ཨ་རིའི་མགྲིན་ཚབ་པའི་གོ་ཆོད་དགོས།

ཕྱི་ཚེས་ ༡༤ ཉིན་སྲིད་འཛིན་ཨོ་བྷ་མ་ལགས་ལ་ཨ་རིའི་ཆབ་སྲིད་ཚོགས་པ་གཉིས་ཀྱི་གྲོས་ཚོགས་འཐུས་མི་ ༣༢ ཙམ་གྱིས་མིང་རྟགས་བཀོད་པའི་སྙན་ཞུ་ཞིག་ཕུལ་ཏེ།  ཕྱི་ཚེས་ ༡༩ ནས་ ༢༠ བར་རྒྱ་ནག་གི་སྲིད་འཛིན་ཧུའུ་ཅིན་ཐའོ་ཨ་རིར་གཟིགས་སྐོར་སྐབས།  རྒྱ་ནག་ནང་གི་སྐྱི་གཡའ་བའི་འགྲོ་བ་མིའི་ཐོབ་ཐང་གི་གནས་སྟངས་དང་། དེ་བཞིན་བཙོན་འཇུག་མནར་གཅོད་འོག་གི་དམངས་གཙོ་དོན་གཉེར་བ་རྣམས་ཀྱི་མིང་ཐོ་གསལ་བཤད་གནང་དགོས་པར་མ་ཟད། རྒྱ་གཞུང་གིས་ཁ་ཡོད་ལག་ཡོད་ཀྱི་སྒོ་ནས་ངེས་པར་དུ་འགྲོ་བ་མིའི་ཐོབ་ཐང་ཡར་རྒྱས་གཏོང་དགོས་པར་ནན་སྐུལ་ཞུ་དགོས་པའི་འབོད་སྐུལ་བྱས་འདུག

 

 སྙན་ཞུ་དེའི་ནང་། རྒྱུན་པར་གཞུང་གིས་རང་ཉིད་ཀྱི་དཔལ་འབྱོར་གནས་བབ་ཁོ་ན་གླེང་སློང་བྱེད་ཀྱི་ཡོད། ད་ལྟ་རྒྱ་ནག་འཛམ་གླིང་དཔལ་འབྱོར་ཚོང་རའི་གར་སྟེགས་སྟེང་བསླེབས་ཡོད་ཀྱང་། ཁོ་ཚོས་ད་དུང་འགྲོ་བ་མིའི་ཐོབ་ཐང་གི་གནད་དོན་དང་འཛམ་ཡོངས་ཁྱབ་རིན་ཐང་རྩ་བ་ནས་ངོས་ལེན་གནང་གི་མེད། ལོ་སྔོན་མའི་ནོ་བྷེལ་ཞི་བདེའི་གཟེངས་ཀྱི་མཛད་སྒོའི་སྔོན་གྱི་དུས་ཚོད་ཐུང་ངུ་དེའི་ནང་། རྒྱ་གཞུང་གིས་འཁྲབ་སྟོན་བྱས་པའི་བྱ་སྤྱོད་དེ་དག་གིས་ཁོ་ཚོའི་རང་གཤིས་ངོ་མ་དམར་རྗེན་དུ་མངོན་ཡོད། རྒྱ་ནག་གཞུང་གིས་འཛེམས་དོགས་དང་། གཞན་ལ་བརྩི་བཀུར་ཕྲན་ཙམ་མེད་པའི་སྒོ་ནས་འཛམ་གླིང་རྒྱལ་ཁབ་གཞན་དག་གཟེངས་རྟགས་མཛད་སྒོར་མི་རྒྱུར་སྐུལ་སློང་དང་། ཚོང་འབྲེལ་གྱི་ཐབས་ལམ་སྤྱད་དེ་གནོན་ཤུགས་སྤྲོད་ཐབས་བྱས་ཡོད། དེ་བཞིན་ལིག་ཞོ་པོ་ཡི་ནང་མི་གཙོས་པའི་དམངས་གཙོ་དོན་གཉེར་བ་མང་པོར་སྔར་ལས་ལྷག་པའི་བཀག་སྡོམ་བྱས་ཡོད།

