དྷ་སྟེང་བོད་ཁྱིམ་དབུ་བརྙེས་ཏེ་ལོ་ངོ་ ༥༩ འཁོར་བའི་མཛད་སྒོའི་སྟེང་སྤྱི་འཐུས་ཚོགས་གཞོན་མཆོག་ནས་སློབ་ཕྲུག་རྣམས་ཀྱི་ཡིག་རྒྱུག་གྲུབ་འབྲས་ཁོ་ནར་མི་དམིགས་པར་དོན་དངོས་ཤེས་ཡོན་གྱི་སྤུས་ཚད་གོང་མཐོར་གཏོང་ཐབས་དང་འཛིན་སྐྱོང་ཚགས་ཚུད་ཡོང་རྒྱུར་དམིགས་དགོས་སྐོར་གསུངས་སོང་།དེ་རིང་སྔ་དྲོའི་ཆུ་ཚོད་ ༩ སྟེང་། དྷ་སྟེང་བོད་ཁྱིམ་སློབ་གྲྭ་དབུ་བརྙེས་ནས་ལོ་ངོ་ ༥༩ འཁོར་བའི་དུས་དྲན་མཛད་སྒོ་དྷ་སྟེང་བོད་ཁྱིམ་སློབ་གྲྭའི་ཐང་ཆེན་དུ་ཚོགས་སོང་བ་དང་། མཛད་སྒོའི་སྐུ་མགྲོན་གཙོ་བོར་དཔལ་ཞྭ་དཀར་གཡུང་དྲུང་བོན་གྱི་བསྟན་པའི་གཙུག་རྒྱན་སྐྱབས་རྗེ་སྨན་རིའི་ཁྲི་འཛིན་ ༣༤ པ་ལུང་རྟོགས་ཟླ་བ་དར་རྒྱས་མཆོག་གི་དབུས། བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་གཞན་གཉིས་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གི་དབུས་བཀའ་བློན་རྣམ་པ་དང་། བོད་མི་མང་སྤྱི་འཐུས་ཚོགས་གཞོན་མཆོག་གི་དབུས་པའི་སྤྱི་འཐུས་རྒྱུན་ལས་རྣམ་པ། དགའ་ལྡན་ཕོ་བྲང་གི་སྐུ་ཚབ་དང་། དགོན་སྡེ་ཁག་གི་མཁན་པོ་དང་སྐུ་ཚབ་རྣམ་པ། བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་དྲུང་ཆེ་རྣམ་པ་དང་།  རང་དབང་ཅན་གྱི་སྡེ་ཚན་ཁག་གི་འགན་འཛིན། ཚོགས་སྐྱིད་ཁག་གི་སྐུ་ཚབ། དེ་བཞིན་བོད་ཁྱིམ་སློབ་གྲྭའི་དབུ་ལས་སློབ་ཕྲུག་ཟུར་པ་དང་ལས་ཐོག་བཅས་སེར་སྐྱ་མི་མང་ཁྱོན་ ༢༠༠༠ ཡས་མས་འཛོམས་འདུག་ལ། མཛད་སྒོའི་ཐོག་་སློབ་ཁྱིམ་སློབ་གྲྭ་ཁག་ནང་ཕྱག་ལས་གནང་སྟེ་ཞབས་ལོ་ ༢༠ ཧྲིལ་བོ་འཁོར་བའི་དགེ་ལས་ ༢༢ ལ་བོད་ཁྱིམ་སློབ་གྲྭའི་དཀའ་དྲིན་རྗེས་དྲན་གྱི་གཟེངས་རྟགས་སྐུ་ཐང་རེ་དང་། བོད་ཁྱིམ་སློབ་གྲྭའི་སློབ་ཕྲུག་གཉིས་ལ་ཤེས་རིག་ལས་ཁུངས་ནས་བུམ་སྐྱོན་གསུམ་བྲལ་གྱི་བྱ་དགའ་གནང་སོང་བ་དང་། ཉིན་གུང་རྒྱབ་ནས་ཧི་མ་ཅཱལ་མངའ་ཁུལ་དུ་ཡོད་པའི་བོད་ཁྱིམ་སློབ་གྲྭ་ཁག་ནས་རྐང་བྲོ་གླུ་གཞས་གཟིགས་འབུལ་དང་། དགོང་དྲོ་ཕྱི་ལོ་ ༡༩༩༤ ནས་ ༡༩༩༦་བར་གྱི་བོད་ཁྱིམ་སློབ་ཟུར་རྣམས་ཀྱི་གོ་སྒྲིག་འོག་སློབ་གྲྭ་ཁག་བར་འདྲི་རྩད་འགྲན་བསྡུར་བཅས་ཞུ་རྒྱུ་ཡིན་པ་དང་། སང་ཉིན་ནས་བོད་ཁྱིམ་སློབ་གྲྭའི་ཁང་ཚན་ནང་ཁུལ་གྱི་མཆོང་རྒྱུག་འཕེན་གསུམ་གྱི་ལུས་རྩལ་རྩེད་འགྲན་བྱ་རྒྱུ་ཡིན་འདུགམཛད་སྒོའི་ཐོག་མར་བོད་ཁྱིམ་སྤྱི་ཁྱབ་ངེས་སྟོན་པ་ཐུབ་བསྟན་རྡོ་རྗེ་ལགས་ནས་བོད་ཁྱིམ་སློབ་གྲྭ་སྤྱི་ཡོངས་ཀྱི་ལས་བསྡོམས་སྙན་སྒྲོན་ཞུ་སྐབས། དྷ་སྟེང་བོད་ཕྲུག་ཁྱིམ་སྡེ་འདི་ ༡༩༦༠ ལོར་ཐོག་མར་ཇ་མུ་ས་ཁུལ་དུ་བོད་མི་ལམ་བཟོ་བའི་ཕྲུ་གུ་ ༥༡ ཙམ་སྐུའི་གཅེན་མོ་དམ་པ་ཚེ་རིང་སྒྲོལ་མ་མཆོག་ནས་ཐུགས་འགན་བཞེས་གནང་མཛད་དེ་གསར་འཛུགས་གནང་བ་དང་། བོད་ཕྲུག་ཁྱིམ་སྡེ་ནི་བཙན་བྱོལ་བོད་མིའི་དྭ་ཕྲུག་དང་ཕྱེད་དྭ་ཕྲུག་ཉམ་ཐག་བཅས་ལ་གཟིགས་སྐྱོང་དང་ཤེས་ཡོན་མཁོ་སྤྲོད་བྱེད་པའི་ངོ་བོ་ཆ་ཚང་ལ་ཆིག་སྒྲིལ་ཁེ་མེད་ཀྱི་ཚོགས་པ་ཆེ་ཤོས་ཤིག་ཡིན་ཞིང་། བོད་ཁྱིམ་གྱི་ངོས་ནས་བོད་ཕྲུག་རྣམས་རང་དབང་གི་སྒོ་ནས་འཚར་ལོངས་དང་། བོད་མི་རིགས་ཀྱི་ངོ་བོ་དང་རིག་གཞུང་ལ་སྤོབས་སེམས་དང་དགའ་ཞེན་ལྡན་ལ། སློབ་ཕྲུག་སོ་སོའི་མོས་ནུས་དང་བསྟུན་པའི་ལམ་སྟོན་ཐུབ་ཆེད་སློབ་མ་དབུས་སུ་བཞག་པའི་ཤེས་ཡོན་སྤྲོད་རྒྱུའི་ཐབས་ལམ་དང