོད། ནང་སྲིད་དང་ཕྱི་དྲིལ་ལས་ཁུངས་བཅས་བཅས་སུ་ཕྱག་ལས་གནང་ཡོད་ལ། ད་ལྟ་ནུབ་ཡུ་རོབ་སྐུ་ཚབ་དོན་གཅོད་ཀྱི་ཕྱག་ལས་གནང་མུས་ཡིན་འདུག
གསར་འགོད་པ། དཔལ་ལྡན།
གལ་སྲིད་ང་རང་སྔོན་འགྲོའི་འོས་གཞིའི་ནང་སླེབས་པ་ཡིན་ན། མང་ཚོགས་ཀྱི་རེ་འདོད་བཞིན་བཀའ་ཁྲིའི་འོས་གཞིར་འདུག་རྒྱུ་ཡིན། མི་མང་གི་ཐོབ་ཐང་དང་རང་དབང་། ཐག་གཅོད་བཅས་ལ་ང་ཚོས་བརྩི་བཀུར་དགོས་པ་ཡིན་ཞས་གསུངས་འདུག སྐུ་ངོ་མཆོག་གི་དྲང་གཏམ་གསུངས་པ་འདིས་ཀྱང་བབ་བརླིང་བརྟན་གསུམ་ཡོད་པ་མཚོན་པས་རྒྱ་ཆེའི་མང་ཚོགས་ནས་སྐུ་ངོ་བཀྲ་ཤིས་དབང་འདུད་མཆོག་ལ་འོས་ཤོག་འཕེན་རོགས་ཞེས་བསྐུལ་མ་ཞུ་གི་ཡོད།
སྐུ་ངོས་འཕེབས་པར་འཚམས་དྲིན་བཀྲ་ཤིས་བདེ་ལེགས་ཞུ།
ཐུགས་རྗེ་ཆེ།།
བཀའ་ཟུར་བཀྲ་ཤིས་དབང་འདུས་ལགས། སྐུ་མཁྱེན། འཚང་ཁ་མ་རྒྱག་རོགས།
རྒན་རབས་པ་རྣམས་ཀྱིས་ཀྱང་ཞུམ་པ་མེད་པའི་སྙིང་སྟོབས་དང་ལྷག་བསམ་གྱིས་རྒྱུད་བསྐུལ་ཏེ་བོད་རྒྱ་ཆེ་མི་མང་གི་དོན་དུ་འབད་པ་ལྷུར་ལེན་གནང་བར་རྗེས་སུ་ཡི་རང་དང་བསྔགས་བརྗོད་ཞུ་རྒྱུ་ཡིན། འོན་ཀྱང་༸གོང་ས་མཆོག་སྐུ་འཚོ་བཞུགས་ཀྱི་བསྐལ་བཟང་དུས་བཟང་འདིར་མི་རབས་གསར་པ་ཞིག་ལ་བཀའ་བློན་ཁྲི་པའི་ཐུགས་འགན་དེ་ལྟ་ཚོད་ཅིག་གནང་ཐུབ་ན་ཡག་པོ་འདུག འབྱུང་འགྱུར་རྒན་རབས་པ་རྣམས་རིམ་གྱིས་བྱོན་ཏེ་གློ་བུར་དུ་གཞོན་སྐྱེས་ཚོར་འགན་དེ་བསླེབ་ན་སྐུ་ངལ་འཕྲད་སྲིད་པ་རེད།
དེར་བརྟེན་བགྲེས་པ་རྣམས་ཀྱིས་སློབ་སྟོན་འོག་གཞོན་སྐྱེས་རྣམས་ལ་གོ་སྐབས་དེ་གནང་ཐུབ་ན་ཡག་པོ་འདུག།