པཱ་ཀི་སི་ཐན་གྱི་སྲིད་བློན་ཨིམ་རན་ཁན་མཆོག་གིས་ཡང་བསྐྱར་རྒྱ་གར་གྱི་སྲིད་བློན་མུ་དྷི་མཆོག་ལ་ཡིག་འབྲེལ་གནང་སྟེ་རྒྱལ་ཁབ་གཉིས་བར་ཞི་འགྲིག་ཡོང་སླད་གྲོས་མོལ་བྱེད་འདོད་ཡོད་སྐོར་ཞུས་འདུག

ཁ་སང་ཕྱི་ཚེས་ ༧ ཉིན། པཱ་ཀི་སི་ཐན་གྱི་(Geo TV)གསར་ཁང་གིས་སྤེལ་བའི་གནས་ཚུལ་ལྟར་ན། པཱ་ཀི་སི་ཐན་གྱི་སྲིད་བློན་ཨིམ་རན་ཁན་(Imran Khan)མཆོག་གིས་རྒྱ་གར་གྱི་སྲིད་བློན་མུ་དྷི་མཆོག་ལ་འཕྲིན་ཡིག་ཅིག་བསྐུར་ཏེ། ཕྱོགས་གཉིས་ཀྱི་འབྲེལ་ལམ་གཙོའི་ཀ་ཤི་མིར་གྱི་གནད་དོན་སོགས་ཀྱི་ཐད་གྲོས་མོལ་གྱིས་ཞི་འགྲིག་ཡོང་འདོད་ཡོད་སྐོར་བརྗོད་ཡོད་འདུག་ལ། ཐེངས་འདིར་པཱ་ཀི་སི་ཐན་སྲིད་བློན་མཆོག་གིས་གྲོས་མོལ་གནང་ཐབས་ཀྱི་རེ་སྐུལ་ཐེངས་གཉིས་པ་དེ་ཆགས་ཡོད་འདུག

སྲིད་བློན་ཨིམ་རན་ཁན་གྱི་འཕྲིན་ཡིག་ནང་། སྲིད་བློན་མུ་དྷི་མཆོག་རྒྱ་གར་རྒྱལ་ཡོངས་འོས་བསྡུའི་ཁྲོད་རྒྱལ་ཁ་ཐོབ་སྟེ་ཐེངས་གཉིས་པའི་སྲིད་བློན་གྱི་དམ་འབུལ་གནང་བར་རྟེན་འབྲེལ་ཞུས་ཡོད་པ་དང་སྦྲགས། ཕྱོགས་གཉིས་ཀྱིས་གྲོས་མོལ་གནང་བ་བརྒྱུད་གནད་དོན་སེལ་རྒྱུ་དེ་རྒྱལ་ཁབ་གཉིས་ཀྱི་ཁེ་ཕན་ཡིན་པ་དང་། ཕྱོགས་གཉིས་ཀྱི་ས་ཁུལ་ཡར་རྒྱས་དང་མི་མང་དབུལ་ཕོངས་ལས་ཐར་བའི་ཐབས་ལམ་གཙོ་བོ་སྟེ་མཉམ་ལས་བྱ་རྒྱུ་གལ་ཆེན་ཡིན་པ་དང་། པཱ་ཀི་སི་ཐན་ཕྱོགས་ནས་ཀ་ཤི་མིར་གནད་དོན་གཙོའི་དཀའ་རྙོག་ཚང་མ་སེལ་འདོད་ཡོད་སྐོར་བརྗོད་ཡོད་འདུ

