དཔལ་ས་སྐྱའི་རིགས་གཏེར་དཔྱིད་ཆོས་ཆེན་མོ་ལེཊ་པར་གྲུབ།  

རྫོང་སར་བཤད་གྲྭ་རུ་ཚོགས་པའི་དཔལ་ས་སྐྱའི་རིགས་གཏེར་དཔྱིད་ཆོས་ཆེན་མོ་སྐབས་དགུ་པ་དང་རིས་མེད་མཁས་པའི་ཕར་ཕྱིན་བགྲོ་གླེང་ཐོག་ས་སྐྱའི་བྱེས་ཀྱི་བཤད་གྲྭ་ཁག་ ༩ མཉམ་ཞུགས་གནང་།ཁ་སང་དབུས་ས་སྐྱ་སྨོན་ལམ་ཐེབས་རྩ་ཁང་གི་གོ་སྒྲིག་འོག སྦིར་ཅོན་ཏ་རའི་ཉེ་འཁྲིས་རྫོང་སར་བཤད་གྲྭ་རུ་ཉིན་གྲངས་ ༡༥ རིང་ཚོགས་པའི་དཔལ་ས་སྐྱའི་རིགས་གཏེར་དཔྱིད་ཆོས་ཆེན་མོ་སྐབས་དགུ་པ་དང་རིས་མེད་མཁས་པའི་ཕར་ཕྱིན་བགྲོ་གླེང་ལེགས་པར་གྲུབ་ཡོད་པ་དང་། འདི་ལོའི་རིགས་གཏེར་དཔྱིད་ཆོས་ཆེན་མོའི་ཐོག་དཔལ་ས་སྐྱའི་བྱེས་ཀྱི་བཤད་གྲྭ་ཁག་བཅུ་ལྷག་གི་ཁྲོད་ནས་ས་སྐྱ་མཐོ་སློབ་དང་། རྫོང་སར་བཤད་གྲྭ། མ་དགོན་བཤད་གྲྭ། གསང་ཆེན་རྒྱུད་ཀྱི་བཤད་གྲྭ། གོང་དཀར་ཆོས་སྡེའི་བཤད་གྲྭ། པདྨ་ཚལ་གྱི་བཤད་གྲྭ། རིམ་སྦིག་བཤད་གྲྭ། རང་རིག་ཨེ་ཝྃ་བཤད་གྲྭ། དེ་བཞིན། འབྲི་རུ་བསམ་འགྲུབ་བདེ་ཆེན་ཆོས་འཁོར་གླིང་བཅས་བཤད་གྲྭ་ཁག་ ༩ མཉམ་ཞུགས་གནང་སྟེ། འཆད་རྩོད་རྩོམ་གསུམ་གྱི་སྒོ་ནས་ཚད་མ་རིག་པའི་སྐོར་ལ་སློབ་གཉེར་དོགས་གཅོད་དང་ཕར་ཕྱིན་སོགས་ཀྱི་ཐོག་བགྲོ་གླེང་གནང་ཡོད་པ་རེད།

