དཔེ་དེབ་འདིའི་ནང་དོན་གཙོ་བོ་ནི། འདི་ག་བོད་ཀྱི་དུས་བབ་གསར་ཁང་ནས། བོད་ཀྱི་ད་ལྟའི་ཛ་དྲག་གི་གནས་བབ་དང་ང་ཚོའི་ལས་འགན། ཞེས་པའི་བརྗོད་གཞིའི་ཐོག་གསུང་བཤད་གནང་རྒྱུའི་རེ་འདུན་ཞུས་ངོར། ༡༩༩༧ ལོའི་ཟླ་ ༦ ཚེས་ ༢༣ ཉིན་མཁས་དབང་ཟམ་གདོང་རིན་པོ་ཆེ་མཆོག་གིས་བོད་གཞུང་སྨན་རྩིས་ཁང་གི་ཚོགས་ཁང་ནས། ད་ལྟའི་བོད་ཀྱི་ཆབ་སྲིད་གནས་སྟངས་ཛ་དྲག་ཆགས་ཡོད་པ་དང་། དུས་ཚོད་ཀྱི་ཆ་ནས་ཛ་དྲག་ཆགས་ཡོད་པ། སྤྱི་ཚོགས་ཀྱི་ཆ་ནས་ཛ་དྲག་ཆགས་ཡོད་པ། བཟང་སྤྱོད་ཀྱི་ཆ་ནས་ཛ་དྲག་ཆགས་ཡོད་པ། དཔལ་འབྱོར་གྱི་ཆ་ནས་ཛ་དྲག་ཆགས་ཡོད་པ་སོགས། བོད་པའི་སྲིད་འབྱོར་རིགས་གསུམ་གྱི་ཛ་དྲག་གནས་བབ་རིགས་མ་འདྲེས་པར་ཁ་གསལ་ཞིང་། གོ་བདེ་བའི་ཐོག་ནས་གསུང་ཡོད་ལ། དེ་བཞིན། བོད་གཞུང་གཞུང་ཞབས་འདེམས་བསྐོ་ལྷན་ཁང་གི་གོ་སྒྲིག་འོག ༧གོང་ས་སྐྱབས་མགོན་ཆེན་པོ་མཆོག་གི་དབུ་ཁྲིད་འོག བཙན་བྱོལ་བོད་གཞུང་གི་གྲུབ་འབྲས་སྤྱི་དང་། བྱེ་བྲག་དེང་སྐབས་རྒྱལ་སྤྱིའི་ཐོག་གི་བོད་དོན་གནས་སྟངས། ཞེས་པའི་བརྗོད་གཞིའི་ཐོག་ཁོང་གིས། བཙན་བྱོལ་བོད་གཞུང་ཇི་ལྟར་ཆགས་ཚུལ་དང་། ཆོས་དང་རིག་གཞུང་འཛིན་སྐྱོང་བྱས་པ། ཆབ་སྲིད་དམངས་གཙོའི་རིང་ལུགས་ལ་བསྐྱུར་ཚུལ། བོད་ཀྱི་བདེན་མཐའ་གསལ་ཐབས་ཀྱི་ཕྱག་ལས། རྒྱལ་སྤྱིའི་ཐོག་གི་བོད་དོན་གནས་སྟངས་བཅས་ཀྱི་ཐད་ཟབ་ཅིང་རྒྱས་པའི་གསུང་བཤད་གནང་ཡོད།
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།