དེབ་འདིའི་ནང་དོན་གཙོ་བོ་ནི། བོད་མི་སྲིད་དོན་པ་དང་གསར་བརྗེ་བ་གྲགས་ཆེན། འབའ་པ་ཕུན་ཚོགས་དབང་རྒྱལ་གྱི་མི་ཚེའི་ལོ་རྒྱུས་དང་འབྲེལ་ཏེ། སྐབས་དེའི་བོད་རྒྱའི་ཆབ་སྲིད་འཕོ་འགྱུར་དང་། སྤྱི་ཚོགས་གནས་བབ། བོད་སྡེ་བ་གཞུང་གི་སྒྲིག་འཛུགས་དང་ལམ་ལུགས་སོགས་བརྗོད་སྙིང་དུ་བཟུང་སྟེ། མ་རྩ་རིང་ལུགས་ཀྱི་སྲིད་གཞུང་དུ་གྲགས་པའི་གོ་མིན་ཏང་དང་། གོང་ཁྲན་ཏང་དམར་ཤོགས་ཚོགས་པ་གཉིས་བར་ཁྱོད་ཤི་ང་གསོན་གྱི་འགལ་འདུའི་འཐབ་རྩོད་རྒྱས་འབྲི་བྱས་ཡོད་ལ། རྒྱལ་སྤྱིའི་སྟེང་གི་དམར་ཤོག་དང་དམངས་གཙོ་གཉིས་བར་གྱི་རྒྱལ་ཕམ་འཐབ་རྩོད་སོགས་ལའང་ཟུར་བལྟའི་ཚུལ་དུ་བཀོད་ཡོད།
འབའ་པ་ཕུན་ཚོགས་དབང་རྒྱལ་གྱི་རླབས་ཆེན་གསར་བརྗེ་བསམ་བློ་དེར་གྲུབ་ཆ་གལ་ཆེན་གཉིས་ཡོད། དང་པོ། ཁོང་བྱིས་པའི་དུས་ནས་སེམས་པའི་གཏིང་སར་ཉལ་ཡོད་པའི་དུས་རབས་ཉི་ཤུའི་དུས་མགོར་ཁམས་དང་ཨ་མདོའི་ས་ཁུལ་ཏུ་གོ་མིན་ཏང་གི་ལོག་སྤྱོད་དམག་མིས་འཕྲོག་བཅོམ་བསྲེགས་རྡུང་ཚབ་ཆེན་བྱས་ཏེ། མི་སེར་ལ་གཉའ་གནོན་དང་བརྙས་བཅོས་ཚད་མེད་བྱས་པའི་ཕ་མེས་ཚོའི་ངག་རྒྱུན་གྱིས་བསླངས་པའི་ཞེ་འཁོན་དང་། ནར་སོན་ཏེ་རྒྱ་ནག་ནན་ཅིན་སོགས་སུ་སློབ་གྲྭར་སྐྱོད་སྐབས། གོ་མིན་ཏང་གི་རུལ་སུངས་སྲིད་ཇུས་ཀྱིས་ཁོའི་ལས་དོན་ལ་ཕོག་ཐུག་ཚབ་ཆེན་བཏང་ཡོད་ལ། ཁོར་ཡུག་དང་དགེ་རྒན། སློབ་གྲོགས་སོགས་ཀྱིས་ཁོའི་བསམ་བློར་ཤུགས་རྐྱེན་ཐེབས་ཡོད། གཉིས་པ། ལོ་རབས་བཞི་བཅུ་ཡས་མས་ནས་རྒྱ་ནག་གུང་ཁྲན་ཏང་གིས་བོད་ཀྱི་མཐའ་མཚམས་ཁག་ཏུ་བཙན་འཛུལ་དང་མི་གསོད་ཁྲག་སྦྱོར་ཡ་ང་བ་བྱེད་ཀྱིན་ཡོད་ནའང་། བོད་སྡེ་བ་གཞུང་གི་སྐུ་དྲག་ཚོས་དེ་དག་སྣང་མེད་ཀྱིས་རྒྱས་སྤྲོས་དང་རྒྱན་འཛུགས་ཤོ་རྒྱག རྒྱུ་དབང་འཕྲོག་རྩོད་སོགས་སྐྱུག་བྲོ་བའི་སྤྱི་ཚོགས་རྙིང་བའི་ལམ་ལུགས་དེར་ཞེན་པ་གཏིང་ནས་ལོག་ཅིང་། བོད་མི་རིགས་འཆི་གསོན་གྱི་གཉན་འཕྲང་དེ་ལས་སྐྱོབ་འདོད་ཀྱི་སེམས་ཤུགས་དང་སྙིང་སྟོབས་ཆེས་ཆེར་འབར་ཏེ། ཁོང་ཉིད་དངོས་སུ་སྤྱི་ཚོགས་རིང་ལུགས་ཀྱི་གསར་བརྗེ་བྱ་བཞག་ནང་ཞུགས་ཤིང་། བོད་རིགས་དམར་ཤོག་ཚོགས་པ་གསར་འཛུགས་བྱས་པ་སོགས་ནི། བོད་མི་གསར་བརྗེ་པ་ཁོང་གི་བསམ་བློའི་རྒྱབ་ལྗོངས་གལ་ཆེན་ཞིག་ཏུ་གྲུབ་ཡོད་ལ། དཔེ་དེབ་འདིའི་ནང་གི་བསྟན་དོན་གཙོ་བོའང་དེ་ཡིན།
