མཆོད་ཡོན་གྱི་འབྲེལ་བ་ཆབ་སྲིད་ཀྱི་ཐོག་ནས་འགྲེལ་བཤད་རྒྱག་ཁག་པོ་རེད།

རྒྱ་ནག་གཞུང་གིས་ས་སྐྱའི་སྐབས་ཀྱི་རྙོག་འཛིང་ཆེ་བའི་ལོ་རྒྱུས་ཀྱི་ཉོག་མ་གཏིང་སློག་བྱས་ཏེ་ལོ་རྒྱུས་ཀྱི་དོན་དངོས་ལ་ཞིབ་འཇུག་བྱེད་དཀའ་བར་གྱུར་ཡོད་སྐོར་བརྗོད་སོང་།

དེ་རིང་ས་རཱ་བོད་རིག་པའི་བགྲོ་གླེང་ཚོགས་ཐེངས་བཅུ་གཅིག་པའི་ལས་ཉིན་གཉིས་པའི་ཐོག་གདན་ཞུས་གཏམ་བཤད་པ་ཏཱ་ལའི་བླ་མ་མཐོ་རིམ་སློབ་གཉེར་ཁང་གི་ལོ་རྒྱུས་དགེ་རྒན་བཀྲ་བཟང་ལགས་ཀྱིས། ས་སྐྱ་པ་དང་ཧོར་གཉིས་ཀྱི་འབྲེལ་བ་དང་གནས་བབ་ཞེས་པའི་བརྗོད་གཞིའི་ཐོག་གཏམ་བཤད་གནང་སྐབས། དེང་སང་ཆབ་སྲིད་ཀྱི་ཤུགས་རྐྱེན་འོག་ལོ་རྒྱུས་ཀྱི་དོན་དངོས་ལ་བློ་གཟུ་བོར་གནས་མ་ཐུབ་པའི་དཀའ་ངལ་ཞིག་ཡོང་བཞིན་ཡོད་པའི་སྐོར་ལ་ཁོང་གིས། སྤྱིར་ལོ་རྒྱུས་ཞེས་པ་འཛམ་གླིང་གི་རྒྱལ་ཁབ་གང་ཞིག་ལ་མཚོན་ན་ཞིབ་འཇུག་བྱ་ས་ཞིག་དང་གནས་ཚུལ་ཤེས་རྟོགས་བྱེད་ཐབས་ཤིག  ཡང་ན་ཕན་ཚུན་བགྲོ་གླེང་བྱེད་ས་ཞིག་མ་གཏོགས།  རྒྱལ་ཁབ་དང་མི་རིགས་ཀྱི་གནས་བབ་དང་ངོ་བོ་མཚོན་བྱེད་ཅིག་ཏུ་ཨུ་ཚུགས་ཀྱིས་འཇོག་སྲོལ་དེ་དེང་སང་ཉུང་ཉུང་ཆགས་བསྡད་ཡོད་པ་རེད། ཡིན་ན་ཡང་། ང་ཚོ་བོད་པའི་ལོ་རྒྱུས་དེ་ཧ་ཅང་རྙོག་འཛིང་ཅན་ཞིག་ཆགས་བསྡད་ཡོད་པ་ལྟར། རྒྱ་ནག་གིས་བོད་དེ་རྒྱ་ནག་གི་མངའ་ཁོངས་ཡིན་པ་སྒྲུབ་བྱེད་དུ་ཆབ་སྲིད་ཙམ་མ་ཟད་ལོ་རྒྱུས་ཀྱི་ཐོག་ནས་བཤད་བསྡད་ཡོད་དུས། བོད་པ་ཚོས་ཀྱང་བོད་དེ་རྒྱ་ནག་གི་མངའ་ཁོངས་མ་ཡིན་པ་ཆབ་སྲིད་ཀྱི་ཐོག་ནས་སྒྲུབ་དགོས་པ་མ་ཟད་ལོ་རྒྱུས་ཀྱི་ཐོག་ནས་སྒྲུབ་དགོས་ཀྱི་ཡོད་དུས། ལོ་རྒྱུས་དང་ཆབ་སྲིད་གཉིས་དེ་ཕན་ཚུན་མཉམ་བསྲེས་ལྟ་བུར་སོང་ནས། ལོ་རྒྱུས་ལ་དཔྱད་ཞིབ་བྱེད་པའི་སྐབས་སུ་དོན་སྙིང་དེ་ཆབ་སྲིད་རྩོད་གླེང་གི་ཆ་ཤས་ལྟ་བུ་ཞིག་འགྱུར་བཞིན་ཡོད་པ་དང་། ལོ་རྒྱུས་སྐོར་ལ་བགྲོ་གླེང་བྱེད་པའི་སྐབས་སུ་ཤེས་རིག་ཅིག་གི་རྣམ་པར་ངོས་འཛིན་མི་བྱེད་པར།  ཆབ་སྲིད་འཐབ་རྩོད་ཀྱི་ངོ་བོ་ཞིག་ཏུ་འགྱུར་བཞིན་ཡོད་པ་རེད། དེ་ཡིས་ལོ་རྒྱུས་དཔྱད་ཞིབ་བྱེད་མཁན་དང་ཉམས་ཞིབ་པ་ཚོས་ལོ་རྒྱུས་ཀྱི་དོན་དངོས་རང་ལ་ལྟ་མི་ཐུབ་པའི་དོགས་གཞི་ཞིག་སླེབས་འཇུག་གི་ཡོད་པ་རེད།

