རྒྱ་ནག་གཞུང་གིས་ཧོང་ཀོང་ནང་ཡོད་པའི་དབྱིན་ཡུལ་དོན་གཅོད་ཁང་གི་ཚོང་འབྲེལ་ལས་བྱེད་སི་མོན་ཁྲིན་འཛིན་བཟུང་བྱས་ཡོད་འདུག
ཁ་སང་ཕྱི་ཚེས་ ༢༡ ཉིན་རྒྱ་ནག་ཕྱི་སྲིད་མགྲིན་ཚབ་པ་ཀུན་ཧྲང་ (Geng Shuang) གིས། རྒྱ་ནག་གི་ཧྲིན་ཀྲིན་གྲོང་ཁྱེར་ནང་དོན་གཅོད་གྱི་ཚོང་འབྲེལ་ལས་བྱེད་སི་མོན་ཁྲིན་(Simon Cheng) གྱིས་སྤྱི་ཚོགས་བདེ་སྲུང་གི་སྒྲིག་ཁྲིམས་དང་འགལ་བའི་ལས་ཀ་བྱས་རྐྱེན་འཛིན་བཟུང་བྱས་ཏེ། ཉིན་གྲངས་ ༡༥ ཙམ་རིང་བཀག་ཉར་བྱས་ཡོད་པ་དང་། ཁོ་ནི་རྒྱ་ནག་གི་མི་སེར་ཡིན་པ་ལས་དབྱིན་ཡུལ་གྱི་མི་སེར་མིན་པས། རྒྱ་ནག་གི་ནང་སྲིད་གནད་དོན་ཞིག་ཏུ་གྱུར་ཡོད་པ་དང་། དབྱིན་གཞུང་ནས་ཧོང་ཀོང་ཐོག་ནོར་འཁྲུལ་ཅན་གྱི་བསྒྲགས་གཏམ་འགའ་ཤས་སྤེལ་ཡོད་པ་དང་། ལྐོག་བརྡ་སྤྲད་དེ་མེ་ཤུགས་ཆེ་རུ་གཏོང་ཐབས་མི་བྱེད་རྒྱུར་བསྐྱར་དུ་རེ་སྐུལ་ཞུ་ཡི་ཡོད། ཅེས་བརྗོད་ཡོད་ཀྱང་། ནག་ཉེས་ཅི་ཡིན་བརྗོད་མེད་པ་རེད།
དེ་རིང་རྒྱ་ནག་གཞུང་འབྲེལ་གོ་ལའི་དུས་བབ་ནང་། སི་མོན་ཁྲིན་གྱིས་རྒྱ་ནག་གི་བཅའ་ཁྲིམས་དོན་ཚན་ ༦༦ པའི་མི་སུ་རུང་སྨད་ཚོང་ཁང་དུ་སོང་ཚེ། ཉིན་གྲངས་ ༡༠ ནས་ ༡༥ བར་དུ་འཛིན་བཟུང་བྱེད་ཆོག་པའི་དགོངས་དོན་ལྟར་འཛིན་བཟུང་བྱས་ཡོད་པ་དང་། འཛིན་བཟུང་བྱས་རྗེས་ཁོའི་ནང་མིར་གར་ཡོད་ཅི་བྱུང་གི་བརྡ་སྤྲོད་དགོས་ཀྱང་། སི་མོན་ཁྲིན་ཁོ་རང་གི་རེ་་འདུན་ལྟར་བརྡ་སྤྲད་མེད་སྐོར་དང་། ཧོང་ཀོང་དང་ཐའེ་ཝན་གྱི་གསར་ཁང་ཁག་ནས་གནས་ཚུལ་དེ་ཆབ་སྲིད་ཀྱི་ངོ་བོར་བསྒྱུར་ཐབས་བྱེད་ཀྱི་ཡོད་སྐོར་བཀོད་འདུག
སི་ཨན་ཨན་གསར་ཁང་གི་གནས་ཚུལ་ལྟར་ན། སི་མོན་ཁྲིན་གྱི་གྲོགས་པོ་ཚོས་ཁོང་འཛིན་བཟུང་བྱས་པའི་རྒྱུ་མཚན་ནི། ཧོང་ཀོང་གི་དམངས་གཙོའི་ཆེད་མི་གྲངས་སྟོང་ཕྲག་མང་པོས་ངོ་རྒོལ་ཁྲོམ་སྐོར་བྱེད་ཀྱི་ཡོད་པ་དང་འབྲེལ་བ་ཡོད་པ་དང་། སི་མོན་ཁྲིན་གྱིས་ངོ་རྒོལ་བར་རྒྱབ་སྐྱོར་མཚོན་ཆེད་སྤྱི་ཚོགས་དྲ་ལམ་ཁག་ཏུ་པར་རིས་དང་མཆན་སོགས་བཏབ་པས་ཡིན་སྐོར་དང་། དེང་སྐབས་རྒྱ་ནག་དང་ཧོང་ཀོང་གི་མཐའ་མཚམས་སྐོར་སྲུང་བ་ཚོས་འགྲུལ་བའི་ཁ་པར་དང་ཁུག་མ་སོགས་སྔོག་ཏེ། ཧོང་ཀོང་གི་ངོ་རྒོལ་ལས་འགུལ་ནང་ཞུགས་ཡོད་མེད་སོགས་ཞིབ་བཤེར་ནན་མོ་བྱེད་ཀྱི་ཡོད་པའི་སྐབས་དང་འཁེལ་ཡོད་སྐོར་བརྗོད་འདུག
