ཡང་གཞོན་ནུའི་ལས་འགུལ་བ་ལྔ་འཛིན་བཟུང་བྱས།

དེ་རིང་ཉིན་རྒྱབ་ཙམ་ལ་རྒྱ་གར་ལྷོ་ཕྱོགས་སུ་བོད་ཀྱི་གཞོན་ལྷན་ཚོགས་ཀྱི་ལས་འགུལ་བ་སློབ་མ་ ༥ རྒྱ་གར་ཉེན་རྟོག་པས་འཛིན་བཟུང་བྱས་ཡོད་འདུགདེ་རིང་ཉིན་རྒྱབ་ཏུ་སློབ་ཕྲུག་དེ་ཚོ་ཞི་ཅིན་ཕིན་ཡོང་འཆར་ཡོད་པའི་ཅེ་ནའེ་གྲོང་ཁྱེར་གྱི་ཉེ་འཁྲིས་མཱ་མཱ་ལཱ་པུ་རམ་ (Mamallapuram) གྲོང་སྡེའི་རྒྱ་མཚོའི་ཁར་ཕྱིན་ཏེ། རྒྱ་ནག་གཞུང་གིས་བོད་ཐོག་འཛིན་པའི་སྲིད་བྱུས་མཚམས་འཇོགས་དགོས་པའི་འཕྲེད་དར་དང་བོད་ཀྱི་རྒྱལ་དར་འཕྱར་ཏེ། རྒྱ་གར་ཀྱི་སྲིད་བློན་བློན་མོ་དྷི་མཆོག་ལ་བོད་ཀྱི་གནད་དོན་རྒྱ་ནག་གི་སྲིད་འཛིན་ཞི་ཅིན་ཕིན་ལ་ཐུག་འཕྲད་སྐབས་ངེས་པར་དུ་གླེང་སློང་དགོས་པ་དང་། ཞི་ཅིན་ཕིན་ལ་བོད་ནང་འགྲོ་བ་མིའི་ཐོབ་ཐང་རྡོག་རོལ་གཏོང་མཚམས་འཇོག་དགོས་པའི་ཞུ་འབོད་བྱས་ཏེ། བོད་ཀྱི་རྒྱལ་དར་འཕྱར་བ་དང་། རྒྱ་ནག་གཞུང་གི་བཙན་གནོན་འོག་བོད་མི་རྣམས་ཀྱིས་རང་ལུས་མེར་བསྲེགས་གནང་ཡོད་པའི་པར་སོགས་བཟུང་ནས་ངོ་རྒོལ་ལས་འགུལ་སྤེལ་བར་བརྟེན། ཅེ་ནའེ་ཉེན་རྟོག་པས་འཛིན་བཟུང་བྱས་ཡོད་འདུག

འདི་གའི་གསར་འགོད་པས་དབུས་གཞོན་ནུ་ལྷན་ཚོགས་ཀྱི་དྲུང་ཆེ་བསོད་ནམས་ཚེ་རིང་ལགས་སུ་སློབ་མ་དེ་ཚོའི་ད་ལྟའི་གནས་སྟངས་གང་འདྲ་ཆགས་ཡོད་མེད་དྲིས་པར་ཁོང་གིས། ཁོང་ཚོ་སློབ་མ་རྐྱང་རྐྱང་ཡིན་ལ། རིང་ཉིན་རྒྱབ་ཙམ་ལ་འཛིན་བཟུང་བྱས་ཡོད་པ་དང་། རྒྱ་ནག་གི་སྲིད་འཛིན་ཞི་ཅིན་ཕིན་རྒྱ་གར་ནས་ཕྱིར་མ་ལོག་བར་དུ་ཉེན་རྟོག་པས་ཁོང་ཚོ་ཀློད་གློལ་གཏང་རྒྱུ་མིན་པ་གསལ་པོ་ཡིན་སྐོར་བརྗོད་བྱུང་།