་། ཕ་མས་བརྩེ་བ་དང་གཅེས་སྐྱོང་འོག་འཛིན་སྐྱོང་ཞུ་བཞིན་པའི་ཚོགས་པ་ཞིག་ཡིན་ལ། ད་ལྟའི་ཆར་བོད་ཁྱིམ་སློབ་གྲྭ་ཁག་བརྒྱད་དང་ལས་རིགས་སློབ་གཉེར་ཁང་གཉིས། ཏཱ་ལའི་བླ་མ་མཐོ་སློབ་རིམ་སློབ་གཉེར་ཁང་དང་བོད་ཁྱིམ་མཐོ་སློབ་སྡོད་ཁང་གཉིས་བཅས་ཡོད་པ་དང་། གཞན་བུ་ཕྲུག་གཅེས་སྐྱོང་ཀྱི་ཞབས་ཞུ་དང་བོད་ཁྱིམ་ཤེས་ཡོན་འཕེལ་རྒྱས་སྡེ་ཚན་བཅས་ཀྱི་ནང་བོད་ཁྱིམ་མ་ལག་དང་རྒྱ་གར་མཐོ་སློབ་ཁག་ཏུ་བསྐྱོད་བཞིན་པའི་སློབ་ཕྲུག་གྲངས་ ༩༨༤༣ ལ་གཟིགས་རྟོག་ཞུ་བཞིན་ཡོད་པ་དང་། བོད་ཁྱིམ་ནང་རྒས་གཅོང་གྲངས་ ༥༦༨ དང་ལས་བྱེད་གྲངས་ ༡༢༩༣ བཅས་ཡོད་པ་དང་། དེ་བཞིན་ཕྱི་ལོ་ ༢༠༡༩ ལོར་བོད་ཁྱིམ་སྤྱི་ཡོངས་ཀྱི་སློབ་ཕྲུག་གི་གྲངས་ཀ་ ༧༢༡༠ དང་། སློབ་འཇུག་དང་གནས་སྤོས་ཟིན་པ་ ༧༢༨། སློབ་ཕྲུག་རྩ་དགོངས་དང་གནས་སྤོས་སོང་བ་ ༥༧༩། བོད་ཁྱིམ་ལས་བྱེད་གྲངས་ ༡༡༢༦ དང་དགེ་ལས་གསར་ཞུགས་གྲངས་ ༧༧ ། རྩ་དགོངས་དང་གནས་སྤོས་སོང་བ་ ༡༡༤ བཅས་ཡོད་སྐོར་བརྗོད་སོང་།ཡང་བོད་ཁྱིམ་གྱི་ཤེས་ཡོན་གནས་ཚད་ཐད་ཁོང་གིས། འདི་ལོར་བོད་ཁྱིམ་སློབ་གྲྭའི་རྒྱ་གར་རྒྱལ་ཡོངས་འཛིན་རིམ་བཅུ་གཉིས་ནང་སློབ་ཕྲུག་ ༥༦༦ ཡོད་པ་ལས། ཡིག་རྒྱུགས་ནང་སློབ་ཕྲུག་གྲངས་ ༥༥༨ འཛུལ་ཞུགས་བྱས་པ་ལས་ཡིག་རྒྱུགས་འཕྲོད་པའི་བརྒྱ་ཆ་ ༩༨.༥ སོན་པ་མ་ཟད། ཚན་རིག་སྡེ་ཚན་གྱི་སློབ་ཕྲུག ༣ དང་ཚོང་འབྲེལ་སྡེ་ཚན་གྱི་སློབ་ཕྲུག་ ༣། འབྱུང་རིག་སྡེ་ཚན་གྱི་སློབ་ཕྲུག་ ༡ བཅས་སློབ་ཕྲུག་ ༧ ལ་དགའ་ལྡན་ཕོ་བྲང་གི་བྱ་དགའ་ཐོབ་ཡོད་པ་དང་། དེ་བཞིན་འཛིན་རིམ་བཅུ་པའི་རྒྱལ་ཡོངས་ཡིག་ཚད་ནང་སློབ་ཕྲུག་ ༥༩༠ འཛུལ་ཞུགས་བྱས་པ་ལས། ཡིག་རྒྱུགས་འཕྲོད་པའི་བརྒྱ་ཆ་ ༩༠.