ཨ་རིའི་སྲིད་འཛིན་ཊོམ་ཕུ་མཆོག་གིས་ཕྱི་ལོ་ ༢༠༢༠ ལོའི་སྲིད་འཛིན་འོས་བསྡུའི་དྲིལ་བསྒྲགས་ཨ་རིའི་ཆབ་སྲིད་ལངས་ཕྱོགས་ངེས་གཏན་མེད་པའི་ཧྥོ་ལོ་རི་ཌ་མངའ་སྡེའི་ནང་དངོས་སུ་མགོ་བརྩམས་འདུགཁ་སང་ཨ་རིའི་སྲིད་འཛིན་ཊོམ་ཕུ་མཆོག་གིས་ཧྥོ་ལོ་རི་ཌ་མངའ་སྡེའི་ཨོར་ལན་ཌོ་ (Orlando, Florida) གྲོང་ཁྱེར་དུ། ཁོང་ཕྱི་ལོ་ ༢༠༢༠ ལོའི་སྲིད་འཛིན་འོས་མིར་ལངས་བའི་དྲིལ་བསྒྲགས་ལས་འགུལ་དངོས་སུ་མགོ་འཛུགས་ཀྱི་གཞུང་འབྲེལ་གསལ་བསྒྲགས་གནང་ཡོད་པ་དང་། སྐབས་དེར་ཊོམ་ཕུ་མཆོག་གིས་གལ་སྲིད་ཁོང་ལ་རྒྱལ་ཁ་འཐོབ་པ་ཡིན་ན།  ཨ་རི་བསྐྱར་དུ་རླབས་ཆེན་གྱི་རྒྱལ་ཁབ་ཅིག་ཏུ་བསྐྲུན་རྒྱུའི་དམ་བཅའ་དང་སྦྲགས། དམངས་གཙོ་ཚོགས་པས་སོ་སོའི་ཆབ་སྲིད་ཀྱི་ཁེ་ཕན་སྲུང་སྐྱོབ་ཆེད་ཁྲིམས་མཐུན་མ་ཡིན་པའི་གནས་སྤོར་བ་རྣམས་ཨ་རིར་སླེབ་ཏུ་འཇུག་གི་ཡོད་པ་མ་ཟད། ཨ་རིའི་མི་སེར་རྣམས་ཀྱི་ཐོབ་ཐང་ལ་རྡོག་རོལ་གཏོང་གི་ཡོད་སྐོར་གྱི་སྐྱོན་བརྗོད་དྲག་པོ་གནང་ཡོད་འདུག

མི་ཚོགས་ཀྱི་མདུན་དུ་ཊོམ་ཕུ་མཆོག་གིས། དོ་དགོང་ང་ཁྱེད་ཚོའི་མདུན་དུ་ལངས་ཏེ་བསྐྱར་དུ་ཨ་རིའི་སྲིད་འཛིན་དུ་ལངས་བའི་དྲིལ་བསྒྲགས་ལས་འགུལ་མགོ་རྩོམ་རྒྱུ་ཡིན། ངས་ཁྱེད་ཚོ་བློ་ཕམ་མི་ཡོང་རྒྱུའི་དམ་བཅའ་འཇོག་གི་ཡོད། ཅེས་དང་། ང་ཚོས་རང་གི་རྒྱལ་ཁབ་འདི་ཁྲིམས་ལ་བརྩི་སྲུང་བྱེད་མཁན་མི་སེར་ཚོའི་སྡོད་གནས་ཤིག་ཡིན་པ་ལས། ཕྱི་ནས་ཡོང་བའི་ནག་ཉེས་ཅན་ཚོའི་ཆེད་དུ་མིན་པར་ཡིད་ཆེས་བྱེད་ཀྱི་ཡོད། ཅེས་གསུངས་འདུག