དེའི་སྐོར་ལ་རྒྱ་གར་དུས་བབ་གསར་ཁང་གིས་སྤེལ་བའི་གནས་ཚུལ་ནང་། ཐེངས་འདིར་སྲིད་བློན་ཨིམ་རན་ཁཱན་མཆོག་གིས་མུ་དྷི་གཞུང་ལ་ཀ་པི་སི་ཐན་ཕྱོགས་ནས་དཀའ་རྙོག་རིགས་སེལ་འདོད་ཡོད་སྐོར་བརྗོད་པ་ཐེངས་གཉིས་པ་དེ་ཆགས་ཡོད་པ་དང་། ཐེངས་དང་པོ་དེ་ཁོང་པཱ་ཀི་སི་ཐཱན་གྱི་སྲིད་བློན་དུ་བདམས་རྗེས་རྒྱ་གར་དང་མཉམ་ལས་བྱ་འདོད་ཡོད་པ་མ་ཟད། རྒྱ་གར་ཕྱོགས་ནས་བཟང་ཕྱོགས་སུ་གོམ་གང་སྤོས་པ་ཡིན་ན། པཱ་ཀི་སི་ཐན་ཕྱོགས་ནས་གོམ་པ་གཉིས་སྤོ་རྒྱུ་ཡིན་སྐོར་སོགས་བརྗོད་ཡོད་ན་ཡང་། ད་ལོའི་ཕྱི་ཟླ་ ༢ པའི་ནང་རྒྱ་གར་ཀ་ཤི་མིར་ནང་པཱ་ཀི་སི་ཐན་གྱི་འཇིགས་སྐུལ་བས་གཏོར་རྒོལ་བྱས་རྗེས། ཕྱོགས་གཉིས་བར་མཁའ་དམག་གིས་འཇབ་རྒོལ་དང་ང་ཤི་ཁྱོད་གསོན་གྱི་གདོང་ཐུག་བྱུང་རྐྱེན་ཕྱོགས་གཉིས་ཀྱི་འབྲེལ་ལམ་ལ་དོ་ཕོག་ཆེན་པོ་ཕྱིན་ཡོད་སྐོར་བརྗོད་འདུག

སྐབས་དེར་པཱ་ཀི་སི་ཐན་རྗེ་ཨི་ཨེམ་འཇིགས་སྐུལ་དྲག་སྤྱོད་པས་རྒྱ་གར་གྱི་ཉེན་རྟོག་དམག་མི་ ༤༠ ལྷག་རྐྱེན་འདས་སུ་བཏང་ཡོད་པའི་གནས་ཚུལ་ཐོན་རྗེས། ཕྱོགས་གཉིས་ཀྱི་སྤྱི་ཚོགས་ནང་གླེང་སློང་ཤུགས་ཆེན་པོ་བྱུང་ཡོད་པ་མ་ཟད། རྒྱལ་སྤྱིའི་སྟེང་སྔ་ཕྱི་མ་གཏོགས་རྒྱ་གར་གཞུང་གིས་པཱ་ཀི་སི་ཐན་ལ་དྲག་རྒོལ་བྱ་རྒྱུ་ཡིན་པ་གཏན་འཁེལ་བྱས་ཡོད་པ་དང་། གནད་དོན་དེའི་ཐད་རྒྱལ་སྤྱིའི་སྤྱི་ཚོགས་ནས་པཱ་ཀི་སི་ཐན་ལ་སྐྱོན་བརྗོད་དང་རྒྱ་གར་མཉམ་དུ་འཇིགས་སྐུལ་བའི་དོན་རྐྱེན་ལ་མཉམ་ལས་བྱ་དགོས་པའི་སྐུལ་སློང་དང་། པཱ་ཀི་སི་ཐཱན་ངོས་ནས་འཇབ་རྒོལ་སྐབས་འཛིན་བཟུང་བྱས་པའི་རྒྱ་གར་མཁའ་དམག་འཇབ་རྒོལ་བ་ཕྱོགས་གཉིས་ཀྱི་མཐུན་ལམ་ཆེད་ཀློད་གྲོལ་གཏོང་དགོས་པའི་འབོད་སྐུལ་གནང་ཡོད་པ་རེད། དྲག་རྒོལ་དོན་རྐྱེན་བྱུང་སྐབས་སོ་ཌི་རྒྱལ་ཁབ་ཀྱི་རྒྱལ་སྲས་མོ་ཧཱ་མཌ་བྷིན་སཱལ་མཱན་(Mohammad Bin Salman) གྱིས་རྒྱ་གར་དང་པཱ་ཀི་སི་ཐན་ནང་སྐོར་སྐྱོད་བྱེད་བཞིན་པའི་སྐབས་དང་འཁེལ་ཡོད་པར་བརྟེན། ད་བར་རྒོལ་ལན་སློག་མེད་པར་གནས་སྐབས་ཞི་འགྲིག་ཡོང་ཐབས་བྱས་ཡོད་པ་རེད།

