ཧོང་ཀོང་གི་ཡུན་ལོང་མེ་འཁོར་འབབ་ཚུགས་སུ་སྟོད་གོས་དཀར་པོ་གྱོན་ཞིང་ཁ་རས་བརྒྱབས་པའི་མི་བརྒྱ་སྐོར་ཞིག་གིས་ངོ་རྒོལ་ལས་འགུལ་བ་དང་འགྲུལ་བ་སོགས་ལ་གང་བྱུང་དབྱུག་པ་སོགས་ཀྱིས་གཞུས་ཏེ་མི་མང་པོར་རྨས་སྐྱོན་བཟོས།དེ་རིང་ཧོང་ཀོང་རང་དབང་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་ཧོང་ཀོང་གི་དམངས་གཙོ་དོན་གཉེར་བ་འབུམ་ ༤ ལྷག་གིས་བསྐྱར་དུ་གཞུང་གི་ལས་ཁུངས་ལྟེ་བའི་ཉེ་འཁྲིས་སུ་ངོ་རྒོལ་གྱི་རྔོམ་སྟོན་ཁྲོམ་སྐོར་བྱས་ཏེ། ས་གནས་དེའི་དགོང་མོའི་ཆུ་ཚོད་ ༡༠།༣༠ ཙམ་ནས་ལས་འགུལ་མཚམས་འཇོག་བྱས་ནས་རང་སར་ལོག་བཞིན་པའི་སྐབས། སྟོད་གོས་དཀར་པོ་གྱོན་ཞིང་ཁ་རས་གྱོན་པའི་མི་བརྒྱ་སྐོར་ཞིག་གིས། ཡུན་ལོང་མེ་འཁོར་འབབ་ཚུགས་(Yuen Long MTR station)སུ་ཡོད་པའི་ལས་འགུལ་བ་དང་། འགྲུལ་བ། གསར་འགོད་པ་བཅས་ལ་གང་བྱུང་རྒྱུག་པ་གཞུས་ཏེ་ཉུང་མཐར་མི་གྲངས་ ༣༦ ལྷག་ལ་རྨས་སྐྱོན་བཏང་ཡོད་འདུག

དེ་རིང་ཉིན་རྒྱབ་ཏུ་ཧོང་ཀོང་གི་སྲིད་འཛིན་ལྕམ་ཁེ་རི་ལེམ་གྱིས་བསྒྲགས་གཏམ་ཞིག་སྤེལ་སྐབས། འཚེ་བ་དེ་དཀའ་ངལ་སེལ་ཐབས་ཀྱི་ཐབས་ལམ་ཞིག་མིན། འཚེ་བས་འཚེ་བ་མ་གཏོགས་བསྐྱེད་མི་ཐུབ། ཁྲིམས་དང་སྒྲིག་གཞི་གདལ་བཤིག་བཏང་བ་དེས་མཐའ་མར་ཧོང་ཀོང་དང་དེའི་མི་མང་རྣམས་ལ་གྱོང་རག་གི་ཡོད། ངས་ཚོགས་སྡེ་དང་མི་མང་ཚང་མས་ཁྲིམས་ལ་བརྩི་སྲུང་གིས་འཚེ་བའི་བྱ་སྤྱོད་སྤང་དགོས་པའི་འབོད་སྐུལ་བྱེད་ཀྱི་ཡོད། ཅེས་བརྗོད་འདུག་པ་མ་ཟད། ཁ་སང་གི་དོན་རྐྱེན་དེ་བསམ་ཡུལ་ལས་འདས་པ་ཞིག་ཡིན་པ་དང་། མོས་ཉེན་རྟོག་ཚན་པར་གནད་དོན་དེར་ཞིབ་འཇུག་མཐར་ཕྱིན་པ་ཞིག་བྱ་དགོས་སྐོར་མངགས་ཡོད་པ་སོགས་བརྗོད་འདུག

