ཉི་ཧོང་གཞུང་ཚབ་མདུན་དུ་རང་ལུས་མེར་བསྲེགས་བཏང་།

ལྷོ་ཀོ་རི་ཡའི་རྒྱལ་སར་ཡོད་པའི་ཉི་ཧོང་གཞུང་ཚབ་ཁང་གི་མདུན་དུ་རང་ལོ་ ༧༨ ཡིན་པའི་ཀོ་རི་ཡའི་སྐྱེས་པ་ཞིག་གིས་རང་ལུས་མེར་བསྲེགས་བཏང་སྟེ་འདས་གྲོངས་སུ་ཕྱིན་ཡོད་འདུགཁ་སང་ཕྱི་ཚེས་ ༡༩ ཉིན་གྱི་སྔ་དྲོར་ལྷོ་ཀོ་རི་ཡའི་རྒྱལ་ས་སོལ་གྱི་ཉི་ཧོང་གཞུང་ཚབ་ཁང་གི་མདུན་དུ། ལྷོ་ཀོ་རི་ཡའི་ཀེམ་(Kim)མིང་ཅན་གྱི་སྐྱེས་པ་ལོ་ན་ ༧༨ཡིན་པ་ཞིག་གིས་རླངས་འཁོར་ནང་དུ་རང་ལུས་མེར་བསྲེགས་བཏང་སྟེ་འདས་གྲོངས་སུ་ཕྱིན་ཡོད་པ་དང་། བརྒྱུད་ལམ་ཁག་ནས་མི་དེས་ཉི་ཧོང་དང་ལྷོ་ཀོ་རི་ཡའི་འབྲེལ་ལམ་ཇེ་སྡུག་ཏུ་འགྲོ་བཞིན་པར་ངོ་རྒོལ་ཆེད་རང་ལུས་མེར་བསྲེགས་བཏང་བ་ཡིན་ལུགས་བརྗོད་ཀྱི་འདུག

ལྷོ་ཀོ་རི་ཡའི་ཉེན་རྟོག་ཁང་གིས། མི་དེས་རང་ལུས་མེར་བསྲེགས་གཏོང་དོན་ལྷོ་ཨེ་ཤ་ཡའི་ཁུལ་གྱི་རྒྱལ་ཁབ་ཁག་གི་འབྲེལ་ལམ་ཇེ་སྡུག་ཏུ་འགྲོ་བཞིན་ཡོད་པའི་རྐྱེན་གྱིས་་ཡིན་པ་དང་། ཁོས་མེར་བསྲེགས་མ་བཏང་གོང་ངོ་ཤེས་ཤིག་ལ་ཁ་པར་བཏང་ནས་ཁོང་ཉི་ཧོང་གི་གཞུང་ཚབ་ཁང་གི་མདུན་ལ་རང་ལུས་མེར་བསྲེགས་གཏོང་བར་འགྲོ་བཞིན་ཡོད་པ་དང་། ཁོས་དེ་ལྟར་བྱེད་དོན་ཉི་ཧོང་ལ་ངོ་རྒོལ་ཆེད་ཡིན་སྐོར་བརྗོད་ཡོད་འདུག

ཡང་ཀེམ་གྱི་ནང་མི་ཚོས་ཉེན་རྟོག་པར་བརྗོད་ན། ཀེམ་གྱིས་རང་ལུས་མེར་བསྲེགས་གཏོང་དོན་དེ་སྔོན་ཕྱི་ལོ་ ༡༩༡༠ ནས་ ༡༩༤༥ བར་ཉི་ཧོང་གིས་ལྷོ་ཀོ་རི་ཡར་དབང་བསྒྱུར་སྐབས། ཀེམ་གྱི་ཕ་ཚབ་ཉི་ཧོང་དམག་གིས་བཙན་གྱིས་ངལ་རྩོལ་བསྒྱུར་བཀོད་ཁང་དུ་བཅུག་པའི་རྐྱེན་གྱིས་ཡིན་སྐོར་བརྗོད་ཡོད་པ་དང་། གནད་དོན་དེའི་ཐད་ཉི་ཧོང་ཕྱི་སྲིད་བློན་ཆེན་ཊཱ་རོ་ཀོ་ནོ་(Taro Kono)ལགས་ཀྱིས། གནད་དོན་དེ་ནི་ཕྱི་ལོ་ ༡༩༦༥ ལོའི་ཆིངས་ཡིག་འོག་ཀུན་གསབ་སྤྲད་ཟིན་པ་ཞིག་ཡིན་པ་དང་། ལྷོ་ཀོ་རི་ཡའི་ཕྱོགས་ནས་དེ་འདྲའི་རིགས་གླེང་སློང་བྱེད་པ་ནི་ཧ་ཅང་ཚུལ་མཐུན་མིན་པ་ཞིག་ཡིན་སྐོར་བརྗོད་དེ་ངོས་བཞེས་གནང་མི་འདུག

