བཀའ་བློན་འོས་མི་བུད་མེད་ཅིག་ལ་ངན་བསླབ་ཇི་ལྟ་ཇི་ལྟར་བྱས་མིན་ཉན་ཞིབ་གནང་།

ཁ་མཆུ་ཨང་ ༢༠ པ་མ་ཉེས་ཁག་གཡོགས་ཀྱི་ཞུ་སྦྱོར་བས་བཀའ་ཤག་གི་དཔང་པོ་ཤར་གླིང་ཟླ་སྒྲོན་དཔང་པོ་ཕན་མེད་བཟོ་རྒྱུའི་དགག་པ་བརྒྱབས་ཏེ་ཞུ་སྦྱོར་བ་དང་བཀའ་ཤག་གི་ཁྲིམས་རྩོད་པའི་བར་རྩོད་བཤད་གནང་གི་འདུགདེ་རིང་སྔ་དྲོའི་ཆུ་ཚོད་ ༡༠ སྟེང་། བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་གཏུག་བཤེར་ཁང་དུ། སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་ལེའུ་ ༧ པ་གཞིར་བཟུང་ཁ་མཆུ་ཞུ་སྦྱོར་དེབ་འགོད་ཨང་ ༢༠ པ་མ་ཉེས་ཁག་གཡོགས་ཀྱི་ཞིབ་དཔྱོད་ཉན་ཞིབ་ཐེངས་དྲུག་པ་གནང་སོང་བ་དང་། ཞུ་སྦྱོར་བའི་དཔང་པོ་འཇིགས་མེད་ཚུལ་ཁྲིམས་དང་། བཀའ་ཤག་གི་དཔང་པོ་ཤར་གླིང་ཟླ་སྒྲོན་དང་མགོན་པོ་ཚེ་རིང་བཅས་བཅར་ཏེ། འཇིགས་མེད་ཚུལ་ཁྲིམས་དང་ཤར་གླིང་ཟླ་སྒྲོན་གཉིས་ཀྱིས་བཀའ་ཤག་གི་གསལ་བཤད་དོན་ཚན་བཅུ་ཡི་དོན་ཚན་དགུ་པའི་ནང་། ཞུ་སྦྱོར་བས་བཀའ་བློན་འོས་མི་བུད་མེད་ཅིག་ལ་ཁྱེད་རང་སྲིད་སྐྱོང་བློ་བཟང་སེང་གེ་དང་མཉམ་དུ་ལས་ཀ་བྱས་ན། ཁྱེད་རང་གི་མདུན་ལམ་ལ་དོ་ཕོག་འགྲོ་ཉེན་ཡོད་པ་སོགས་ཆུ་ཚོད་ ༤ ཙམ་རིང་སྲིད་སྐྱོང་ལ་དམའ་འབེབ་བྱས་ཏེ། ཁོ་མོའི་བློ་སྣ་འགྱུར་ཐབས་ངན་བསླབ་སྣ་ཚོགས་བྱས་ཡོད་སྐོར་བརྗོད་པ་དེ་ཇི་ལྟ་ཇི་ལྟར་ཡིན་པའི་ཐད་དཔང་པོ་བྱས་སོང་། ཡིན་ནའང་།  ཕྱི་དྲོའི་ལས་རིམ་ཁྲོད་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་གི་དོན་ཚན་ ༡༥ དང་ ༡༦ ། ༣༠ བཅས་ཀྱི་དགོངས་དོན་འོག ཞུ་སྦྱོར་བས་བཀའ་ཤག་གི་དཔང་པོ་ཤར་གླིང་ཟླ་སྒྲོན་རྩིས་མེད་དང་ཕན་མེད་བཟོ་དགོས་པའི་དགག་པ་བྱས་ཏེ། ཞུ་སྦྱོར་བ་དང་རྩོད་ལན་པའི་བར་རྩོད་བཤད་བྱུང་སོང་བ་དང་། སང་ཉིན་མུ་མཐུད་རྩོད་བཤད་གནང་རྒྱུ་དང་།ཌི་སི་ཁུལ་གཙོ་བོར་གྱུར་བའི་ས་ཁུལ་ག་བར་ཕེབས་ཀྱང་ཞུ་སྦྱོར་བས་སྲིད་སྐྱོང་དང་། ད་ལྟའི་བཀའ་ཤག་ལ་དམའ་འབེབས་ཀྱི་གཏམ་གླེང་བྱ་རྒྱུ་འཆར་ཅན་ལྟ་བུ་བྱེད་བཞིན་པ་ཞེས་པ་དེ་ཁུངས་སྐྱེལ་ཆེད་བཀའ་ཤག་གི་དཔང་པོ་མགོན་པོ་ཚེ་རིང་གཏུག་བཤེར་ཁང་དུ་བཅར་རྒྱུ་ཡིན་འདུགདེ་རིང་ཞིབ་དཔྱོད་ཉན་ཞིབ་ཀྱི་ཐོག་མར་ཁྲིམས་ཞིབ་པ་ཆེ་བ་བཀའ་རྒྱུད་དོན་གྲུབ་མཆོག་གིས། རྩོད་ལན་པ་བཀའ་ཤག་སྲིད་སྐྱོང་བློ་བཟང་སེང་གེ་བརྒྱུད་པའི་ཁྲིམས་རྩོད་པ་བློ་བཟང་གྲགས་པ་ནས་སྤྱི་མང་གཏུག་བཤེར་ཁྲིམས་ཡིག་དོན་ཚན་༤༢ (ཀ] ༡) གཞིར་བཟུང་། དཔང་པོ་མགོན་པོ་ཚེ་རིང་དང་བྲག་གཡབ་བློ་བཟང་། ཆོས་འཛིན་བཅས་དཔང་པོ་གསུམ་མིང་འདོན་བྱས་ཡོད་པ་ལས། དཔང་པོ་བྲག་གཡབ་བློ་བཟང་དང་ཆོས་འཛིན་གཉིས་ཞུ་སྦྱོར་བས་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་གི་དོན་ཚན་ ༡༥ དང་ ༡༦ ། ༣༠ བཅས་ཀྱི་དགོངས་དོན་འོག་རྩིས་མེད་དང་ཕན་མེད་ཡོང་བའི་སྙན་ཞུ་ཕུལ་བ་ལྟར། ཆེས་མཐོའི་ཁྲིམས་ཞིབ་ཁང་ནས་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་གི་དོན་ཚན་ ༡༥ པ་གཞིར་བཟུང་མ་དྲང་བའི་ཕྱོགས་ལྷུང་ཆགས་ཀྱི་ཡོད་པའི་ཞུ་སྦྱོར་ཁུངས་སྐྱེལ་ལྟར། དཔང་པོ་བྲག་གཡབ་བློ་བཟང་དང་ཆོས་འཛིན་གཉིས་རྩིས་མེད་བཏང་ཡོད་པ་སྒྲོགས་སྦྱང་གནང་སོང་།

