བོད་རིགས་སློབ་མ་བསྟན་རྣམ་གཡུ་སྦྲང་ལགས་དང་བསྟན་འཛིན་ལྷ་མོ་ཨུ་དགའ་ལགས་གཉིས་ལ་ཨོ་གླིང་གི་ནེའུ་སོའོ་ཌི་ལྦེལ་མངའ་སྡེའི་བློན་ཆེན་བྱ་དགའ་ཐོབ་འདུག
ཟླ་འདིའི་ཕྱི་ཚེས་ ༩ ཉིན། སིད་ཎི་གྲོང་ཁྱེར་ནང་གི་ནེའུ་སོའོ་ཌི་ལྦེལ་གཙུག་ལག་སློབ་གྲྭ་ཆེན་མོའི་ (University of New South Wales) ཚོགས་ཁང་དུ། ཕྱི་ལོ་ ༢༠༡༩ ལོའི་ཨོ་གླིང་ནེའུ་སོའོ་ཌི་ཝེལ་(New South Wales)མངའ་སྡེ་གཞུང་གི་མི་རིགས་སློབ་གྲྭའི་བློན་ཆེན་བྱ་དགའ་སྤྲོད་པའི་མཛད་སྒོ་ཚོགས་ཡོད་པ་དང་། མཛད་སྒོའི་ཐོག་མངའ་སྡེའི་ཤེས་རིག་བློན་ཆེན་ལྕམ་སཱ་རཱ་མཱེ་ཤཱལ(Sarah mitchell)མཆོག་གིས། སིད་ཎི་བོད་རིགས་མཐུན་ཚོགས་རིག་གནས་སྐྱེས་ཚལ་ཁང་གཟའ་མཇུག་སློབ་གྲྭའི་སློབ་མ་བསྟན་རྣམ་གཡུ་སྦྲང་ལགས་སུ། གཞི་རིམ་གོང་མའི་བོད་ཀྱི་སྐད་ཡིག་སློབ་གཉེར་སྦྱང་འབྲས་རྩེར་སོན་གྱི་བློན་ཆེན་བྱ་དགའ་རིམ་པ་གཉིས་པའི་གཟེངས་རྟགས་ཐོབ་ཡོད་པ་དང་། སློབ་མ་བསྟན་འཛིན་ལྷ་མོ་ཨུ་དགའ་ལགས་སུ་གཞི་རིམ་འོག་མའི་བོད་ཀྱི་སྐད་ཡིག་སློབ་གཉེར་སྦྱང་འབྲས་རྩེར་སོན་གྱི་བློན་ཆེན་བྱ་དགའ་རིམ་པ་གཉིས་པ་ཐོབ་ཡོད་འདུག

བློན་ཆེན་གྱི་བྱ་དགའ་དེ་ནི། གཟའ་མཇུག་སློབ་གྲྭ་སོ་སོའི་ནང་ནས་ལོ་འཁོར་ཡིག་རྒྱུགས་དང་འཛིན་གྲྭར་བཅར་ཐོ། སྤྱོད་ལམ་དང་རིག་རྩལ་འགྲན་ཚོགས་སུ་འཛུལ་ཞུགས་ཀྱི་སྤུས་ཚད་བཅས་གཙོར་བཟུང་གིས་འོས་དམིགས་གཉིས་རེ་མངའ་སྡེའི་ཤེས་རིག་ལས་ཁུངས་ལ་ཕུལ་རྗེས། ཤེས་རིག་ལས་ཁུངས་ཀྱིས་བློན་ཆེན་བྱ་དགའི་འོས་དམིགས་རྣམས་ཀྱི་གནས་སྟངས་ལ་དཔྱད་ཞིབ་བགྱིས་ཏེ། སློབ་མ་རྩེ་ཕུད་ ༡༠ དྲག་འདེམས་ཀྱིས་བློན་ཆེན་བྱ་དགའ་རིམ་པ་དང་པོ་དང༌གཉིས་པ། གསུམ་པ་བཅས་གནང་སྲོལ་ཡོད་པ་ཞིག་ཡིན་འདུག

