རྒྱ་དཔོན་བཀག་སྡོམ་གྲོས་འཆར།

ཨ་རིའི་གྲོས་ཚོགས་འོག་མའི་འཐུས་མིས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་མཁན་རྒྱ་ནག་དཔོན་རིགས་ཚོ། ཨ་རིའི་རྒྱལ་ཁོངས་སུ་འཛུལ་མི་ཆོག་པའི་ཁྲིམས་དོན་གྲོས་འཆར་བཏོན་འདུག 
ཕྱི་ཚེས་ ༤ ཉིན་ཨེ་ཕེ་གསར་ཁང་གིས་གནས་ཚུལ་སྤེལ་བ་ལྟར་ན། ཨ་རིའི་གྲོས་ཚོགས་འོག་མའི་འཐུས་མི་ཆཱ་རེ་སི་སི་མེ་ཐི་(Chris Smith)ལགས་ཀྱིས། ཨ་རིའི་གྲོས་ཚོགས་སུ་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་རྒྱ་ནག་དཔོན་རིགས་ཚོ་དང་ཁོ་ཚོའི་ནང་མི་རྣམས་ཨ་རིའི་རྒྱལ་ཁོངས་སུ་འཛུལ་མི་ཆོག་པའི་གྲོས་འཆར་ཞིག་བཏོན་འདུག   ཁྲིམས་དོན་གྲོས་འཆར་དེ་ནི་འགྲོ་བ་མིའི་ཐོབ་ཐང་ལ་བརྡལ་བཤིག་གཏོང་མཁན་རྒྱ་ནག་དཔོན་རིགས་ཚོར་དམིགས་བཙུགས་ཀྱིས་བཏོན་པ་ཞིག་ཡིན་འདུག གྲོས་འཆར་དེའི་ནང་འགྲོ་བ་མིའི་ཐོབ་ཐང་ལས་འགུལ་བ་དང་། ཁྲིམས་རྩོད་པ། གསར་འགོད་པ་བཅས་གནོད་འཚེ་གཏོང་བ་དང་། དེ་བཞིན་བོད་དང་ཡུ་གུར། སོག་པོ་བཅས་གྲངས་ཉུང་མི་རིགས་ཐོག་དྲག་ཆས་ཀྱི་སྟོབས་ཤུགས་སྤྱད་དེ་གཉའ་གནོན་དམར་གསོད་གཏོང་མཁན་གྱི་རིགས་བཅས་འདུས་ཡོད་པར་མ་ཟད། བཙན་དབང་སྤྱད་དེ་སྦྲུམ་མའི་སྐྱེ་སྒོ་འགོག་པ་དང་འགྲོ་བ་མིའི་སྐྱེ་འཕེལ་ཐད་སྒེར་གཅོད་སྲིད་ཇུས་སྤེལ་མཁན། ད་དུང་རྒྱ་ནང་བཙན་བྱོལ་སྐྱབས་བཅོལ་དུ་འབྱོར་བའི་བྱང་ཀོ་རི་ཡའི་ཡུལ་མི་རྣམས་བཙན་ཤུགས་ཀྱིས་ཕྱིར་འཕུད་གཏོང་མཁན་བཅས་ཚུད་ཡོད་འདུག   
ཨ་རིའི་ནེའུ་རྒྱལ་སེ་ནས་ཡིན་པའི་གྲོས་ཚོགས་འཐུས་མི་ཆཱ་རེ་སི་སི་མེ་ཐི་ལགས་ཀྱིས། རྒྱ་ནག་ནང་དྲུག་བཞིའི་དམངས་གཙོའི་ལས་འགུལ་བྱུང་བ་ནས་ད་ལྟའི་བར་འགྲོ་བ་མིའི་ཐོབ་ཐང་གནས་སྟངས་ལོ་རེ་བཞིན་སྐྱོ་རུ་ཆས་ཏེ། ད་ལྟ་འཛམ་གླིང་གི་མི་ཚང་མས་དོ་སྣང་བྱ་དགོས་པའི་ཛ་དྲག་གི་གནས་སྟངས་འོག་ཚུད་ཡོད། ཁྲིམས་དོན་གྲོས་འཆར་འདི་ནི་རང་ཉིད་ཀྱི་མི་མང་ལ་གཉའ་གནོན་བརྡབ་གསིག་གཏོང་མཁན་རྒྱ་ནག་དཔོན་རིགས་ཚོར་དྲན་སྐུལ་ཞིག་ཡིན་ཅེས་བརྗོད་ཡོད་པ་རེད། 

