གངས་སྐྱིད་ནས་ངྷ་ས་མེག་གྷན་དུ་ཡོད་པའི་བཞུགས་སྒར་ཀིརྟི་བྱེས་པ་གྲྭ་ཚང་དུ་གསར་འགོད་དུ་བསྐྱོད་པ་དང་། དེ་འབྲེལ་གྱི་འཆར་ཡན་ཐོར་བུ།
རྡོ་ལ་བརྡར་རི་འདབ་ཀྱི་དབྱར་གྱི་ཆར་ཤོད་དང་ཀང་ར་ལུང་ཁོག་གི་སྨུག་ལོང་འདིས་ངའི་སེམས་ངལ་ཞིང་ལུས་དུབ་པར་བྱེད་ལ། ཉིན་འདི་ཚོར་སུན་སྣང་ཞིག་གིས་རྟག་ཏུ་བསྡམས་འདུག འཛང་གླིང་སྤྱི་བསང་ཉིན་ཡང་དགའ་སྐྱོ་འདྲེས་མའི་མིག་ཆུ་བར་མེད་དུ་གཏོང་བ་ལྟ་བུའི་གནམ་རྒན་མས་སྤྱི་ལེ་གཅིག་ཙམ་ཡོད་པའི་གངས་སྐྱིད་ནས་མེག་གྷན་བར་གྱི་ངའི་འགྲུལ་བཞུད་དེ་ཆར་ཆུའི་ཁྲོད་བསྟིམས་སོང་། མེག་གྷན་དུ་འབྱོར་སྐབས་ང་ཁ་ཐུག་ཏུ་བཞུགས་སྒར་ཀིརྟི་བྱེས་པ་གྲྭ་ཚང་གི་གྲྭ་ཚེ་རིང་ལགས་འཚོལ་དུ་ཕྱིན། ཁོང་ནི་འདི་ལོའི་གསུམ་བཅུའི་དུས་དྲན་རྗེས་ནས་བོད་ནང་གི་གནས་ཚུལ་དང་ལྷག་པར་ཁོང་གི་ཕ་ཡུལ་མདོ་སྨད་རྔ་པའི་ཕྱོགས་ཀྱི་གནས་ཚུལ་ལ་དུས་ཐོག་ཉམས་ཞིབ་བྱེད་མཁན་ཞིག་ཡིན་ལ། ནམ་རྒྱུན་ང་ཁོང་གི་སར་གནས་ཚུལ་རེའི་ཆེད་དུ་བསྐྱོད་ཐེངས་རེར་ཁོང་གིས་ཤོག་གྲངས་བཞི་ནས་ལྔ་ཡོད་པའི་ཉམས་ཞིབ་ཟིན་བྲིས་རེ་གྲ་སྒྲིག་བྱས་ཡོད། ཁོང་མཐོང་ཐེངས་རེར་ངའི་བསམ་པར། ང་ཚོ་བྱེས་གྱར་བོད་མི་ཡིན་ཚུལ་གྱིས་བོད་ཆོལ་ཁ་གསུམ་གྱི་གནས་ཚུལ་ལ་ཉམས་ཞིབ་བྱེད་མི་ཐུབ་ནའང་། རང་ཉིད་ཀྱི་ཞང་དང་རྫོང་། ཁུལ་རིམ་པ་བཅས་ཀྱི་ས་གནས་གསར་འགོད་པ་ངེས་པར་དུ་ཉན་དགོས་སྙམ། གསར་ཁང་ཞིག་དང་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་སྡེ་ཞིག བོད་གནས་ཉམས་ཞིབ་ཁང་ལྟ་བུ་ཞིག་གིས་བོད་ནང་གི་ས་གནས་རེ་རེ་བཞིན་དུས་ཐོག་ཏུ་གནས་ཚུལ་ཤེས་རྟོགས་བྱེད་དགོས་ན་མི་རྒྱུའི་འགྲོ་གྲོན་དང་དུས་ཚོད། ས་གནས་རེ་རེ་བཞིན་འབྲེལ་ལམ་མེད་པའི་དཀའ་ཁག་འཕྲད་ཀྱིན་ཡོད་ལ། བྱེས་གྱར་བོད་མི་མི་རེ་ངོ་རེས་རང་ཉིད་ཀྱི་ཞང་དང་རྫོང་། ཁུལ་རིམ་པ་བཅས་ཀྱི་གནས་ཚུལ་ཤེས་རྟོགས་བྱ་ཐུབ་པ་བྱུང་ཚེ་བོད་ནང་གི་གནས་ཚུལ་རྣམས་དུས་ཡུན་ཐུང་ཐུང་ཞིག་གི་ནང་ཆད་ལྷག་མེད་པར་ང་ཚོས་ཤེས་རྟོགས་ཐུབ་རྒྱུ་ནི་ཁག་པོ་ཞིག་མ་རེད།
