བོད་ནང་གངས་སྐྱོན་བྱུང་འདུག

ཉིན་ཤས་སྔོན་ནས་བཟུང་མཚོ་སྔོན་ཞིང་ཆེན་འཇུ་ལག་རྫོང་ཁོངས་སུ་གངས་སྐྱོན་བྱུང་སྟེ་ཕྱུགས་ཟོག་སེམས་ཅན་དང་ཞིང་ཁར་གནོད་སྐྱོན་ཆེན་པོ་ཐེབས་ཀྱི་ཡོད་འདུགདེ་རིང་རྒྱ་ནག་གཞུང་འབྲེལ་གསར་འགྱུར་བརྒྱུད་ལམ་ཁག་ཏུ་སྤེལ་བའི་གནས་ཚུལ་ལྟར་ན། ཟླ་འདིའི་ཕྱི་ཚེས་ ༡༤ ཉིན་ནས་བཟུང་མཚོ་སྔོན་ཞིང་ཆེན་འཇུ་ལག་རྫོང་དུ་གངས་སྐྱོན་ཆེན་པོ་བྱུང་སྟེ། ས་གནས་ཁག་ཅིག་གི་ཕྱུགས་ཟོག་སེམས་ཅན་དང་། ཞིང་ཁའི་ནས་འབྲུ་སོགས་ལ་གནོད་སྐྱོན་ཆེན་པོ་ཐེབས་ཡོད་པ་མ་ཟད། གངས་ཤུགས་ཆེ་བའི་རྐྱེན་གྱིས་འབྲོག་པའི་ཕྱུག་རྭ་བརྡིབས་པ་དང་། ཡུལ་མི་ཚོར་འགྲིམ་འགྲུལ་ལམ་ཁ་འགག་པ་སོགས་ཀྱི་དཀའ་ངལ་ཆེན་པོ་འཕྲད་བཞིན་ཡོད་ཀྱང་། རྒྱ་གཞུང་གི་གསར་ལམ་དུ་ད་ལྟའི་ཆར་མི་ལ་ཤི་རྨས་གང་ཡང་ཐེབས་མེད་སྐོར་བསྒྲགས་འདུག