ཡང་ཁོང་གིས། ཨ་རི་འདི་ནམ་ཡང་སྤྱི་ཚོགས་རིང་ལུགས་ཀྱི་རྒྱལ་ཁབ་ཅིག་ཏུ་འགྱུར་མི་སྲིད་པ་དང་། གལ་ཏེ་ ༢༠༢༠ ལོའི་འོས་བསྡུ་དེ་དམངས་གཙོ་ཚོགས་པར་འཐོབ་བའི་དབང་དུ་གཏང་ན། དེས་སྤྱི་ཚོགས་རིང་ལུགས་འཕེལ་རྒྱས་འགྲོ་བ་དང་། ཨ་རིའི་རྨི་ལམ་ཆེན་པོ་དེ་བརྡལ་བཤིག་འགྲོ་བ་མཚོན་གྱི་ཡོད། ཅེས། ཐེངས་སྔོན་མའི་སྲིད་འཛིན་འོས་བསྡུའི་ཁ་གཏད་པ་དམངས་གཙོ་ཚོགས་པའི་ལྕམ་ཧེ་ལ་རི་ཁི་ལིན་ཊོན་ (Hillary Clinton)ལགས་ཀྱིས་གློག་འཕྲིན་བརྒྱུད་རྒྱལ་ཁབ་ཀྱི་གསང་བ་ཕྱིར་གྱར་ཡོད་ལུགས་དང་། ཕྱི་ལོ་ ༢༠༡༦ ལོའི་སྲིད་འཛིན་འོས་བསྡུའི་སྐབས་ཨུ་རུ་སུས་གསང་བའི་ཐེ་གཏོགས་བྱས་ཡོད་མེད་ཀྱི་མུ་ལར་སྙན་ཐོ་(Mueller Report)ལ་དམངས་གཙོ་ཚོགས་པས་སྣེ་འཁྲིད་དེ་ཞིབ་འཇུག་བྱས་ཡོད་ཀྱང་འབྲས་བུ་ཐོན་མེད་ཀྱང་། ད་དུང་ཨུ་ཚུགས་ཀྱིས་བསྐྱར་དུ་ཞིབ་འཇུག་འཚོག་དགོས་པའི་རེ་སྐུལ་འདོན་གྱི་ཡོད་པར་སྐྱོན་བརྗོད་དང་། གསར་འགོད་པ་རྣམས་ལ་དམིགས་ནས་ “གནས་ཚུལ་རྫུན་མ་སྤེལ་མཁན་དེ་ཚོ་” ཞེས་ཟུར་འདོན་གྱིས་སྐྱོན་བརྗོད་གནང་ཡོད་འདུག

སྤྱིར་སྲིད་འཛིན་ཊོམ་ཕུ་མཆོག་གིས་ཕྱི་ལོ་ ༢༠༡༧ ལོའི་ཕྱི་ཟླ་ ༡ པོའི་ནང་སྐབས་རྗེས་མའི་སྲིད་འཛིན་འོས་བསྡུའི་ནང་ཞུགས་རྒྱུར་ཐོ་འགོད་སོགས་གནང་སྟེ། ད་བར་གནད་འགག་ཅན་གྱི་ས་ཁུལ་མི་ཉུང་བ་ཞིག་གི་ནང་འོས་བསྡུའི་དྲིལ་བསྒྲགས་རང་བཞིན་གྱི་གཏམ་བཤད་སོགས་གནང་ཚར་ཡོད་ཀྱང་། ཐེངས་འདིར་ཡོངས་གྲགས་ཀྱི་ཐོག་ནས་ཆབ་སྲིད་ཀྱི་ལངས་ཕྱོགས་ངེས་གཏན་མེད་པའི་ཧྥོ་ལོ་རི་ཌ་མངའ་སྡེའི་ནང་དངོས་སུ་གཞུང་འབྲེལ་གསལ་བསྒྲགས་གནང་ཡོད་པ་དང་། ས་གནས་གསར་འགོད་པ་ཚོས་བརྗོད་པ་ལྟར་ན། ཊོམ་ཕུ་མཆོག་གི་རྒྱབ་སྐྱོར་བ་མང་པོ་ཞིག་གིས་ཁ་སང་ཞོགས་པ་ནས་འདུ་འཛོམས་ཁང་གི་ཕྱི་ལོགས་ལ་སྒུག་ནས་བསྡད་ཡོད་པ་དང་། ཡང་ཁོང་ལ་ངོ་རྒོལ་བྱེད་མཁན་གྱི་ཤོག་ཁག་ཅིག་གིས་ངོ་རྒོལ་སྐད་འབོད་ཀྱང་བྱས་ཡོད་འདུག

