ཧ་རི་ཡ་ནའི་བྷ་ར་ཌུར་གྷར་ནང་ཡོད་པའི་བོད་མི་སུད་ཚོང་པའི་ཁྲོམ་རར་ཡུལ་མི་ཚོང་པ་ཚོས་གཏོར་བཤིག་བཏང་ཡོད་པར་བརྟེན་ཉེན་རྟོག་པས་ཁྲོམ་ར་གཏོར་མཁན་ཁག་ཅིག་འཛིན་བཟུང་བྱས་ཏེ་འདྲི་རྩད་བྱེད་བཞིན་ཡོད་འདུག
ཁ་སང་ཕྱི་ཚེས་ ༡༨ ཉིན། རྒྱ་གར་གྱི་མངའ་སྡེ་ཧ་རི་ཡ་ནའི་བྷ་ཧ་ཌུར་གྷར་(Bahadurgarh)གྲོང་ཁྱེར་གྱི་ཡུལ་མི་ཚོང་པ་མང་པོ་ཞིག་མཉམ་རུབ་ཀྱིས། བོད་མི་སུད་ཚོང་པ་ཚོས་ས་གནས་དེར་དགུན་དུས་ཀྱི་ཁྲོམ་ར་རྒྱག་བཞིན་པར་གཏོར་བཤིག་བཏང་ཡོད་སྟབས། ས་གནས་ཉེན་རྟོག་པས་ཁྲོམ་རར་གཏོར་བཤིག་གཏོང་མཁན་ཁག་ཅིག་འཛིན་བཟུང་བྱས་ཡོད་པ་དང་། རྒྱ་གར་གྱི་བརྒྱུད་ལམ་ཁག་ཅིག་ཏུ་གནས་ཚུལ་ཐོན་པ་ལྟར་ན། ཡུལ་མི་ཚོང་པ་དེ་ཚོས་བོད་མིའི་ཁྲོམ་རར་གཏོར་བཤིག་བཏང་ཡོད་པ་མ་ཟད། སྐྱེས་པ་ཞིག་ལ་རུབ་འཛིང་བྱས་པ་དང་བར་ཕྱེ་མཁན་བུད་མེད་དང་བྱིས་པ་ལའང་གཅར་བརྡུང་བཏང་ཡོད་སྐོར་བརྗོད་འདུག
རྒྱ་གར་གྱི་(Tribune India)དྲ་རྒྱའི་ཐོག་གནས་ཚུལ་སྤེལ་བ་ལྟར་ན། བོད་མིའི་ཁྲོམ་ས་དེར་ས་གནས་རྫོང་ཚོང་རའི་ལྷན་ཚོགས་ནས་ཆོག་མཆན་ཐོབ་ཡོད་ཀྱང་། ཡུལ་མི་ཚོང་པ་ཚོས་དང་པོར་བོད་མིའི་ཁྲོམ་སའི་འགྲམ་དུ་ངོ་རྒོལ་བྱས་ཡོད་པ་དང་། དེ་ནས་གནས་སྐབས་རིང་བཟོས་པའི་བོད་མིའི་ཁྲོམ་རར་གཏོར་བཤིག་བཏང་ཡོད་པར་བརྟེན། ས་གནས་ཉེན་རྟོག་པས་ངོ་རྒོལ་བ་ཁག་ཅིག་འཛིན་བཟུང་བྱས་ཡོད་པ་དང་། ས་གནས་ཉེན་རྟོག་ཁང་གི་དཔོན་པོ་(Vishnu Prasad)ལགས་ཀྱིས་གསར་འགོད་པར། གནད་དོན་དེ་མི་མང་མཉམ་རུབ་ཀྱིས་ཟིང་འཁྲུག་བསླངས་བ་དང་། མི་ལ་གནོད་འཚེ་དང་གཞན་གྱི་ཅ་དངོས་ལ་གནོད་སྐྱོན་བཏང་བའི་ཉེས་མིང་འོག་འདྲི་རྩད་ཞིབ་བཤེར་བྱེད་བཞིན་ཡོད་སྐོར་བརྗོད་འདུག