དེ་འབྲེལ་གྱི་གནས་ཚུལ་ནང་གངས་སྐྱོན་གྱིས་མང་ཚོགས་ཀྱི་ཐོན་སྐྱེད་དང་འཚོ་བར་བཟོས་པའི་གྱོང་གུད་ཚབས་ཆེན་པོ་ཡིན་པ་དང་། ཡུལ་ཚོ་དང་གྲོང་རྡལ་ཁག་ཤས་སུ་ནས་དང་ལོག་དཀར། ཡུག་པོ་སོགས་ཀྱི་ཞིང་ཁར་གནོད་སྐྱོན་ཆེན་པོ་ཐེབས་ཡོད་པ་མ་ཟད། རྫོང་ཡོངས་ནས་ཕྱུག་ཟོག་ལ་གཟན་རྩྭ་ཏུན་ཁྲི་ ༢ ལྷག་སྤྱོད་དགོས་བྱུང་བ་དང་། ད་ལྟའི་ཆར་རྫོང་གི་ཞིང་འབྲོག་ཆུ་བེད་ལས་ཁུངས་དང་རང་བྱུང་ཐོན་ཁུངས་ལས་ཁུངས། སྡོད་ཁང་འཛུགས་སྐུན་ལས་ཁུངས་དང་འགྲིམ་འགྲིལ་ལས་ཁུངས་སོགས་ནས་གནོད་ཐེབས་ཁུལ་དུ་རོགས་སྐྱོར་བྱེད་བཞིན་ཡོད་སྐོར་དང་། གནམ་གཤིས་ཀྱི་གནས་སྟངས་ཇེ་ལེགས་སུ་ཕྱིན་རྗེས་རིམ་གྱིས་གནོད་ཕོག་གནས་སྟངས་ལ་ཞིབ་ཕྲའི་བསྡོམས་རྩིས་རྒྱག་རྒྱུ་ཡིན་སྐོར་བསྒྲགས་ཡོད་པ་ལས། ད་ལྟའི་ཆར་ཕྱུག་ཟོག་ག་ཚོད་ཤི་ཡོད་པ་དང་ཞིང་ཁའི་ནས་འབྲུ་ག་ཚོད་ལ་གྱོང་གུད་ཐེབས་ཡོད་མེད་སོགས་བཤད་མི་འདུགམཚོ་སྔོན་ནི་དུས་ལྟར་དགུན་ཟླ་ཚེས་པ་དང་གངས་ཤུགས་ཆེར་འབབ་སའི་ས་ཁུལ་ཞིག་ཡིན་པ་དང་། ཕྱི་ལོ་ ༢༠༡༨ ལོར་མཚོ་སྔོན་ལྷོ་རྒྱུད་ཀྱི་འབྲོག་ཁུལ་ཁག་ཏུ་གངས་སྐྱོན་ཤུགས་ཆེན་བྱུང་སྟེ།  མི་རྒྱུ་གཉིས་ལ་གྱོད་གུད་དང་གནོད་འཚེ་ཆེན་པོ་ཐེབས་ཡོད་པ་དང་། རྒྱ་ནག་གཞུང་ཕྱོགས་ནས་བརྗོད་པ་ལྟར་ན། ལོ་དེའི་དགུན་དུས་སུ་ཁྱོན་ཉིན་གྲངས་ ༡༠༠ ཙམ་ལ་བསྟུན་མར་ཁ་བ་བབས་ཡོད་པ་དང་། ཁ་བ་འབབ་ཤུགས་ཆེ་ཤོས་ཡུལ་ཤུལ་དང་། མགོ་ལོག མཚོ་ཤར་སོགས་ཡིན་པ་དང་། གངས་སྐྱོན་ཁྲོད་ཕྱུགས་ཟོག་གྲངས་ ༥༧༨༠༠ ཙམ་ལ་འཆི་སྐྱོན་བྱུང་བའི་ཁྲོད་མང་ཆེ་བ་འབྲི་གཡག་དང་ལུག་ཡིན་པ་དང་། བདག་མེད་གཅན་གཟན་རི་དྭགས་རིགས་ ༢༡༩ ཙམ་ཤི་ཡོད་པ་དང་། མང་ཆེ་བ་གནའ་བ་དང་དགོ་བ་སོགས་ཡིན་ལ། འདི་ལོའི་གངས་སྐྱོན་ཁྲོད་འབྲོག་པའི་ཕྱུགས་ཟོག་ཤི་བའི་དཔལ་འབྱོར་གྱོང་གུད་རྒྱ་སྒོར་དུང་ཕྱུར་གཅིག་དང་བྱེ་བ་ ༩ ས་ཡ་ ༢  ཙམ་ཡིན་པ་དང་། གངས་སྐྱོན་གྱིས་ཁྱོན་རྫོང་དང་གྲོང་ཁྱེར་ ༡༣  གྱི་མངའ་ཁུལ་དུ་ཡོད་པའི་འབྲོག་ཁྱིམ་ཁྲི་ ༢༡ ལྷག་ལ་གནོད་འཚེ་ཐེབས་ཡོད་སྐོར་བརྗོད་ཡོད་པ་རེད།

སྔར་ལོའི་ལོ་སར་གྱི་སྔ་གཞུག་ཏུ་མཚོ་སྔོན་ཡུལ་ཤུལ་ཁུལ་དུ་གངས་སྐྱོན་ཆེན་པོ་བྱུང་སྟེ་འགྲིམ་འགྲུལ་འགྲོ་འོང་འགག་པ་དང་། ཕྱུགས་ཟོག་སེམས་ཅན་གངས་ཀྱིས་མནན་ཏེ་ཉིན་གྲངས་མང་པོར་ལྷག་པ་དང་། ཆུ་དང་གཟན་རྩྭ་མ་རག་པའི་དཀའ་ངལ་ཆེན་པོ་འཕྲད་དེ་ཤི་སྐྱོན་བྱུང་བའི་གནས་ཚུལ་བརྒྱུད་ལམ་དུ་ཐོན་སྐབས། རྒྱ་ནག་གཞུང་གི་གསར་འགྱུར་བརྒྱུད་ལམ་ཁག་ནས་གངས་སྐྱོན་ཁྲོད་སྲིད་གཞུང་གིས་འཕྲལ་དུ་གནོད་སྐྱོན་ཞི་འཇགས་དང་། མི་མང་ལ་ལོ་གསར་པ་རོལ་ཐུབ་པ་ཁག་ཐེག་བྱས་ཡོད་སྐོར་སོགས་ཤུགས་ཆེན་བསྒྲགས་ཡོད་ན་ཡང་། ཉིན་ཤས་རྗེས་སུ་ས་གནས་བོད་མི་ཚོས་འབྲོག་ཁྱིམ་མང་པོར་ཟ་མ་དང་འབུད་ཤིང་སོགས་ཀྱི་དཀའ་ངལ་འཕྲད་བཞིན་ཡོད་པས་འཕྲལ་དུ་རོགས་སྐྱོར་དགོས་པའི་འབོད་སྐུལ་གནང་ཡོད་པ་དང་། ས་གནས་ཀྱི་བླ་མ་དང་ཡུལ་མི་དྭང་བླངས་བས་གནོད་ཐེབས་རོགས་སྐྱོབ་བྱས་པ་དང་། རླངས་འཁོར་མང་པོའི་ནང་གཟན་རྩྭ་དབོར་འདྲེན་བྱས་པ་མ་ཟད། གཞུང་ལམ་མེད་པའི་རི་སྒང་ཁུལ་དུ་གཟན་རྩྭ་རྒྱབ་ཏུ་འཁུར་ནས་ཕྱིན་པ། འགྲིམ་འགྲུལ་བདེ་འཇགས་ཆེད་གཞུང་ལམ་གྱི་ཁ་བ་འཕྱགས་པ་སོགས་ཀྱི་པར་དང་གནས་ཚུལ་མང་པོ་བརྒྱུད་ལམ་དུ་ཐོན་ཡོད་པ་རེད།

ས་མཐོ་ཞིང་ཁ་བའི་འབབ་ཚད་ཤུགས་ཆེ་བའི་མཚོ་སྔོན་ཞིང་ཆེན་གྱི་འབྲོག་ཁུལ་མང་པོ་ཞིག་ཏུ་ཕྱི་ལོ་ ༢༠༠༨ ལོར་ཡང་གངས་སྐྱོན་ཆེན་པོ་བྱུང་ནས་སེམས་ཅན་མང་པོར་འཆི་སྐྱོན་བྱུང་ཡོད་པ་དང་། ཡང་ཕྱི་ལོ་ ༢༠༡༥ ལོར་མཚོ་སྔོན་ཞིང་ཆེན་མཚོ་ནུབ་ཁུལ་གཏེར་ལམ་རྫོང་སོགས་སུ་གངས་སྐྱོན་ཆེན་པོ་བྱུང་སྟེ། གཏེར་ལམ་རྫོང་ཡོངས་སུ་འབྲོག་ཁྱིམ་ ༢༠༠༠ ཙམ་ཡོད་པའི་ནང་ནས་ཕྱུགས་ཟོག་འབུམ་ ༥ ལྷག་ལ་གནོད་སྐྱོན་ཐེབས་པའི་གནས་ཚུལ་ཐོན་པ་དང་། ཡུལ་མི་ཚོས་གནོད་ཐེབས་ཁུལ་དུ་དྭང་བླངས་རོགས་སྐྱོར་བྱས་པའི་པར་སོགས་སྤྱི་ཚོགས་བརྒྱུད་ལམ་དུ་བསླེབས་པར་བརྟེན། རྒྱ་ནག་གཞུང་གིས་གནོད་སེལ་རོགས་སྐྱོར་བ་ཚོས་ངེས་པར་དུ་རྒྱ་ནག་གཞུང་གི་རྒྱལ་དར་འཁྱེར་དགོས་པའི་བཙན་བཀའ་བཏང་བ་སོགས་ཀྱི་གནས་ཚུལ་ཕྱི་ཕྱོགས་སུ་ཐོན་ཡོད་པ་རེད།

གསར་འགོད་པ། སངས་རྒྱས་དཀོན་མཆོག

བསྐྱར་བཅོས།: ༢༠༡༩/༡༠/༡༧

Leave a Reply

One thought on “བོད་ནང་གངས་སྐྱོན་བྱུང་འདུག

  1. གཞུང་པ་ཚེ་དབང་བསོད་ནམས

    བོད་ཟླ་བརྒྱད་པའི་ནང་གངས་བབས་པ་དེ་ཅུང་ཡ་ཚན་རེད་ན་ཕྱི་ལོ་ ༡༩༥༩ ས་ཕག་ལོར་
    བོད་རྒྱ་འོག་ཤོར་བ་རེད་ལ་འདི་ལོ་༢༠༡༩ ས་ཕག་ལོ་ལ་བོད་རང་བཙན་ཐོབ་པའི་
    རྟེན་འབྲེལ་ལ་ངོས་འཛིན་ཞུ་གི་ཡོད་ལ་འབྱུང་བའི་གནོད་འཚེའི་འོག་ཚུད་པའི་མི་དང་
    དུད་འགྲོ་སྲོག་ཆགས་ཚང་མ་བདེ་ཆེན་ཞིང་དུ་སངས་རྒྱས་འོད་དཔག་ཏུ་མེད་པའི་ཞིང་
    ཁམས་ནུབ་ཕྱོགས་བདེ་བ་ཅན་དུ་སྐྱེས་པ་ཤོག་ཨོམ་ཨ་མི་སྡེ་ཝ་ཧྲི་་་་་་་་་་་་་ཧྲི་་་་་་་་ཧྲི