དྷ་ས་ས་འཐུས་གསར་པའི་དམ་འབུལ།

གསར་དུ་འདེམས་ཐོན་བྱུང་བའི་དྷ་རམ་ས་ལའི་ས་གནས་འཐུས་མི་ ༡༥ ཡི་ནང་ནས་ངོ་ཡོད་ས་འཐུས་ ༡༤ ཡིས་དམ་བཅའ་ཕུལ་ཏེ་ལས་འཁུར་ཞུས།དེ་རིང་སྔ་དྲོའི་ཆུ་ཚོད་ ༡༠ ཙམ་ཐོག དྷ་ས་ས་གནས་མགོ་འཛིན་ལས་ཁུངས་ཀྱི་ཚོགས་ཁང་དུ། སྐབས་ ༡༠ པའི་དྷ་ས་ས་འཐུས་མི་ ༡༥ འོས་འདེམས་བྱུང་བ་ནས་མི་ ༡༤ ཡིས། བྱང་ཕྱོགས་ས་གནས་ཁྲིམས་ཞིབ་ཁང་གི་ས་གནས་ཁྲིམས་ཞིབ་པ་ལྷ་འབྲུག་ལགས་ཀྱི་མདུན་དུ་དམ་འབུལ་ཞུས་སོང་ལ། དམ་འབུལ་ཐོག་དྷ་སའི་ས་གནས་མགོ་འཛིན་ཀུན་དགའ་ཚེ་རིང་ལགས་གཙོ་བོར་གྱུར་པའི་ཚོགས་སྐྱིད་ཁག་གི་སྐུ་ཚབ་བཅས་ཁྱོན་མི་གྲངས་ ༥༠ མ་ཟིན་ཙམ་འཛོམས་འདུག

ས་འཐུས་གསར་པ་ཡོངས་ཀྱི་དམ་འབུལ་གྲུབ་རྗེས། ངོ་ཡོད་ས་འཐུས་ ༡༤ ཡིས་འོས་བླུགས་པ་བརྒྱུད་ཟླ་བ་ཚེ་རིང་ལགས་སུ་འོས་གྲངས་ ༨ ཐོབ་སྟེ་ས་འཐུས་ཚོགས་གཙོ་དང་། བློ་བཟང་ཚེ་རིང་ལགས་སུ་འོས་གྲངས་ ༡༠ ཐོབ་སྟེ་ཚོགས་གཞོན་ཏུ་འདེམས་ཐོན་བྱུང་བ་གསལ་བསྒྲགས་གནང་རྗེས། སླར་ཡང་ས་གནས་ཁྲིམས་ཞིབ་པ་ལྷ་འབྲུག་ལགས་ཀྱི་མདུན་དུ་ས་འཐུས་ཚོགས་གཙོ་གཞོན་གཉིས་ཀྱིས་དམ་འབུལ་ཞུས་སོང་།

དྷ་སའི་ས་གནས་མགོ་འཛིན་ཀུན་ཚེ་རིང་ལགས་སུ་ས་གནས་འཐུས་མི་ཇི་ཙམ་གལ་ཆེན་ཡིན་སྐོར་དྲིས་པར། ས་གནས་ལ་ཀ་བ་གསུམ་ཡོད་པ་རེད། ས་གནས་འཐུས་ཚོགས་དང་རང་བདེན་ཚོགས་ཆུང་། ས་གནས་མགོ་འཛིན་ལས་ཁུངས་བཅས་ཡིན་པ་རེད། ས་གནས་སུ་ས་གནས་མགོ་འཛིན་ལས་ཁུངས་ཀྱིས་བོད་མིའི་སྒྲིག་འཛུགས་ཀྱི་སྐུ་ཚབ་ལྟ་བུར་ཉིན་རེའི་འཛིན་སྐྱོང་གི་ལས་དོན་ཆ་ཚང་བྱེད་ཀྱི་ཡོད་སྟབས། ས་གནས་མགོ་འཛིན་གྱི་ཁྱབ་ཁུངས་ལས་ཁུངས་ཁག་གི་ལོ་གཅིག་གི་སྔོན་རྩིས་དང་ལས་དོན་བྱེད་ཕྱོགས་ལ་སྟངས་འཛིན་བྱེད་པའི་དབང་ཚད་དེ་ས་གནས་གྲོས་ཚོགས་རང་ལ་ཡོད་པ་དང་། ས་གནས་དེར་ལས་དོན་དག་དག་བྱེད་ཀྱི་ཡོད་མེད་ལ་སྟངས་འཛིན་གནང་མཁན་དེའང་ས་གནས་འཐུས་ཚོགས་ཆགས་ཡོད་པ་རེད། དེ་བས་ས་འཐུས་གལ་ཆེན་པོ་ཆགས་དགོས་པའི་རྒྱུ་མཚན་གཙོ་བོ་དེ་རེད། དེ་ཙམ་མིན་པར་མི་མང་ལ་དཀའ་སྡུག་དང་ཛ་དྲག་གི་གནད་དོན་ག་རེ་ཡོད་ནའང་ས་འཐུས་ལ་ཞུས་ཚེ་ས་འཐུས་གྲོས་ཚོགས་བརྒྱུད་ས་གནས་མགོ་འཛིན་ལ་བཀའ་འདྲི་ཞུས་པ་སོགས་དབུས་ཀྱི་འགྲོ་སྟངས་ལྟར་གཅིག་མཚུངས་ཡིན་པ་རེད།  ཅེས་བརྗོད་བྱུང་།

བོད་མིའི་སྒྲིག་འཛུགས་ཀྱི་བཅའ་ཁྲིམས་དོན་ཚན་དགུ་པ་ལྟར་ན། ས་གནས་འཐུས་མིའི་གྲངས་ཚད་ནི་ས་གནས་ཆེ་ཆུང་ལ་གཞིགས་པའི་ཚོགས་མི་གྲངས་ ༣༥ ལས་མ་བརྒལ་བ་དང་། ས་འཐུས་གྲངས་ ༧ ལས་མི་ཉུང་བ་དགོས་ཀྱི་ཡོད་པ་དང་། ས་འཐུས་ཀྱི་སྐབས་རེའི་དུས་ཡུན་ལོ་ ༣ རེ་ཡིན་པ་རེད།

གསར་འགོད་པ། ཀླུ་མགོན་ཐར།

བསྐྱར་བཅོས།: ༢༠༡༩/༡༡/༢༡

Leave a Reply