འདི་ལྟ་བུའི་བསམ་གཞིགས་ཤིག་དང་ལྷན་དུ་ངས་ཀིརྟི་བྱེས་པ་གྲྭ་ཚང་གི་རྒྱལ་སྒོ་ནས་ཅུང་ཙམ་བསྒུགས་རྗེས་གྲྭ་ཚེ་རིང་ལགས་ཀྱིས་ཤོག་ངོས་གཉིས་ཅན་གྱི་བོད་གནས་ཉམས་ཞིབ་ཀྱི་ཡིག་ཆ་ཞིག་ཁྱེར་ཡོང་ནས་ང་ལ་སྤྲད་སོང་། ཡིག་ཆ་དེའི་ནང་གསལ་བ་ལྟར་ན། རྔ་པ་རྫོང་རྔ་སྨད་བློ་རྟ་ཞང་གི་རང་ལོ་ ༢༧ ཡིན་པའི་གོང་མ་ཚང་གི་ཚེ་ཁོ་འབོད་པར་རྒྱ་གཞུང་གིས་ལོ་ ༡༣ གྱི་བཙོན་འཇུག་ཁྲིམས་ཐག་བཅད་པ་དང་། རང་ལོ་ ༢༥ ཡིན་པའི་གྲོང་སྟོད་ཚང་གི་གཏེར་མཛོད་ལོ་ ༡༨ བཙོན་འཇུག རང་ལོ་ ༢༣ ཡིན་པའི་ཁེར་ཁང་ཚང་གི་སྐལ་བྷར་ཚེ་བཙོན་གྱི་བཙོན་འཇུག་ཁྲིམས་ཐག་བཅད་ཡོད་འདུག ཁོང་ཚོར་རྡུང་གཅོག་འཕྲོག་སྲེག་གི་ཉེས་མིང་བཙུགས་ཏེ་རྔ་པ་རང་སྐྱོང་ཁུལ་གྱི་འབྲིང་རིམ་མི་མང་ཁྲིམས་ཁང་ནས་ཁྲིམས་ཐག་བཅད་པ་ཡིན་ཚུལ་ས་གནས་གསར་འགོད་པར་འགྲེལ་བརྗོད་བྱས་འདུག རྒྱ་ནག་གི་བཅའ་ཁྲིམས་ནང་ཉེས་དོན་ཅི་ཞིག་ཡིན་ཡང་ཁྲིམས་བཤེར་བྱེད་པའི་བརྒྱུད་རིམ་ནང་རང་ཕྱོགས་ནས་ཁྲིམས་རྩོད་པ་གླས་ཏེ་དག་འབུལ་བྱེད་རྒྱུའི་དབང་ཚད་སྤྱི་འབངས་སུ་ལའང་ཡོད་སྐོར་འཁོད་ཡོད་མོད། དེང་སྐབས་བོད་ས་སྟོད་སྨད་བར་གསུམ་དུ་བོད་མི་མང་བོར་ཁྲིམས་ཐག་གཅོད་ཀྱིན་ཡོད་ནའང་། བཅའ་ཁྲིམས་འདི་ལག་ལེན་ཟུར་ཙམ་ཡང་བསྟར་གྱི་མེད་པ་ས་རིས་ཐང་གསལ་ཡིན་པ་ལྟར། གོང་གསལ་བོད་མི་གསུམ་ལ་ཡང་ཐོབ་ཐང་འདི་ཟུར་ཙམ་ཡང་སྤྲད་མེད་པ་དང་། གནད་དོན་གཞན་ཞིག་ནི། ཁོང་ཚོ་ཆབ་སྲིད་དང་འབྲེལ་བ་གཏན་ནས་མེད་པར་རྡུང་གཅོག་འཕྲོག་སྲེག་གི་ཉེས་དོན་ཁོ་ན་ཡིན་ཚུལ་བཤད་པ་ནི་རྒྱལ་སྤྱིའི་གནོན་ཤུགས་ལ་གཡོལ་ཆེད་ཙམ་ལས། དོན་དངོས་ཐོག་ཁོང་ཚོས་བོད་མི་རིགས་ཀྱི་ཐོབ་ཐང་དང་རང་དབང་། མི་རང་རང་གི་མངོན་འདོད་བཅས་ཀྱི་འབོད་ཚིག་བསྒྲགས་ནས་རྒྱ་གཞུང་ལ་ངོ་རྒོལ་ཁྲོམ་སྐོར་བྱས་པའི་དོན་དག་ཉག་ཅིག་གིས་འདི་ལྟར་དྲང་བདེན་མིན་པའི་ཁྲིམས་ཐག་བཅད་པ་རེད་ཅེས་དང་། ཡིག་ཆ་དེའི་ནང་མུ་མཐུད་བཀོད་དོན། བློ་རྟ་ཞང་གི་མི་ ༡༨ ཙམ་བཀག་ཉར་བྱས་ཏེ་ད་བར་ཟླ་ཕྱེད་ཙམ་སོང་འདུག་ཀྱང་ཁོང་ཚོའི་གནས་སྟངས་གང་ཡང་ཤེས་རྟོགས་བྱུང་མེད། རྔ་སྨད་ཨ་ཁམས་ཞང་གི་མི་ ༥ དེ་སྔོན་ཕྱི་ཟླ་ ༣ པའི་ཟླ་མཇུག་ནས་བཟུང་འདུག་ཀྱང་ད་བར་གནས་ཚུལ་གང་ཡང་བྱུང་མེད་པར་ལྷག་འདུག དེང་སྐབས་རྔ་པ་རྫོང་ཁོངས་ཀྱི་དགོན་པ་ཁག་གི་འདུ་འཛོམས་བྱེད་སར་གློག་བརྙན་ལེན་བྱེད་ཀྱི་ཡོ་ཆས་མང་བོ་གསར་དུ་བཙུགས་ཡོད་འདུག་ལ། གྲྭ་པ་ཚོས་དེ་ཅི་ཡིན་སྐོར་དྲིས་པར་ཁ་པར་གྱི་གློག་ལམ་ཡིན་ཚུལ་ལན་འདེབས་བྱས་ཡོད་མོད། རྗེས་སུ་གློག་བརྙན་ལེན་པར་བེད་སྤྱོད་བྱས་འདུག་ལ། ཆོས་རྒྱུད་བོན་པོ་ཡིན་པའི་རྔ་པ་རྟོགས་ལྡན་དགོན་པའི་གྲྭ་པ་རྣམས་དེ་སྔོན་རྒྱལ་གཅེས་ཆོས་གཅེས་ཀྱི་ལས་འགུལ་ལ་མགོ་སྒུར་མ་ཐུབ་པར་དགོན་པ་ནས་བྲོས་བྱོལ་གྱིས་སོང་ཡོད་པ་ད་ལྟའང་ཚུར་དགོན་པར་ཡོང་མེད་པར་དགོན་པ་མུ་མཐུད་ལྷག་ཡོད་འདུག་ཅེས་གསལ་འདུག་ལ། མཇུག་ཏུ་ཀིརྟི་བྱེས་པ་གྲྭ་ཚང་གི་ཛ་དྲག་འབྲེལ་མཐུད་ཚོགས་ཆུང་ནས། ཕྱི་ལོ་ ༢༠༠༨ ཟླ་ ༧ ཚེས་ ༡༨ ལ། ཞེས་བྲིས་འདུག ཡང་ཤོག་བུ་གཞན་ཞིག་ཏུ་ཟླ་ ༧ ཚེས་ ༣ ཉིན་རྔ་པ་རྫོང་རྨེའུ་རུ་མ་ནས་ཡིན་ཞིང་རང་ལོ་ ༡༦ ཡིན་པའི་ཀིརྟི་གདོང་རི་དགོན་གྱི་གྲྭ་བློ་བཟང་ཚུལ་ཁྲིམས་འབོད་པས་རང་སྲོག་བཅད་ཡོད་འདུག ཁོང་གིས་རང་སྲོག་མ་བཅད་པའི་སྔོན་དེར་ཡང་དགོན་པའི་ནང་རྒྱ་གཞུང་གི་མགོ་ཁྲིད་ཚོ་ཐོན་ཏེ་ཚོགས་འདུ་འཚོགས་ཟེར་གྱིན་འདུག ད་ཡང་སྡོད་བཅུག་མ་སོང་ཞེས་བརྗོད་འདུག ཁོང་ཉལ་ཁང་ནས་ཐོན་ཏེ་སྐར་མ་ ༡༥ ཙམ་སོང་མཚམས་ཁོང་གི་སྤུན་ཆེ་བ་ཕྱི་ནས་ཐོན་དུས་ཁོང་ར་ནང་གི་འབུད་ཤིང་ཁང་དུ་སྐེར་ཐག་པ་བསྐོན་ནས་དཔྱངས་ཡོད་པ་དང་སྐབས་དེར་དབུགས་ཆད་ཡོད་འདུག་ཅེས་དོན་ཚན་ཞིག་ཏུ་འཁོད་འདུག