དེབ་འདི་སྔོན་མ་དབྱིན་ཡིག་ནང་ཐོན་རྗེས་སུད་སི་ནས་མགོ་ནས་མཇུག་བར་ཐེངས་གཅིག་བཀླགས་པ་ཡིན། ཧ་ཅང་སྙན་པོ་བྱུང་། རྒྱ་གར་ནང་སླེབས་རྗེས་དེབ་འདི་བོད་ཡིག་ནང་བསྒྱུར་འདུག་ཟེར་ཡང་དབྱིན་ཡིག་ནང་བཀླགས་ཟིན་སྟབས་ཀློག་འདོད་མ་བྱུང་། ཉེ་དུས་གྲོགས་པོ་མང་པོས་བོད་བསྒྱུར་དེའི་སྐོར་མང་པོ་ཞིག་བཤད་ཀྱི་འདུག་ལ། ངའི་རོགས་པ་ཨ་མདོ་བ་ཞིག་གིས་དབྱིན་ཇི་དེ་ཆ་ཚང་པར་སློག་བྱས་ཏེ། བོད་བསྒྱུར་དེ་དང་བསྡུར་ཏེ་དབྱིན་ཡིག་སྦྱོང་གི་འདུག མགོ་སེར་ཁ་ཤས་ཀྱིས་དེབ་འདི་དབྱིན་ཇི་དང་བོད་ཡིག་གཉིས་མཉམ་སྦྲགས་ཀྱིས་ཀློག་པར་མ་ཟད། ཨེ་ཤ་ཡ་རང་དབང་རླུང་འཕྲིན་ཁང་གིས་ཀློག་པའི་སྒྲ་སྤྱད་དེ་བོད་སྐད་བོད་ཡིག་སྦྱོང་གི་འདུག དེར་བརྟེན་ངས་ཀྱང་བོད་བསྒྱུར་དེ་ཆ་ཚང་གཅིག་བཀླགས་པ་ཡིན། དབྱིན་ཡིག་ནང་ཀློག་པ་ལས་སྙན་པ་ལྟ་བུ་ཞིག་བྱུང་། དེ་ནས་ལེའུ་ཁ་ཤས་དབྱིན་བོད་གཉིས་བསྡུར་ནས་བཀླགས་པ་ཡིན། བསྒྱུར་རྩལ་ཧང་སངས་དགོས་པ་བྱུང་འདུག་ ང་རང་ལའང་ཕན་ཐོགས་ཆེན་པོ་བྱུང་། དངོས་གནས་དཔེ་མི་སྲིད་པའི་ཡག་པོ་བསྒྱུར་འདུག བསྔགས་བརྗོད་ཡོད། ད་ཕན་དབྱིན་ཡིག་ནས་བསྒྱུར་བའི་ནང་ནས་འདི་ལས་ལེགས་པ་མཐོང་མ་མྱོང་།
འོན་ཀྱང་ལོ་ཙཱ་བ་ཆུང་ཚེ་རིང་ལགས་ཀྱིས་བསྒྱུར་བའི་དེབ་གཞན་དག་མང་པོ་མཐོང་མ་མྱོང་། སྒྱུར་རྩལ་དེ་ཙམ་ཡག་པོ་ཡོད་དུས་དེ་ཙམ་ལ་མཚམས་མ་བཞག་པར་མུ་མཐུད་དེབ་གཞན་དག་མང་ཙམ་བསྒྱུར་གནང་ན། བོད་ཀྱི་སྐད་ཡིག་རིག་གཞུང་ལ་ཕན་ཐོགས་ཆེན་པོ་ཡོང་ངེས་རེད།
སྐུ་ཞབས་ཆུང་ཚེ་རིང་ལགས།
་་་་་་་་་་ངས་ཁྱེད་ལ་སྙིང་དབུས་ནས་ཐུགས་རྗེ་ཞུ་བཞིན་ཡོད།་རྒྱུ་མཚན་ནི་ཁྱེད་ཀྱིས་འབའ་བ་ཕུན་ཚོགས་དབང་རྒྱལ་གྱི་མི་ཚེའི་ལོ་རྒྱུས་འདི་དཔེ་མི་སྲིད་པའི་ཡག་པོ་སྒྱུར་གནང་འདུག།་