གཞན་ཡང་། དེ་རིང་སྔ་དྲོར་བཀའ་ཤག་གི་ཁྲིམས་རྩོད་པ་བློ་བཟང་གྲགས་པས་སྤྱི་མང་གཏུག་བཤེར་ཁྲིམས་ཡིག་གི་དོན་ཚན་ཞེ་གཉིས་པ་ ༤ འོག་དངོས་དོན་ ༧ པ་ཁུངས་སྐྱེལ་སླད། སྤྱི་ཚོགས་དྲ་ལམ་བརྒྱུད་དཔང་པོ་འཕར་མ་ ༤ འདོན་འབུལ་ཆོག་པའི་བཀའ་འཁྲོལ་སྙན་ཞུ་ཕུལ་ཡོད་པ་དང་། ཆེས་མཐོའི་ཁྲིམས་ཞིབ་ཁང་ནས་སྤྱི་མང་གཏུག་བཤེར་ཁྲིམས་ཡིག་གི་དོན་ཚན་ཞེ་གཉིས་པ་ (ཀ] ༤པའི་ཆ་རྐྱེན་འོག་དཔང་པོ་འཕར་མ་ ༤ དེ་སྔོན་འབོད་འགུགས་བྱེད་འཆར་དཔང་བོའི་མིང་ཐོའི་ནང་གཞུང་དངུལ་སྲི་ཚགས་ཀྱི་རྒྱུ་མཚན་བགྲངས་ནས་བཀོད་མེད་པ་དང་།སྙན་ཞུའི་ནང་འགོད་རྒྱུ་འཚེམས་ལུས་སུ་གྱུར་སྐོར་བྲིས་མེད་པ་དང་འགོད་རྒྱུ་འཚེམས་ལུས་སུ་གྱུར་བའི་རྒྱུ་མཚན་གང་ཡང་བཀོད་མེད་པར་བརྟེན།  དཔང་པོ་འཕར་མ་ ༤ འབོད་འགུགས་ཆོག་པའི་བཀའ་འཁྲོལ་གཏོང་ཐབས་མེད་ཀྱང་། དཔང་པོ་ ༤ ཡི་ཁོངས་ནས་བསོད་ནམས་ཚེ་རིང་གིས་ ༢༠༡༨། ༡༡ ། ༩ འཁོད་ཚིག་ཐོ་ཞིག་རྩོད་ལན་པས་དཔང་རྟགས་ཨང་ ༤༩ པར་ཐོག་མ་ནས་འདོན་འབུལ་ཞུས་ཡོད་སྟབས། དོ་བདག་གི་ཚིག་ཐོའི་བརྗོད་པ་དེ་དག་ཁོ་ན་ཁུངས་སྐྱེལ་གྱི་ཆེད་དུ་སྤྱི་ཚོགས་དྲ་ལམ་བརྒྱུད་དཔང་པོར་འདོན་འབུལ་ཆོག་པ་དང་། ཨ་རི་དོན་ཁང་ལ་དཔང་པོར་བརྟག་ཞིབ་བྱ་ཡུལ་ས་གནས་དང༌། ལྟ་རྟོག་བྱེད་པོ་བསྐོ་འཛུགས་དགོས་པའི་བརྡ་ཐོ་བཏང་བའི་ངོ་བཤུས་རྩོད་ལན་པར་བཏང་འབྱོར་ཟིན་ཡོད་འདུག ཡིན་ནའང་།  ཕྱི་དྲོའི་ཆུ་ཚོད་ ༤:༥༦ ཐོག་སྙན་ཞུ་བསྐྱར་མ་ཞིག་ཕུལ་བའི་ནང་། དོ་བདག་བསོད་ནམས་ཚེ་རིང་ད་ལྟ་དོ་སྐྱེལ་རླངས་འཁོར་བཏང་ནས་ཨ་རིའི་མངའ་སྡེ་(Califonia)ནས་ (New