རྒྱ་གར་ཉེན་རྟོག་པས་བོད་མི་ ༩ འཛིན་བཟུང་བྱས་ཏེ་བཙོན་ཁང་དུ་བཅུག

རྒྱ་གར་ལྷོ་ཕྱོགས་ནས་ཞི་ཅིན་ཕིན་ལ་ངོ་རྒོལ་བྱ་འཆར་ཡོད་པའི་ཉེས་མིང་འོག་བོད་མི་ལས་འགུལ་བ་དང་སློབ་ཕྲུག་བཅས་བོད་མི་ ༩ འཛིན་བཟུང་བྱས་ཏེ་བཙོན་ཁང་དུ་བཅུག་ཡོད་པ་མ་ཟད་དེ་རིང་ཡང་བསྐྱར་སློབ་ཕྲུག་༢༥ ཉེན་རྟོག་ཁང་དུ་འཁྲིད་འགྲོ་ཡི་འདུགཟླ་འདིའི་ཕྱི་ཚེས་ ༡༡ ནས་ཉིན་གྲངས་གསུམ་རིང་རྒྱ་གར་གྱི་སྲིད་བློན་མུ་དྷི་དང་། རྒྱ་ནག་གི་སྲིད་འཛིན་ཞི་ཅིང་ཕིན་གཉིས་རྒྱ་གར་ལྷོ་ཕྱོགས་ཅེ་ནའེ་གྲོང་ཁྱེར་གྱི་ཉེ་འཁྲིས་མཱ་མཱ་ལཱ་པུ་རམ་ (Mamallapuram) གྲོང་སྡེའི་ནང་ཐུག་འཕྲད་བྱ་འཆར་ཡོད་སྟབས།  རྒྱ་གར་གཞུང་གིས་དོགས་ཟོན་དམ་དྲག་ཤུགས་ཆེན་བྱས་ཏེ་དེ་རིང་ཞོགས་པར་ཡང་བསྐྱར་མ་རྡ་ར་སི་བོད་ཕྲུག་ཚོགས་པའི་(TSAM) ཚོགས་པའི་སློབ་ཕྲུག་ ༢༥ རླངས་འཁོར་ནང་བཅུག་སྟེ་སེ་ལི་ཁྱུར་ཉེན་རྟོག་ཁང་(Seliaqur Police station)་དུ་འཁྲིད་འགྲོ་ཡི་འདུག་ལ། འདས་པའི་ཉིན་ཤས་ནང་རྒྱ་གར་ས་གནས་ཉེན་རྟོག་པས་བོད་རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ལགས་གཙོ་བོར་གྱུར་བའི་གཞོན་ནུ་ལྷན་ཚོགས་ཀྱི་དབུས་རིག་གཞུང་འགན་འཛིན་ཡེ་ཤེས་ལགས།  བོད་རང་བཙན་སློབ་ཕྲུག་ཚོགས་པའི་དབུས་ཚོགས་གཙོ་རིག་འཛིན་ཆོས་སྒྲོན་ལགས་དང་། དབུས་རྒྱུན་བསྟན་འཛིན་བློ་བཟང་ལགས། ཚོགས་པའི་ལྡི་ལིའི་ཚོང་ཁང་གི་འགན་འཛིན་བསྟན་འཛིན་སྐལ་བཟང་ལགས་བཅས་གསུམ་དང་། མ་རྡ་ར་སི་བོད་ཕྲུག་ཚོགས་པའི་ཚོགས་གཙོ་དང་རྒྱུན་ལས་ ༢། གཞན་བོད་མི་ ༡ བཅས་ཁྱོན་མི་གྲངས་ ༩ འཛིན་བཟུང་བྱས་ཏེ། ད་ལྟའི་ཆར་ཅེ་ནའེ་དབུས་གཞུང་གི་བཙོན་ཁང་(Chennai Central Jail) ནང་བཀག་ཉར་བྱས་འདུག

སང་ཉིན་མ་དྷ་ར་སིའི་མཐོ་སློབ་ཁག་གི་རྒྱུགས་སྤྲོད་ཡིན་པ་དང་། བོད་པའི་སློབ་ཕྲུག་གཉིས་བཙོན་ཁང་དུ་ཡོད་སྟབས། བོད་ཀྱི་གཞོན་ནུ་དང་རང་བཙན་སློབ་ཕྲུག་ཚོགས་པས་ཆེད་མངག་བྱས་པའི་ཁྲིམས་རྩོད་པ་ཞིག་གིས་སློབ་ཕྲུག་དེ་གཉིས་ཀློད་གྲོལ་ཡོང་ཐབས་གནང་གི་ཡོད་ཀྱང་། ཁ་སང་དེ་རིང་རྒྱ་གར་གྱི་དྷ་ཤེ་ར་དུས་ཆེན་ཡིན་པས་ཁྲིམས་ཁང་སོགས་ཚང་མ་སྒོ་བརྒྱབས་ཡོད་པ་དང་། ཁྲིམས་རྩོད་པ་དེ་ཁྲིམས་ཞིབ་ཆེ་བའི་བཞུགས་གནས་སུ་བཅར་ཡོད་ཀྱང་ནང་དུ་བསྡད་མེད་སྐོར་བརྗོད་བྱུང་།