གཞན་ཡང་། རྒྱ་གར་ཉེན་རྟོག་པས་ངོ་རྒོལ་བྱ་འཆར་ཡོད་པའི་ཉེས་མིང་འོག་ལས་འགུལ་བ་དང་མ་རྡ་ར་སི་གཙུག་ལག་སློབ་གཉེར་ཁང་གི་སློབ་ཕྲུག་བཅས་ཉུང་མཐར་བོད་མི་ ༩ འཛིན་བཟུང་བཙོན་འཇུག་བྱས་ཡོད་སྟབས།  རྒྱ་གར་བོད་དོན་རྒྱབ་སྐྱོར་ཚོགས་པ་ (Core Group for Tibetan Cause-India)དང་། བོད་རང་བཙན་སློབ་ཕྲུག་ཚོགས་པ། གཞོན་ནུ་ལྷན་ཚོགས་བཅས་ནས་ནག་ཉེས་གང་ཡང་མེད་པའི་སློབ་ཕྲུག་རྣམས་གང་བྱུང་འཛིན་བཟུང་བཙོན་འཇུག་བྱས་པར་སྐྱོན་བརྗོད་དང་སྦྲགས། བོད་མི་དེ་རྣམས་འཕྲལ་དུ་ཀློད་གྲོལ་ཡོང་ཐབས་ཀྱི་ལས་འགུལ་སྤེལ་བཞིན་ཡོད་པ་དང་། དེ་བཞིན་མ་རྡ་ར་སི་གཙུག་ལག་སློབ་གཉེར་ཁང་གི་རྒྱ་གར་བ་སློབ་ཕྲུག་ ༢༠ ཙམ་གྱིས། ང་ཚོ་བོད་རིགས་སློབ་ཕྲུག་ཚོ་དང་མཉམ་དུ་ཡོད་ཅེས་པའི་གཏམ་བསྒྲགས་བཀོད་པའི་འཕྲེད་བྱང་འཁུར་ཏེ་གདུང་སེམས་མཉམ་སྐྱེད་ཀྱི་ལས་འགུལ་སྤེལ་ཡོད་འདུགདེ་རིང་རྒྱ་གར་རྒྱལ་ཡོངས་བོད་རང་བཙན་སློབ་ཕྲུག་ཚོགས་པས་བསྒྲགས་གཏམ་ཞིག་སྤེལ་བའི་ནང་། རྒྱ་གར་ནི་དམངས་གཙོ་དང་རང་དབང་གི་ལུང་པ་ཞིག་ཡིན་སྟབས་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་ལ་བརྩི་བཀུར་བྱས་དང་བྱེད་མུས་ཡིན་པར་ཡིད་ཆེས་ཡོད་སྐོར་དང་། བོད་རང་དབང་ནི་རྒྱ་གར་གྱི་བདེ་འཇགས་ཡིན་པ། རྒྱ་ནག་གཞུང་ནས་བོད་མིའི་འབོད་སྒྲ་མངོན་ཆུང་བཟོ་ཐབས་བྱེད་ཀྱི་ཡོད་པས། སློབ་ཕྲུག་ཚོགས་པ་དང་བཀག་ཉར་བྱས་ཟིན་པའི་སློབ་མ་ཚོས་སྲིད་བློན་མུ་དྷུ་མཆོག་ལ་བོད་ནང་གི་འགྲོ་བ་མིའི་ཐོབ་ཐང་བློ་ཚབ་རང་བཞིན་ཅན་ཡིན་སྐོར་གླེང་སློང་དགོས་པ་དང་། འཛམ་གླིང་གི་མགོ་འཁྲིད་ཚོས་ལོ་རྒྱུས་ཀྱི་བདེན་པའི་ཕྱོགས་ནས་ལངས་རྒྱུའི་ཞུ་སྐུལ་དང་། འཛིན་བཟུང་བྱས་པའི་ལས་འགུལ་བ་འཕྲལ་དུ་ཀློད་གྲོལ་དགོས་པ་བཀོད་འདུག