York) ལ་ཡོང་བའི་ལམ་བར་ལ་ཡོད་པ་དང༌། ས་གནས་དེ་གཉིས་དབར་དོ་སྐྱེལ་རླངས་འཁོར་གྱིས་ཉིན་ཞག་བཞི་ཙམ་འགོར་གྱི་ཡོད་པ་དང༌། དོ་བདག་གིས་གུང་གསེང་ལེན་རྒྱུ་དཀའ་ངལ་ལ་སོགས་ཀྱི་རྐྱེན་པས་ཁོང་ཟླ་འདིའི་ཚེས་ ༡༢ མ་གཏོགས་ཨ་རི་དོན་ཁང་ལ་ངོ་བཅར་ཞུ་ཐབས་གཏན་ནས་མི་འདུག་པས། ཚེས་ ༡༢ བར་དོ་བདག་གི་ཁུངས་སྐྱེལ་གྱི་ཆེད་སྤྱི་ཚོགས་དྲ་ལམ་བརྒྱུད་དཔང་པོར་འདོན་འབུལ་ཆོག་པའི་བཀའ་འཁྲོལ་གནང་སྐྱོང་ཡོང་བ་ཞུ་ཞེས་གསལ་བའི་ཐད།ཆེས་མཐོའི་ཁྲིམས་ཞིབ་ཁང་གིས། ༡། དེ་རིང་སྔ་དྲོ་འབོད་ཁྲིད་ཆོག་པའི་བཀའ་འཁྲོལ་ཞུས་པའི་དཔང་པོ་ཞིག་ཕྱི་དྲོ་ཁྲིད་ཐབས་མེད་པའི་རྒྱུ་མཚན་བགྲང་བ་དང༌། དེའང་ཞིབ་གཅོད་ཀྱི་ཚེས་ཆ་གཏན་འབེབས་དང་། བརྟག་ཞིབ་བྱ་ཡུལ་ས་གནས་དང་། ལྟ་རྟོག་བྱེད་པོ་བསྐོ་འཛུགས་ཀྱིས་མཚོན་པའི་སྔོན་འགྲོའི་བྱེད་སྒོ་ཁག་གཏན་འབེབས་ཟིན་རྗེས། དུས་ཐུང་འདི་ཙམ་ནང་ཁྲིམས་ཞིབ་བྱ་རིམ་འཕར་འགྱང་ཞུས་པ་དེ་ངོས་ལེན་བྱ་རྒྱུའི་རྒྱུ་མཚན་མི་ལྡན་པ་དང་། ༢། ཞོགས་པའི་སྙན་ཞུའི་ནང་། དཔང་པོ་ ༣ ལ་ཚེས་ ༧ སྔོན་ཐོངས་མཆན་རག་ཐབས་མེད་པས། སྤྱི་ཚོགས་དྲ་ལམ་བརྒྱུད་ཁུངས་སྐྱེལ་ཆོག་པ་ཞུས་ཡོད་པ་དང༌། ཕྱི་དྲོའི་སྙན་ཞུའི་ནང་། རྩོད་ལན་པའི་ངོས་ནས་དོ་བདག་ས་གནས་གང་རུང་ལ་(skype) དང༌ (whatsApp) གང་རུང་བརྒྱུད་ཁུངས་སྐྱེལ་ཆོག་པ་བསམ་མོད་ཅེས་ཁྲིམས་ཞིབ་བྱ་རིམ་ལ་རྒྱུ་མཚན་མི་ལྡན་པའི་ཚོད་དཔག་བྱས་ཏེ། རྩོད་ལན་པའི་སྔ་ཕྱི་མི་མཚུངས་པའི་བརྗོད་བབ་འདི་རིགས་ཁག་མེད་པའི་རྒྱུ་མཚན་དུ་ཆ་འཛིན་བྱེད་ཐབས་མེད། ༣། དེར་བརྟེན། ཞོགས་པར་རྩོད་ལན་པའི་དཔང་པོར་འབོད་ཁྲིད་ཆོག་པའི་བཀའ་འཁྲོལ་སྤྲད་པའི་བསོད་ནམས་ཚེ་རིང་རྩོད་ལན་པས་དཔང་པོར་འབོད་འགུགས་མ་ཐུབ་པའི་ངོས་འཛིན་ཐག་གཅོད་གནང་ཡོད་པ་སྒྲོགས་སྦྱང་གནང་སོང་།