ལྷག་པར་དུ་ས་སྐྱ་དང་ཧོར་གྱི་ལོ་རྒྱུས་དེ་བས་ཀྱང་རྙོག་འཛིང་ཆེན་པོ་ཞིག་ཆགས་ནས་ཡོད་པ་རེད། སྤྱིར་ས་སྐྱ་དང་ཧོར་གྱི་སྐབས་ལོ་བརྒྱ་ལྷག་རིང་གི་ལོ་རྒྱུས་ཀྱི་བརྒྱུད་རིམ་ཞིག་ཡིན་ན་ཡང་། རྒྱ་ནག་གིས་དེ་རྙོག་མ་གཏིང་སློག་ལྟ་བུ་བྱས་ཏེ་ས་སྐྱའི་སྐབས་ནས་བོད་དེ་རྒྱ་ནག་གི་མངའ་ཁོངས་རེད་ཅེས་བཤད་ཡོང་དུས། ལོ་རྒྱུས་ཀྱི་དོན་དངོས་ལས་ཆབ་སྲིད་ཀྱི་རྣམ་པ་ཞིག་ཏུ་འགྱུར་ནས་ལོ་རྒྱུས་ཞིབ་འཇུག་ལ་དཀའ་ངལ་དང་ལྷག་པར་དུ་བོད་ནང་ནས་ས་སྐྱ་དང་ཧོར་སྐབས་ཀྱི་ལོ་རྒྱུས་ལ་ཞིབ་འཇུག་བྱེད་སྐབས་བློ་གཟུ་བོར་གནས་མི་ཐུབ་པ་ཞིག་དང་། བཙན་བྱོལ་ནས་བོད་དེ་རྒྱ་ཁོངས་མིན་པའི་གྲུབ་དོན་དེ་སྔོན་ལ་སྤེལ་ནས་སྒྲུབ་བྱེད་དེ་རྗེས་སུ་འཚོལ་བཞིན་པ་ཞིག་ཡིན་དུས། ལོ་རྒྱུས་ཀྱི་དོན་དངོས་དེ་ཆ་ཚང་བ་ཞིག་མི་ཡོང་བ་ཆགས་བསྡད་ཡོད་པ་རེད། ཅེས་དང་། ཁོང་གིས་སྤྱིར་བོད་དང་ཧོར་གྱི་བར་ལ་འབྲེལ་བ་དེ་སྔོན་ནས་བྱུང་ཡོད་པ་དང་། ས་སྐྱ་དང་ཧོར་གྱི་འབྲེལ་བ་དེ་རྗེས་སུ་བྱུང་ཡོད་སྐོར་བརྗོད་སོང་།

ཡང་ཁོང་གིས། ཐོག་མར་ས་སྐྱ་པཎ་ཊི་ཏ་ཀུན་དགའ་རྒྱལ་མཚན་དང་གོ་ཏན་ཁང་གཉིས་བར་མཆོད་ཡོན་གྱི་འབྲེལ་བ་བྱུང་ཡོད་པ་དང་། དེ་ནས་འགྲོ་མགོན་འཕགས་པ་དང་ཀུབ་ལེ་ཁང་གཉིས་བར་བླ་སློབ་ཀྱི་འབྲེལ་བ་བྱུང་བ་མ་ཟད། ཀུབ་ལེ་ཁང་ནས་འགྲོ་མགོན་འཕགས་པས་བོད་ཀྱི་ཆབ་སྲིད་ཀྱི་འགན་དབང་བཞེས་པར་རོགས་ཕན་ཆེན་པོ་གནང་སྟེ། བོད་ཀྱི་ཆོས་སྲིད་གཉིས་ཀྱི་འགན་བཞེས་ཡོད་ཀྱང་དེང་སང་རྒྱ་ནག་གིས་མི་གཅིག་གི་ལས་དོན་གཉིས་གཉེར་བ་ངོ་བོ་གཅིག་ལྟ་བུ་ཞིག་ཏུ་བསྒྱུར་ནས་ལོ་རྒྱུས་ལ་འཁྱོག་བརྗོད་བྱེད་ཀྱི་ཡོད་སྐོར་དང་། སྤྱིར་མཆོད་ཡོན་སྤྱིན་བདག་གི་འབྲེལ་བ་ཞེས་པ་ལོ་རྒྱུས་ཀྱི་ནང་དུ་འགྲེལ་བརྗོད་བྱེད་ཧ་ཅང་ཁག་པོ་ཞིག་ཏུ་ཆགས་ནས་ཡོད། འཛམ་གླིང་གི་རྒྱལ་ཁབ་དང་མི་རིགས་མང་པོའི་ལོ་རྒྱུས་ནང་དུ་དེ་འདྲ་བའི་དཔེ་ཞིག་བཞག་ཟེར་ན་ཁྱོན་ནས་མེད་སྟབས། ཆབ་སྲིད་ཀྱི་ཐོག་ནས་མཆོད་ཡོན་གྱི་འབྲེལ་བར་འགྲེལ་བཤད་རྒྱག་དགོས་ན་ཁག་པོ་ཆགས་ཡོད་སྐོར་བརྗོད་སོང་།