སྲིད་འཛིན་ཁྱེད་ཉིད་ཀྱང་། ནོ་བྷེལ་ཞི་བདེ་གཟེངས་རྟགས་ཐོབ་མཁན་ཡིན་པར་མ་ཟད། ནོ་བྷེལ་ཞི་བདེ་གཟེངས་རྟགས་སྐུ་ཞབས་ལིག་ཞོ་པོ་ལ་སྤྲོད་རྒྱུར་ཁྱེད་ཀྱིས་ཀྱང་གུས་བརྩི་བྱས་ཡོད་ན། ཐེངས་འདིར་སྐུ་ཞབས་ལིག་ཞོ་པོ་དང་། ཁྲིན་ཀོང་ཁྲིན། ཡུ་གུར་མི་རིགས་ཀྱི་དབུ་ཁྲིད་རེ་བྷེ་ཡ་ཡི་བུ་སོགས་བཙོན་འོག་ཏུ་ཡོད་པའི་དམངས་གཙོ་དོན་གཉེར་བ་དང་གཞུང་དང་ལངས་ཕྱོགས་ཐ་དད་འཛིན་མཁན་རྣམས་ཀློད་གྲོལ་གཏོང་རྒྱུར་ནན་སྐུལ་གནང་རྒྱུ་དང་། དེ་བཞིན་རྒྱ་ནག་ནང་རྒྱལ་སྤྱིའི་གནས་འཕྲིན་དྲ་རྒྱའི་བརྗོད་བྱར་ཞིབ་བཤེར་བཀག་སྡོམ་དང་། ཟིན་བྲིས་བ་དང་གསར་འགོད་པ་མང་པོ་བཙོན་འཇུག་བཀག་ཉར། བོད་དང་ཡུ་གུར་གཙོས་པའི་གྲངས་ཉུང་མི་རིགས་དང་། ལྷག་པར་དུ་ཆོས་ལུགས་དད་མོས་རང་དབང་བརྡལ་བཤིག་དང་བཙན་གནོན་བྱེད་བཞིན་པ་སོགས་མཚམས་འཇོག་གིས་འགྲོ་བ་མིའི་གཞི་རྩའི་རང་དབང་དང་ཐོབ་ཐང་ལ་བརྩི་བཀུར་དགོས་ཡོང་རྒྱུའི་ཐད་དོན་ཕན་ལྡན་པའི་གྲོས་མོལ་བྱ་དགོས་པ་སོགས་བཀོད་ཡོད་འདུག

 

ད་དུང་སྙན་ཐོ་དེའི་ནང་། སྲིད་འཛིན་ཨོ་བྷ་མས་རང་ཉིད་ལ་ནོ་སྦེལ་ཞི་བདེ་གཟེངས་རྟགས་འབུལ་བཞེས་ཀྱི་མཛད་སྒོའི་གཏམ་བཤད་སྐབས། ཨ་རི་དུས་ནམ་ཡང་འགྲོ་བ་མིའི་ཡོངས་ཁྱབ་རིན་ཐང་མངོན་འགྱུར་ཡོང་བའི་རེ་སྙེག་ཀྱི་འབོད་སྒྲ་སྒྲོག་གི་ཡིན། ཞེས་བརྗོད་ཡོད་པས། ང་ཚོ་གྲོས་ཚོགས་འཐུས་མི་དག་གི་ངོས་ནས། ཁྱེད་རང་ཧུའུ་ཅིན་ཐོ་དང་ཐུག་སྐབས། རེ་སྙེག་དེ་མངོན་འགྱུར་ཡོང་ཕྱིར་གྲོས་མོལ་གནང་རྒྱུར་འབོད་སྐུལ་ཞུ་རྒྱུ་ཡིན། འདས་པའི་ཉམས་མྱོང་གྱིས་གསལ་སྟོན་གནང་བ་ལྟར། ཁྱེད་ཀྱིས་སྲིད་སྐྱོང་གནང་བའི་དུས་སྐབས་རིང་འབོད་སྒྲ་དེ་དག་མཚམས་འཇོག་དང་གྲགས་མེད་འགུལ་མེད་ཀྱི་རྣམ་འགྱུར་བཟུང་བ་མཐའ་དག རྒྱ་གཞུང་གི་ངོས་ནས་དེ་ནི་ཨ་རིའི་ནུས་ཤུགས་ཉམས་པ་དང་སྤོབས་པ་ཞུམ་པའི་རྟགས་མཚན་ཞིག་ལ་ངོས་འཛིན་བྱས་ཡོད། དེར་བརྟེན། ང་ཚོས་ངོས་ནས་ཁྱེད་ཀྱིས་ཤུགས་ཆེན་པོ་དང་ཧ་ཅང་གསལ་ཐག་ཆོད་པོའི་སྒོ་ནས་ཨ་རིའི་མི་མང་གི་མགྲིན་ཚབ་གནང་སྟེ། རྒྱ་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནས་ཚུལ་གསལ་འདོན་དང་། གང་མགྱོགས་གནས་བབ་དེ་ལེགས་བཅོས་བྱ་དགོས་པའི་སྐུལ་འདེད་གནང་དགོས། ཞེས་བརྗོད་ཡོད་པ་རེད།   