ཧོང་ཀོང་གཞུང་གིས་ཁ་སང་གི་དོན་རྐྱེན་དང་འབྲེལ་བའི་བསྒྲགས་གཏམ་ཞིག་སྤེལ་བའི་ནང་། ཡུན་ལོང་མེ་འཁོར་འབབ་ཚུགས་སུ་མི་འགའ་ཤས་ཀྱིས་འགྲུལ་བའི་ཐོག་ལ་རུབ་རྡུང་བྱས་པའི་རྐྱེན་གྱིས་འཁྲུག་འཛིང་དང་རྨས་སྐྱོན་ཐེབས་ཡོད་འདུག ཁྲིམས་ལ་བརྩི་སྲུང་བྱེད་མཁན་གྱི་ཧོང་ཀོང་བའི་སྤྱི་ཚོགས་ཀྱིས་འདི་ལྟ་བུའི་བྱ་སྤྱོད་རིགས་ལ་ངོས་ལེན་བྱ་ཐབས་མེད། ཧོང་ཀོང་གཞུང་ནས་འཚེ་བའི་བྱ་འགུལ་ལ་དགག་པ་བྱེད་ཀྱི་ཡོད་ལ། ཁྲིམས་ཐག་ནན་མོ་གཅོད་རྒྱུ་ཡིན། ཅེས་བརྗོད་འདུག་པ་དང་། དེ་བཞིན་དེ་རིང་ཞོགས་པར་ཧོང་ཀོང་ཉེན་རྟོག་ལས་ཁུངས་ཀྱིས་གསར་འགོད་གསལ་བསྒྲགས་ཤིག་སྤེལ་བའི་ནང་། ང་ཚོས་ཁ་སང་གི་དོན་རྐྱེན་ནང་ཞུགས་པའི་མི་དེ་ཚོ་ངོ་ཐག་ཆོད་མེད་སྟབས། ད་བར་སུ་ཡང་འཛིན་བཟུང་བྱེད་ཐུབ་མེད།  སྟོད་གོས་དཀར་པོ་གྱོན་མཁན་ཚང་མ་འཁྲུག་འཛིང་ནང་ཞུགས་པར་ངོས་འཛིན་བྱེད་ཐབས་མི་འདུག ཡིན་ན་ཡང་ང་ཚོས་དྲང་པོའི་སྒོ་ནས་གནད་དོན་རེ་རེ་བཞིན་ཐག་གཅོད་བྱ་རྒྱུ་ཡིན། ཞེས་བརྗོད་འདུགགསར་ལམ་ཁག་གིས་གནས་ཚུལ་སྤེལ་བ་ལྟར་ན། ཁ་སང་གི་དོན་རྐྱེན་སློང་མཁན་ཕལ་ཆེ་བ་མི་རྒན་པ་ཡིན་འདུག་ལ། སྤྱི་ཚོགས་དྲ་ལམ་ཁག་ཏུ་བརྒྱུད་སྤེལ་བྱེད་བཞིན་པའི་བརྙན་ཐུང་ནང་། སྟོད་གོས་དཀར་པོ་གྱོན་པའི་མི་དེ་ཚོས་གློག་སྐེས་དང་མེ་འཁོར་ནང་གི་འགྲུལ་བ་རྣམས་ལ་ལྕགས་དང་ཤིང་གི་དབྱུག་པས་གང་བྱུང་གཞུས་ཀྱི་ཡོད་པ་མ་ཟད། ཐ་ན་བུད་མེད་དང་གསར་འགོད་པ་རྣམས་ལ་ཡང་གཞུས་ཏེ་མགོ་དང་སྣ་ཁུང་སོགས་ནས་ཁྲག་འཛར་གྱི་ཡོད་པ་དང་། མེ་འཁོར་འབབ་ཚུགས་སུ་ཡོད་པའི་སྟོད་གོས་ནག་པོ་གྱོན་མཁན་རྣམས་ལས་འགུལ་བ་ཡིན་ཤག་བྱས་ཏེ་ཐང་ལ་མ་འགྱེལ་བར་དུ་གང་བྱུང་དབྱུག་པ་དང་རྡོག་ཐོ་སོགས་ཀྱིས་གཞུས་པ་མཐོང་གི་འདུག