དེ་སྔོན་དྲུག་བཞིའི་དོན་རྐྱེན་སྐབས་རྒྱ་གཞུང་དང་ཐད་ཀར་གྲོས་མོལ་གྱི་སློབ་ཆེན་པའི་ཚོགས་པ་སྒྲིག་འཛུགས་གནང་མཁན་གྱི་ཁྲིམས་རྩོད་པ་ཞའ་ཞོ་ཅེ་ཡིས་བརྗོད་དོན། གལ་སྲིད་ཨ་རིས་འགྲོ་བ་མིའི་ཐོབ་ཐང་བརྡལ་བཤིག་གཏོང་མཁན་ཚོར་ཁྲིམས་ལུགས་རང་བཞིན་གྱི་སྒོ་ནས་གནོན་ཤུགས་བྱ་ཐབས་སྤྱད་པ་ཡིན་ན། འཛམ་གླིང་རྒྱལ་སྤྱིའི་ཚོགས་སྡེ་ཁག་དང་།  དམངས་གཙོའི་རྒྱལ་ཁབ་གཞན་དག་གིས་ཀྱང་དེ་བཞིན་གནོན་ཤུགས་སྤྲོད་རྒྱུར་ཤུགས་རྐྱེན་ཐེབས་སྲིད་པ་རེད། ངས་བསམ་པར་འདི་ནི་རྒྱལ་སྤྱིའི་འགྲོ་བ་མའི་ཐོབ་ཐང་ཡར་རྒྱས་ཀྱི་གོམས་སྟབས་གཅིག་རེད། ཡིན་ནའང་། གྲོས་འཆར་འདི་གཏན་འབེབས་ཡོང་ཐུབ་རྒྱུར་དཔལ་འབྱོར་དང་ཕྱི་འབྲེལ་སོགས་ཕྱོགས་མང་པོའི་ཐད་ནས་འགོག་རྐྱེན་ཡོང་སྲིད་པ་རེད། ཅེས་བརྗོད་འདུག 

གསར་འགོད་པ། ཚེ་རིང་རྒྱལ།

བསྐྱར་བཅོས།: ༢༠༡༦/༠༡/༠༦

Leave a Reply

3 thoughts on “རྒྱ་དཔོན་བཀག་སྡོམ་གྲོས་འཆར།

  1. གཟི་མིག་༣པ

    མཛུན་མ་དང་ཁོ་རང་ཚོ་ཁེ་ཕན་ལ་བལྟ་བཞིན་ཡོད་དངོས་ནས་ཨ་རིས་བོད་ལ་རོགས་རམ་བྱེད་བཞིན་མེད་

  2. བོན་རྒྱ་བསྟན་འཛིན་རབ་རྒྱས།

    གྲོས་འཆར་འདི་ལམ་ལྷུང་བྱུང་མིན་ལ་མ་ལྟོས་པར་རྒྱ་རྒན་ཚོ་བརྡ་གསལ་བོ་ཞིག་བརྒྱབ་པ་རེད། ལྷག་པར་མུ་མཐུད་ནས་གྲོས་འཆར་འདི་འདྲ་རིམ་པར་བྱུང་ན་ལམ་ལྷུང་ཡང་འབྱུང་སྲིད་པ་ཞིག་རེད། རྒྱ་ནག་གི་གནམ་འོག་ན་སྒེར་གཅོད་ཀྱི་ཆར་ནག་གིས་གཤེར་གྱིན་པའི་འགྲོ་བ་ཡོད་དོ་ཅོག་གི་ཚབ་བྱས་ནས་སྐུ་ཞབས་ཁོང་ལ་ཐུགས་རྗེ་ཆེ་ཞུ་བ་ཡིན།

  3. ཨ་རིའི་གྲོས་ཚོགས་འོག་མའི་འཐུས་མི་ཆཱ་རེ་སི་སི་མེ་ཐི་(Chris Smith)མཆོག་ཉིད་ཀྱིས་དྲང་བདེན་གྱི་ལམ་ནས་གྲོས་འཆར་འདི་འདྲ་བ་ཞིག་སྟོན་གནང་བ་ནི་ཐུགས་རྗེ་ཆེ་ཞུ་རྒྱུ་དང་། འོན་ཀྱང་གྲོས་འཆར་དེ་སྟོན་པ་ཙམ་ལས་ལག་ལེན་ཏུ་འཁེལ་ཐུབ་ཀྱི་རེད་བསམ་པ་མེད། རྒྱལ་ཁབ་ཅི་འདྲ་ཞིག་ཡིན་ཀྱང་འགྲོ་བ་མིའི་ཐོབ་ཐང་ཟེར་བ་དེ་རང་རང་སོ་སོའི་མཁེ་ཕན་ཁོ་ན་སྒྲུབ་སའི་ཆབ་སྲིད་ཀྱི་ལག་ཆ་ཞིག་ལས་དོན་དངོས་དང་མཚམས་པའི་ལས་དོན་སྣེ་གཅིག་ཀྱང་སྒྲུབ་ཀྱི་མེད་པ་མཐོང་གསལ་རེད།