མཇུག་ཏུ་སློབ་གཉེར་བ་ཞིག་གིས་སོག་པོས་བོད་ལ་དབང་སྒྱུར་བྱས་ཡོད་མེད་ཀྱི་ཐད་ནས། འགྲོ་མགོན་འཕགས་པར་བོད་ཆོལ་ཁ་གསུལ་ཕུལ་བ་ནས་བོད་དེ་ལོགས་སུ་བུད་ཡོད་པར་བརྗོད་ན་ཡང་། དེའི་རྗེས་སུ་སོག་པོས་བོད་ལ་ཁྲལ་བསྡུ་བ་སོགས་མང་པོ་ཞིག་གསལ་བསྡད་ཡོད་པ་དེ་ང་རང་ཚོའི་ངོས་ནས་རྒྱ་ནག་ལ་འགྲེལ་བཤད་ག་འདྲ་ཞིག་རྒྱག་དགོས་དྲིས་པར་ཁོང་གིས། སོག་པོའི་བོད་ལ་ཆབ་སྲིད་ཐད་ནས་དབང་བསྒྱུར་ཡོད་མེད་ལ་དེང་སང་མང་པོ་ཞིག་གིས་ཟུར་དུ་བོད་དེ་དམིགས་བསལ་བ་ཞིག་ཡིན་པར་བཙན་ཚུགས་ཀྱིས་སྒྲུབ་ཅི་ཐུབ་བྱེད་བཞིན་ཡོད་ན་ཡང་། སོག་པོའི་ཞི་བདེ་རྒྱ་མཚོ་ནས་མེ་ཌི་ཏྲེ་ནི་ཡན་(mediterranean)རྒྱ་མཚོ་བར་དུ་འཛམ་གླིང་ལ་བྱུང་མ་མྱོང་བའི་སོག་པོའི་རྒྱལ་ཁམས་ཆེན་པོ་ཞིག་བཙུགས་པ་རེད། དེའི་ནང་དུ་ས་ཁུལ་དང་མི་སྡེ་མང་པོ་ཞིག་དང་རྒྱལ་ཁབ་བྱས་ཏེ་རྩིས་ན་༥༠་ལྷག་ཅིག་ཡོད་དུས། བོད་ཡང་དེའི་ཆ་ཤས་སུ་ཚུད་པ་རེད་ཅེས་ང་ཚོས་ངོས་ལེན་བྱ་དགོས་པ་ཡོད་པ་རེད། དེ་ལྟར་མ་ཡིན་པར་སྐབས་དེའི་བོད་དེ་བཟོ་ལྟ་གཞན་ཞིག་བཟོ་དགོས་བསམ་ན་དེ་ལོ་རྒྱུས་ཀྱི་དོན་དངོས་དང་མཐུན་གྱི་ཡོད་པ་མ་རེད། ཡིན་ན་ཡང་། རྒྱ་ནག་གིས་ད་ལྟ་རྙོག་འཛིང་ཞིག་བཤད་བཞིན་པ་དེ་སོག་པོས་བོད་ལ་དབང་བསྒྱུར་བྱས་ཡོད་མེད་ཀྱི་ཐད་ནས་མ་ཡིན་པར། རྒྱ་ནག་དང་ང་ཚོའི་བར་གྱི་རྩོད་རྙོག་དེ་ཡོན་རྒྱལ་རབས་སྐབས་སུ་རྒྱ་ནག་ལ་ཀུབ་ལེ་ཁང་གིས་དབང་བསྐྱར་བྱས་པ་དེ་ཤུལ་བཞག་ལྟ་བུ་ཞིག་ཏུ་རྩིས་ཏེ། དེ་ནས་བཟུང་བོད་དེ་རྒྱ་ནག་གི་དབང་སྒྱུར་འོག་ཡོད་པར་བཤད་བཞིན་ཡོད་པ་རེད། ལོ་རྒྱུས་ནང་བཞིན་བྱས་ཏེ་སོང་ན་དེ་ཧ་ཅང་ཁྱད་མཚར་བ་ཞིག་ཆགས་ཡོད་པ་རེད། ལོ་རྒྱུས་ཟེར་བ་དེ་སྐབས་དེའི་གནས་སྟངས་རང་ལས་དེའི་རྗེས་ནས་ག་རེ་བྱུང་བ་དེར་འབྲེལ་བ་མེད་ན་ཡང། རྒྱ་ནག་གིས་ཡོན་གྱི་སྐབས་མ་ཟད་མེན་དང་ཆིན་སོགས་ཀྱིས་ཡིན་པར་སྒྲུབ་བཞིན་ཡོད་པ་རེད་ཅེས་བརྗོད་སོང་།