ཡང་བརྙན་ཐུང་གཞན་ཞིག་གི་ནང་། མེ་འཁོར་ནང་གི་འགྲུལ་བ་ན་གཞོན་ཞིག་གིས་ཕྱག་བཙལ་ཏེ་ཁོ་ཚོར་མ་གཞུ་རོགས་ཞེས་ཞུ་བ་བྱེད་བཞིན་འདུག དོན་རྐྱེན་བྱུང་སྐབས་ཡུལ་དངོས་སུ་ཉེན་རྟོག་པ་གཅིག་རྐྱང་མཐོང་རྒྱུ་མི་འདུག་ཀྱང་། མཚན་མོའི་ཆུ་ཚོད་ ༡༡།༣༠ ཙམ་ལ་ཉེན་རྟོག་པ་ཡུལ་དངོས་སུ་འབྱོར་སྐབས། སྟོད་གོས་དཀར་པོ་གྱོན་མཁན་ཚོ་འགྲོ་ཚར་ཡོད་སྟབས། ལས་འགུལ་བ་དང་འགྲུལ་བ་རྣམས་ཀྱིས་ཉེན་རྟོག་པས་མི་མང་གི་བདེ་འཇགས་སྲུང་སྐྱོབ་ཀྱི་ལས་འགན་བསྒྲུབས་ཐུབ་མེད་སྐོར་བརྗོད་དེ་གཤེ་གཤེ་བཏང་ཡོད་འདུག

ཕྱི་ཚེས་ ༢༠ ཉིན་མི་གྲངས་འབུམ་འགའ་ཤས་ཀྱིས་རྒྱའི་རྒྱལ་དར་སོགས་འཕྱར་ཏེ་དོགས་ཡོད་ཉེས་ཅན་རྩིས་སྤྲོད་ཀྱི་ཁྲིམས་འཆར་ལ་ངོ་རྒོལ་བྱེད་མཁན་ཚོར་ངོ་རྒོལ་ཁྲོམ་སྐོར་བྱས་ཡོད་པ་དང་། རྒྱ་ནག་གི་གཞུང་འབྲེལ་གསར་ཁང་ཁག་གིས་ཀྱང་དེ་འབྲེལ་གྱི་གནས་ཚུལ་བཀོད་ཡོད་པ་རེད། དེ་སྔོན་ཡང་རྒྱ་ནག་སྐམ་ས་ཆེན་མོའི་མི་སེར་ཡིན་པའི་མི་གྲངས་འབུམ་མ་ཟིན་ཙམ་གྱིས་ཧོང་ཀོང་གི་ཉེན་རྟོག་པར་རྒྱབ་སྐྱོར་དང་། དམངས་གཙོ་དོན་གཉེར་བའི་ལས་འགུལ་ལ་ངོ་རྒོལ་བྱས་ཏེ་དབྱུག་པ་གཞུས་པ་སོགས་ཀྱི་དྲག་སྤྱོད་སྤེལ་ཡོད་འདུག

འདི་ལོའི་ཕྱི་ཟླ་ ༦ ཚེས་ ༡༢ ནས་བཟུང་ཧོང་ཀོང་གི་དོགས་ཡོད་ཉེས་ཅན་རྩིས་སྤྲོད་ཀྱི་ཁྲིམས་འཆར་ལ་ངོ་རྒོལ་གྱི་ལས་འགུལ་ཤུགས་ཆེར་སྤེལ་མགོ་བརྩམས་ཡོད་པ་དང་། ད་བར་ཧོང་ཀོང་གི་དམངས་གཙོ་དོན་གཉེར་བ་ས་ཡ་ ༢ ལྷག་གིས་ཁྲིམས་འཆར་དེ་གཏན་དུ་རྩིས་མེད་གཏོང་དགོས་པ་མ་ཟད། ཧོང་ཀོང་དམིགས་བསལ་སྲིད་འཛིན་ས་ཁུལ་གྱི་གཙོ་འཛིན་ལྕམ་ཁེ་རི་ལེམ་གྱིས་རྩ་དགོངས་ཞུ་དགོས་པའི་དགོས་འདུན་བཏོན་ཡོད་ཀྱང་། ཁེ་རི་ལེམ་གཞུང་གིས་ཁྲིམས་འཆར་དེ་ནུས་མེད་ཆགས་པ་ཡིན་སྐོར་ཙམ་ལས་རྩིས་མེད་བཏང་བ་སོགས་གསལ་པོ་བཟོས་མེད་པ་དང་། ཧོང་ཀོང་མི་མང་གིས་མོ་རང་དང་ཕྱག་རོགས་ཚོར་ཞབས་ཞུའི་གོ་སྐབས་ཤིག་སྤྲོད་པའི་རེ་བ་ཡོད་སྐོར་སོགས་བརྗོད་དེ། མི་མང་གི་མངོན་འདོན་དྭང་ལེན་བྱས་མེད་སྟབས་མུ་མཐུད་ངོ་རྒོལ་ཟིང་འཁྲུག་བྱུང་གི་ཡོད་པ་རེད།

འདས་པའི་ཟླ་གཅིག་ལྷག་གི་ཧོང་ཀོང་ངོ་རྒོལ་ལས་འགུལ་ཁྲོད་ལས་འགུལ་བ་དང་ཉེན་རྟོག་པ་གདོང་ཐུག་བྱུང་བ་དང་། དེ་བཞིན་ལས་འགུལ་བས་ཁྲིམས་བཟོ་ལྷན་ཁང་ནང་བཙན་འཛུལ་བྱས་པ་དང་། རྒྱ་ནག་གཞུང་དང་ཧོང་ཀོང་གཞུང་ལ་རྒྱབ་སྐྱོར་བྱེད་མཁན་ཚོས་ཀྱང་རྒྱབ་སྐྱོར་གྱི་ལས་འགུལ་སྤེལ་བ་སོགས་ཡུལ་དེའི་ནང་རྙོག་ཟིང་ཆེན་པོ་བྱུང་བར་བརྟེན། རྒྱལ་སྤྱིའི་སྤྱི་ཚོགས་ཀྱིས་བློ་འཚབ་དང་སྦྲགས་རྒྱ་ནག་གཞུང་དང་ལྷག་པར་དུ་ལྕམ་ཁེ་རི་ལེམ་གྱི་གཞུང་ལ་སྐྱོན་བརྗོད་མང་པོ་བྱས་ཡོད་པ་དང་། ཟླ་འདིའི་ཕྱི་ཚེས་ ༡༨ ཉིན་ཡུ་རོབ་གྲོས་ཚོགས་ངོས་ནས་ཧོང་ཀོང་གི་ད་ལྟའི་གནས་སྟངས་དང་འབྲེལ། རྒྱ་ནག་གཞུང་གིས་རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྒྲོམ་གཞི་རྡོག་རོལ་དུ་གཏོང་བཞིན་ཡོད་སྐོར་ལ་གྲོས་ཆོད་ཅིག་གཏན་འབེབ་གནང་ཡོད་པ་མ་ཟད། ཡུ་རོབ་མཐུན་ཚོགས་ཀྱི་ཁོངས་གཏོགས་རྒྱལ་ཁབ་དག་གིས་ཧོང་ཀོང་ལ་མིག་ཆུའི་དུག་རླངས་སོགས་ལས་འགུལ་བཀག་འགོག་ཀྱི་མཚོན་ཆ་རིགས་ཕྱིར་འདྲེན་བྱ་རྒྱུ་མིན་པའི་ཁྲིམས་འཆར་བཏོན་ཡོད་འདུག

གསར་འགོད་པ། པ་སངས་ཚེ་རིང་།