འདི་ལོར་རིས་མེད་མཁས་པའི་བགྲོ་གླེང་དེ་གཞུང་ཆེན་ཕར་ཕྱིན་ཐོག་གནང་ཡོད་ཅིང་། བགྲོ་གླེང་ཐོག་༸སྐྱབས་རྗེ་འཁོན་གདུང་ཨ་བྷེ་ཀྲི་ཏ་བཛྲ་རིན་པོ་ཆེ་དང་། ༸སྐྱབས་རྗེ་འཁོན་གདུང་ཨ་བྷ་ཡ་རིན་པོ་ཆེ་རྣམ་གཉིས་ཀྱི་དབུས་ས་སྐྱའི་བཤད་གྲྭ་ཁག་གི་མཁན་རིན་པོ་ཆེ་རྣམ་པ་དབུ་བཞུགས་ཐོག བགྲོ་གླེང་བ་གཡུང་དྲུང་བོན་དང་། སྔ་འགྱུར་རྙིང་མ། རི་བོ་དགེ་ལུགས་པ་བཅས་ཀྱི་མཁས་དབང་རྣམ་པ་དང་། ས་སྐྱའི་བཤད་གྲྭ་ཁག་ལྔ་ནས་མཁན་པོ་ལྔ་བཅས་ཁྱོན་མཁས་དབང་རྣམ་པ་ ༩ ཡིས་ཕར་ཕྱིན་སྐོར་ལ་སོ་སོའི་ལུགས་ཀྱི་བཞེད་པ་དང་མཐུན་པའི་རྩོམ་ཡིག་སྒྲོག་སྦྱང་དང་དྲི་བ་དྲིས་ལན་སོགས་གནང་།རིགས་གཏེར་དཔྱིད་ཆོས་ཆེན་མོ་འདིའི་དམིགས་ཡུལ་གཙོ་བོ་ནི། འཇམ་མགོན་ས་སྐྱ་པཎྜི་ཏ་ཆེན་པོས་ཐོག་མར་ཤེས་བྱ་ཀུན་ལ་མཁས་པར་བྱ།། བར་དུ་མཁས་པའི་ཚོགས་སུ་ལེགས་པར་བཤད།། ཐ་མ་འདྲིས་པའི་དོན་ལ་བརྩོན་པས་བསྒོམ།། དུས་གསུམ་རྒྱལ་བ་ཀུན་གྱི་བཞེད་གཞུང་ཡིན།། ཞེས་གསུངས་པ་ལྟར། དམ་པ་གོང་མའི་བཞེད་གཞུང་སྐྱོང་བའི་སྐྱེས་བུ་སྐྱེད་སྲིང་ཐུབ་པའི་ཆེད་དུ་བཤད་གྲྭ་ཁག་ཕན་ཚུན་རྣམ་དཔྱོད་བརྗེ་ལེན་དང་། ཚད་མ་རིག་པར་གོ་རྒྱ་བསྐྱེད་པར་འཆད་རྩོད་རྩོམ་གསུམ་གྱི་སྒོ་ནས་ཕན་ཚུན་གོ་བསྡུར་དང་རིག་རྩལ་འགྲན་པའི་སྡིངས་ཆ་ཞིག་བསྐྲུན་པ་དང་། ཚད་མ་རིགས་གཏེར་འདི་ཉིད་སློབ་དཔོན་ཕྱོགས་གླང་དང་ཆོས་གྲོགས་ཡབ་སྲས་ཀྱི་ཚད་མའི་བཤད་སྲོལ་དྲི་མ་མེད་པ་ཞིག་ཡིན་པས་དེའི་འཕྲིན་ལས་དར་རྒྱས་ཡུན་དུ་གནས་ཆེད་དང་། ཡང་སྒོས་ཕྱི་ལོ་ ༢༠༡༤ ལོར་དབུས་དཔལ་ས་སྐྱའི་སྨོན་ལམ་ཐེབས་རྩ་ཁང་གི་རྒྱུན་ལས་གསར་འཛུགས་བྱུང་བར། ༸སྐྱབས་མགོན་༸གོང་མ་ཁྲི་ཆེན་རིན་པོ་ཆེ་མཆོག་དང་། ༸གོང་མ་ཁྲི་འཛིན་རིན་པོ་ཆེ་རྣམ་གཉིས་ནས་ཤེས་ཡོན་དང་འབྲེལ་བའི་ལས་དོན་སྒྲུབ་དགོས་པའི་བཀའ་སློབ་ལམ་སྟོན་ཕེབས་དོན་བཞིན། དབུས་དཔལ་ས་སྐྱའི་སྨོན་ལམ་ཐེབས་རྩ་ཁང་ནས་དཔལ་ས་སྐྱའི་དགོན་སྡེ་ཁག་གི་གཞི་རིམ་དང་། མཐོ་རིམ་ཤེས་ཡོན་ཡར་རྒྱས་ཆེད་ལས་དོན་དུ་མ་བསྒྲུབས་དང་སྒྲུབ་མུས་ལས། རིགས་གཏེར་དཔྱིད་ཆོས་ཆེན་མོ་ནི་མཐོ་རིམ་ཤེས་ཡོན་ཡར་རྒྱས་སུ་དམིགས་པ་ཞིག་ཡིན་པ་རེད། དཔལ་ས་སྐྱའི་རིགས་གཏེར་དཔྱིད་ཆོས་ཆེན་མོ་འདི་ནི་གནའ་སྔ་མོ་བོད་དུ་དཔལ་ས་སྐྱའི་གདན་ས་ཆེན་པོ་སོགས་སུ་དབྱར་ཆོས་དང་དགུན་ཆོས། དེ་བཞིན། དཔྱིད་ཆོས་ཞེས་ཚོགས་སྲོལ་ཡོད་པ་དང་། བཙན་བྱོལ་དུ་གཙོ་བོ་༸གོང་ས་རྒྱལ་བ་རིན་པོ་ཆེ་མཆོག་དང་། ༸སྐྱབས་མགོན་༸གོང་མ་ཁྲི་ཆེན་རིན་པོ་ཆེ་རྣམ་གཉིས་ཀྱི་དབུས་རིས་མེད་སྐྱེས་མཆོག་དམ་པ་རྣམས་ཀྱི་བཀའ་དྲིན་དང་བཀའ་སློབ་ལམ་སྟོན་འོག བཤད་གྲྭ་ཁག་མཉམ་རུབ་ཀྱིས་དབྱར་ཆོས་དང་དགུན་ཆོས་ཚོགས་སྲོལ་བྱུང་བ་ལྟར། དཔལ་ས་སྐྱའི་བཤད་གྲྭ་ཁག་མཉམ་རུབ་ཀྱིས་རིགས་གཏེར་དཔྱིད་ཆོས་འདི་མུ་མཐུད་ཚོགས་ཀྱི་ཡོད་པ་དང་། རིགས་གཏེར་དཔྱིད་ཆོས་ཆེན་མོའི་རིང་གཙོ་བོ་འཇམ་མགོན་ས་སྐྱ་པཎྜི་ཏ་ཆེན་པོས་མཛད་པའི་ཚད་མ་སྡེ་བདུན་མདོ་དང་བཅས་པའི་དགོངས་འགྲེལ་ཚད་མ་རིགས་གཏེར་གྱི་གཞུང་འཆད་རྩོད་རྩོམ་གསུམ་གྱི་སྒོ་ནས་ཚད་མ་རིག་པའི་སྐོར་ལ་སློབ་སྦྱོང་གནང་གི་ཡོད་པ་དང་། ལྷག་པར་དུ་གཞུང་ཆེན་ཁག་གི་དགོངས་པའི་དཀའ་གནད་གསེད་བཀྲོལ་ཚད་ལྡན་ཞིག་ཡོང་བ་སོགས་ཀྱི་ཆེད་དུ་དམིགས་ཏེ། གཞུང་ཆེན་ཁག་བརྗེ་རེས་ཀྱིས་ཆོས་བརྒྱུད་རིས་མེད་ཀྱི་མཁས་དབང་གདན་ཞུའི་ཐོག་བགྲོ་གླེང་གོ་སྒྲིག་མུ་མཐུད་ཞུ་བཞིན་ཡོད་པ་རེད།

དཔལ་ས་སྐྱའི་སྨོན་ལམ་ཐེབས་རྩའི་ཡིག་ཚང་ནས་གནས་ཚུལ་མཁོ་གཏོང་གནང་།

བསྐྱར་བཅོས།: ༢༠༡༩/༠༤/༡༦

Leave a Reply