ད་ལྟ་རང་སེ་ལི་ཁྱུར་ཉེན་རྟོག་ཁང་དུ་འཁྲིད་འགྲོ་བཞིན་ཡོད་པའི་མ་རྡ་ར་སི་བོད་ཕྲུག་ཚོགས་པའི་(TSAM) ཚོགས་མི་བཀྲ་ཤིས་དབང་མོ་ལགས་ཀྱིས་འདི་གའི་གསར་འགོད་པར། དེ་རིང་ཞོགས་པར་ཡང་བསྐྱར་སེ་ལི་ཁྱུར་མངག་གཏོང་ཁང་(Seliaqur Police station)ཉེན་རྟོག་པས་བོད་པའི་སློབ་ཕྲུག་རྣམས་རླངས་འཁོར་ནང་བཅུག་སྟེ་ཉེན་རྟོག་ཁང་དུ་འཁྲིད་འགྲོ་བཞིན་ཡོད་པ་དང་། ག་རེ་བྱས་ནས་འཁྲིད་ཀྱི་ཡོད་མེད་སོགས་ཤེས་རྟོགས་བྱུང་མེད་སྐོར་བརྗོད་བྱུང་ལ། དེ་བཞིན་མ་རྡ་ར་སི་བོད་ཕྲུག་ཚོགས་པའི་(TSAM) ཚོགས་གཞོན་བསྟན་འཛིན་ཆོས་སྒྲོན་ལགས་ཀྱིས་འདི་གའི་གསར་འགོད་པར། ཕྱི་ཚེས་ ༦ ཉིན་ཞོགས་པར་ས་གནས་ཉེན་རྟོག་པས་མ་རྡ་ར་སི་བོད་ཕྲུག་ཚོགས་པའི་ཚོགས་གཙོ་དཔལ་ལྡན་དོན་གྲུབ་ལགས་ཁོང་རང་གི་ཉལ་ཁང་ནས་ཁྲིད་ཕྱིན་པ་དང་། དེ་བཞིན་ཚོགས་པའི་ཚོགས་མི་བཀྲ་ཤིས་ལེགས་ལྡན་ལགས་དང་། ཚེ་རིང་དོན་འགྲུབ་ལགས་གཉིས་ཀྱང་ཁྲིད་དེ། ད་ལྟའི་ཆར་ཅེ་ནའེ་དབུས་གཞུང་གི་བཙོན་ཁང་ནང་ཡོད་པ་དང་།  སྤྱིར་བཏང་ཉིན་གཉིས་གོང་ནས་ས་གནས་ཀྱི་ཉེན་རྟོག་པས་འདིར་ཡོད་བོད་པའི་མཐོ་རིམ་སློབ་གཉེར་བ་ཚང་མ་སེ་ལི་ཁྱུར་མངག་གཏོང་ཁང་(Seliaqur Police station) ལ་ཁྲིད་དེ། ཐོག་མར་ངོ་རྟགས་ཆོད་རྒྱུའི་ཆེད་དུ་ཡིན་སྐོར་བརྗོད་སོང་ཡང་། ཕྱིས་སུ་རིམ་པས་ང་ཚོ་ཚང་མའི་ཁ་པར་ཨང་གྲངས་བླངས་ཏེ། མུ་དྷི་དང་ཞི་ཅིན་ཕིན་གྱི་ཐུག་འཕྲད་སྐབས་ལས་འགུལ་ནང་ཞུགས་མི་ཉན་པ་དང་། གལ་ཏེ་ལས་འགུལ་ནང་ཞུགས་པ་ཡིན་ན་སོ་སོའི་མི་ཚེ་ལ་དོ་ཕོག་འགྲོ་སྲིད་སྐོར་ཉེན་བརྡ་བཏང་བ་མ་ཟད། མཐའ་མར་ང་ཚོའི་བདེ་འཇགས་ཆེད་ཡིན་སྐོར་བརྗོད་དེ་མི་རེ་རེར་ལས་འགུལ་ནང་ཞུགས་ཀྱི་མིན་ཞེས་པའི་ཁས་ལེན་ཡིག་ཆ་ཞིག་གི་ཐོག་ལ་མིང་རྟགས་རྒྱག་ཏུ་བཅུག་ཡོད་སྐོར་དང་། ཁ་སང་གཞོན་ནུ་ལྷན་ཚོགས་དང་བོད་རང་བཙན་སློབ་ཕྲུག་ཚོགས་པའི་ངོས་ནས་ལྡི་ལི་ནས་ཁྲིམས་རྩོད་པ་ཞིག་མངག་གཏོང་བྱས་ཏེ་བཙོན་གྲོལ་ཐོབ་ཐབས་བྱེད་ཀྱི་ཡོད་སྐོར་སོགས་བརྗོད་སོང་།རྒྱ་གར་ཨ་ནི་གསར་ཁང་གིས་དེ་འབྲེལ་གྱི་གནས་ཚུལ་ཞིག་སྤེལ་བའི་ནང་། བོད་པའི་སློབ་ཕྲུག་ལ་རྒྱབ་སྐྱོར་གནང་མཁན་རྒྱ་གར་གྱི་ཁྲིམས་རྩོད་པ་ཀེ་ཨར་ཝིན་དྷི་(K Arvind) ཞེས་པ་ཞིག་གིས། ཏ་མིལ་ནཱ་དྷུའི་(Tamil Nadu) ཉེན་རྟོག་པས་སྲིད་བློན་མུ་དྷི་དང་སྲིད་འཛིན་ཞི་ཅིན་ཕིན་གྱི་ཐུག་འཕྲད་མ་བྱུང་གོང་ནས་བོད་དོན་འཐབ་རྩོད་པ་བསྟན་འཛིན་བརྩོན་འགྲུས་ལགས་དང་། བོད་པའི་སློབ་ཕྲུག་འགའ་ཤས་འཛིན་བཟུང་བྱས་འདུག་ཀྱང་། ཉེན་རྟོག་ཕྱོགས་ལ་ཁོང་ཚོར་འཛིན་བཟུང་བྱེད་རྒྱུའི་གཞི་རྩ་གང་ཡང་མེད། ཅེས་དང་། ཉེན་རྟོག་པས་སྡོད་ཁང་ནང་ཡིག་རྒྱུགས་ལ་གྲ་སྒྲིག་བྱེད་བཞིན་པའི་སློབ་མ་རྣམས་འཛིན་བཟུང་བྱས་འདུག སློབ་མ་དེ་ཚོས་ཐ་ན་ལས་འགུལ་སྤེལ་རྒྱུའི་འཆར་གཞི་ཡང་མེད་པ་རེད། ཁོང་ཚོས་རང་གི་ཡིག་རྒྱུགས་ཁོ་ནར༡་སེམས་འཁྲལ་བྱེད་བཞིན་ཡོད་པ་རེད། ཅེས་བརྗོད་འདུག་པ་མ་ཟད། ཁྲིམས་རྩོད་པ་ཨར་ཝིན་དྷི་ལགས་ཀྱིས་རྒྱ་གར་གྱི་ཆེས་མཐོའི་ཁྲིམས་ཞིབ་ཁང་ལ་ད་ལན་གྱི་གནས་ཚུལ་དེ་ཞུ་གཏུག་བྱ་རྒྱུ་ཡིན་སྐོར་བརྗོད་འདུག

