གྲོས་ཚོགས་ལ་དབུ་སྐོར་ཨེ།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༧༡༢ སྟེང་གི་རྩོམ་སྒྲིག་པའི་གཏམ།

ད་ལོའི་ཕྱི་ཟླ་དྲུག་པའི་གྲོས་ཚོགས་སྟེང་། སྲིད་སྐྱོང་བློ་བཟང་སེང་གེ་མཆོག་གིས་རང་གི་བཀའ་བློན་ལྷན་ཚོགས་ཁོངས་སུ། ཤར་གླིང་བསྟན་འཛིན་ཟླ་སྒྲོན་ལགས་མཚན་འདོན་གནང་བ་ལྟར། གྲོས་ཚོགས་ནང་གི་སྤྱི་འཐུས་ངོ་ཡོད་ ༤༣ ལས་འོས་གྲངས་ ༢༥ ཐོབ་སྟེ་མང་མོས་ཐོག་བཀའ་བློན་དུ་བདམས་ཐོན་བྱུང་ཡོད་པ་མ་ཟད། ཕྱི་ཉིན་ཁྲིམས་ཞིབ་པ་ཆེ་བའི་མདུན་དུ་དམ་འབུལ་ཡང་ཞུས་ཟིན་ཡང་། རྗེས་སུ་བཅའ་ཁྲིམས་ཀྱི་དགོངས་དོན་ལྟར་རང་ལོ་ ༣༥ ཧྲིལ་བོ་འཚང་མེད་པའི་གནས་ཚུལ་ཕྱི་གྱར་བྱུང་སྟབས། སྲིད་སྐྱོང་གིས་གྲོས་ཚོགས་ནང་དགོངས་སེལ་དང་སྦྲགས་ཁོང་མོ་བཀའ་བློན་ནས་ཕྱིར་འཐེན་བྱས་པ་གསལ་བསྒྲགས་གནང་།

ཟླ་འདིའི་ཕྱི་ ༢༣ ཉིན་བསྟན་འཛིན་ཟླ་སྒྲོན་རང་ལོ་ ༣༥ ཏག་ཏག་འཚང་བ་རེད། ཕྱི་ཚེས་ ༢༤ ཉིན་གྱི་སྔ་དྲོར་སྲིད་སྐྱོང་གིས་བསྐྱར་དུ་ཁོང་མོ་གྲོས་ཚོགས་ནང་ཕྱི་དྲིལ་བཀའ་བློན་དུ་མཚན་འདོན་གནང་སྐབས། ངོ་ཡོད་སྤྱི་འཐུས་ ༢༧ གྱིས་དགག་པ་བརྒྱབ་སྟེ་བཀའ་བློན་དུ་བསྐོ་ཐུབ་མེད། ཐེངས་སྔོན་མའི་དགག་པ་ལས་ཐེངས་འདིར་དགག་པ་རྒྱག་མཁན་མང་དུ་ཕྱིན་ཡོད་པ་འདིས། གྲོས་ཚོགས་འཐུས་མི་ཚོས་ཟླ་སྒྲོན་གྱི་ནོར་འཁྲུལ་ལས་ཀྱང་། སྲིད་སྐྱོང་གི་གནང་ཕྱོགས་ལ་འདོད་པ་མེད་པའི་རྣམ་འགྱུར་གསལ་བོར་བསྟན་པ་ཞིག་ཆགས་ཡོད།

ཐེངས་འདིར་བསྟན་འཛིན་ཟླ་སྒྲོན་བཀའ་བློན་དུ་བསྐོ་མ་ཐུབ་པ་དེ་ཟླ་སྒྲོན་གང་ཟག་སྒེར་ངོས་ནས་བཤད་ན། མི་ཚེའི་ནང་གི་མིང་ཆལ་དང་ཕམ་ཁ་ཆེན་པོ་ཞིག་ཡིན་ཡང་། བོད་སྤྱི་ཐོག་ནས་བཤད་ན་དྲང་བདེན་ཞིག་དང་། ཁྲིམས་སྒྲིག་ལ་བརྩི་བཀུར་ཞུས་པའི་རྒྱལ་ཁ་ཞིག་ཆགས་ཡོད། གལ་སྲིད་ཐེངས་འདིར་ཁོ་མོ་ཕྱི་དྲིལ་བཀའ་བློན་དུ་བདམས་འཐོན་བྱུང་ཡོད་ཚེ། སྐྲངས་འབུར་སྟེང་ལ་ཁུ་ཚུར་ཞེས་པའི་དཔེ་ལྟར། སྲིད་སྐྱོང་གིས་བཀའ་བློན་འོས་འདེམས་ཐུགས་གཡེང་འཐུས་ཤོར་དུ་བཏང་བའི་སྟེང་ལ། གྲོས་ཚོགས་འཐུས་མི་ཚོས་ཀྱང་རང་གིས་བཟོས་པའི་ཁྲིམས་སྒྲིག་ལ་རང་གིས་རྡོག་རོལ་བཏང་བ་ཆགས་ཡོད།