ངའི་སེམས་པར་རང་དབང་མེད་པའི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་བཅའ་ཁྲིམས་སུ་རང་ལོ་བཅོ་བརྒྱད་མ་ལོན་པའི་བྱིེས་པ་ཞིག་ལའང་བཟོད་དུ་མེད་པའི་བསུན་བཙུར་དང་། ཐེག་པར་དཀའ་བའི་སྡུག་བསྔལ་སྤྲད་དེ་ཨུ་ཐུག་ཐབས་སད་ངང་མཐར་རང་སྲོག་གཅོད་དགོས་ཐུག་པའི་ཡིད་སྐྱོ་བའི་བཅོས་སྒྲུང་ཐུང་ཐུང་ཞིག་རྟོགས་བཟོ་བྱས་པ་ཡིན།
ཡང་ཟླ་ ༧ ཚེས་ ༦ ཉིན་གྱི་ཕྱི་དྲོའི་ཆུ་ཚོད་ ༡ ཙམ་ལ་རྔ་པ་ཀིརྟི་དགོན་གྱི་དགུང་ལོ་ ༧༠ ཙམ་ཡིན་པའི་དགེ་བཤེས་འཇམ་དཔལ་རྒྱ་མཚོ་སྐུ་གཤེགས་འདུག་ལ། ཁོང་ནམ་རྒྱུན་སྐུ་གཟུགས་བདེ་ཐང་ཡིན་ནའང་། ཟླ་ ༦ པའི་ནང་དགོན་པའི་གྲྭ་པ་རྣམས་ཕྱི་ལ་ཐོན་པ་ནས་བཟུར་རླུང་ནད་བྱུང་ཡོད་པ་དང་། སྨན་པས་བརྟག་དཔྱད་བྱས་པར་ན་ཚ་ཁྲག་རླུང་ཡིན་པའི་ངོས་འཛིན་བྱས་འདུག སྐབས་དེར་རྒྱ་གཞུང་གིས་ཟླ་ ༧ ཚེས་ ༥ ཚུན་ལ་གྲྭ་པ་རྣམས་ཕྱིར་དགོན་པར་མ་འབྱོར་ཚེ་ས་གནས་སོ་སོར་དམག་མི་བཏང་སྟེ། འཛིན་བཟུང་བྱ་རྒྱུ་ཡིན་པའི་བརྡ་ཁྱབ་བཏང་བ་ཁོང་གིས་ཐོིས་འཕྲལ་ནད་གཞི་ཚབས་ཆེ་རུ་སོང་ནས་སྐུ་གཤེགས་ཡོད་འདུག
ཁོང་གི་ས་ནས་ཤོག་ངོས་དེ་གཉིས་ཁྱེར་ཏེ་ཕྱིར་ཡོང་བའི་ལམ་ལ་ཆས་ནའང་། ཆར་བ་སྔར་བཞིན་ཤག་ཤག་གིས་འབབ་ཀྱིན་འདུག་ལ། ངྷ་སའི་ཁོར་ཡུག་ཡོངས་སྨུག་སྤྲིན་བན་བུན་ཞིག་གིས་བཏུམས་ཏེ། རྒྱང་ཐག་རིང་བོ་མཐོང་དཀའ་བར་གྱུར་བས། ངས་བོད་གནས་གསར་འགྱུར་འཚོལ་རྒྱུར་རྒྱ་ནག་གིས་འགྲུལ་ལམ་བཅད་པ་དང་། ཁ་པར་དང་དྲ་རྒྱ། གློག་འཕྲིན་བཅས་ལ་བཀག་སྡོམ་ནན་མོ་བྱས་ཏེ་ཉིན་རེ་བཞིན་ཛ་དྲག་ཏུ་འགྱུར་བཞིན་པའི་བོད་ནང་གི་གནས་ཚུལ་ཕྱི་ཕྱོགས་སུ་གཏོང་ཐབས་བྲལ་བའི་ད་ལྟའི་བོད་ནང་གི་གནས་སྟངས་རིགས་ཤིག་དེ་རིང་གི་གནམ་གཤིས་འདིས་འགྲེལ་གྱིན་འདུག་ཨང་བསམ་པའི་འཆར་ཡན་ཞིག་གི་ཀློང་དུ་ཚུད།
གསར་འགོད་པ། ཨ་རིག་འགྱུར་མེད།