ཟླ་འདིའི་ཕྱི་ཚེས་ ༥ ཉིན་རྒྱ་གར་ལྷོ་ཕྱོགས་ཊ་མིལ་ནཱ་དྷུ་མངའ་སྡེའི་ཝེ་ལོམ་པོ་རཱམ་ (Viluppuram) ས་གནས་ཉེན་རྟོག་པས་བོད་དོན་འཐབ་རྩོད་པ་བསྟན་འཛིན་བརྩོན་འགྲུས་ལགས་འཛིན་བཟུང་བྱས་ཏེ། ས་གནས་ཀྱི་ཀོ་ཏ་ཀུ་པཱམ་ཉེན་རྟོག་ཁང་དུ་བཀག་ཉར་བྱས་རྗེས། ཕྱི་ཚེས་༦ ཉིན་ཁོང་ཅི་ནཡེ་བྷ་ཛལ་དབུས་བཙོན་ཁང་ནང་དུ་བཅུག་ཡོད་འདུག ཀོ་ར་ཀུ་པཱམ་ཉེན་རྟོག་ཁང་གིས་གསར་འགོད་པར། དེ་གའི་ཉེན་རྟོག་ཁང་ལ་བསྟན་འཛིན་བརྩོན་འགྲུས་ལགས་ཀྱིས་སྲིད་འཛིན་ཞི་ཅིན་ཕིན་གྱི་ལྟ་སྐོར་དང་བསྟུན། ངོ་རྒོལ་ལས་འགུལ་ཞིག་སྤེལ་འཆར་ཡོད་པའི་གསང་བའི་གནས་ཚུལ་ཞིག་འབྱོར་ཡོད་པ་དང་། ཁོང་རང་འཛིན་བཟུང་བྱེད་སྐབས་ཁོང་གི་ལག་ན་བོད་རང་བཙན་གྱི་འཕྲེད་དར་དང་འགྲེམ་ཡིག་ཡོད་སྐོར་བརྗོད་འདུག་ལ། བསྟན་འཛིན་བརྩོན་འགྲུས་ལགས་ཀྱིས་ད་ལན་ཙམ་མ་ཡིན་པར་དེ་སྔ་ཕྱི་ལོ་ ༢༠༠༢ ལོ་དང་ ༢༠༠༥ སོགས་སུའང་། རྒྱ་ནག་གི་སྲིད་འཛིན་སྲིད་བློན་རྒྱ་གར་དུ་བསླེབས་སྐབས། བོད་རང་བཙན་གྱི་འཕྲེད་དར་འཕྱར་བ་ཏེ་ངོ་རྒོལ་གནང་བའི་རྐྱེན་གྱིས་རྒྱ་གར་ཉེན་རྟོག་པས་འཛིན་བཟུང་བྱས་ཡོད་པ་རེད།ཁ་སང་རྒྱ་གར་ཧིན་དྷུ་སི་ཏཱན་དུས་བབ་ (Hindustan Times) ཀྱིས་དེའི་སྐོར་གནས་ཚུལ་སྤེལ་བའི་ནང་། བསྟན་འཛིན་བརྩོན་འགྲུས་ལགས་འཛིན་བཟུང་བྱས་རྗེས། མངའ་སྡེ་གཞུང་གིས་མངའ་སྡེའི་ས་གནས་ཉེན་རྟོག་ཁང་དག་ལ་བོད་མི་འདུས་སྡོད་གཞིས་ཆགས་ཁག་ལ་ལྟ་རྟོག་ནན་པོ་བྱེད་དགོས་སྐོར་དང་། ལས་འགུལ་རིགས་སྤེལ་འཆར་ཡོད་མེད་ཐད་གནས་ཚུལ་མཁོ་སྒྲུབ་བྱེད་དགོས་པའི་བཀོད་ཁྱབ་བཏང་ཡོད་པ་ལྟར། འདི་གའི་གསར་འགོད་པས་བྷེང་ལོར་དང་མེ་སོར་ཁུལ་གྱི་བོད་པའི་སློབ་ཕྲུག་ཚོགས་པའི་མགོ་འཁྲིད་དག་ལ་ཁུལ་དེར་དམ་དྲག་ཡོད་མེད་དྲིས་པར་ད་ལྟའི་ཆར་བྷེང་ལོར་ཁུལ་དུ་དམ་དྲག་མི་འདུག་ཀྱང་། མེ་སོར་ཁུལ་དུ་གཞུང་གི་ཉེན་རྟོག་པའམ་གསང་བའི་ལས་ཁུངས་ཀྱི་མི་སྣ་ཞིག་སླེབས་ཏེ། བོད་པའི་སློབ་ཕྲུག་རྣམས་ཀྱིས་ངོ་རྒོལ་ལས་འགུལ་རིགས་སྤེལ་འཆར་ཡོད་མེད་ཐད་འདྲི་རྩད་བྱས་ཡོད་སྐོར་བརྗོད་བྱུང་།