ཝ་ཤིན་ཊོན་ཆ་འཕྲིན་གྱིས་སྤེལ་བའི་གནས་ཚུལ་ནང་། འདས་པའི་ལོ་ ༢ དང་ཕྱེད་ཀའི་སྲིད་འཛིན་གྱི་ལས་ཡུན་རིང་ཊོམ་ཕུ་མཆོག་གིས་ཨ་རིའི་ནང་གི་ཁྲིམས་མཐུན་མ་ཡིན་པའི་གནས་སྤོར་བའི་གནད་དོན་དེ་གཙིགས་སུ་བཟུང་ཡོད་པ་མ་ཟད། ཁ་སང་གི་གཏམ་བཤད་ནང་དུའང་འདས་པའི་ལོ་ ༢ དང་ཕྱེད་ཀའི་ནང་ང་ཚོས་བསྒྲུབས་པ་བཞིན་ཨ་རིའི་སྲིད་འཛིན་སུས་ཀྱང་གནང་ཐུབ་མེད་པ་དང་། ཕྱི་ལོ་ ༢༠༡༦ ལོའི་འོས་བསྡུའི་ལས་འགུལ་ནི་འོས་བསྡུའི་ལས་འགུལ་ཙམ་མིན་པར་ཆབ་སྲིད་ཀྱི་ལས་འགུལ་ཆེན་པོ་ཞིག་ཡིན་སྐོར་སོགས་གསུངས་འདུག འོན་ཀྱང་སྲིད་འཛིན་འོས་བསྡུའི་ཚོད་དཔག་གྲུབ་དོན་ལྟར་ན། མང་ཚོགས་ཀྱི་ཁྲོད་ན་སྲིད་འཛིན་ཊོམ་ཕུ་མཆོག་གི་འཛིན་སྐྱོང་གི་ཕྱག་ལས་གནང་ཕྱོགས་ཐད་འདོད་པ་མ་ཁེངས་མཁན་ཤུགས་ཆེན་པོ་ཡོད་པ་མ་ཟད། ཕྱི་ལོ་ ༢༠༡༨ ལོའི་ཨ་རིའི་བར་མའི་འོས་བསྡུའི་སྐབས་སུ་ཡང་སྤྱི་མཐུན་ཚོགས་པར་ཕམ་ཁ་ཆེན་པོར་བྱུང་སྟེ། གྲོས་ཚོགས་འོག་མའི་ནང་བུད་མེད་གཙོས་པའི་སྲིད་འཛིན་ཊོམ་ཕུ་མཆོག་གི་ཁ་གཏད་དམངས་གཙོ་ཚོགས་པའི་ཁོངས་མི་མང་པོར་ཞབས་བཀྱག་ཐོབ་ཡོད་པ་རེད།

ཨ་རིའི་གྲོས་ཚོགས་འོག་མའི་སྤྱི་མཐུན་ཚོགས་པའི་འཐུས་མི་ཟུར་པ་དང་ཊོམ་ཕུའི་རྒྱབ་སྐྱོར་བ་ནིའུ་ཊི་གྷིང་རི་ཆི་ (Newt Gingrich) ཡིས། གལ་ཏེ་དཔལ་འབྱོར་མུ་མཐུད་སྲ་བརྟན་གནས་ཐུབ་ན། ཊོམ་ཕུ་མཆོག་ལ་ཡང་བསྐྱར་འཐོབ་རྒྱུའི་རེ་བ་ཡོད་པ་རེད། ཅེས་བརྗོད་ཡོད་པ་དང་། འོས་བསྡུའི་དྲིལ་བསྒྲགས་མགོ་འཛུགས་ཀྱི་གཏམ་བཤད་སྐབས་ཊོམ་ཕུ་མཆོག་གིས་ཨ་རིའི་དཔལ་འབྱོར་དེ་ཡར་རྒྱས་ཀྱི་རྩེ་མོར་སོན་ཡོད་སྐོར་དང་། ད་ལྟའི་ཨ་རིའི་ལས་མེད་ཀྱི་ཚད་གཞི་དེ་འདས་པའི་ལོ་ངོ་ ༥༡ ནང་གི་དམའ་ཤོས་ཡིན་སྐོར་གསུས་ཡོད་པ་ལྟར། ནིའུ་ཡོག་དུས་བབ་ཀྱིས་སྤེལ་བའི་གནས་ཚུལ་ནང་དུ་ཡང་འདི་ལོའི་ཕྱི་ཟླ་ ༥ པའི་ནང་ཨ་རིའི་ལས་མེད་ཀྱི་ཚད་གྲངས་དེ་བརྒྱ་ཆ་ ༣།༦ ཡིན་པ་དང་། དེ་ནི་ཕྱི་ལོ་ ༡༩༦༩ རྗེས་ཀྱི་དམའ་ཤོས་ཡིན་སྐོར་བསྒྲགས་ཡོད་འདུག