འདས་པའི་བདུན་ཕྲག་གཅིག་མ་ཟིན་ཙམ་ནང་བོད་རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ལགས་དང་། བོད་ཀྱི་གཞོན་ནུ་ལྷན་ཚོགས་ཀྱི་རྒྱུན་ལས་ཚོགས་མི་དང་བོད་རང་བཙན་སློབ་ཕྲུག་ཚོགས་པའི་ཚོགས་གཙོ་རྒྱུན་ལས་སོགས་ཉུང་མཐར་བོད་མི་ ༡༤ རྒྱ་གར་ཉེན་རྟོག་པས་འཛིན་བཟུང་བྱས་ཡོད་པ་དང་། མ་རྡ་ར་སི་སློབ་ཕྲུག་ཚོགས་པའི་ཚོགས་མི་ ༣༢ ཙམ་ལ་ངོ་རྒོལ་ལས་འགུལ་ནང་ཞུགས་རྒྱུ་མིན་པའི་ཁས་ལེན་ཡི་གེར་མིང་རྟགས་འགོད་དུ་བཅུག་པ་དང་། ངོ་རྒོལ་ནང་ཞུགས་ན་སོ་སོའི་མ་འོངས་མདུན་ལམ་ལ་གནོད་པ་ཡོང་རྒྱུ་ཡིན་སྐོར་སོགས་ཀྱི་ཉེན་བརྡ་བཏང་ཡོད་པ་རེད།

གསར་འགོད་པ། ཀླུ་མགོན་ཐར།

བསྐྱར་བཅོས།: ༢༠༡༩/༡༠/༡༠

Leave a Reply

2 thoughts on “ཡང་གཞོན་ནུའི་ལས་འགུལ་བ་ལྔ་འཛིན་བཟུང་བྱས།

  1. གཞུང་པ་ཚེ་དབང་བསོད་ནམས

    རང་ཡུལ་དང་རང་དབང་རང་བཙན་སོགས།
    རང་མི་རིགས་འཚོ་བའི་མདུན་ལམ་རེད།
    རང་མི་དང་རང་དོན་རང་ལས་སོགས།
    རང་ཡུལ་སྐྱོབས་ལ་རང་བཙན་དགོས།

  2. ཝཻ། 👋 ཐུགས་རྗེ་གཟིགས། 👍 བོད་ཀྱི་དུས་བབ་ཚང་། Tibettimes བོད་ཀྱི་དུས་བབ་ཚང་དེ་ གནས་ཚུལ་ཚད་ལྡན་ཞིག་ཡིན་པ་ཡིན་ན་་་ མདོ་སྟོད་ཆུ་བཞི་སྒང་དྲུག་ཟེར་མཁན་དང་། བོད་ཀྱི་གཞོན་ནུ་ཟེར་མཁན་དང་། བོད་རང་བཙན་སློབ་ཕྲུག་ཟེར་མཁན། འཇམ་དབྱངས་ནོར་བུ་ཟེར་མཁན། ཕན་མེད་ཀྱི་ཚོགས་པ་ཁྱ་ལེ་ཁྱོ་ལེ་དེ་ཚོ་དྲས་ དུས་བབ་ནང་མ་བཀོད་རོགས། ང་ཚོ་ཉི་མ་མ་འཁྱོལ་མཁན་དེ་འདྲ་མིན། 😂😂😂 དངོས་ནས་འདི་ལས་ མི་མང་གིས་འདམ་པའི་ སྤྱི་མཐུས་་་ གྲོས་ཚོགས་ནང་ གསུང་མཁྱོན་ནས་བྱོན་རྒྱུ་མེད་མཁན་སྤྱི་མཐུས། མི་མང་ལ་རྒྱག་རེས་རྒྱག་མཁན་སྤྱི་མཐུས། བོད་ཀྱི་འབྲེལ་བསྒྲག་ཁ་ལ་འཁྱེར་ནས་ ཡུལ་སྐོར་སྤྲོ་འཆམ་ཕེབས་མཁན་སྤྱི་མཐུས། འདི་གེ་དེ་གང་མང་མང་བཀོད་ཐུབ་ན་ཡག་པོ་འདུག རྗེས་མ་ང་ཚོ་སྐྱར་དུ་འདམ་མཆོག་གི་རེད་པ། 😂😂😂