འདི་གའི་གསར་འགོད་པས་ཁ་པར་བརྒྱུད་བོད་མིའི་སུད་ཚོང་ཚོགས་པའི་འགན་འཛིན་ཀརྨ་དགེ་ལེགས་ལགས་སུ་གནས་ཚུལ་དེའི་སྐོར་སྐད་ཆ་དྲིས་པར། ས་གནས་ཀྱི་རྒྱ་གར་ཚོང་པ་ཉི་ཤུ་སུམ་ཅུ་ཞིག་ས་གནས་བོད་མིའི་ཁྲོམ་སར་ཡོང་སྟེ་ལྕགས་ཤོག་ཁང་པ་ཚང་མར་གཏོར་བཤིག་བཏང་ཡོད་ཀྱང་། ཕན་ཚུན་ལ་ཕུད་རྒྱག་གཏོང་རེས་བྱས་པ་ཙམ་ལས་ལག་པ་བཀྱགས་མེད་སྐོར་དང་། ཁྲོམ་སར་གཏོར་བཤིག་བཏང་རྗེས་ས་གནས་སྐོར་སྲུང་བར་གནས་ཚུལ་ཡར་ཞུ་བྱས་ཏེ་རྒྱ་གར་བ་བཅོ་ལྔ་ཉི་ཤུ་ཞིག་འཇུས་ཡོད་པ་དང་། ད་ལྟའི་ཆར་མི་ག་ཚོད་ཅིག་བཀག་ཉར་འོག་ཡོད་མེད་གསལ་པོ་ཤེས་མེད་པ་དང་། ས་གནས་རྒྱ་གར་གཞུང་གིས་བོད་མི་ཚོས་ས་ཆ་དེར་ཁྲོམ་བསྟན་ཆོག་པའི་ཆོག་མཆན་ཡོད་ཀྱང་ཡུལ་མི་ཚོང་པ་ཚོས་དགའ་མི་དགའ་བྱས་ཏེ་གཏོར་ཡོད་པ་དང་། ཕྱིས་སུ་བོད་མི་སུད་ཚོང་བ་ཚོས་ས་དེར་མུ་མཐུད་ཁྲོམ་ར་བཟོས་ཏེ་ཚོང་རྒྱག་ཆོག་སྐོར་ལབ་ཡོད་པ་བརྗོད་བྱུང་།
ཡང་ཁོང་གིས། ད་ལྟའི་བར་ས་གནས་ཀྱི་བོད་མི་སུད་ཚོང་པ་ཚོས་སུད་ཚོང་ཚོགས་པར་སྙན་ཞུ་གང་ཡང་འབྱོར་མེད་ཀྱང་། ཧ་རི་ཡ་ན་ལྡི་ལི་ས་གནས་མགོ་འཛིན་གྱི་ཁྱབ་ཁོངས་སུ་གཏོགས་ཀྱི་ཡོད་པ་དང་། ལྡི་ལི་དོན་གཅོད་ཀྱང་ཡོད་པས་དེར་སྙན་ཞུ་རྒྱག་དགོས་ཀྱི་ཡོད་ལ། གལ་སྲིད་ཚོགས་པའི་ངོས་ནས་རྒྱབ་གཉེར་དེ་འདྲ་དགོས་ཚེ་སྤྲོད་འཆར་ཡོད་སྐོར་བརྗོད་བྱུང་།