༡ ཡིན་པ་དང་། གཞན་འདི་ལོར་སྨན་པའི་(MBBS)མཐོ་སློབ་སློབ་ཡོན་ཐོབ་མཁན་གཅིག་དང་། པེ་སི་ཊོལ་ཛི་མཐོ་སློབ་(Pestolozzi)སློབ་ཡོན་ཐོབ་མཁན་གཅིག ཡུ་ཊབ་པི་སེ་མཐོ་སློབ(uwc)སློབ་ཡོན་ཐོབ་མཁན་གྲངས་ ༥ དང་། ཉི་འོང་ཆི་བྷ(chiba)མཐོ་སློབ་སློབ་ཡོན་ཐོབ་མཁན་གཅིག གཞན་བྷི་རེ་མཐོ་སློབ་(Brea college)སློབ་ཡོན་ཐོབ་མཁན་སློབ་ཕྲུག་གཅིག་བཅས་བྱུང་ཡོད་སྐོར་བརྗོད་བྱུང་།

གཞན་ཡང་བོད་ཁྱིམ་སློབ་གྲྭའི་བོད་མིའི་སྒྲིག་འཛུགས་ཀྱི་ཤེས་ཡོན་སྲིད་བྱུས་ལག་བསྟར་བྱེད་བཞིན་པའི་སྐོར་ལ་ཁོང་གིས། བོད་ཁྱིམ་སློབ་གྲྭའི་ནང་བོད་ཡིག་གི་རྨང་གཞི་བརྟན་པོ་ཡོང་ཆེད། ཕྱི་ལོ་ ༡༩༨༥ ནང་གཞི་རིམ་འོག་མ་འཛིན་རིམ་དང་པོ་ནས་ལྔ་པ་བར་གྱི་ཚན་རིག་དང་ཨང་རྩིས། སྤྱི་ཚོགས་རིག་གནས་ཀྱི་སློབ་ཚན་ཆ་ཚང་བོད་ཡིག་བརྒྱུད་རིམ་ཐོག་སློབ་འཁྲིད་ཞུས་ཡོད་ཀྱང་། ཕྱི་ལོ་ ༢༠༡༦ ལོའི་སློབ་མགོར་བོད་ཁྱིམ་སློབ་སྡེའི་ནང་བཙན་བྱོལ་བོད་མིའི་ཤེས་ཡོན་སྲིད་བྱུས་ཀྱི་དགོངས་དོན་ལྟར་ངོ་སྤྲོད་ལག་བསྟར་ཞུས་ཏེ། ཕྱི་ལོ་ ༡༠༡༩ ལོར་འཛིན་རིམ་བཞི་པ་ནས་དབྱིན་ཡིག་སློབ་ཚན་ངོ་སྤྲོད་ཞུས་ནས་ད་ཆར་བོད་ཁྱིམ་སློབ་སྡེ་ཡོངས་ལ་ཤེས་ཡོན་སྲིད་བྱུས་བརྒྱ་ཆ་བརྒྱ་ལག་བསྟར་འགྲོ་བཞིན་ཡོད། ཅེས་དང་། བོད་ཁྱིམ་སློབ་གྲྭའི་དཔལ་འབྱོར་གནས་བབ་སྐོར་ནས་གསུང་སྐབས་ཁོང་གིས། བོད་ཁྱིམ་འགན་འཛིན་ལྷན་ཚོགས་སུ་ལོ་འཁོར་སྔོན་རྩིས་ཚོད་དཔག་འཆར་རྩིས་བཀའ་འཁྲོལ་ཞུས་པ་ཁྱོན་བསྡོམས་ཧིན་སྒོར་ས་ཡ་ ༤༦༢,༠༠༠,༠༠༠ དང་སོང་བསྡོམས་སྒོར་ས་ཡ་ ༤༦༠.