ལྷོ་ཀོ་རི་ཡའི་ཉེན་རྟོག་ཕྱོགས་ནས་མུ་མཐུད་གནད་དོན་དེར་རྟོག་ཞིབ་བྱེད་བཞིན་ཡོད་པ་དང་། མི་མང་པོ་ཞིག་གིས་ཁོས་རང་ལུས་མེར་བསྲེགས་གཏོང་དོན་ནི་འདས་པའི་ལོ་ཤས་ནས་ཉི་ཧོང་དང་ལྷོ་ཀོ་རི་ཡའི་བར་ཚོང་འབྲེལ་གྱི་དཀའ་རྙོག་མང་པོ་ཡོང་བཞིན་ཡོད་པ་དང་། ཉི་ཧོང་གིས་ལྷོ་ཀོ་རི་ཡར་འཕྲུལ་ལས་ཕྱིར་ཚོང་རིགས་ལ་བཀག་སྡོམ་བྱས་ཏེ། ཕྱོགས་གཉིས་ཀྱི་འབྲེལ་བ་ཇེ་སྡུག་ཏུ་འགྲོ་བཞིན་པའི་རྐྱེན་གྱིས་ཡིན་པའི་ཚོད་དཔག་བྱེད་བཞིན་ཡོད་འདུག

ཉི་ཧོང་དང་ལྷོ་ཀོ་རི་ཡ་གཉིས་ནི་ཨེ་ཤ་ཡའི་ཨ་རིའི་ཕྱོགས་གཏོགས་ཀྱི་རྒྱལ་ཁབ་གཉིས་ཡིན་ན་ཡང་། ཕྱི་ལོ་ ༡༩༡༠ ནས་ ༡༩༤༥ བར་ཉི་ཧོང་གིས་ལྷོ་ཀོ་རི་ཡར་དབང་བསྒྱུར་བྱས་པའི་རྐྱེན་གྱིས་ཕྱོགས་གཉིས་ཀྱི་མང་ཚོགས་བར་ད་དུང་ཡང་འཁོན་འཛིན་ཡོད་པ་དང་། ལྷོ་ཀོ་རི་ཡའི་མི་མང་གིས་འདས་པའི་ལོ་ངོ་བཅུ་ཙམ་ཞིག་ནས་ལྷོ་ཀོ་རི་ཡའི་ཉི་ཧོང་གཞུང་ཚབ་མདུན་དུ་ཉི་ཧོང་ལ་ངོ་རྒོལ་སྐད་འབོད་དང་། ཐ་ན་ངོ་རྒོལ་སྐབས་མི་ཁ་ཤས་ཁོང་ཁྲོ་ཆེན་པོའི་ངང་སོ་སོའི་མཛུབ་མོ་བཏུབ་པ་དང་། ཉེན་རྟོག་པར་འཁྲུག་འཛིང་ཤོར་བ་སོགས་རྩུབ་སྤྱོད་རིགས་ཀྱང་བྱུང་ཡོད་འདུག

ཐེངས་འདིར་ལྷོ་ཀོ་རི་ཡའི་མི་ཞིག་གིས་ཉི་ཧོང་ལ་ངོ་རྒོལ་ཆེད་རང་ལུས་མེར་བསྲེགས་བཏང་བ་ཐེངས་དང་པོ་མ་ཡིན་པར། ཕྱི་ལོ་ ༢༠༡༧ ལོར་དེ་སྔོན་དམག་ཆེན་གཉིས་པའི་སྐབས་སུ་ལྷོ་ཀོ་རི་ཡའི་བུད་མེད་ཧ་ཅང་མང་པོ་ཞིག་ཉི་ཧོང་གིས་ཆགས་སྤྱོད་བྲན་གཡོག་ཏུ་བཀོལ་བའི་གནད་དོན་ཐད་ཀུན་གསབ་སྤྲོད་ཕྱོགས་དང་འབྲེལ་བའི་གྲོས་ཆོད་འཇོག་སྐབས། ལྷོ་ཀོ་རི་ཡའི་ནང་པའི་དགེ་སློང་ཞིག་གིས་གྲོས་ཆོད་དྲང་བདེན་མ་བྱུང་སྐོར་བརྗོད་དེ་རང་ལུས་མེར་བསྲེགས་བཏང་ཡོད་པ་རེད།

གསར་འགོད་པ། སངས་རྒྱས་དཀོན་མཆོག

བསྐྱར་བཅོས།: ༢༠༡༩/༠༧/༢༠

Leave a Reply