འཛམ་གླིང་ནང་གི་རང་བྱུང་གནོད་སྐྱོན་ཆེས་མང་བའི་རྒྱལ་ཁབ་ཧྥི་ལི་པེན་གྱི་ནང་ས་ཡོམ་ཚད་རིམ་ ༦.༤ ཅན་ཞིག་བརྒྱབ་སྟེ་མི་རྒྱུ་གཉིས་ལ་གནོད་སྐྱོན་ཐེབས་ཡོད་འདུགདེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་སྤེལ་བའི་གནས་ཚུལ་ལྟར་ན། མདང་ནུབ་ཧྥི་ལི་པེན་(Philippine)རྒྱལ་ཁབ་ཀྱི་ལྷོ་བརྒྱུད་མན་དྷ་ནའོ(Mindanao)གླིང་ཕྲན་དུ་ས་ཡོམ་ཚད་རིམ་ ༦.༤ ཅན་ཞིག་བརྒྱབ་སྟེ། མི་གྲངས་ ༥ རྐྱེན་འདས་དང་མི་ ༦༠ ཙམ་ལ་རྨས་སྐྱོན་ཕོག་ཡོད་པ་དང་། ས་ཡོམ་རྐྱེན་གྱིས་སྡོད་ཁང་བརྡིབ་པ་དང་གཞུང་ལམ་ཆད་པ་ས་ཉིལ་བྱུང་སོགས་བྱུང་ཡོད་འདུག

ས་གནས་ཁོ་ཊ་བྷ་ཊོ(Cotabato)གྲོང་སྡེའི་སྤྱི་ཁྱབ་གཞོན་པ་རྗོ་སེ་ལའེ་ཊོ་པེ་ནོལ(Joselito Pinol)གྱིས། ས་ཡོམ་གྱིས་སྡོད་ཁྱིམ་སོགས་ལ་གཏོར་བཤིག་བཏང་ཚད་ཤུགས་ཆེན་པོ་ཡིན་པ་དང་། ས་འགུལ་ཤུགས་ཆེན་བྱུང་སའི་ཁུལ་དུ་སློབ་གྲྭ་དང་ཧྥི་ལི་པེན་གྱི་སྲིད་འཛིན་གྱི་བཞུགས་གནས་སོགས་ཡོད་ན་ཡང་། སྲིད་འཛིན་མཆོག་རྒྱལ་སར་བཞུགས་ཡོད་པས་ཉེན་ཁ་མེད་པ་དང་། དེ་རིང་སློབ་གྲྭ་ཁག་ཚོགས་ཐུབ་མེད་སྐོར་བརྗོད་འདུག

ཧྥི་ལི་པེན་གཞུང་འབྲེལ་ས་འགུལ་དང་མེ་རི་བརྟག་དཔྱད་ཁང་གིས། ཐེངས་འདིའི་ས་འགུལ་དེ་ལྷོ་ནས་བྱང་བར་རིང་ཚད་སྤྱི་ལེ་ ༢༢ དང་གཏིང་ཟབ་ཚད་ ༨ དང་། ས་འགུལ་ཆུང་ཙག་འགུལ་ཐེངས་ ༢༠༠ ཙམ་བྱུང་ཡོད་སྐོར་བརྗོད་ཡོད་ན་ཡང་། ཨ་རིའི་ས་གཤིས་དཔྱད་ཞིབ་ཁང་གིས་ཧྥི་ལི་པན་གྱི་ས་འགུལ་གྱི་གཏིང་ཟབ་ཚད་སྤྱི་ལེ་ ༡༤ ཙམ་ཡིན་སྐོར་བརྗོད་འདུགས་གནས་ཡུལ་མི་ཚོས་ཐེངས་འདིའི་ས་ཡོམ་ཁྲོད་ཡུལ་མི་ཚོས་སྡོད་ཁང་ཕལ་ཆེར་བར་གཏོར་བཤིག་བཏང་ཡོད་པ་དང་། བུ་མོ་ལོ་ན་ ༧ ཅན་ཞིག་དང་ལོ་ ༢ ཅན་གཉིས་གྱང་ར་བརྡིབས་ནས་རྐྱེན་འདས་སུ་སོང་ཡོད་པ་དང་། གཞན་མི་གཅིག་ས་འགུལ་བྱུང་བ་དང་སྙིང་རྩ་འགག་ནས་རྐྱེན་འདས་སུ་སོང་སྐོར་དང་། ས་གནས་མང་པོའི་ནང་ཚོང་ཁང་ཁག་ཅིག་ལ་མེ་སྐྱོན་ཚབ་ཆེན་བྱུང་ཡོད་སྐོར་བརྗོད་འདུག

ཧྥི་ལི་པེན་དེ་ཞི་བདེ་རྒྱ་མཚོའི་མེ་ཟླུམ་སྟེང་ཆགས་ཡོད་སྟབས། འཛམ་གླིང་གི་ས་འགུལ་དང་མེ་རི་འཕྱུར་བ། མཚོ་རླུང་དང་དྲག་ཆར་སོགས་འབྱུང་བའི་གནོད་སྐྱོན་ཆེས་ཆེ་བའི་ས་ཁུལ་ཞིག་ཡིན་པ་དང་། ཡུལ་དེར་ལོ་རེར་ས་ཡོམ་ཆུང་རིགས་འགུལ་ཐེངས་ ༧༠༠༠ ལྷག་ཡོང་གི་ཡོད་པ་དང་། ཕྱི་ལོ་ ༡༩༩༠ ལོར་ཧྥི་ལི་པེན་གྱི་བྱང་ཕྱོགས་སུ་ས་ཡོམ་ཚད་རིམ་ ༧.༧ ཅན་ཞིག་བརྒྱབ་ནས་མི་གྲངས་ ༢༠༠༠ ལྷག་རྐྱེན་འདས་སུ་སོང་ཡོད་འདུག

གསར་འགོད་པ། སངས་རྒྱས་དཀོན་མཆོག