བོད་ལ་སྟོད་དིང་རི་རྫོང་བྲང་རྩེ་གྲོང་ཚོ་ནས་ཡིན་པའི་བོད་མི་ཚེ་རིང་བཀྲ་ཤིས་ལགས་རྒྱ་གཞུང་ཉེན་རྟོག་པས་འཛིན་བཟུང་བྱས་ཏེ་ཟླ་གཅིག་ཕྱིན་ཡོད་ཀྱང་གང་དུ་ཡོད་མེད་སོགས་ཀྱི་གནས་ཚུལ་གང་ཡང་ཤེས་རྟོགས་མ་ཐུབ་པར་ལྷག་འདུག

འདི་ག་བོད་ཀྱི་དུས་བབ་གསར་ཁང་ལ་འབྲེལ་ཡོད་ཅིག་གིས་གནས་ཚུལ་མཁོ་སྤྲོད་གནང་བ་ལྟར་ན། ཉེ་སྔོན་ཕྱི་ཟླ་ ༨ ཚེས་ ༢༠ ཉིན་གྱི་ཕྱི་དྲོའི་ཆུ་ཚོད་ ༦ ཙམ་ལ་སྟོད་དིང་རི་རྫོང་བྲག་རྩེ་གྲོང་ཚོ་ནས་ཡིན་པའི་ཚེ་རིང་བཀྲ་ཤིས་ཞུ་བ་ཞིག་རྒྱ་གཞུང་ཉེན་རྟོག་པས་བཙན་འཁྲིད་བྱས་ཡོད་པ་དང་། ཕ་མ་དང་གཉེན་ཉེ་ཚོས་དིང་རི་རྫོང་ཉེན་རྟོག་ཁང་དང་འབྲེལ་ཡོད་ལས་ཁུངས་ཁག་ལ་སྐད་ཆ་ཡང་ཡང་དྲིས་ཡོད་ཀྱང་ལན་གང་ཡང་སྤྲད་མེད་སྟབས། ད་ལྟ་ཁོང་གང་དུ་ཡོད་མེད་སོགས་ཀྱི་གནས་ཚུལ་ཤེས་རྟོགས་མ་ཐུབ་པར་ལྷག་ཡོད་འདུག

ད་ལྟའི་ཆར་ཁོང་འཛིན་བཟུང་བྱེད་དགོས་དོན་ཅི་ཡིན་ཁ་གསལ་ཤེས་ཀྱི་མེད་ཀྱང་། གནས་ཚུལ་མཁོ་སྤྲོད་པས་གསུངས་པ་ལྟར་ན། བྲག་རྩེ་གྲོང་ཚོའི་ཡུལ་མི་ཚོས་ཚེ་རིང་བཀྲ་ཤིས་ལགས་ཕྱི་ལོ་ ༢༠༠༨ དང་ ༢༠༠༩ བར་ལ་གཞིས་ཀ་རྩེ་དང་ལྷ་ས་རུ་ངོ་རྒོལ་ལས་འགུལ་ཁྲོད་ཞུགས་ཡོད་པའི་དོགས་གཞིའི་འོག ད་ལན་ཉེན་རྟོག་པས་འཛིན་བཟུང་བྱས་པ་ཞིག་ཡིན་སྲིད་པའི་ཚོད་དཔག་བྱེད་ཀྱི་ཡོད་འདུག

གནས་ཚུལ་མཁོ་སྤྲོད་པས་བརྗོད་པ་ལྟར་ན། ཕྱི་ལོ་ ༢༠༠༩ ལོར་རྒྱ་ནག་གཞུང་ནསབཟུང་བོད་ནང་གྲོང་གསེབ་གསར་པ་དང་སྤྱི་ཚོགས་གསར་པ་ཞེས་པའི་སྲིད་བྱུས་ཤིག་སྤེལ་ཏེ། དེང་རབས་ཀྱི་ཁང་པ་འཛུགས་སྐྲུན་གྱི་ལས་གཞི་ཞིག་སྤེལ་བཞིན་ཡོད་པ་དང་། ལོ་དེར་རྒྱ་གཞུང་ནས་སྟོད་དིང་རི་རྫོང་བྲག་རྩེའི་གྲོང་ཚོའི་ནང་དེང་རབས་ཀྱི་ཁང་པ་འཛུགས་སྐྲུན་བྱེད་པར་སྡེ་མི་ཚང་མ་སྐད་བཏང་སྟེ་ཚོགས་འདུ་ཚོགས་སྐབས། ཚེ་རིང་བཀྲ་ཤིས་ལགས་མི་མང་གི་དཀྱིལ་ནས་ཡར་ལངས་ཏེ། ཁང་པ་བཟོ་བཅོས་བཏང་ན་འགྲིག་གི་ཡོད། འོན་ཀྱང་། བོད་ཀྱི་སྲོལ་རྒྱུན་གྱི་ཁང་པའི་བཟོ་བཀོད་རང་འཇགས་འཇོག་དགོས་ཡོད་ཅེས་རྒྱ་གཞུང་གི་འཆར་གཞི་དེར་མོས་མཐུན་བྱས་མེད་པ་དང་། དེའི་རྗེས་ཡུན་རིང་མ་འགོར་བར་ས་གནས་གཞུང་གི་ལས་བྱེད་ཁག་ཅིག་ཚེ་རིང་བཀྲ་ཤིས་ལགས་ཀྱི་ཁྱིམ་དུ་ཡོང་སྟེ་སྔོག་བཤེར་བྱེད་སྐབས། ༧གོང་ས་མཆོག་གི་སྐུ་པར་ཞིག་ལག་སོན་བྱུང་ཡོད་སྟབས། ཁོང་འཛིན་བཟུང་བྱས་ཏེ་ཁ་བྲལ་རིང་ལུགས་དང་ངན་འབྲེལ་གྱིས་སྤྱི་ཚོགས་ཟང་ཟིང་བཟོས་པ་ཟེར་བའི་ཉེས་མིང་འོག ཕྱི་ལོ་ ༢༠༡༡ བར་ལོ་གཉིས་རིང་བཙུན་འཇུག་བྱས་ཡོད་པ་དང་། བཙོན་གྲོལ་ཐོབ་རྗེས་བཟང་བཙོན་འོག་བཅུག་སྟེ། དིང་རི་རྫོང་ལས་གཞན་ལྷ་ས་དང་གཞིས་ཀ་རྩེ་སོགས་སུ་འགྲོ་མི་ཆོག་པར་བཟོས་ཡོད་འདུགད་ལྟ་ཚེ་རིང་བཀྲ་ཤིས་ལགས་ནི་རང་ལོ་ ༣༦ ཡིན་ཞིང་། ཕ་དབང་འདུས་དང་མ་རྣམ་གྲོལ་གཉིས་ལ་བུ་གཉིས་ཡོད་པའི་ནང་ནས་བུ་ཆེ་བ་དེ་ཡིན་པ་དང་། ཁོང་གི་ཁྱིམ་དུ་པ་ལགས་གཉིས་དང་ཨ་མ་ལགས། དེ་བཞིན་ཁོང་བཟའ་ཚང་གཉིས་ལ་བྱིས་པ་བཞི་བཅས་ཁྱོན་ནང་མི་ ༡༠ ཡོད་འདུག

གསར་འགོད་པ། སྐལ་བཟང་སྦྱིན་པ།