བོད་པའི་སློབ་མར་སློབ་ཡོན་འཕར་སྣོན་བྱུང་བའི་དཀའ་ངལ་དབུས་ལ་ཞུས།

ལྡི་ལིའི་ནེ་རུ་གཙུག་ལག་སློབ་གྲྭ་ཆེན་མོས་བོད་པའི་སློབ་མ་ཚོར་ཕྱི་རྒྱལ་གྱི་སློབ་མ་ནང་བཞིན་སློབ་ཡོན་འཕར་སྣོན་བྱུང་སྟེ་དཀའ་ངལ་འཕྲད་བཞིན་པའི་གནད་དོན་དེ། ལྡི་ལིའི་སྐུ་ཚབ་དོན་གཅོད་ལས་ཁུངས་ནས་རྒྱ་གར་དབུས་གཞུང་ལ་ཞུ་གཏུག་གནང་བཞིན་འདུགདེ་རིང་རྒྱ་གར་དཔལ་འབྱོར་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན།  འདི་ལོའི་ཕྱི་ཟླ་ ༧ པ་བཟུང་། རྒྱ་གར་གྱི་རྒྱལ་ས་ལྡི་ལི་རུ་ཡོད་པའི་ཇ་བ་ཧར་ལལ་ནེ་རུ་གཙུག་ལག་སློབ་གྲྭ་ཆེན་མོས། ཕྱི་གླིང་བའི་སློབ་མ་ཚོར་སློབ་ཡོན་འཕར་སྣོན་གྱི་སྲིད་བྱུས་ཤིག་ལག་བསྟར་བྱེད་མགོ་བརྩམས་ཡོད་པ་ལྟར། བཙན་བྱོལ་བོད་མིའི་སློབ་ཕྲུག་ཚོའང་སློབ་ཡོན་འཕར་སྣོན་དེའི་ཁོངས་སུ་བཅུག་སྟེ། སློབ་ཕྲུག་མང་པོ་ཞིག་གིས་སློབ་ཡོན་སྤྲོད་མ་ཐུབ་པའི་དཀའ་ངལ་འོག་སློབ་མཚམས་བཞག་པ་དང་། སློབ་ཞུགས་མ་ཐུབ་པའི་དཀའ་ངལ་ཡོང་ཡོད་སྟབས། ཉེ་སྔོན་ཕྱི་ཟླ་ ༡༡ ཚེས་ ༢༧ ཉིན་ལྡི་ལིའི་སྐུ་ཚབ་དོན་གཅོད་ནས་རྒྱ་གར་དབུས་གཞུང་ལ་སྙན་ཞུ་ཞིག་ཕུལ་ཏེ། བོད་པ་ཚོ་རྒྱ་གར་ནང་སྐྱབས་བཅོལ་བ་ཡིན་པས་བོད་པའི་སློབ་ཕྲུག་ཚོ་ཕྱི་གླིང་བའི་སློབ་ཕྲུག་ནང་བཞིན་སློབ་ཡོན་ལེན་གྱི་ཡོད་པ་ནི་དྲང་པོ་མིན་སྟབས།  རྒྱ་གར་ཕྱི་སྲིད་དང་མི་ཤུགས་གོང་འཕེལ་བློན་ཆེན་ལྷན་ཁང་གཉིས་ནས་མགྱོགས་མྱུར་རྒྱ་གར་ནང་སྲིད་ལྷན་ཁང་གི་བཀོད་ཁྱབ་གཞིར་བཟུང་། ཕྱི་ལོ་ ༢༠༡༤ ལོའི་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ཀྱི་དགོངས་དོན་ལྟར། ཇ་བ་ཧར་ལལ་ནེ་རུ་གཙུག་ལག་སློབ་གྲྭ་ཆེན་མོ་ཚུད་པའི་རྒྱ་གར་གྱི་གཙུག་ལག་སློབ་གཉེར་ཁང་ཁག་ཏུ་བོད་མི་ཚོར་དམིགས་བཀར་གྱི་འགྲོ་ལུགས་འགྲོ་སྟངས་ཤིག་ཡོད་པ་ལག་བསྟར་ཡོང་བའི་རེ་སྐུལ་ཞུས་ཡོད་འདུག