ཡང་དམངས་གཙོ་ཚོགས་པས་བརྗོད་ན། སྲིད་འཛིན་ཊོམ་ཕུ་མཆོག་གིས་སྨན་ཡོན་ཉུང་འཕྲི་བྱེད་རྒྱུ་སོགས་ཀྱི་ཁས་ལེན་རྣམས་བསྒྲུབས་མེད་པ་དང་། ཕྱི་ལོ་ ༢༠༡༦ སྲིད་འཛིན་འོས་བསྡུའི་སྐབས་ཊོམ་ཕུ་མཆོག་གིས་ཨུ་རུ་སུ་དང་ངན་པ་ལག་སྦྲེལ་བྱས་མིན་གྱི་ཁྲིམས་བཤེར་སྐབས། ཁྲིམས་ཞིབ་ཁང་གི་ལས་དོན་ལ་བཀག་འགོག་བྱས་པའི་ཉེས་མིང་འོག་སྲིད་འཛིན་ནས་གནས་དབྱུང་གཏོང་དགོས་པའི་བསམ་ཚུལ་འདོན་མཁན་བྱུང་ཡོད་པ་མ་ཟད། ཊོམ་ཕུ་མཆོག་ནས་ཨ་རི་ཁ་འཐོར་དུ་བཏང་སྟེ་མི་རིགས་དབྱེ་འབྱེད་དང་། བུད་མེད་ལ་ཁྱད་གསོད། དེ་བཞིན་ཨ་རྒྱའི་ཚོང་དམག་སྲིད་བྱུས་དང་། འདས་ལོའི་སོ་ཌི་ཨ་རབ་(Sadhi Arabia)ཀྱི་གསར་འགོད་པ་ཇཱ་མལ་ཁ་ཤོ་གྷི་ (Jamal Khashoggi) ཡི་གནད་དོན་དང་། སོ་ཌི་ཨ་རབ་ཀྱི་རྒྱབ་གཉེར་ཡོད་པའི་ཡེ་མན་ནང་གི་དམག་འཁྲུག་སོགས་ཀྱི་ཐད་ནས་སོ་ཌི་གཞུང་ཐོག་ལ་འཛིན་པའི་སྲིད་བྱུས་ཐད་དོགས་འདྲི་དང་སྐྱོན་བརྗོད་ཆེན་པོ་བྱེད་བཞིན་ཡོད་པ་མ་ཟད། འདས་པའི་ལོ་ ༢ དང་ཕྱེད་ཀའི་ནང་སྲིད་འཛིན་ཊོམ་ཕུ་མཆོག་གིས་དོན་དངོས་འཁྱོག་བཤད་དང་། དངོས་འབྲེལ་འུར་སྒྲོག་བྱེད་བཞིན་ཡོད་པའི་སྐྱོན་བརྗོད་མང་པོ་བྱེད་ཀྱི་ཡོད་པ་རེད།

ཊོམ་ཕུ་མཆོག་གི་ཁ་གཏད་གཙོ་བོ་དང་དམངས་གཙོ་ཚོགས་པའི་སྲིད་འཛིན་འོས་མི་བྷེར་ནེ་སན་ཌིར་སི(Bernie Sanders)ལགས་ཀྱིས། ཊོམ་ཕུ་ཡིས་ཆུ་ཚོད་ ༡།༣༠ རིང་རྫུན་གཏམ་དང་། མགོ་སྐོར། དོན་སྙིང་མེད་པའི་གཏམ་བཤད་ཅིག་སྤེལ་འདུག ཅེས་ཊོམ་ཕུ་མཆོག་གི་དྲིལ་བསྒྲགས་གཏམ་བཤད་ལ་རྒོལ་གཏམ་བཏང་ཡོད་པ་དང་། དེ་བཞིན་དམངས་གཙོ་ཚོགས་པའི་ཁོངས་མི་གཞན་གྱིས་ཀྱང་ཊོམ་ཕུའི་ཆབ་སྲིད་དེ་ཨ་རི་ཁ་འཐོར་དགུ་འཐོར་དུ་གཏོང་བའི་ཉེན་ཚབས་ཆེ་བའི་ཆབ་སྲིད་ཅིག་ཡིན་སྐོར་སྐྱོན་བརྗོད་བྱས་འདུགནེའུ་ཡོག་དུས་བབ་ཀྱིས་སྤེལ་བའི་གནས་ཚུལ་ནང་། ད་ལྟའི་ཆར་ཕྱི་ལོ་ ༢༠༢༠ ལོའི་ཨ་རིའི་སྲིད་འཛིན་འོས་བསྡུའི་ནང་དམངས་གཙོ་ཚོགས་པའི་འོས་མི་ ༢༣ དང་སྤྱི་མཐུན་ཚོགས་པའི་འོས་མི་  ༢ བཅས་ལངས་ཡོད་པ་དང་། ཕྱི་ལོ་ ༢༠༡༨ ལོའི་ཨ་རིའི་བར་མའི་འོས་བསྡུ་ལྟར་ལོ་རྗེས་མའི་སྲིད་འཛིན་འོས་བསྡུའི་ནང་དུའང་བུད་མེད་འོས་མི་མང་པོ་ཡོང་གི་ཡོད་སྐོར་བརྗོད་འདུག

གསར་འགོད་པ། པ་སངས་ཚེ་རིང་།