གསར་འགོད་པ། སངས་རྒྱས་དཀོན་མཆོག

བསྐྱར་བཅོས།: ༢༠༡༧/༠༨/༢༢

Leave a Reply

2 thoughts on “མཆོད་ཡོན་གྱི་འབྲེལ་བ་ཆབ་སྲིད་ཀྱི་ཐོག་ནས་འགྲེལ་བཤད་རྒྱག་ཁག་པོ་རེད།

  1. རྒྱུད་གྲ་བློ་བཟང་དབང་འདུས།

    ཨོ་ཧོ། ༧གོང་ས་མཆོག་ནས་ག་དུས་ཡིན་ན་་་ བོད་དེ་ལོ་ངོ་སྟོང་ཕྲག་སྔོན་ནས་ལོ་རྒྱུ་རང་བཞིན་ལྡན་ཡོད་པ་དང་། བོད་ལ་བདེན་པ་ཡོད་པ་ཞིག་གསུངས་ཀྱིས་ཡོད། འདི་ཏག་ཏག་མ་སྒྲིག་པ་རེད་པས། རྒྱ་ནག་ཁོ་རང་ཚོའི་ལོ་རྒྱུ་ནང་ ཨེ་ཤི་ཡ་ནང་སྟོབ་ཆེན་རྒྱལ་ཁབ་་་ རྒྱ་བོད་ཧོར་གསུམ་འཁོད་ཡོད། རྒྱ་དམར་གྱིས་དང་པོ་ས་སྐྱ་ཧོར་གྱི་ལོ་རྒྱུ་ཕར་བཞགས། ཆོས་རྒྱལ་སྲོང་བཙན་སྒམ་པོའི་དུས་ནས་བོད་དེ་རྒྱཡི་ཆ་ཤས་རེད་བཤད་ཡོད། རྒྱ་བཟའ་ཀོང་ཇོ་ཆ་ནས་རེད། ཡང་ཕྱི་སུ་༧གོང་ས་ལྔ་པ་ཆེན་པོའི་སྐབས་ནས་རྒྱ་ཁོངས་རེད་བཤད་ཡོད། བོད་རིག་པའི་ཞིབ་འཇུག་སྐབས་སུ་ཟབ་ཟབ་གནང་དགོས། བསམ་ཤེས་མེད་པའི་རྒྱ་ནག་གོ་ལ་བསྡོད་མཁན་ཚོ་དཔལ་འབྱོར་གྱིས་སྨྱོན་པ་ཆགས་ནས་ཁ་ནས་གང་བྱུང་མང་བྱུང་བཤད་ཀྱི་རེད། ཁོང་ཚོའི་བཤད་ཚད་ཚང་མ་ཁ་ཡ་བྱས་བསྡད་ན་ནམ་ཞིག་ཁྱེད་རང་ཀན་སར་ན་ཚ་ཕོག་གི་རེད་ཏོ། དེ་ལས་ཁྱེད་རང་རྒྱ་ནག་དེ་བོད་དང་སོག་པོའི་ཁོངས་གཏོགས་ཡིན་པ་སྒྲུབ་བྱ་བཀོད་ཐུབ་པ་བྱེད་དགོས། ཉི་འོང་གྱི་ རྒྱ་ནག་ལ་ ཁྱོད་རང་ཚོ་བོད་ལ་ཐུབ་ཚོད་བཏང་པ་ནང་བཞིན་ང་ཚོ་ལ་འགྲོ་ཀྱི་མ་རེད་ད། རྒྱ་ནག་ལ་ལན་བརྒྱབ་སོང་བ། ཁྱེད་རང་ གོ་མ་བྱུང་ངས།