གསར་འགོད་པ། པ་སངས་ཚེ་རིང་།

བསྐྱར་བཅོས།: ༢༠༡༩/༡༠/༠༨

Leave a Reply

3 thoughts on “རྒྱ་གར་ཉེན་རྟོག་པས་བོད་མི་ ༩ འཛིན་བཟུང་བྱས་ཏེ་བཙོན་ཁང་དུ་བཅུག

  1. བསོད་ནམས་རྒྱལ་མཚན།

    ངེད་ཅག་བོད་པ་ཚང་། རྒྱ་དཀར་ནག་གཉིས་ཀྱི་ གཡོ་རྒྱུ་ལ་ མགོ་འཁོར་དོག་མེད། ཟབ་ཟབ་གནང་། རྒྱ་གར་གྱི་དཔེ་ལ་་་ ལྕགས་ཀྱི་ལྕགས་གཏུབ་ཟེར། 😂 😂 😂

  2. གཞུང་པ་ཚེ་དབང་བསོད་ནམས

    ད་ང་ཚོའི་གནས་ཚང་གཞུང་ལ་ཐུགས་ཁག་མི་འདུག་ང་ཚོའི་ནུས་པ་ཐོན་པའི་ལས་འགུལ་སྤེལ་
    རྒྱུ་མེད་པར་གནས་ཡུལ་གཞུང་ལ་མཛད་དཀའ་དང་སྲུན་པོ་མ་བཟོས་ན་ཡག་ང་ཚོའི་ལས་འགུལ་
    གང་སྤེལ་ཀྱང་ནུས་པ་ཐོན་པ་ཞིག་སྤེལ་དགོས་པ་ལས་གནས་ཡུལ་གཞུང་སྲུན་པོ་བཟོ་ཐུབ་པ་ཙམ་གྱི་
    ང་ཚོའི་ལས་འགུལ་ལ་སྒྲུབ་འབྲས་ཐོན་པར་ནམ་ཡང་ངོས་འཛིན་བྱ་མི་ཉན་པ་དང་རྒྱ་མིའི་
    དཔོན་པོ་རྒྱ་གར་དུ་འབྱོར་གྱི་ཡོད་ན་དབུས་བོད་མིའི་སྒྲིག་འཛུགས་འཛིན་སྐྱོང་བཀའ་ཤག་དང་
    ཁྲིམས་བཟོ་སྤྱི་འཐུས་གྲོས་ཚོགས་འཐུས་མི་རྣམས་ནས་རྒྱ་ནག་གི་དཔོན་པོ་ཐུགས་རྒྱུའི་ཐབས་ཤེས་
    གནང་དགོས་པ་དེ་དབུ་མའི་ལམ་གྱི་སྙིང་དོན་གཉིས་སྨན་དབུ་མའི་ལམ་ཟེར་བ་ནས་མི་དང་མི་
    ཐུག་ནས་ཕར་བཤད་ཚུར་ཉན་དང་ཚུར་བཤད་ཕར་ཉན་རྒྱུད་ནས་བོད་རྒྱའི་དཀའ་སྙོགས་སེལ་
    ཐུབ་པའི་ཐབས་ལམ་ཚོལ་དགོས་པ་ལས་རྒྱལ་སྤྱིའི་ནང་ཁ་དམག་ལ་འགན་འཁུར་ཐུབ་པ་ཙམ་
    གྱི་བོད་རྒྱའི་དཀའ་སྙོགས་སེལ་མི་ཐུབ་ལ་ངོ་རྒོལ་ལས་འགུལ་སྤེལ་ཐུབ་ཙམ་གྱི་བོད་རྒྱའི་དཀའ་