གསར་འགོད་པ། ཚེ་རིང་རྒྱལ།

 

བསྐྱར་བཅོས།: ༢༠༡༦/༠༡/༠༦

Leave a Reply

2 thoughts on “ཨ་རིའི་མགྲིན་ཚབ་པའི་གོ་ཆོད་དགོས།

  1. སྤེན་པ་རྡོ་རྗེ།

    ཨ་རིའི་སྲིད་འཛིན་གྱིས་ཞབས་འདྲེན་ལུང་པ་གང་ཞུ་རྒྱུ་རེད། འགྲོ་བ་མིའི་ཐོབ་ཐང་ཚོགས་པ་ཁག་ལ་བློ་ཕམ་བཟོད་གླགས་མེད་པ་སྐྱེ་རུ་འཇུག་རྒྱུ་རེད། བོད་དང་ཡུ་གུར་གཙོས་པའི་རྒྱ་ནག་གི་གྲངས་ཉུང་མི་རིགས་ཁག་ལ་ཡིད་ཆད་ཅིག་འོང་གི་འཇུག་རྒྱུ་རེད། རྒྱལ་ཁབ་གཉིས་བར་ཚོང་འབྲེལ་ཡག་ཐག་ཆོད་རྒྱག་རྒྱུ་རེད། ཕྱོགས་གཉིས་བར་གྱི་དམག་གི་འགྲོ་འོང་ཅུང་ཇེ་བཟང་ལ་གཏོང་རྒྱུ་རེད། དེ་ཙམ་རེད།

  2. གསར་འགོད་པ་ཚེ་རིང་རྒྱལ་ལགས།
    གསར་འགྱུར་གྱི་ཁ་བྱང་”ཨ་རིའི་མགྲིན་ཚབ་པའི་གོ་ཆོད་དགོས།”ཞེས་པའི་འོག་ཏུ་ངས་མཐོང་བའི་ཡིག་ནོར་དང་ཆད་སྐྱོན་བྱུང་བ་འདི་དག་རེད།
    མཆན་བུ་འདི་མ་འགོག་རོགས། དྲ་ཐོག་གི་ཀློག་པ་པོ་ཚོར་ཡང་ཕན་ཐོགས་ངེས་ཅན་ཡོང་ངེས་རེད།

    མ་དག་པ། དག་པ།

    སྲིད་འཛོན། སྲིད་འཛིན།
    ནར་གཅོད། མནར་གཅོད།
    དཔའ་འབྱོར། དཔལ་འབྱོར།
    རྡུང་བཙན་གནོན་བྱེད་བཞིན་པ། གཅར་རྡུང་བཙན་གནོན་བྱེད་བཞིན་པ།
    རེ་སྙེགས། རེ་སྙེག
    མངོན་འགྱུར་ཡོངས་བའི། མངོན་འགྱུར་ཡོང་བའི།
    གཞིར་རྩའི། གཞི་རྩའི།
    ཉམ་པ། ཉམས་པ།
    འཛམ་ཡོངས་ཁྱབ་རིན་ཐང་། འཛམ་གླིང་ཡོངས་ཁྱབ་རིན་ཐང་།
    འཛམ་གླིང་རྒྱ་ཁབ། འཛམ་གླིང་རྒྱལ་ཁབ།
    ཞི་བདེའི་གཟེངས་ཀྱི་མཛད་སྒོའི། ཞི་བདེའི་གཟེངས་རྟགས་ཀྱི་མཛད་སྒོའི།