ཟླ་འདིའི་ཕྱི་ཚེས་ ༩ ཉིན་ཧོང་ཀོང་ནང་ཡོད་པའི་དབྱིན་ཡུལ་དོན་གཅོད་ཁང་གི་ཚོང་འབྲེལ་ལས་བྱེད་སི་མོན་ཁྲིན་ (Simon Cheng) ཧོང་ཀོང་གི་མཐའ་མཚམས་སུ་ཡོད་པའི་རྒྱ་ནག་གི་ཧྲིན་ཀྲིན་གྲོང་ཁྱེར་ (Shenzhen) ནང་ཚོང་དོན་ཆེད་ཕྱིན་ཡོད་པ་དང་། ཕྱིར་ལོག་སྐབས་ཁོས་དགའ་རོགས་ལ་ཧོང་ཀོང་ལ་མཐུད་ཡོད་པའི་མེ་འཁོར་ཞིག་གི་ནང་ཡོད་སྐོར་བཤད་ཡོད་ཀྱང་། དེ་ནས་བཟུང་གར་སོང་ཆ་མེད་དུ་གྱུར་ཡོད་སྟབས། ཁོང་གི་ནང་མི་ཚོས་ཧོང་ཀོང་ཉེན་རྟོག་ཁང་ལ་གནས་ཚུལ་ཡར་ཞུ་བྱས་ཏེ། ཆེད་དུ་ཁྲིམས་རྩོད་པ་གླས་ནས་ཧྲིན་ཀྲིན་གྲོང་ཁྱེར་གྱི་ཉེན་རྟོག་ཁང་ཚང་མར་འདྲི་ཞིབ་དགོས་པའི་འབོད་སྐུལ་ཞུས་ཡོད་པ་དང་། ཧོང་ཀོང་ཉེན་རྟོག་ཁང་ནས་རྒྱ་ནག་ནང་འབྲེལ་བ་བྱས་ཏེ་སི་མོན་ཁྲིན་བར་བརླག་ཕྱིན་སྐོར་གནས་ཚུལ་དྲིས་ཡོད་ཀྱང་བརྡ་ལན་སྤྲད་མེད་སྐོར་བརྗོད་ཡོད་འདུག
ཟླ་འདིའི་ཕྱི་ཚེས་ ༢༠ ཉིན་ཧོང་ཀོང་ས་གནས་ཀྱི་གནས་ཚུལ་ཞིག་གི་ནང་སི་མོན་ཁྲིན་རྒྱ་ནག་གི་ཧྲིན་ཀྲིན་གྲོང་ཁྱེར་ནས་འཛིན་བཟུང་བྱས་ཡོད་པའི་གནས་ཚུལ་སྤེལ་རྗེས། ཧོང་ཀོང་ནང་ཡོད་པའི་དབྱིན་ཡུལ་དོན་གཅོད་ཁང་གིས། ང་ཚོའི་ལས་བྱེད་ཅིག་ཕྱིར་ཧོང་ཀོང་ལ་ལོག་སྐབས་འཛིན་བཟུང་བྱས་པའི་གནས་ཚུལ་དེར་བློ་འཚབ་ཧ་ཅང་ཆེན་པོ་ཡོད། ང་ཚོས་ཁོའི་ནང་མི་ཚོར་རོགས་འདེགས་བྱས་ནས་ཁོའི་གནས་ཚུལ་རྩད་གཅོད་གཏོང་རྒྱུ་ཡིན་ཞེས་བརྗོད་འདུག
ཁ་སང་མི་གྲངས་ ༡༠ ལྷག་ཧོང་ཀོང་གི་དབྱིན་ཡུལ་དོན་གཅོད་ཁང་གི་སྒོ་ཁར་འཛོམས་ཏེ། རྒྱ་ནག་གཞུང་གིས་སི་མོན་ཁྲིན་འཛིན་བཟུང་བྱས་ཡོད་པར་བློ་འཚབ་ཡོད་པ་དང་། དབྱིན་ཡུལ་གཞུང་ནས་ཁོའི་གནད་དོན་གསལ་པོ་དང་ཀློད་གྲོལ་གཏོང་ཐབས་སུ་སླར་ལྷག་ཤུགས་སྣོན་བྱེད་དགོས་པའི་འབོད་སྐུལ་བྱས་ཡོད་པ་དང་། རང་ལོ་ ༢༩ ཡིན་པའི་འབོད་སྐུལ་བ་ཞིག་གིས། དེ་རིང་གནས་ཚུལ་དེ་སི་མོན་ཁྲིན་ལ་བྱུང་ཡོད་པ་དང་། སང་ཉིན་ངའི་མགོ་ཐོག་ལའང་བསླེབས་སྲིད་པ་ཞིག་རེད། ཅེས་བརྗོད་འདུག
གསར་འགོད་པ། ཀླུ་མགོན་ཐར།