    སྙོགས་དེ་བས་ཀྱང་སེལ་མི་ཐུབ་པ་དེ་ཡང་ང་ཚོའི་གསལ་པོ་ཤེས་དགོས་པ་བཅས་དོན་དངོས་ལྔ་
    དང་ལྔ་བཅུའི་ལས་འཆར་ལ་ང་ཚོའི་འགན་འཁུར་ནས་གོང་ས་མཆོག་གི་སྐུ་དུས་འདིར་བོད་རྒྱའི་
    དཀའ་སྙོགས་སེལ་དགོས་པ་ནི་གཉིས་སྨན་དབུ་མའི་ལམ་ལ་བོད་རྒྱའི་འགོ་འཁྲིད་ནས་འགན་
    འཁུར་ནས་མི་དང་མི་ཐུག་ནས་ཡིད་ཆེས་དང་གུས་བརྩི་བསམ་ཤེས་དང་གུ་ཡངས་རྒྱུད་ནས་བོད་
    རྒྱའི་དཀའ་སྙོགས་མ་འགྲིག་པའི་ཆ་དེ་འགྲིག་པ་བཟོ་དགོས་པ་དང་མ་ཚང་བའི་ཆ་དེ་ཚང་
    བ་བཟོ་དགོས་པའི་འགན་དེ་བོད་རྒྱ་གཉིས་ཀྱི་ད་ལྟའི་འགོ་འཁྲིད་ཚོར་ཡོད་པ་ལས་མི་མང་
    གི་ལག་ཏུ་མེད་པ་དེ་ཡང་ཕྱོགས་གཉིས་ཀས་གསལ་པོ་མཁྱེན་དགོས་བཅས་དབུ་མའི་ལམ་རྒྱལ་
    རྒྱུར་ཅིག།

    1. ཚེ་བརྟན་འགྱུར་མེད།

      ༑ ཚེ་དབང་ལགས། ནུས་པ་དོན་མེད་ན་དབང་ཡོན་ལྡན་པའི་རྒྱ་གཞུང་དེ་ལྷིང་ངེས་བསྡད་འདུག་གས་གྲུབ་འབྲས་ཡོད་མིན་ལ་མ་བལྟོས་པར་གཅིག་ཤོར་གཉིས་མཐུད་ཀྱི་བོད་མིོའི་ལས་འགུལ་ལ་ངང་ངང་ཤུགས་ཤུགས་ཀྱིས་གནོད་ཤུགས་སྤེལ་བཞིན་མིན་འདུག་གམ།
      བོད་རྒྱ་ཞི་མོལ་དེ་རྒྱ་ནག་ནས་༸གོང་ས་མཆོག་ཉིད་ལས་གཞུང་མཉམ་ཞུ་འདོད་མེད་པ་ད་བར་གྱི་སྲིད་བྱུས་རེད་པ། ཉེ་དུས་༸གོང་ས་མཆོག་ནས་གནས་དོན་ཐད་བཀའ་སློབ་ཞིག་ཀྱང་ཕེབས་འདུག་ག ཡིན་ཀྱང་ལམ་ཡོད་ན་གཞུང་དང་གྲོས་ཚོགས་གཉིས་ནས་ཁྱེད་ཀྱིས་དགོངས་པ་ལྟར་ཞུས་ན་ཁྱེ་ལས་གྱོོང་ག་ནས་འོང་། དེ་ལྟར་ཞུ་ཡི་ཡོད་གཤའ་ལ། གང་ལྟར་ཡང་ལས་དོན་སྤེལ་དགོས་པ་ལས་དེ་མིན་སོ་སོའི་ཁང་པའི་ནང་རྒྱ་བོད་སུའི་རྒྱལ་དར་ཆར་ནས་བསྡད་ནའང་ཕན་མི་ཐོག