འདི་གའི་གསར་འགོད་པས་ཁ་པར་བརྒྱུད་ལྡི་ལིའི་སྐུ་ཚབ་དོན་གཅོད་བཀའ་ཟུར་འབྲོང་ཆུང་དངོས་གྲུབ་ལགས་སུ་གནད་དོན་འདིའི་སྐོར་ལ་བཀའ་འདྲི་ཞུས་སྐབས། ཇ་བ་ཧར་ལལ་ནེ་རུ་གཙུག་ལག་སློབ་གྲྭ་ཆེན་མོའི་ནང་ཡོད་པའི་བོད་པའི་སློབ་ཕྲུག་ཚོས་ཕྱི་རྒྱལ་བའི་སློབ་མ་ནང་བཞིན་སློབ་ཡོན་སྤྲོད་དགོས་ལབ་པ་རེད། དེར་བརྟེན། ང་ཚོས་ཞུ་གཏུག་བྱེད་བཞིན་ཡོད། ད་ལྟའི་ཆར་གནས་ཚུལ་འདིའི་སྐོར་ལ་གྲུབ་འབྲས་ག་རེ་འཐོན་གྱི་ཡོད་མེད་སོགས་ཤེས་ཀྱི་མེད་པ་དང་གྲུབ་འབྲས་ཆ་ཚང་ཞིག་ཐོན་མེད་པས། དམིགས་བསལ་གང་ཡང་ཞུ་རྒྱུ་མེད། ཅེས་གསུངས་བྱུང་།

སློབ་ཡོན་འཕར་སྣོན་བྱས་རྐྱེན་འདི་ལོར་སློབ་ཕྲུག་ཉུང་ཉུང་ཞིག་ལས་སློབ་ཆེན་དེར་འཛུལ་ཞུགས་ཐུབ་མེད་སྐོར་སྐུ་ངོ་དོན་གཅོད་ལགས་ཀྱིས། སྤྱིར་བཏང་ཇ་བ་ཧར་ལལ་ནེ་རུ་གཙུག་ལག་སློབ་གྲྭ་ཆེན་མོའི་ནང་བོད་པའི་སློབ་ཕྲུག་མང་པོ་ཡོད་པ་རེད། འདི་ལོར་བོད་པའི་སློབ་མ་སློབ་འཇུག་ཐོབ་མཁན་ཁྱོན་མི་གྲངས་ ༤༠ ཙམ་ཡོད་ཀྱང་། སློབ་ཡོན་འཕར་སྣོན་བྱས་པའི་རྐྱེན་གྱིས་བོད་པའི་སློབ་མ་ཁྱོན་ ༡༠ ཙམ་ལས་འཛུལ་ཞུགས་བྱེད་ཐུབ་མེད་པ་རེད། ཅེས་གསུངས་བྱུང་།

ད་ལྟའི་ཆར་སློབ་ཡོན་གྱི་དཀའ་ངལ་འོག་སློབ་ཆེན་དེར་འགྲིམས་མ་ཐུབ་པར་དྷ་ས་དང་ལྡི་ལི་སོགས་སུ་ལས་ཀ་བྱས་ཏེ་བསྡད་ཡོད་མཁན་ཁག་ཅིག་འདུག་ལ། སློབ་ཡོན་འཕར་སྣོན་བྱུང་རྐྱེན་སློབ་མཚམས་འཇོག་དགོས་བྱུང་བའི་དཀའ་ངལ་འདི་ད་ལྟའི་ཆར་རྒྱ་གར་གྱི་སློབ་ཆེན་གཞན་ནང་བྱུང་ཡོད་པའི་གནས་ཚུལ་གོ་ཐོས་མི་འདུག