དགུན་དུས་སླེབ་གྲབས་ཡོད་པ་དང་བསྟུན། བོད་མི་ཚོ་རྒྱ་གར་གྱི་ས་གནས་མང་པོ་རུ་སུད་ཚོང་རྒྱག་ཏུ་འགྲོ་བཞིན་ཡོད་པས་ས་ཆ་གཞན་དུ་དཀའ་ངལ་འདི་རིགས་བྱུང་གི་ཡོད་མེད་དྲིས་པར་ཁོང་གིས། བོད་མི་སུད་ཚོང་བ་ཚོས་རྒྱ་གར་རྒྱལ་ཡོངས་ཀྱི་ས་ཆ་གང་སར་ཚོང་རྒྱག་གི་ཡོད་པ་དང་། སུད་ཚོང་ཚོགས་པའི་ནང་ད་ལྟའི་ཆར་ས་གནས་ཁག་ ༡༦༠ ལྷག་དང་། ཁྱིམ་ཚང་ ༤༠༠༠ བརྒལ་བ་ཡོད་ལ། སྤྱིར་བཏང་བོད་མི་སུད་ཚོང་བ་ཚོར་དཀའ་ངལ་མང་པོ་ཞིག་འཕྲད་ཀྱི་ཡོད་པ་དང་། དམིགས་བསལ་གྱིས་རྒྱ་གར་བྱང་ཕྱོགས་ཀྱི་ཧི་མ་ལ་ཡའི་རི་རྒྱུད་པ་དང་བལ་པོའི་ཚོང་པ་ཚོ་བོད་མིའི་ཚོང་སར་ཡོང་སྟེ་ནམ་རྒྱུན་དཀའ་ངལ་འཕྲད་ཀྱི་ཡོད་སྟབས། དཀའ་ངལ་དེ་དག་སེལ་ཆེད་ཕྱི་ལོ་ ༢༠༡༧ ཟླ་ ༤ པའི་ནང་ལུ་ཌི་ཡ་ན་(Ludhiana)རུ་རྒྱ་གར་རྒྱལ་ཡོངས་ཀྱི་སུད་ཚོང་བའི་དམིགས་བསལ་ཚོགས་ཆེན་ཞིག་ཚོགས་གཏན་འཁེལ་ཡོད་སྐོར་བརྗོད་བྱུང་།
གསར་འགོད་པ། པདྨ་མཚོ།
འཕྲལ་ཕུགས་༢ཀྱི་དཀའ་ངལ་བསལ་ཐབས་དོན་ གྲོས་བསྟུན་ཞིབ་རྒྱག་གིས་ ཐག་གཅད་དགོས་པ་གལ་ཆེར་མཐོང་།
རྒྱ་གར་འདི་བ་ཚང་གི་ནེའུ་རོ་རྗེ་ནས་བཟུང་མགོ་ཁྲིད་རིམ་པ་ཡིད་ཆེས་གང་ཡང་མེད།
བོད་མི་ཚོ་སུད་ཚོང་བར་སེམས་གསོ་ཡོད།
ཧེ་རི་ཡ་ན་མངའ་སྡེ་འདི་ནང་གི་མི་རིགས་རྗ་ཌི་ཟེར་བ་འདི་བྱ་སྤྱོད་ངན་པ་ཡོད་པ་རེད། ལྡི་ལི་མཐོ་སློབ་སྐབས་རྗ་ཌི་དང་སྤེ་ཧ་རི་གཉིས་འཁྲུག་འཛིང་ཤོར བས་ཧིན་རྡི་མཐོ་སློབ།རམ་ཇ་སི་མཐོ་སློབ། ཧང་སི་ར་ཇི་མཐོ་སློབ་བཅས་ཉིན་འགའ་སྒོ་རྒྱག་དགོས་བྱུང་ཡོད།
གནས་ཚུལ་འདི་འདྲ་ཐང་མང་བྱུང་བ་ཞིག་རེད་ཡིན་ན་ཡང་བོད་མི་ཚོས་འཐབ་འཛང་མ་བྱས་པ་འདི་ཧ་ཀྱང་གི་ཡག་པོ་རེད། གང་ལྟར་རྒྱལ་ཁབ་མེད་ན་འདི་འདྲ་འབྱུང་སྲིད་པ་ཞིག་རེད། བོད་མི་ཚོས་རང་དབང་ལུང་པ་ནས་རང་ཁ་གསོ་ཐབས་བྱུང་ན་འགྲིག་འདུག་བསམ་ན་ད་བར་ད་དུང་༸གོང་ས་མཆོག་བཞུགས་ཡོད་ཙང་སྐྱོན་ཡོད་པ་མ་རེད་སུད་འཚོང་བ་རྣམས་ཀྱི་འདུག་གནས་དང་ཁྲོམས་ར་གཏོར་བ་ཀུན་སབ་ཐོབ་ངེས་རེད། མ་འོངས་པར་༸གོང་ས་མཆོག་མ་བཞུགས་པས་ཉི་མ་ཞིག་ཤར་ན་དེ་ཚར་རེད། དེ་ཐུགས་ལ་བཟུང་ནས་ལས་ཀ་བྱེད་དགོས་པ་དང་འབད་བརྩོན་གནང་དགོས་པ་ངེས་པར་བརྗེད་མི་རུང་བས་བྱ་བ་གལ་ཆེན་ཞིག་རེད་དྲན་ནས་ཡོད། ད་བར་འུ་ཅག་རྒྱ་གར་ལུང་པ་ནས་སྡོད་ཁང་ཡག་པོ་རེད་རྒྱབ་ཐུབ་པ་དང་ཚོང་ཁང་དང་ཟ་ཁང་ཙམ་རེད་ཡོད་དུས་ཡིད་ཚིམ་ནས་འདུག་ཁ་བྱས་ནས་རྗེས་མ་དཀའ་ངར་འབྱུང་བ་གསལ་བོ་རེད། བོད་མི་ཚང་མ་སྐྱབས་བཅོལ་བ་ཡིན་པ་མ་བརྗེད་པའི་ཐོག་འབད་བརྩོན་བྱས་ནས་བོད་ལ་ལོག་ཐུབ་གནང་དགོས་པ་གལ་ཆེན་རེད།
གནས་ཚུལ་འདི་དང་འདི་འདྲ་བ་མང་པོ་ཡོད་པ་དེ་ཚོ་དུས་ཐོག་ཏུ་ནད་ལ་སྨན་དང་ལྟོག་པར་ཟས་ཟེར་བ་ལྟར་དཀའ་སྙོགས་གསེལ་དགོས་པའི་འགན་བོད་མིའི་བལ་ཚོང་སྒྲིགས་འཛུགས་དང་དབུས་བོད་མིའི་སྒྲིག་འཛུགས་བཀའ་སྤྱི་གཉིས་ཧིན་བོད་མཛའ་འབྲེལ་ཚོགས་ལྡི་ལི་དོན་གཅོད་སོགས་ནས་གནས་ཚུལ་ཞི་འཇམ་དུ་བཏང་ནས་མ་འོངས་བོད་མི་བལ་ཚོང་ཚོར་དཀའ་ངལ་དེ་རིགས་མི་འབྱུང་ཆེད་འབྲེལ་ཡོད་རྒྱ་གར་གྱི་དབུས་ས་གཉིས་ཀྱི་མཐོ་རིམ་མི་སྣའི་མཉམ་བཀའ་བསྡུར་གནང་དགོས་པ་གལ་ཆེའི་ནང་གི་གལ་ཆེན་ཞིག་མ་རེད་དམ་།
བླ་མ་མཁྱེན་ནོ། རང་དབང་མེད་ན་གནས་སྟངས་འདི་འདྲ་རེད། ཁོང་རྣམ་པར་གདུངས་སེམས་མཉམ་བསྐྱེད་ཡོད།
སྐྱབས་མགོན་རིན་པོ་ཆེས་དབུས་ང་ཚོའི་ད་བར་རྒྱ་གར་རང་དབང་ལུང་པ་ཞེས་ཁ་གྲགས་རྐུབ་གྲགས་བྱས་པ་དེའི་འབྲས་བུ་འདི་ཟོ་ཨ།