      སྐད་འབོད་རྒྱག་རྒྱུ་དེ་དམངས་གཙོའི་ཁེ་དབང་ངམ། ཞི་བའི་ལམ་མམ། དབང་མེད་པས་ལག་ཆའམ། ག་རེ་བསམ་ཡང་འཐུས་པའི་ཁ་བཤད་ལག་དོན་དུ་བསྟར་རྒྱུའི་ལམ་བཟང་གཅིག་ཡིན། དེར་སོང་ད་རེས་རྒྱ་གར་ནང་རྒྱའི་དཔོན་ཕེབས་དུས་སུ་ངོ་རྒོལ་ཞུ་ཐབས་ཞུས་པ་རང་དོན་རང་གཅེས་ཡིན་ཀྱང་དགའ་བསུ་ཞུ་ཡི་ཡིན། ངོ་རྒོལ་མ་བྱེད་རྒྱུའི་འབོད་བསྐུལ་དེ་སྔའང་ཞུས་ཡོད་ལ་ཕན་ཐོག་བྱུང་བ་ཤེས་མ་སོང་ཀྱང་བོད་མིའི་ནང་ད་ཆ་ངོ་བརྒོལ་ཞུས་ན་འགྲིག་གམ་མི་འགྲིག་ཅེས་ཐེ་ཚོམ་བྱེད་མཁན་ཕལ་ཆེར་ཡོད་ས་རེད། རྒྱ་མིས་བོད་པར་རང་བཙན་སྤྲོད་འདོད་མེད་ན་ལམ་དབུ་མ་གཉིས་ཕན་གྱི་ལམ་ལ་འཇུག་རྒྱུ་དེ་ཐབས་བཟང་ཤོས་དེ་རེད། དེར་སོང་རང་རེའི་དབུ་འཁྲིད་ཁོང་གི་བཀའ་ལ་སྲུང་བརྩི་དྭང་བསྐུར་ཡོད་ན་རང་བཙན་གྱི་འབོད་སྒྲ་འདོན་ནའང་ལམ་དབུས་མ་ལ་ཕན་པ་ལས་གནོད་པ་ངས་མི་མཐོང། རྒྱུ་མཚན་བཀོད་རྒྱུ་ཡོད། ལམ་དབུ་མར་འགྲོ་ཡི་ཡིན་ཞེས་བེམ་པོ་ལྟར་བསྡད་ན་རྒྱ་མིས་རྡོག་ཧྲུལ་གཏོང་རྒྱུ་ལས་གཞན་མི་མཐོང།

      ཡང་། སྐད་འབོད་སོགས་ལས་འདས་པའི་ཐབས་ལམ་གཞན་དཔེ་ན་རྒྱ་མིའི་དཔོན་ཁག་ནམ་འོང་ལ་རྒྱའི་དར་ཆ་འཁྱེར་ནས་དགའ་བསུ་ཞུས་ན་ལོ་ཤས་རྗེས་་༼་ལོ་༡༠༠ ཡས་མས༽ཞི་མོལ་ཡོང་རྒྱུའི་ངེས་པ་བཪྙེད་ཀྱི་ཡོད་ན་ལོས་ཞུ། ཡིན་ཀྱང་ད་ལྟའི་རྒྱ་གཞུང་གིས་བྱ་ལམ་ལ་ཞིབ་ན་ཁག་པོ་ཡིན་འདུག