ཉན་ཞིབ་གྲུབ་རྗེས་གསར་འགོད་པས་ཞུ་སྦྱོར་བ་སྤེན་པ་ཚེ་རིང་ལགས་སུ་རྩོད་ལན་པའི་དཔང་པོ་ཤར་གླིང་ཟླ་སྒྲོན་རྩིས་མེད་གཏོང་རྒྱུའི་དགག་པ་བརྒྱབས་དགོས་དོན་གང་ཡིན་དྲིས་པར་ཁོང་གིས། ཐོ་གཞུང་ནང་ལ་དཔང་པོ་ ༥ གནང་ཡོད་པ་དང་། ལྔའི་ནང་ནས་གཅིག་དེ་རྩིས་ཞིབ་ཀྱི་ལས་བྱེད་བསྟན་འཛིན་ཤེས་ལྡན་ལགས་རེད། ཁོང་རང་གི་དཔང་པོ་བྱེད་པའི་ལས་དོན་ཚར་བ་རེད། ད་ལྟ་གཞན་པ་དཔང་པོ་ ༤ ཡོད་པའི་ནང་ནས་ཤར་གླིང་ཟླ་སྒྲོན་ལགས་གཅིག་རེད། གཞན་གསུམ་དེ་ནེའུ་ཡོག་ནས་རེད། གསུམ་གྱི་ནང་ལོགས་ནས་གཉིས་དེ་ཁྲིམས་ཞིབ་ཁང་གིས་ཁོ་ཚོས་སྤྱི་ཚོགས་དྲ་རྒྱ་ཁག་ནང་བཤད་པ་དེ་ཚོ་ཕྱོགས་ལྷུང་ཡིན་པ་ཞུ་སྦྱོར་བས་ཁུངས་སྐྱེལ་ཐུབ་སོང་ཟེར་ནས་ཁོང་གཉིས་རྩིས་མེད་བཏང་གནང་བ་རེད། དེ་གཉིས་རྫ་ཆུ་ཁ་བ་ཆོས་འཛིན་དང་བྲག་གཡབ་བློ་བཟང་རེད། གཅིག་དེ་ཡོང་ཆོག་གི་ཡོད་ཟེར་ནས་ད་ལྟ་མགོན་པོ་ཚེ་རིང་ལགས་སླེབས་བསྡད་ཡོད་པ་རེད། ཅེས་བརྗོད་བྱུང་།དེ་སྔོན་ཞུ་སྦྱོར་བས་ཤར་གླིང་ཟླ་སྒྲོན་དཔང་པོར་འཁྲིད་པར་དགག་པ་བརྒྱབས་ཡོད་པའི་སྐོར་ལ་ཁོང་གིས། དེ་སྔོན་ཤར་གླིང་ཟླ་སྒྲོན་དཔང་པོ་ཕན་མེད་བཟོ་དགོས་པའི་དགག་པ་བརྒྱབ་པ་དེ་ལ་ཁྲིམས་ཞིབ་ཁང་གི་ངོས་ནས་མོ་རང་དཔང་པོ་ངོ་མ་དེ་ཆགས་ཀྱི་འདུག དེར་བརྟེན་མོ་རང་ཁྲིམས་ཁང་ནང་ལ་སླེབས་ནས་བརྟག་ཞིབ་བྱས་ན་མ་གཏོགས་ཐག་གཅོད་ཐུབ་ཀྱི་མ་རེད་ཅེས་གསུངས་པ་རེད། དེ་རིང་ཞོགས་པར་ང་ཚོས་རེ་བ་ག་རེ་བརྒྱབས་ཡོད་པ་རེད་ཟེར་ན། དཔང་པོ་ ༢ ལ་འདྲི་རྩད་བྱས་རྗེས་གནད་དོན་གཙང་མ་ཆགས་པ་ཡིན་ན། ང་ཚོས་དེ་སྔོན་དགག་པ་བརྒྱབས་ཡོད་རེད་དེ། དགག་པ་རྒྱག་དགོས་དུས་གནད་དོན་མི་འདོད་པ་དེ་འདྲ་བཤད་དགོས་ཐུག་གི་ཡོད་རེད།དེར་བརྟེན་དེ་འདྲ་ཞིག་འགྲོ་དགོས་མ་ཐུག་ན་བསམ་པ་རེད། འོན་ཀྱང་། ད་ལྟ་དཔང་པོས་ལན་གནང་སྟངས་དེ་དག་ངའི་བསམ་བློ་དང་གཤིས་ཀའི་ནང་མེད་པ་དེ་འདྲ་གསུངས་ཡོང་དུས། དགག་པ་རྒྱག་རྒྱུའི་གནས་སྟངས་དེ་ཆགས་པ་རེད། ཅེས་བརྗོད་བྱུང་།