༥༨༣,༠༧༩་༠༠ བྱུང་སོང་ཁ་འཐབ་ཀྱིས་ཁྱོན་བསྡོམས་ལྷག་སྒོར་ས་ཡ་༡.༤༡༦༩༢༡ བཅས་སྔོན་རྩིས་ཚོད་དཔག་བཀའ་འཁྲོལ་བཞིན་དཔལ་འབྱོར་འདུ་འགོད་ཀྱང་ཐུབ་ཡོད་པ་དང་། སྤྱིར་དེང་སང་སློབ་ཕྲུག་གི་ཁ་གྲངས་ཇེ་ཉུང་དུ་འགྲོ་བཞིན་པ་སོང་དཔལ་འབྱོར་ཡོང་འབབ་ཀྱང་ཇེ་ཞན་དུ་འགྲོ་བ་དངོས་བདེན་ཡིན་ཡང་། བར་ལམ་ལོ་ཤས་ནང་ལས་བྱེད་དང་ལས་གཞི་སོགས་གང་ཐུབ་མཁོ་བསྡུའི་མཚོན། གྲོན་ཆུང་འབད་པ་ཞུས་ཏེ་ད་བར་ཁྱོན་བསྡོམས་སྒོར་ས་ཡ་༤.༢༡.༨༣,༧༥༥་༤༥ བསྲི་ཚགས་ཐུབ་པར་བརྟེན། འདི་ལོར་ལས་བྱེད་ཀྱི་གླ་ཕོགས་ཀྱང་ཆུང་ངུ་ཞིག་སྤར་ཆ་ཐུབ་པ་བྱུང་ཡོད་པར་དགའ་བ་འཕེལ། དེ་བཞིན་ཁང་པ་ལྷག་མ་མང་པོ་ཡོད་པ་སོང་། གཞིས་ཁོངས་དང་ཁང་པ་མེད་པའི་ལས་ཟུར་རྣམས་ལ་སྣེ་སེལ་ཙམ་ཁང་གླ་བསྡུ་བཞེས་ཐོག་ལས་ཟུར་ནང་མི་ ༡༥ ལ་བགྲེས་ཤག་གི་མཐུན་རྐྱེན་བསྐྲུན་ཐུབ་ཡོད། ལྷག་པར་དུ་ཕྱི་ནང་ཐམས་ཅད་ནས་ཤིན་ཏུ་སེམས་འཚབ་གནང་བཞིན་པའི་ལས་བྱེད་གསོག་དངུལ་གྱི་དཀའ་ངལ་ཡང་ད་ཆ་སེལ་ཐུབ་ཡོད་སྐོར་སོགས་བརྗོད་བྱུང་།

དེའི་རྗེས་བོད་མི་མང་སྤྱི་འཐུས་ཚོགས་གཞོན་མཆོག་གིས་སྤྱི་འཐུས་ལྷན་ཚོགས་ཀྱི་གསུང་བཤད་གནང་སྐབས། དེང་སྐབས་བོད་ཁྱིམ་སློབ་གྲྭ་ཁག་དང་ཤེས་རིག་ཁྱབ་ཁོངས་སློབ་གྲྭ་ཁག་ནང་སློབ་ཕྲུག་གི་གྲངས་འབོར་ཇེ་ཉུང་དུ་འགྲོ་བཞིན་པ་ཁ་གསབ་བྱ་ཐབས་མེད་པས། སློབ་གྲྭ་ཁག་ཟླ་སྒྲིལ་གྱིས་སློབ་ཕྲུག་རྣམས་ཀྱི་ཡིག་རྒྱུག་གྲུབ་འབྲས་ཁོ་ནར་མི་དམིགས་པར་དོན་དངོས་ཤེས་ཡོན་གྱི་སྤུས་ཚད་གོང་མཐོར་གཏོང་ཐབས་དང་འཛིན་སྐྱོང་ཚགས་ཚུད་ཡོང་རྒྱུར་དམིགས་དགོས་པ་ནི་དུས་ཀྱི་དགོས་མཁོར་མཐོང་བ་མ་ཟད། དགེ་རྒན་དང་ལས་