ཐེངས་འདིའི་གྱོང་གུད་ཡོད་ཚད་ཀྱི་འབབ་ས་དེ་ཤར་གླིང་ཟླ་སྒྲོན་ཆགས་སོང་། སྲིད་སྐྱོང་གི་ཧབ་བེ་ཧོབ་བེ་གནང་སྟངས་དེས་ཤར་གླིང་ཟླ་སྒྲོན་གྱི་སྤྱི་འཐུས་རྐུབ་སྟེགས་ཤོར་པ་མ་ཟད། མི་སྒེར་ལའང་འདག་ཐབས་མེད་པའི་མཚན་ཤས་བཟོས་པ་དེར་དགོངས་སེལ་ཞུ་དགོས་ཀྱང་། ཐོག་མ་སྲིད་སྐྱོང་གིས་ཁོ་མོར་བཀའ་འདྲི་གནང་སྐབས། ཁོ་མོས་མ་ཤེས་པ་ཡིན་ནམ། ཤེས་བཞིན་དུ་མ་བཤད་པ་ཡིན། གང་ལྟར། ཟླ་གསུམ་ལྷག་གིས་རང་ལོ་ ༣༥ ཧྲིལ་བོ་ལོན་མེད་པ་གསང་བ་བྱས་པ་དེས་ཐེངས་འདིའི་ནོར་འཁྲུལ་ནག་ཉེས་ཡོངས་རྫོགས་བགོ་བཤའ་བརྒྱབ་ཡོད།

སྤྱི་ཚོགས་བརྒྱུད་ལམ་ཁག་ཏུ་སྲིད་སྐྱོང་གིས་བསམ་བཞིན་དུ་ཤར་གླིང་ཟླ་སྒྲོན་ནག་པོ་བཟོ་ཐབས་སུ། ལས་འགུལ་འདི་བརྩམས་པ་རེད་ཟེར་བ་དེ་སྤྱི་ཚོགས་དཀྲུག་བྱེད་ཀྱི་དཀྲོགས་གཏམ་རེད་ལ། ཡང་ཁག་ཅིག་གིས། བོད་རྩིས་ལྟར་བྱས་ན་ཤར་གླིང་ཟླ་སྒྲོན་རང་ལོ་ ༣༥ འཚང་ཡོད་ཀྱང་། གྲོས་ཚོགས་ཀྱིས་བསམ་བཞིན་དུ་ཁོ་མོ་བཀའ་བློན་དུ་མ་བཏང་བ་རེད་ཟེར་བ་དེའང་དཔྱ་དངུལ་ལག་དེབ་དང་བཅའ་ཁྲིམས་གཉིས་ཀྱི་འབྲེལ་བ་ངོ་མ་ཤེས་པའི་འཆལ་གཏམ་རེད།

ཐེངས་འདིར་གནད་དོན་འདི་དང་འབྲེལ་ཏེ་གནད་དོན་གསར་པ་གཉིས་བྱུང་ཡོད་པ་ནི། སྲིད་སྐྱོང་གིས་གྲོས་ཚོགས་ལ་དབུ་སྐོར་དང་གྲོས་ཚོགས་ཀྱི་སྒྲིག་གཞི་རྩིས་ཡོད་མེད་དེ་རེད། གྲོས་ཚོགས་སྔ་མའི་སྟེང་སྲིད་སྐྱོང་གིས་བཀའ་བློན་འོས་མི་དག་མཚན་འདོན་གནང་སྐབས། སྤྱི་འཐུས་ཁག་ཅིག་གིས་སྔར་སྲོལ་ལྟར་འོས་མི་དག་གི་ལོ་རྒྱུས་འགྲེམ་དགོས་སྐོར་ཞུས་སྐབས། སྲིད་སྐྱོང་གིས་ང་ཚོས་ཞིབ་འཇུག་བྱས་ཡོད། ཡིག་ཆ་བསྔོག་ཡོད། ད་རེས་འོས་མི་འདོན་སྟངས་དེ་བཀའ་ཤག་སྐབས་བཅུ་གཉིས་བཅུ་གསུམ། བཅུ་བཞི་བཅས་ཀྱི་འགྲོ་སྟངས་དང་གཅིག་པ་གཅིག་རྐྱང་ཡིན་གསུངས་ཡོད་ཀྱང་། ཐེངས་འདིར་སྤྱི་འཐུས་གཅིག་གིས་ཞིབ་འཇུག་བྱས་པར་བཀའ་ཤག་སྐབས་བཅོ་ལྔ་པའི་བཀའ་བློན་འོས་མི་འདོན་སྟངས་དང་བཀའ་ཤག་སྔ་མ་དག་གི་འོས་མི་འདོན་སྟངས་གཅིག་པ་མིན་པའི་བདེན་དཔང་གྲོས་ཚོགས་སུ་ཞུས་ཡོད།

བསྐྱར་བཅོས།: ༢༠༡༦/༡༠/༠༥

Leave a Reply