དེ་བཞིན་གསར་འགོད་པས་བཀའ་ཤག་གི་ཁྲིམས་རྩོད་པ་བློ་བཟང་གྲགས་པར་ཁྲིམས་ཞིབ་ཁང་གི་ངོས་ནས་བཀའ་ཤག་གི་དཔང་པོ་ཕན་མེད་གནང་ཡོད་པའི་སྐོར་དྲིས་པར་ཁོང་གིས། ང་ཚོའི་དཔང་པོ་གཉིས་ཕན་མེད་བྱུང་པ་རེད། དེའང་ཁྲིམས་ཞིབ་ཁང་གི་ཁྲིམས་སྒྲིག་ལྟར་བྱུང་པ་ཞིག་ཆགས་ཡོད་པ་རེད། ཡིན་ནའང་། དཔང་པོ་གཉིས་ཀ་དེ་ཞུ་སྦྱོར་བ་སྤེན་པ་ཚེ་རིང་ངོས་ནས་སྙན་ཞུ་བརྒྱབས་ཏེ་ཕྱོགས་ལྷུང་སོགས་རེད་འདུག་ལབ་སྟེ། གང་ལྟར་ཀྱང་ཤར་གླིང་ཟླ་སྒྲོན་གྱི་གཙོས་དཔང་པོ་ཚང་མར་དགག་པ་རྒྱག་པའི་ཐབས་ཤེས་བཏང་སྟེ་དགག་པ་བརྒྱབས་པ་རེད། དེ་ལ་བརྟེན་ནས་ང་ཚོའི་དཔང་པོ་གཉིས་ཕན་མེད་བྱུང་པ་རེད། ང་ཚོའི་ངོས་ནས་གྱོང་ཆེན་པོ་རག་སོང་ཞེས་ཞུས་རྒྱུ་ཡིན། ང་ཚོའི་གནད་དོན་དེ་ཌི་སི་ཡི་ས་ཁུལ་ཁག་ཏུ་སྲིད་སྐྱོང་དང་བཀའ་ཤག་ལ་དམའ་འབེབ་བཟོས་པའི་སྐོར་ཡིན་དུས། རྗེས་ལ་ང་ཚོས་དཔང་པོ་ ༤ སྐད་བཏང་པ་རེད། ཁོང་ཚོས་ཀྱང་གནད་དོན་འདྲ་མིན་ཐོག་ལ་ཞུ་སྦྱོར་བ་སྤེན་པ་ཚེ་རིང་གིས་བཀའ་ཤག་དང་སྲིད་སྐྱོང་ལ་དམའ་འབེབ་གང་འདྲ་བྱས་ཡོད་པ་དེའི་ཐོག་ལ་ར་སྤྲོད་དང་ཁུངས་སྐྱེལ་ཡོད་པ་དེ་འདྲ་རེད། དེ་ཡིན་དུས་ཡང་དཔལ་ལྡན་ཁྲིམས་ཞིབ་ཁང་ནས་གང་ལྟར་དཔང་པོ་དེ་ཚོ་ངོས་ལེན་མ་བྱས་པ་རེད། དེའང་ཁྲིམས་དོན་གྱི་ལུང་དྲངས་ཏེ་མ་བླངས་པ་རེད། དེ་ཁྲིམས་ཞིབ་ཁང་གི་ཐག་གཅོད་ཡིན་དུས་ང་ཚོའི་ངོས་ནས་གང་ཡང་བྱ་རྒྱུ་ཡོད་པ་མ་རེད་ཅེས་ཞུས་རྒྱུ་ཡིན། དེའི་ནང་གི་དཔང་པོ་གཅིག་ངོས་ལེན་བྱས་པ་རེད། ཁོ་རང་གིས་སྔོན་མ་ཡིག་ཆ་ཞིག་ཕུལ་ཏེ་ངོས་ལེན་བྱུང་བ་རེད། དེ་ང་ཚོའི་ཁྲིམ་ལུགས་ཀྱི་ནང་དཔེར་ན་ཕྱི་རྒྱལ་དུ་བཞུགས་པའི་སྤྱི་ཚོགས་དྲ་ལམ་ (WhatsApp) དང་ (Skype) དེ་ཚོའི་སྐོར་དེ་ང་ཚོའི་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་ནང་གང་ཡང་གསལ་ཡོད་པ་མ་རེད། དཔང་རྟགས་ཁྲིམས་ཡིག་ནང་སྤྱི་ཚོགས་དྲ་རྒྱ་བེད་སྤྱོད་བཏང་སྟེ་ག་རེ་བྱེད་དགོས་མིན་གསལ་མི་འདུག ང་རང་ངོས་ནས་གང་ཐུབ་ཅི་ཐུབ་བལྟས་པ་ཡིན། དེ་ཡིན་དུས་ང་ཚོའི་ངོས་ནས་ག་རེ་བསམ་པ་རེད་ཟེར་ན། ཁོ་རང་ཚོས་ཕར་ནས་དྲ་རྒྱའི་བརྒྱུད་ལམ་ཁག་ནས་ང་ཚོའི་འདིར་གསལ་བཤད་བྱས་ན་འགྲིག་གི་ཡོད་པ་རེད་བསམས་པ་རེད། གང་ཡིན་ཟེར་ན། ཁྲིམས་སྒྲིག་ནང་གང་ཡང་གསལ་ཆ་མེད་པ་རེད། ཡིན་ནའང་། དཔལ་ལྡན་ཁྲིམས་ཞིབ་ཁང་གི་ངོས་ནས་ཝ་ཤིང་ཊོན་ཌི་སི་ཡི་དོན་གཅོད་ལས་ཁུངས་སུ་འགྲོ་དགོས་རེད་ལབ་པ་རེད། དེའང་དེ་རིང་གི་རྒྱ་གར་གྱི་ཆུ་ཚོད་ ༤ ཐོག་བྱས་ཚར་བ་དགོས་པ་རེད་གསུངས་དུས། རྣམ་པ་ཚོས་མཁྱེན་གསལ་རེད། ཕྱི་རྒྱལ་ཁག་ཏུ་ལས་ཀ་བྱེད་སྡོད་མཁན་ཚོས་དུས་ཚོད་འདོན་དགོས་པ་དང་དགོངས་པ་ཞུ་དགོས་པ་རེད། ཁྱེད་དེ་རིང་ཤོག་ལབ་ན་ཡོང་ཆོག་ཆོག་དང་འགྲོ་ཆོག་ཆོག་ཅིག་རེད་མི་འདུག་གཱ། ཁོ་རང་ཡོང་འདོད་མེད་པ་དེ་འདྲ་མ་རེད། ཡིན་ནའང་ཁོ་རང་ལ་ཐབས་ཤེས་རྩ་བ་ཉིད་ནས་མི་འདུག ཁོ་རང་མོ་ཊ་བཏང་ནས་ཁ་ལེ་ཧྥོར་ནེ་ཡར་ཕེབས་བཞིན་འདུག ད་ཝ་ཤིང་ཊོན་ལ་ད་ལྟ་དང་སང་ཉིན་འགྲོ་དགོས་རེད་ལབ་དུས་འགྲོ་ཐུབ་མི་འདུག དེར་བརྟེན་ང་ཚོས་དུས་འགྱངས་ཀྱི་བཀའ་འཁྲོལ་ཞིག་ཞུས་པ་ཡིན་ཏེ་གནང་མ་སོང་། ཞེས་བརྗོད་བྱུང་།