བྱེད་རྣམ་པར་མཐུན་རྐྱེན་གང་ལེགས་སྦྱོར་སྐྲུན་གནང་དགོས་པ་དང། དེ་བཞིན་སློབ་ཕྲུག་རྣམས་ཀྱི་ལུས་སེམས་འཚར་ལོངས་ཆེད་ཕ་མ་ཚོས་བུ་ཕྲུག་གི་གཙང་སྦྲ་འཕྲོད་བསྟེན་གང་ལེགས་གནང་དགོས་པ་མ་ཟད། མྱོས་རྫས་ངན་གོམས་དང་ལས་རིགས་སྔོན་འགོག་གི་ལས་འཆར་དང་། ཤེས་ཡོན། ཀུན་སྤྱོད་དང་སྤྱི་ཚོགས་སོགས་ཀྱི་ཐད་རྒྱུན་དུ་ནས་ཐུགས་སྣང་གནང་དགོས་པ་དང་། གཞན་ཡང་དགེ་ལས་ངོས་ནས་ཀྱང་སློབ་ཕྲུག་ཚོར་བྱམས་དང་སྙིང་རྗེ་ཤ་ཚའི་ངོས་ནས་ཕྱག་ལས་གནང་རྒྱུའི་མཚོན། བྱ་བ་གང་ཐད་ནས་རམ་འདེགས་ཞུ་ཐུབ་ཚེ་མ་འོངས་པར་བོད་གངས་ཅན་པའི་སོན་རྩ་བུ་ཕྲུག་རྣམས་སྤུས་ཚད་ལྡན་པ་ཤ་སྟག་ཡོང་ཐུབ་རྒྱུ་ཡིན་སྟབས། དེ་དོན་ལག་བསྟར་ཡོང་བར་སྐུལ་མ་ནན་ཏན་དུ་ཞུ་རྒྱུ་ཡིན་སྐོར་སོགས་གསུངས་སོང་།བོད་མིའི་སྒྲིག་འཛུགས་སྲིད་སྐྱོང་མཆོག་ནས་བཀའ་ཤག་གི་གསུང་བཤད་གནང་སྐབས། བོད་ཁྱིམ་དེ་ཐོག་མར་༧གོང་ས་མཆོག་ནས་སྐབས་དེའི་དྭ་ཕྲུག་ཚོའི་ཆེད་དུ་སློབ་གྲྭ་ཞིག་འཛུགས་དགོས་པའི་དགོངས་བཞེས་གནང་བ་བཞིན། འདས་པའི་ལོ་ ༥༩ ཡི་ནང་ད་ལྟའི་བོད་ཁྱིམ་གྱི་སློབ་གྲྭ་ཡན་ལག་དང་བཅས་པའི་ནང་ཕྲུ་གུ་ཁྲི་ཕྲག་མང་པོར་སློབ་སྦྱོང་རག་ཡོད་པ་མ་ཟད། སློབ་སྦྱོང་རག་ཚར་རྗེས་མང་པོ་ཞིག་མཐོ་སློབ་ཁག་ནང་འགྲོ་ཐུབ་ཡོད་པ་དང་། འཛམ་གླིང་སྤྱི་ཡོངས་དང་བོད་མིའི་སྒྲིག་འཛུགས་ཀྱི་ལས་བྱེད་དང་། བཀའ་བློན། གྲོས་ཚོགས་ནང་དུ་ཡང་གྲུབ་འབྲས་སྨིན་པའི་ཐོག་ནས་ཞབས་ཕྱི་ཞུས་ཐུབ་ཡོད་པ་རེད། དེར་བརྟེན་དེ་རིང་ང་ཚོས་བོད་ཁྱིམ་དབུ་བརྙེས་ནས་ལོ་ངོ་ ༥༩ འཁོར་བའི་དུས་དྲན་སྲུང་གཙིའི་ཉིན་མོར། ད་བར་སྐུ་ལས་སྐྱོན་མཁན་དགེ་རྒན་ལས་བྱེད་ཡོངས་ལ་སྙིང་ཐག་པ་ནས་བཀའ་དྲིན་ཆེ་ཞུ་རྒྱུ་དང་། དེང་སང་འཛམ་གླིང་ནང་མཉམ་འབྲེལ་རྒྱལ་ཚོགས་ཀྱི་ཁོངས་སུ་སྐྱབས་བཅོལ་བ་ཁྱོན་ས་ཡ་ ༡༩ དང་འབུམ་ ༩ ཙམ་ཡོད་པའི་ཁྲོད་ནས། ས་ཡ་ ༧ དང་འབུམ་ ༤ སློབ་གྲྭར་བསྐྱོད་ཆོག་པའི་ཕྲུ་གུ་ཡིན་ཡང་། དེ་དག་ལས་ཕྲུ་གུ་ས་ཡ་ ༤ ཙམ་སློབ་གྲྭར་གཏོང་ཐུབ་ཀྱི་མེད་པ་དང་། མཉམ་འབྲེལ་རྒྱལ་ཚོགས་ཀྱི་ཡུ་ནེ་སི་ཁོ་ (UNESCO) ཚན་པའི་གྲངས་ཐོ་ཞིག་གི་ནང་། སྐྱབས་བཅོལ་བ་ཚུད་པའི་འཛམ་གླིང་ཁྱོན་ཡོངས་སུ་སློབ་གྲྭར་བསྐྱོད་ཆོག་པའི་ཕྲུ་གུ་ས་ཡ་ ༢༦༣ ཡོད་ཀྱང་། དེ་དག་ནང་ནས་ཕྲུ་གུ་ལྔའི་ནང་གི་གཅིག་སློབ་གྲྭར་བསྐྱོད་ཐུབ་ཀྱི་མེད་པ་དང་། གནས་སྟངས་དེ་དག་ལ་གཞིགས་ན་༧གོང་ས་མཆོག་གི་བཀའ་དྲིན་ཉག་གཅིག་ལ་བརྟེན་ནས་ང་ཚོ་བཙན་བྱོལ་སྒྲིག་འཛུགས་ནས་ཕྲུ་གུ་སློབ་གྲྭར་གཏོང་རྒྱུར་མཐུན་རྐྱེན་སྦྱོར་བཞིན་ཡོད་སྐོར་དང་། ད་ལྟའི་བཙན་བྱོལ་བོད་མིའི་སྤྱི་ཚོགས་ཀྱི་ཡི་གེ་འབྲི་ཀློག་གི་གནས་ཚད་དེ་བརྒྱ་ཆ་ ༩༤ ལ་སླེབས་ཡོད་པ་དང་། རྒྱ་གར་བའི་འབྲི་ཀློག་གི་གནས་ཚད་དེ་བརྒྱ་ཆ་ ༨༢ ལས་མིན་པས། རྒྱ་གར་གཙོས་པའི་བལ་ཡུལ་དང་བྷང་གྷ་ལ་དྷེ་ཤི། པཱ་ཀི་སི་ཐན་བཅས་ལས་བཙན་བྱོལ་བོད་མིའི་འབྲི་ཀློག་གི་གནས་ཚད་མཐོ་བ་ཡོད་སྐོར་སོགས་གསུངས་སོང་།

མཇུག་ཏུ་དཔལ་ཞྭ་དཀར་གཡུང་དྲུང་བོན་གྱི་བསྟན་པའི་གཙུག་རྒྱན་སྐྱབས་རྗེ་ལུང་རྟོགས་ཟླ་བ་དར་རྒྱས་མཆོག་ནས་བཀའ་སློབ་གནང་སྐབས། སྤྱི་ནོར་༧གོང་ས་སྐྱབས་མགོན་རིན་པོ་ཆེ་མཆོག་གི་ཐུགས་རྗེ་བླ་ན་མེད་པའི་འོག་ནས། ང་ཚོ་བཙན་བྱོལ་ལ་གྱར་ནས་མ་འོངས་བོད་ཀྱི་མདུན་ལམ་གྱི་ཆེད