འདི་ལོའི་ཕྱི་ཟླ་ ༧ པའི་ནང་ཇ་བ་ཧར་ལལ་ནེ་རུ་གཙུག་ལག་སློབ་གྲྭ་ཆེན་མོས་ཕྱི་རྒྱལ་གྱི་སློབ་མ་ཚོར་སློབ་ཡོན་འཕར་སྣོན་གྱི་སྲིད་ཇུས་ཤིག་བཟོས་ཏེ། དེ་སྔོན་ཕྱི་གླིང་བའི་སློབ་ཕྲུག་ཅིག་གིས་སྤྱི་ཚོགས་ཚན་རིག་དང་ཚན་རིག་སོགས་ཀྱི་སློབ་ཚན་ལ་ལོ་རེར་ཨ་སྒོར་ ༡༠༠ ཡིན་ཡང་། སློབ་ཡོན་འཕར་སྣོན་བྱས་རྗེས་སྤྱི་ཚོགས་ཚན་རིག་ལ་སློབ་མ་རེ་ཡིས་ལོ་རེར་སློབ་ཡོན་ཁྱོན་ཨ་སྒོར་ ༡༢༠༠ དང་ཚན་རིག་ལ་ཨ་སྒོར་ ༡༧༠༠ བཅས་སྤྲོད་དགོས་པ་ཆགས་ཡོད་འདུག

སྤྱིར་བཏང་རྒྱ་གར་ནང་གི་བོད་རིགས་སློབ་མ་ཚོར་ཤེས་ཡོན་གནས་ཚད་དང་སློབ་ཡོན་གྱི་ཐོག་ནས་རྒྱ་གར་གྱི་མི་སེར་ཡིན་པའི་སློབ་ཕྲུག་ཚོ་དང་འདྲ་མཉམ་མ་ཡོང་བའི་དཀའ་ངལ་ཞིག་ཡོང་བཞིན་ཡོད་ཀྱང་། འབྲེལ་ཡོད་ལ་དཀའ་སྡུག་ཡར་ཞུ་བྱས་ཏེ་སེལ་ཐུབ་པ་ཡོང་གི་ཡོད་པ་རེད། འདི་ལོའི་ཕྱི་ཟླ་ ༣ ཚེས་ ༢༩ ཉིན་རྒྱ་གར་གྱི་བྷ་ན་རཱ་སི་ཧིན་རྡུ་མཐོ་སློབ་(Banaras Hindu University)གྱིས་ཡོངས་ཁྱབ་གསལ་བསྒྲགས་ཤིག་སྤེལ་ཏེ། མཐོ་སློབ་དེར་ཞུགས་མཁན་བོད་རིགས་སློབ་མ་ཚོ་སྐྱབས་བཅོལ་བའི་གནས་བབ་འོག་སློབ་ཡོན་ཆག་ཡང་བཏང་སྟེ་རྒྱ་གར་གྱི་སློབ་མ་དང་གཅིག་མཚུངས་ལྟར་སྤྲོད་ཆོག་པ་མ་ཟད། རྒྱ་གར་གྱི་ཡུལ་མི་ལྟར་རྒྱུགས་འབྲས་རྩེ་བཏོག་གི་འགྲན་སྡུར་ནང་དུའང་ཞུགས་མི་དགོས་པའི་དམིགས་བསལ་གྱི་སློབ་འཇུག་གི་སྒྲིག་གཞི་གསར་པ་ཞིག་གཏན་འབེབ་གནང་ཡོད་ལ། ཐག་གཅོད་དེ་ནི་བྷ་ན་རཱ་སི་བོད་རིགས་སློབ་མའི་མཐུན་ཚོགས་ནས་ཞུ་སྐུལ་མང་པོ་བྱས་རྗེས་བྱུང་བ་ཞིག་ཡིན་འདུག

གསར་འགོད་པ། སྐལ་བཟང་སྦྱིན་པ།

བསྐྱར་བཅོས།: ༢༠༡༩/༡༢/༠༣

Leave a Reply