ཤར་གླིང་ཟླ་སྒྲོན་གྱི་སྐོར་ལ་ཁོང་གིས། ཤར་གླིང་ཟླ་སྒྲོན་ལགས་དངོས་གནས་ཤེས་འཇོན་གཉིས་ལྡན་ཕུལ་དུ་བྱུང་བའི་ང་ཚོའི་བུད་མེད་ཅིག་རེད། ཁོང་ཕུལ་དུ་བྱུང་བའི་བུད་མེད་ཞིག་ཡིན་པ་ང་ཚོའི་ངོས་ནས་ངོས་འཛིན་བྱེད་ཀྱི་ཡོད། རྒྱ་ཆེའི་མང་ཚོགས་མང་ཤོས་ཤིག་གིས་ཀྱང་དེ་ལུགས་ཡིན་པ་ངོས་འཛིན་བྱས་ཡོད་པ་རེད།གང་ཡིན་ཟེར་ན། ཁོ་རང་སྐབས་གཉིས་ལ་སྤྱི་འཐུས་ཆགས་པ་རེད། ལྷག་པར་དུ་སྐབས་ ༡༦ པའི་ནང་དབུས་གཙང་ཆོས་ཀྱི་ཆོལ་ཁའི་མི་མང་ངོས་ནས་འོས་གྲངས་མཐོ་ཤོས་བླུགས་པའི་དེ་ལྟ་བུའི་ཕུལ་བྱུང་གི་བུད་མེད་ཅིག་ཆགས་པ་རེད། ཁོ་རང་གི་ཤེས་འཇོན་དང་ལྷག་བསམ་དེ་ཚོ་ཚང་མ་ལ་བརྟེན་ནས་བཀའ་བློན་གྱི་འོས་མིའི་ནང་དུའང་ཐེངས་གཉིས་བསླེབས་པ་རེད། དེ་བས་ད་ལྟ་ཁོ་རང་ལ་ཁེ་ཕན་གང་ཡང་མེད་པའི་ཐོག་ནས་དངོས་གནས་དྲང་གནས་བདེན་པ་ལ་རྒྱབ་སྐྱོར་བྱས་ཡོད་པ་དང་། ཁོ་རང་གིས་ཁྲིམས་ཁང་ནང་དུ་ཡང་གདེང་ཚོད་ཆེན་པོའི་ངང་ནས་བདེན་པ་རང་ལ་རྒྱབ་སྐྱོར་བྱས་ནས་དེ་རིང་ཡོང་ཡིན་གསུངས་ཡོད་པ་རེད་ལ། ཁོ་རང་ལ་ཁེ་ཕན་གང་ཡང་ཡོད་པ་མ་རེད། དངོས་ཡོད་གནས་ཚུལ་ག་རེ་བྱུང་བ་དེ་དང་བདེན་པ་ག་རེ་ཡིན་དེའི་རྒྱབ་ཏུ་ལངས་ཏེ་ཕེབས་པ་རེད། ཅེས་སོགས་བརྗོད་སོང་།

གསར་འགོད་པ། པ་སངས་ཚེ་རིང་དང་སངས་རྒྱས་དཀོན་མཆོག ཀླུ་མགོན་ཐར།

བསྐྱར་བཅོས།: ༢༠༡༩/༠༨/༠༧

Leave a Reply

19 thoughts on “བཀའ་བློན་འོས་མི་བུད་མེད་ཅིག་ལ་ངན་བསླབ་ཇི་ལྟ་ཇི་ལྟར་བྱས་མིན་ཉན་ཞིབ་གནང་།

  1. གཞུང་པ་ཚེ་དབང་བསོད་ནམས་

    ཁ་མཆུ་ཨང་ཉི་ཤུ་པ་འདིའི་ད་ལྟ་བར་ཉན་ཞིབ་ཁག་ལ་བལྟ་སྐབས་ཁ་མཆུའི་སྒྲུབ་འབྲས་བཙན་བྱོལ་
    སྤྱི་ཚོགས་ནང་བར་མའི་འོས་བསྡུ་ལས་གཞན་དུ་ཁ་ཕྱོགས་ས་ཡོད་པ་མཐོང་མ་སོང།

  2. གཞུང་པ་ཚེ་དབང་བསོད་ནམས་

    ཁ་མཆུ་རྩོད་གླེང་དང་དཔང་རྟགས་སོགས་དང་འབྲེལ་བའི་ནང་ཆོལ་ཁའི་མིང་མ་སྟོན་ན་ཡག་ལེ་རེད་ལ་
    ཤེས་འཇོན་གཉིས་ལྡན་དང་ཕུལ་འབྱུང་གི་མི་སྣ་ཡིན་མིན་ལག་པའི་པའི་རྒྱབ་མདུན་ངོ་མི་ཤེས་མཁན་དང་
    བཟང་ངན་མི་ཚོར་མཁན་བཀའཤག་དང་ཨ་དོན་བར་དཀྲུགས་མཁན་གྱིས་ཤེས་འཇོན་མི་སྣ་དེ་ཚོ་ད་ནས་
    བཙན་བྱོལ་བོད་མིའི་སྤྱི་ཚོགས་ནང་ངོ་གདོང་བསྟན་འཕོད་ཀྱི་ཨ་ཡོད་ཧཧཧ

  3. གཞུང་པ་ཚེ་དབང་བསོད་ནམས་

    གནས་ཚུལ་ཆ་ཚང་བ་ཞིག་བཀོད་ཐུབ་ན་ཀློག་མཁན་ཚང་མས་གནས་
    ཚུལ་ཆ་ཚང་རྟོགས་ཐུབ་པ་ལས་དེ་མིན་འགོ་མེད་འཇུག་མེད་ཆགས་
    རྒྱུའི་ཉེན་ཁ་ཡོད་པ་དང་བཙན་བྱོལ་སྤྱི་ཚོགས་ནང་ཕྱོགས་ལྷུང་སྤངས་པའི་
    དྲང་བདེན་གྱིས་གསར་ཤོག་སྐྱེ་སྲིངས་མ་ཐུབ་ནས་མི་མང་གི་གསར་ཤོག་ཁག་ལ་
    བལྟ་སྟངས་དང་གསར་ཤོག་བལྟ་ཀློག་བྱ་མི་དེ་བཙན་བྱོལ་སྤྱི་ཚོགས་ཀྱིས་བརྒྱ་ཆ་
    ལྔ་ཡང་མེད་པ་ནས་ཤེས་ཐུབ་པ་བཅས།

  4. ༄།དུས་བབས་ཚང་གི་ཞུ་སྦྱོར་བའི་དཔང་པོ་འཇིགས་མེད་ཚུལ་ཁྲིམས་ཀྱི་མིང་ཙམ་བརྗོད་པ་ལས་ཁོས་དཔང་པོ་ཅི་ཞིག་བྱས་པ་མ་བྲིས་འདི་ངས་ཤེས་མ་སོང་།ཀློག་པ་པོ་རྣམ་པ་ལགས་ཁྱོད་ཚོས་ཤེས་ཀྱི་ཡོད་དམ་།།