གྲོས་ཚོགས་ཚད་མཐོ་རུ་གཏོང་རོགས།

སྐབས་བཅུ་བཞི་པའི་བོད་མི་མང་སྤྱི་འཐུས་གྲོས་ཚོགས་ཀྱི་ཚོགས་འདུ་དུས་ལྔ་བ་ཚོགས་ཏེ་བོད་གཞུང་གི་དཔལ་འབྱོར་སྔོན་རྩིས་དང༌། ཆབ་སྲིད་བགྲོ་གླེང་མགོ་འཛུགས་བྱས་ཡོད་ལ། ༧གོང་ས་མཆོག་གིས་གསུང་འཕྲིན་བསྩལ་བ་དང༌། གྲོས་ཚོགས་གྲོལ་རྗེས་སྤྱི་འཐུས་ནང་ཁུལ་ཉིན་༥རིང་བོད་ཕྱི་ནང་གི་ཆབ་སྲིད་ཐད་བགྲོ་གླེང་གནང་རྒྱུ་ཡིན་འདུག
         ཟླ་འདིའི་ཚེས་༤ཉིན་ནས་༡༥བར་དུ་སྐབས་བཅུ་བཞི་བའི་བོད་མི་མང་སྤྱི་འཐུས་གྲོས་ཚོགས་ཚོགས་དུས་ལྔ་བ་འཚོགས་ཡོད་པ་དང༌།ཕྱི་ཚེས་༨ཉིན་༧གོང་ས་མཆོག་གིས་གྲོས་ཚོགས་ལ་ཆེད་དུ་གསུང་འཕྲིན་གནང་བའི་ནང༌། མང་གཙོ་སྔར་ལས་ལྷག་པའི་དོན་སྙིང་ལྡན་པ་ཡོང་ཆེད་གྲོས་ཚོགས་ཀྱི་འཐུས་མི་དང་ལས་རིམ། ལམ་སྲོལ་བཅས་ཀྱི་གནས་ཚད་གོང་མཐོར་གཏོང་ཐབས་ལ་སྒོ་ཀུན་ནས་འབད་གལ་ཆེ་བ་དང༌། གཞིས་ཕྱེས་བོད་མིའི་འཕྲད་ཕུགས་ཀྱི་བདེ་རྩར་སྨན་ངེས་ཀྱི་ལས་གཞི་ཁག་ལ་འོས་འཚམས་ཀྱི་སྟངས་འཛིན་གཏན་འབེབས་བྱ་ཕྱོགས་ལ་བློ་གྲོས་བཏོན་ཏེ། གྲོས་ཚོགས་དོན་ལྡན་ཡོང་དགོས། དེ་བཞིན་མང་གཙོའི་ཀ་བ་གསུམ་གྱི་སྡེ་ཚན་སོ་སོས་རང་རང་གི་འགན་དབང་ངོས་འཛིན་འཕྱུག་མེད་དང་འབྲེལ་རྣམ་དཔྱོད་ཀྱི་ནུས་པ་ཡོད་རྒུ་རྩལ་སྤྲུགས་བྱེད་དགོས་ཞེས་བཀའ་ནན་གནང་ཡོད་འདུག།
         བོད་མི་མང་སྤྱི་འཐུས་ཚོགས་གཙོ་ཀརྨ་ཆོས་འཕེལ་མཆོག་གིས་གྲོས་ཚོགས་ཚོགས་དུས་ལྔ་བའི་དབུ་འཛུགས་གསུང་བཤད་གནང་པར། སྐབས་༡༡ནས་ད་ལྟའི་བར་བྱུང་མ་མྱོང་བ་ཞིག་ལ་ཐེངས་འདིའི་གྲོས་ཚོགས་དེ་གསུམ་བཅུའི་དུས་དྲན་སྲུང་གཙིའི་སྐབས་སྤྱི་འཐུས་རྣམ་པ་བཞུགས་སྒར་དུ་ཡོད་པཞིག་ཆེད་མངགས་བཟོས་ཡོད། ད་ལོའི་གསུམ་བཅུའི་དུས་དྲན་སྐབས་སྤྱི་འཐུས་ཚང་མ་ཆབ་སྲིད་གྱིས་དུས་དྲན་གལ་ཆེན་དེར་མཉམ་ཞུགས་གནང་རྒྱུ་དང༌། དེའི་ཐོག་ནས་བོད་སྤྱི་བའི་གནས་ཚུལ་ཛ་དྲག་ཏུ་འགྲོ་བཞིན་ཡོད་པའི་ཐོག་ལ་ཚང་མས་ཐུགས་ཁུར་ཆེར་བཞེས་དང༌། ༧གོང་ས་མཆོག་གི་གསུང་འཕྲིན་ལ་གསན་རྗེས་ལས་འགུལ་གང་འདྲ་ཞིག་བརྩམས་དགོས་ན་དངོས་སུ་རང་ཉིད་མཉམ་ཞུགས་ཡོང་བའི་རེ་བ་ཞུ་བཞིན་ཡོད། བོད་ཀྱི་གནས་སྟངས་ཛ་དྲག་དུ་འགྲོ་བཞིན་ཡོད་པ་གང་ནས་ཤེས་ཟེར་ན། གཞིས་ལུས་སྤུན་ཟླ་ཚོས་དགོངས་པ་བཞེས་སྟངས་དང་ཕྱག་ལས་གནང་སྟངས་ཀྱི་ཐོག་ནས་ཤེས་ཐུབ། རྒྱ་ནག་གིས་བོད་མིའི་སེམས་ལ་གནོད་པ་ཚད་མེད་བྱེད་ཀྱིན་ཡོད་སྟབས་བོད་ནང་ཟིང་འཁྲུག་ལངས་པ་དང༌། བཙན་བྱོལ་ནང་དུ་ཡང་བསམ་བློ་གཞན་ཞིག་གཏོང་རྒྱུ་ལས་རེ་བ་མེད་པའི་བསམ་ཚུལཡོང་གིན་ཡོད། ང་ཚོའི་གཞུང་འབྲེལ་མིན་པའི་ཚོགས་པ་ལྔས་གོམ་བགྲོད་གྱི་ལས་འགུལ་ཞིག་སྤེལ་འཆར་ཡོད། སྤྱིར་དེ་ཚོ་གཞུང་འབྲེལ་མིན་པའི་ཚོགས་པས་བརྩམས་པའི་ལས་འགུལ་ཞིག་ཡིན་ཡང༌། ང་ཚོ་ཚོར་བ་མེད་པར་འདུག་ཐབས་ཡོད་པ་མ་རེད། གནས་སྟངས་ལ་གཞིགས་ཏེ་གང་ཞིག་དགོས་བྱེད་དགོངས་པ་བཞེས་དགོས་པ་ཆགས་སྲིད་བཅས་གསུངས་བྱུང༌།
         རྩིས་ལོ་༢༠༠༨ནས་༢༠༠༩སྔོན་རྩིས་ཐད་འདི་གའི་གསར་འགོད་པས་སྤྱི་འཐུས་རྒྱུན་ལས་ཚོད་དཔག་འཆར་རྩིས་ཚོགས་ཆུང་གི་ཚོགས་གཙོ་སྤྱི་འཐུས་ཚུལ་ཁྲིམས་བསྟན་འཛིན་ལགས་སུ་བཅར་འདྲི་ཞུས་པར་ཁོང་གིས། ད་ལོ་དཔེ་མི་སྲིད་པའི་ཡག་པོ་རེད། ལོ་ལྟར་སྔོན་རྩིས་ཕྲན་བུ་ལྷག་འདུག་པ་བྱུང་ཡོད་པ་རེད་དེ། དེ་ཚོ་ཡང་རྒྱུན་གྲོན་དང་དམིགས་བསལ་གྱི་རྩིས་མགོ་གསལ་ལ་མི་གསལ་བ་ཕྲན་བུ་བྱུང་བ་ལས་གནད་འགག་གང་ཡང་མི་འདུག་ཅེས་བརྗོད་བྱུང་ལ། ཡང་སྤྱི་འཐུས་བསྟན་འཛིན་ཆོས་ལྡན་ལགས་སུ་བཅར་འདྲི་ཞུས་པར་ཁོང་གིས། ངའི་ཚོར་སྣང་ལ་ད་བར་བྱུང་མ་མྱོང་བའི་ཡག་ཤོས་དེ་རེད་འདུག རྒྱུན་གྲོན་དང་དམིགས་བསལ་གཉིས་ཀའི་ཐད་འཕར་སོང་དང་འཕར་ཆུང་ཡོད་པ་མ་རེད། རྒྱལ་ཁབ་ཚང་མའི་གྲོས་ཚོགས་ཀྱི་དམིགས་ཡུལ་དེ་རེད། བཀའ་ཤག་ནས་དགོངས་པ་རྒྱ་ཆེན་པོ་བཞེས་ཏེ་འདི་འདྲའི་སྔོན་རྩིས་ཤིག་ཕུལ་བར་བསྔགས་བརྗོད་ཞུ་བཞིན་ཡོད་ཅེས་བརྗོད་བྱུང༌།