ཕྱི་ལོ་ ༡༩༧༨ ལོ་ནས་ནེའུ་སོའོ་ཌི་ཝེལ་མངའ་སྡེའི་མི་རིགས་སྐད་ཡིག་སློབ་གྲྭའམ་གཟའ་མཇུག་སློབ་གྲྭ་གསར་བཙུགས་གནང་ཡོད་པ་དང་། ད་ལྟའི་ཆར་མི་རིགས་སྐད་ཡིག་སློབ་གྲྭའི་ཁྱབ་ཁོངས་སུ་ཁྱོན་སློབ་གྲྭ་ ༥༦༡ དང་སློབ་ཕྲུག་སྟོང་ཕྲག་  ༣༧ ལྷག་གིས། འཛམ་གླིང་གི་སྐད་ཡིག་མི་འདྲ་བ་ ༦༢ ཐོག་སློབ་སྦྱོང་གནང་བཞིན་ཡོད་པ་དང་། དྭང་བླངས་དགེ་རྒན་ཁྱོན་གྲངས་ ༣༡༦༣ ཡོད་འདུག མི་རིགས་སྐད་ཡིག་སློབ་གྲྭའི་སློབ་ཕྲུག་ཁོངས་ནས་སློབ་ཕྲུག་ ༢༠༧ ལ་ཕྱི་ལོ་ ༢༠༡༩ ལོར་བློན་ཆེན་བྱ་དགའ་ཐོབ་ཡོད་འདུགསིད་ཎི་བོད་རིགས་མཐུན་ཚོགས་རིག་གནས་སྐྱེད་ཚལ་ཁང་ནི་ཕྱི་ལོ་ ༡༩༩༧ ཟླ་ ༩ པའི་ནང་ཁྱིམ་ཚང་གི་བོད་སྐད་བོད་ཡིག་སློབ་གྲྭའི་ངོ་བོ་ཙམ་ནས་རིམ་བཞིན་ཡར་རྒྱས་སུ་སོང་ཞིང་། ཕྱི་ལོ་ ༢༠༡༠ ལོར་༧གོང་ས་རྒྱལ་བ་རིན་པོ་ཆེ་མཆོག་ནས་སློབ་གྲྭའི་མིང་ལ་རིག་གནས་སྐྱེད་ཚལ་ཁང་ཞེས་གསོལ་སྩལ་མཛད།  ཕྱི་ལོ་ ༢༠༡༣ ལོར་མངའ་སྡེའི་ཤེས་རིག་ལས་ཁུངས་མི་རིགས་སྣ་མང་སྐད་ཡིག་སློབ་གྲྭར་དེབ་སྐྱེལ་ཞུས་རྗེས། ད་བར་སློབ་གྲྭའི་འཛིན་ཁང་དང་ཁང་གླའི་དོད།  དགེ་རྒན་ཟབ་སྦྱོང་སོགས་ཀྱི་མཐུན་རྐྱེན་མི་རིགས་གཞན་ཁག་དང་གཅིག་མཚུངས་ཐོབ་ཀྱི་ཡོད་འདུག རིག་གནས་སྐྱེས་ཚལ་ཁང་དུ་ད་ལྟ་དངོས་སུ་མི་རིགས་སྐད་ཡིག་སློབ་གྲྭའི་ཁོངས་སུ་དེབ་སྐྱེལ་ཟིན་པ་སློབ་ཕྲུག་ཁྱོན་གྲངས་ ༨༨ དང༌། དྭང་བླངས་དགེ་རྒན་དང་ལས་བྱེད་ཁྱོན་ ༢༣ ཡོད་འདུག སློབ་གྲྭའི་འཛིན་སྐྱོང་གི་སྒྲིག་གཞི་དང་ཤེས་ཡོན་གྱི་སྲིད་བྱུས་ས་གནས་མངའ་སྡེ་གཞུང་གི་མི་རིགས་སྣ་མང་སྐད་ཡིག་སློབ་གྲྭའི་ལམ་སྟོན་ཁག་དང་། དབུས་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་གཞི་རིམ་ཤེས་ཡོན་སྲིད་བྱུས་གཉིས་ཟུང་འབྲེལ་བྱས་ནས་འགྲོ་བཞིན་ཡོད་པ་དང་།

རེས་གཟའ་སྤེན་པར་འཆར་ཅན་ལྟར་དྭང་བླངས་དགེ་རྒན་ཚོས་སློབ་ཕྲུག་ཚོར་བོད་ཀྱི་སྐད་ཡིག་དང་རིག་གཞུང༌། ལོ་རྒྱུས་དང་ནང་ཆོས། རྐང་བྲོ་དང་གླུ་གཞས་བཅས་སློབ་བཞིན་ཡོད་འདུག

གསར་འགོད་པ། ཀླུ་མགོན་ཐར།