རྒྱལ་སྤྱིའི་བོད་ཀྱི་ཟློས་གར་སྒྱུ་རྩལ་ཞིབ་འཇུག་བགྲོ་གླེང་ཚོགས་ཆེན་སྐབས་དང་པོ་བསྡུས།

ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་སེ་མུལ་ཌེལ་བྷ་རོན་བྷེག་ (Samuel Dale Brownback)མཆོག་ནས་རང་ཉིད་རང་དབང་གི་ཆེད་དུ་དྷ་སར་ཕེབས་པ་ཡིན་སྐོར་གསུངས་སོང་།བོད་ཀྱི་ཟློས་གར་ཚོགས་པ་དབུ་བརྙེས་ནས་ལོ་ངོ་ ༦༠ ཧྲིལ་པོ་འཁོར་བའི་དུས་དྲན་དང་སྟབས་བསྟུན། དེ་རིང་ཉིན་གུང་ཆུ་ཚོད་ ༡༢ ཙམ་ལ་བཞུགས་སྒར་དྷ་རམ་ས་ལའི་བོད་ཀྱི་ཟློས་གར་ཚོགས་པའི་ཚོགས་ཁང་གསར་པའི་ནང་། བོད་ཀྱི་ཟློས་གར་ཚོགས་པ་དང་བོད་ཀྱི་སྲིད་བྱུས་ཉམས་ཞིབ་ཁང་ཟུང་འབྲེལ་གྱི་གོ་སྒྲིག་འོག ཉིན་གྲངས་གསུམ་རིང་གི་རྒྱལ་སྤྱིའི་བོད་ཀྱི་ཟློས་གར་སྒྱུ་རྩལ་ཞིབ་འཇུག་བགྲོ་གླེང་ཚོགས་ཆེན་སྐབས་དང་པོ་དབུ་འཛུགས་ཀྱི་མཛད་སྒོ་ཚོགས་སོང་། མཛད་སྒོའི་ཐལག་སྐུ་མགྲོན་གཙོ་བོ་ཨ་རིའི་རྒྱལ་སྤྱིའི་ཆོད་དད་རང་དབང་གི་སྐུ་ཚབ་སྐུ་ཞབས་སེ་མུལ་ཌེལ་བྷ་རོན་བྷེག་ (Samuel Dale Brownback)མཆོག་གི་དབུས་ཕྱི་རྒྱལ་གྱི་སྐུ་མགྲོན་རྣམ་པ་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་བཀའ་བློན་རྣམ་པ། དེ་བཞིན་བོད་ཀྱི་ཟློས་གར་སྒྱུ་རྩལ་ཐད་ཀྱི་ཉམས་ཞིབ་པ་དང་། བོད་ཀྱི་ཟློས་གར་ཚོགས་པའི་ལས་ཐོག་ལས་ཟུར་རྣམ་པ་སོགས་མི་གྲངས་ ༣༠༠ ལྷག་འཛོམས་འདུགམཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས། ངས་སྐུ་ཞབས་བྷ་རོན་བྷེག་དེ་རིང་འདིར་ཕེབས་པ་དེར་བཀའ་དྲིན་ཆེ་ཞུ་ཡི་ཡོད། གང་ཡིན་ཟེར་ན། སྐུ་ཞབས་ཁོང་རང་ནས་དྷ་སར་ཕེབས་ཆེད་ཨ་རི་ནས་སྐུ་ལས་མང་པོ་བསྐྱོན་པ་མ་ཟད། ང་ཚོས་ཀྱང་དྷ་ས་དང་ལྡི་ལི་ནས་དཀའ་ལས་བརྒྱབས་ཡོད་པ་དང་། ། མཐའ་མཇུག་རེས་གཟའ་ལྷག་པའི་ཉིན་ཁོང་ལ་ཐོངས་མཆན་ཐོབ་ཡོད་པ་མ་ཟད། ཁོང་ནས་ཨ་རིའི་འཛིན་སྐྱོང་ནང་དུ་ཡང་ཁོང་རང་གི་གསུང་བཤད་ལ་དག་མཆན་ཐོབ་རྒྱུར་སྐུ་ལས་མང་པོ་བསྐྱོན་ཡོད་སྟབས། འདས་པའི་ཉིན་གྲངས་གསུམ་ནང་ཚང་མ་སྟབས་འགྲིག་པོ་ཆགས་སོང་བས། ལས་དབང་ཞིག་གི་རྐྱེན་པས་སྐུ་ཞབས་ཁྱེད་རང་འདིར་མ་ཕེབས་མཐུ་མེད་ལྟ་བུར་གྱུར་ཡོད། སྐུ་ཞབས་ཁོང་ནས་འདིར་ཕེབས་ཆེད་ཐབས་ཤེས་ཡོད་རྒུ་གནང་བ་དེར་ཐུགས་རྗེ་ཆེ་ཞུ་ཡིན། ཅེས་དང་། ཚང་མས་མཁྱེན་གསལ་ལྟར། སྐུ་ཞབས་བྷ་རོན་བྷེག་ལགས་ནི་བོད་མི་དང་ཡུ་གུར་ཚུད་པའི་འཛམ་གླིང་སྟེང་གི་མི་རིགས་ཚང་མའི་ཆོས་དད་རང་དབང་ལ་རྒྱབ་སྐྱོར་ཤུགས་ཆེན་གནང་མཁན་ཞིག་ཡིན་པ་དང་། ཁོང་གི་མགོ་འཁྲིད་འོག་ནས་ཆོས་དད་རང་དབང་སྐོར་ལ་བློན་ཆེན་རིམ་པའི་ཚོགས་ཆེན་ཐེངས་གཉིས་ཚོགས་པའི་ཐོག འཛམ་གླིང་གི་རྒྱལ་ཁབ་ ༩༠ ལས་མང་བའི་སྐུ་ཚབ་བཅར་ཡོད་པ་མ་ཟད། ཚོགས་ཆེན་གཉིས་ཀའི་ཐོག་བོད་ཀྱི་སྐུ་ཚབ་རྣམས་བཅར་ཐུབ་རྒྱུའི་གོ་སྐབས་བསྐྲུན་ཡོད། ཅེས་གསུངས་སོང་བ་དང་། ཡང་ཁོང་གིས། ད་ལན་གྱི་རྒྱལ་སྤྱིའི་བོད་ཀྱི་ཟློས་གར་སྒྱུ་རྩལ་ཞིབ་འཇུག་བགྲོ་གླེང་ཚོགས་འདི་ནི་བོད་ཀྱི་གླུ་གར་དེ་ཡིད་ལ་འཕྲོག་པ་ཞིག་ཡིན་པ་གསལ་འདོན་བྱ་ཆེད་ཙམ་མ་ཡིན་པར། དེ་ནི་བོད་ཀྱི་ལོ་རྒྱུས་དང་ལོ་ངོ་སྟོང་ཕྲག་རིང་ནས་རྒྱུན་འཛིན་བྱས་པའི་བོད་ཀྱི་རིག་གཞུང་གི་གནད་དོན་ཞིག་ཡིན་པ་གསལ་འདོན་བྱེད་ཆེད་ཡིན་པ་དང་། ཉིན་གྲངས་གསུམ་རིང་གི་བགྲོ་གླེང་ཚོགས་ཆེན་ནང་རྒྱལ་སྤྱིའི་ཐོག་གི་མཁས་དབང་ ༡༦ དང་བོད་ཀྱི་མཁས་དབང་ ༦ ལྷག་གིས་གཏམ་བཤད་སྤེལ་རྒྱུ་ཡིན་སྐོར་གསུངས་སོང་བ་དང་། མཐའ་མཇུག་སྲིད་སྐྱོང་མཆོག་ནས། བོད་བཙན་འཛུལ་བྱས་རྗེས་རྒྱ་ནག་དམར་ཤོག་ཚོགས་པ་དང་མི་མང་བཅིངས་གྲོལ་དམག་གིས་ལས་ཀ་ཐོག་མ་དེ་བོད་ཀྱི་དཔལ་ཡོན་གཏོར་གཤིག་བཏང་ཡོད་སྐོར་དང་། ཉེ་ཆར་རྒྱ་ནག་གཞུང་གི་བླ་རུང་སྒར་གྱི་གྲྭ་འབོར་ཉུང་འཕྲི་བྱས་པས་མ་ཚད། ཡ་ཆེན་སྒར་ཕྱེད་ཀ་ལྷག་རྩ་མེད་བཏང་ཡོད་སྐོར་དང་། བོད་མིའི་སྒྲིག་འཛུགས་ངོས་ནས་ཞུ་འབོད་བྱས་མིན་ལ་མ་ལྟོས་པར་བོད་ནང་གི་བོད་མི་ཚོས་བཙན་འཛུལ་ལ་ངོས་ལེན་བྱ་ཐབས་མེད་པ་དང་། དྲག་གནོན་ལ་མགོ་སྒུར་ཐབས་མེད་པའི་གནས་སྟངས་འོག་་ད་ལྟའང་མུ་མཐུད་རང་ལུས་མེར་སྲེག་གཏོང་གི་ཡོད་སྐོར་སོགས་གསུངས་སོང་།མཛད་སྒོའི་སྐུ་མགྲོན་གཙོ་བོ་ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་སེ་མུལ་ཌེལ་བྷ་རོན་བྷེག་ལགས་ཀྱིས། ང་འདིར་བཅར་ཐུབ་པ་དེར་དགའ་པོ་བྱུང་ལ། ང་འདིར་རང་དབང་གི་ཆེད་དུ་བཅར་བ་ཡིན། ཞེས་དང་། དེ་རིང་ང་འདིར་ནང་ཆོས་ལས་བསྐྱེད་པའི་ཆོས་ལུགས་ཀྱི་གོམས་སྲོལ་ཚུད་པའི་བོད་ཀྱི་ཐུན་མོང་མ་ཡིན་པའི་ངོ་བོ་སྲུང་བརྩི་ཞུ་ཆེད་ཡོང་བ་ཡིན། ཨ་རིའི་ངོས་ནས་བོད་མིའི་བདེ་སྡུག་དང་བོད་མིའི་འཐབ་རྩོད་ལ་དོ་འཁུར་ཆེན་པོ་བྱེད་བཞིན་ཡོད་པ་དང་། དེ་ནི་གཙོ་བོ་ང་ཚོས་བོད་ཀྱི་སྐད་ཡིག་དང་ཆོས་ལུགས། རིག་གཞུང་བཅས་ལ་སྙིང་ཐག་པས་བརྩི་བཀུར་ཞུ་ཡི་ཡོད་པའི་རྐྱེན་པས་ཡིན། མིའི་རིགས་ཀྱི་རིག་གནས་གོམས་སྲོལ་ཁྲོད་ནས་བོད་ཀྱི་རིག་གཞུང་ནི་མིའི་རིགས་ལ་རྩ་ཆེན་ཡིན་པ་དང་། གཞན་ཡང་ཨ་རི་བ་དང་བོད་མི་རྣམས་ཀྱིས་བྱམས་བརྩེ་དང་ཆིག་སྒྲིལ། ཁྲིམས་ཀྱི་དབང་བསྒྱུར་བཅས་ལ་