རྒྱལ་སྤྱིའི་སྲིད་དོན་དབྱེ་ཞིབ་པ་ཚོས་ཐེངས་འདིར་སྲིད་བློན་གཉིས་བར་གྲོས་མོལ་ཡོང་བའི་གནད་དོན་གཅིག་ནི། ཉེ་སྔོན་རྒྱ་གར་གཞུང་གིས་ཟླ་འདིའི་ནང་ཀེར་རྗེ་སི་ཐན་(Kyrgyzstan)སྤྱི་མཐུན་རྒྱལ་ཁབ་ནང་ཚོགས་ལ་ཉེ་བའི་ཧྲང་ཧེ་མཉམ་འབྲེལ་ཚོང་ལས་ཚོགས་འདུའི(SCO)སྐབས་མུ་དྷི་མཆོག་དང་རྒྱ་ནག་གི་མགོ་འཁྲིད་ཞི་ཅིན་ཕིན་གཉིས་ཐུག་འཕྲད་བྱ་རྒྱུ་ཡིན་པ་ལས། པཱ་ཀི་སི་ཐན་གྱི་སྲིད་བློན་དང་ཐུག་འཕྲད་བྱ་རྒྱུ་མིན་སྐོར་བརྗོད་ཡོད་པའི་རྐྱེན་ཡིན་པ་དང་། ཕྱོགས་གཅིག་ནས་མུ་དྷི་གཞུང་གིས་ཉེ་བའི་ལོ་ཤས་ནས་པཱ་ཀི་སི་ཐཱན་དང་རྣོ་ངར་ལྡན་པའི་གདོང་ཐུག་ཁག་ཅིག་ལ་བརྟེན་ནས། སྲིད་བློན་མུ་དྷི་མཆོག་བསྐྱར་དུ་སྲིད་བློན་ཆགས་པ་སོགས་ཀྱིས་པཱ་ཀི་སི་ཐན་ཕྱོགས་ནས་སྔོན་ཚུད་ནས་ཞི་འགྲིག་ཡོང་ཐབས་ཀྱི་གྲ་སྒྲིག་ལྟ་བུ་ཡིན་སྐོར་བརྗོད་འདུག

རྒྱ་གར་དང་པཱ་ཀི་སི་ཐན་གཉིས་ནི་ཡུན་རིང་རྡུལ་ཕྲན་མཚོན་ཆའི་འཇིགས་སྐུལ་དང་དྲག་དམག་གི་གདོང་ཐུག་བྱུང་མྱོང་བའི་ཁྱིམ་མཚེས་རྒྱལ་ཁབ་གཉིས་ཡིན་པ་དང་། རྒྱ་གར་དང་པཱ་ཀི་སི་ཐན་བར་ཕྱི་ལོ་ ༡༩༤༧ དང་། ༡༩༦༥། ༡༩༧༡། ༡༩༩༩ བཅས་ལ་དམག་འཁྲུག་ཆེན་མོ་ཐེངས་བཞི་བརྒྱབས་ཡོད་པ་དང་།  འདི་ལོའི་རྒྱལ་སྤྱིའི་དམག་གི་འཐབ་ཇུས་ལྟེ་གནས་ཁང་(International Institute for Strategic Studies) གིས་བཏོན་པའི་སྙན་ཐོ་ལྟར་ན། ཕྱི་ལོ་ ༢༠༡༨ ལོའི་རྒྱ་གར་གྱི་དམག་གི་འགྲོ་གྲོན་དེ་ཨ་སྒོར་ཐེར་འབུམ་ ༥༨ ཡིན་འདུག་པ་དང་། པཱ་ཀི་སི་ཐན་གྱི་དམག་གི་འགྲོ་གྲོན་དེ་ཨ་སྒོར་ཐེར་འབུམ་ ༡༡ དང་། རྒྱ་གར་ལ་དམག་མི་ས་ཡ་ ༡།༢ དང་། མེ་སྒྱོགས་ ༣༥༦༥ ལས་མང་བ། འཐབ་འཁྲུག་རླངས་འཁོར་ ༣,༡༠༠ དང་། དམག་མི་དབོར་འདྲེན་རླངས་འཁོར་ ༣༣༦། དེ་བཞིན་རྒྱང་ཚད་རིང་བའི་མེ་སྒྱོགས་ ༩༧༡༩ (Artillery)ལྷག་ཡོད་འདུག ཡིན་ན་ཡང་། པཱ་ཀི་སི་ཐན་ལ་དམག་མི་ ༥,༦༠,༠༠༠ དང་། མེ་སྒྱོགས་ ༢,༤༩༦། དམག་མི་དབོར་འདྲེན་རླངས་འཁོར་ ༡,༦༠༥ ། རྒྱང་ཚད་རིང་པོར་སྙོབ་ཐུབ་པའི་མེ་མདའ་ ༤,༤༧༢ དང་། རང་འགུལ་མེ་སྒྱོགས་ ༣༧༥ (Self-propelled howitzer)ལྷག་ཡོད་སྐོར་བརྗོད་ཡོད་འདུག

གསར་འགོད་པ། སངས་རྒྱས་དཀོན་མཆོག