་དུ་ཐོག་མར་བོད་ཕྲུག་ཁྱིམ་སྡེ་འདི་དབུ་བརྙེས་པ་ཞིག་ཡིན་པ་དང་། དེར་བརྟེན་དེ་རིང་ནི་ང་ཚོས་བོད་ཕྲུག་ཁྱིམ་སྡེ་དབུ་བརྙེས་ནས་སྐུ་ལས་ཚད་མེད་སྐྱོན་མཁན་ལས་ཀྱི་སྣེ་མོ་བ་རྣམས་ལ་བཀའ་དྲིན་རྗེས་དྲན་ཞུ་རྒྱུའི་དུས་ཆེན་ཞིག་ཆགས་ཀྱི་ཡོད་པ་དང་། གཙོ་བོ་སྐུའི་གཅེན་མོ་ཚེ་རིང་སྒྲོལ་མ་ལགས་དང་། སྐུའི་གཅུང་མོ་བཀའ་ཟུར་རྗེ་བཙུན་པདྨ་ལགས་གཙོ་བོར་བྱས་པའི་ལས་བྱེད་ཡོངས་ལ་ངས་སྙིང་དབུས་ནས་བཀའ་དྲིན་ཞུ་ཡི་ཡོད། ང་ཚོ་བོད་མི་རིགས་འདི་འཛམ་གླིང་ཐོག་སླེབས་ཆེད་བོད་ཀྱི་ཆབ་དཔལ་རིག་གསུམ་གལ་ཆེན་པོ་ཡིན་ལ། ལྷག་པར་དུ་རིག་གནས་དེ་གལ་ཆེན་པོ་ཆགས་ཀྱི་ཡོད་པ་རེད། རིག་གནས་ཟེར་བ་དེ་ཡང་རིག་པའི་གཞུང་ལུགས་ཡིན་ཡང་གཙོ་བོ་དེ་བོད་མི་རིགས་ཀྱི་སྐད་དང་ཡི་གེ་ཡིན་པས། དེར་བོད་ཀྱི་མ་འོངས་པའི་སོན་རྩ་སློབ་ཕྲུག་རྣམས་ཀྱིས་འཛིན་སྐྱོང་སྤེལ་གསུམ་བྱེད་དགོས་པ་དེ་འགན་འཁྲི་ཆགས་ཀྱི་ཡོད་པར་བརྟེན། ད་ལྟ་ལས་བསྡོམས་སོགས་ནས་ཀྱང་ཡག་ཐག་ཆོད་དང་གྲུབ་འབྲས་ཐོན་པོ་ཞིག་འདུག་པས། དེ་ནི་གཙོ་བོ་༧གོང་ས་མཆོག་གི་བཀའ་སློབ་ལམ་སྟོན་དང་དབུ་འཁྲིད་ཀྱི་འོག་ནས། བོད་མིའི་སྒྲིག་འཛུགས་དང་བོད་ཕྲུག་ཁྱིམ་སྡེའི་འགན་འཛིན་ལས་བྱེད་ཚང་མའི་གྲུབ་འབྲས་ལ་བརྟེན་ནས་བྱུང་བ་ཞིག་ཡིན་པ་ངོས་འཛིན་བྱེད་དགོས་ཀྱི་ཡོད། ཅེས་གསུངས་སོང་བ་དང་། ཡང་ཁོང་གིས། སློབ་གྲྭའི་དགེ་རྒན་ནི་སློབ་ཕྲུག་གི་མིག་དཔེ་ལྟ་ཡུལ་ཞིག་ཡིན་པས། དགེ་རྒན་ཞེས་པ་དེ་ཤེས་སྤྱོད་གཉིས་ལྡན་ཞིག་དགོས་རྒྱུ་གལ་ཆེན་ཡིན་སྐོར་སོགས་གསུངས་སོང་།

གསར་འགོད་པ། སངས་རྒྱས་དཀོན་མཆོག པ་སངས་ཚེ་རིང་།