བརྩི་བཀུར་ཞུ་ཡི་ཡོད་པ་གཅིག་མཚུངས་ཡིན་པའི་ཆ་ནས་ཀྱང་ཡིན། ཅེས་གསུངས་སོང་བ་དང་། ཡང་ཁོང་གིས། ཨེ་ཤ་ཡའི་ཆོས་ལུགས་རྗེས་འབྲང་བ་རྣམས་ཀྱིས་སེམས་ལ་ངེས་དགོས་པ་ཞིག་ལ། ཆོས་ལུགས་གཅིག་ལ་དམ་དྲག་བཙན་གནོན་བྱུང་སྐབས་ཆོས་ལུགས་གཞན་ལའང་དེ་ལྟར་བྱུང་སྲིད་པ་ཞིག་ཡིན་པ་སྟབས། ཐའེ་ལན་ཌི་དང་ཤྲི་ལང་ཀ སོག་པོ་བཅས་ནང་གི་སངས་རྒྱས་ཆོས་ལུགས་རྗེས་འབྲང་བ་ཚོས་བོད་མི་རྣམས་ཀྱི་ཐོག་ལ་ག་རེ་འབྱུང་བཞིན་པ་ཤེས་རྟོགས་བྱ་རྒྱུ་གལ་ཆེན་ཡིན་པ་ནན་སྐུལ་ཞུ་ཡི་ཡོད་སྐོར་དང་། རྒྱ་ནག་གཞུང་གིས་མུ་མཐུད་བོད་མིའི་ཐུན་མིན་རིག་གཞུང་བཅས་པ་རྩ་མེད་གཏོང་ཐབས་བྱེད་ཀྱི་ཡོད་ཀྱང་། བོད་མིའི་རིག་གཞུང་དེ་ཡུན་གནས་ཡོང་ངེས་ཡིན་པ་དང་། ཨ་རིའི་ཆོས་དད་རང་དབང་ལྷན་ཚོགས་ཀྱི་སྙན་ཐོའི་ནང་བོད་ནང་གི་བོད་མི་ཚོར་ཆོས་དད་དང་། འདུ་ཚོགས། སྨྲ་བརྗོད། འགྲུལ་སྐྱོད་རང་དབང་བཅས་ལ་དྲག་གནོན་ཚད་མེད་གཏོང་བཞིན་པ་འཁོད་ཡོད་པ་ལྟར། རྒྱལ་སྤྱིའི་སྤྱི་ཚོགས་ཀྱི་སྐུ་ཚབ་ཅིག་ཡིན་པའི་ཆ་ནས་ཨ་རིའི་ངོས་ནས་རྒྱ་ནག་གཞུང་གིས་ཆོས་དད་རང་དབང་ཐོག་དྲག་གནོན་ཚད་མེད་བྱེད་བཞིན་པར་བློ་འཚབ་ཡོད་པ་མ་ཟད། རྒྱ་ནག་གཞུང་གིས་མི་སྒེར་གྱི་གཞི་རྩའི་འགྲོ་བ་མིའི་ཐོབ་ཐང་ལ་བརྩི་སྲུང་བྱེད་དགོས་པར་ནན་སྐུལ་བྱེད་བཞིན་ཡོད་སྐོར་དང་། རྒྱ་ནག་ངོས་ནས་བོད་མིས་ངོས་འཛིན་བྱས་པའི་༧པཎ་ཆེན་རིན་པོ་ཆེ་སྐུ་ཕྲེང་ ༡༡ པ་དགེ་འདུན་ཆོས་ཀྱི་ཉི་མ་འཕྲལ་དུ་ཀློད་གྲོལ་བྱེད་དགོས་པའམ། ཡང་ན་ཁོང་གི་ད་ལྟའི་གནས་སྟངས་ཇི་ཡིན་ཁ་གསལ་བརྗོད་དགོས་པ་དང་། ཨ་རིའི་ངོས་ནས་བོད་མི་ཚོར་གཞུང་གི་ཐེ་བྱུས་མེད་པར་རང་གི་ཆོས་ལུགས་དབུ་འཁྲིད་འདེམ་རྒྱུའི་ཐོབ་ཐང་དེར་བརྩི་སྲུང་ཞུ་ཡི་ཡོད་པ་དང་། རྒྱལ་སྤྱིའི་སྤྱི་ཚོགས་ངོས་ནས་ཀྱང་བོད་མིར་རྒྱབ་སྐྱོར་བྱེད་དགོས་ཀྱི་ཡོད་སྐོར་དང་། བོད་ཀྱི་ཆོས་ལུགས་དབུ་འཁྲིད་འདེམ་རྒྱུ་དེ་༧གོང་ས་མཆོག་དང་། བོད་བརྒྱུད་ནང་བསྟན་གྱི་དབུ་འཁྲིད་དང་བོད་མི་ཁོ་ནའི་ལག་ཏུ་ཡོད་སྐོར་དང་། རྒྱ་ནག་གཞུང་ངོས་ནས་ད་ལྟའི་བོད་ནང་སྲིད་བྱུས་ལ་འགྱུར་བ་བཏང་སྟེ། བོད་མིའི་ཐུན་མོང་མ་ཡིན་པའི་ཆོས་ལུགས་དང་སྐད་ཡིག རིག་གཞུང་བཅས་པར་གུས་བརྩི་དང་རྒྱུན་འཛིན་བྱེད་དགོས་པའི་ནན་སྐུལ་ཞུ་བཞིན་ཡོད་སྐོར་སོགས་གསུངས་སོང་།

སྐུ་མགྲོན་གཙོ་བོའི་གསུང་བཤད་གྲུབ་མཚམས་བོད་ཀྱི་ཟློས་གར་ཚོགས་པས་གཞན་སྣ་འཁྲབ་སྟོན་གཟིགས་འབུལ་གནང་སོང་བ་དང་། ཉིན་རྒྱབ་ནས་བཟུང་ཉིན་གྲངས་གསུམ་རིང་རྒྱལ་སྤྱིའི་བོད་ཀྱི་ཟློས་གར་སྒྱུ་རྩལ་ཞིབ་འཇུག་བགྲོ་གླིང་ཚོགས་ཆེན་ཚོགས་བཞིན་ཡོད་པ་དང་། སང་ཉིན་ཕྱི་ཚེས་ ༢༩ ཉིན་བོད་ཀྱི་ཟློས་གར་ཚོགས་པ་དབུ་བརྙེསས་ནས་ལོ་ངོ་ཧྲིལ་པོ་ ༦༠ བའི་དུས་དྲན་དང་བསྟུན། ༧གོང་ས་རྒྱལ་བ་རིན་པོ་ཆེ་མཆོག་བོད་ཀྱི་ཟློས་གར་ཁང་དུ་ཆིབས་བསྒྱུར་བསྐྱངས་ཏེ། དེ་གའི་ཚོགས་ཁང་གསར་པའི་གླུ་གར་རིག་རྩལ་ཁང་དབུ་འབྱེད་དང་རབ་གནས་བཅས་གནང་རྒྱུ་ཡིན་འདུག

གསར་འགོད་པ། པ་སངས་ཚེ་རིང་།

བསྐྱར་བཅོས།: ༢༠༡༩/༡༠/༢༩

Leave a Reply

One thought on “རྒྱལ་སྤྱིའི་བོད་ཀྱི་ཟློས་གར་སྒྱུ་རྩལ་ཞིབ་འཇུག་བགྲོ་གླེང་ཚོགས་ཆེན་སྐབས་དང་པོ་བསྡུས།

  1. གཞུང་པ་ཚེ་དབང་བསོད་ནམས

    དུས་བབ་ཚང་ཨ་རིའི་རྒྱལ་སྤྱིའི་ཆོད་དད་རང་དབང་ཟེར་བའི་ཆོད་དད་ཨ་ཡིན་ཆོས་དད་ཡིན་ངེས་ཧཧཧ