ཏང་ལ་རྩེད་མོ་དགོས་ཀྱང་དམངས་ལ་རང་དབང་དགོས།

རྒྱལ་སྤྱིའི་ཨོ་ལིམ་པིག་རྩེད་འགྲན་ཆེན་མོས་འཛམ་གླིང་གི་ཞི་བདེ་དང་རང་དབང༌། མཛའ་མཐུན། བདེ་སྐྱིད་བཅས་ཀྱི་ངོ་བོ་མཚོན་ཡོད་པས། རྒྱལ་ཁབ་དང་མི་རིགས་ཀྱི་དབྱེ་བ་མེད་པར་འཛམ་གླིང་ཡུལ་གྲུ་ཁག་གི་མི་དམངས་ཚང་མས་དགའ་འབོད་དང་བརྩི་བཀུར་ཞུ་གི་ཡོད། 

ཡིན་ནའང༌། ༢༠༠༨ལོའི་རྒྱལ་སྤྱིའི་ཨོ་ལིམ་པིག་རྩེད་འགྲན་གྱི་དབུ་འབྱེད་མཛད་སྒོ་དེ་རྒྱ་ནག་རྒྱལ་ས་པེ་ཅིང་དུ་འཚོགས་རྒྱུར་བདུན་ཕྲག་གཉིས་ལས་ལྷག་མེད་པའི་སྐབས་འདིར། རྒྱ་ནག་མི་དམངས་ཀྱིས་སྲིད་གཞུང་གི་བརྡབ་གསིག་མ་ཐེག་པར་ཨོ་རྩེད་མི་དགོས་རང་དབང་དགོས”ཞེས་འུ་ཐུག་པའི་འཁུན་སྒྲ་སྒྲོག་མགོ་བཙུགས་ཡོད་པའི་གནས་ཚུལ་ཁྱབ་ཀྱིན་ཡོད། དེ་ནི་ཀྲུང་དབྱང་སྲིད་གཞུང་གིས་རང་དབང་དང་ཞི་བདེ་མེད་པའི་ཀྲུང་གོའི་ངོ་གདོང་དངོས་མ་དེ་འགེབས་ཆེད་ཨོ་རྩེད་ཀྱི་བདེ་འཇགས་ལ་ཁ་གཡར་ཏེ། པེ་ཅིང་དང་ཧྲང་ཧེ། ཐེན་ཅིན། ཧྲན་དབྱང༌། ཞང་ཀང༌། ཆིན་ཏོ། ཆིན་ཧང་ཏོ་བཅས་ཨོ་རྩེད་འགྲན་ར་ཡོད་སའི་གྲོང་ཁྱེར་བདུན་ལ་ཞིབ་བཤེར་ནན་མོ་བྱས་ཏེ། ཞིང་ཆེན་གཞན་ནས་ཡིན་པའི་གཞུང་འབྲེལ་མ་ཡིན་པའི་ཕྱོགས་ཐོན་ཚོང་གཉེར་བ་དང་ལས་ཀ་བ་སོགས་ཕྱིར་ཕུད་བཏང་བར་མ་ཟད། ས་གནས་མི་དམངས་ཀྱི་སྒེར་གཉེར་མགྲོན་ཁང་དང་ཟ་ཁང༌། ཚོང་ཁང༌། དཔེ་ཁང༌། སྤྱི་སྤྱོད་ཁ་པར་གཏོང་ས། དྲ་ཁང་བཅས་སྒོ་རྒྱག་ཏུ་བཅུགས་པ་དང༌། གླ་གཏོང་རླངས་འཁོར་འཁོར་རྒྱུགས་ལ་ཚད་བཀག་བཟོས་སྟབས་གྲོང་ཁྱེར་གྱི་མི་མང་པོར་ལས་ཀ་མ་རག་པར་འཚོ་བའི་ཐད་དཀའ་ངལ་འདྲ་མིན་སྣ་ཚོགས་འཕྲད་ཀྱིན་པའི་རྐྱེན་གྱིས་ཡིན་འདུག

གཞན་ཡང་གྲོང་ཁྱེར་ཁུལ་དུ་གནས་སྡོད་དམག་མི་ལས་སྒྱུར་བ་དང༌། ཐོབ་ཐང་གཙོ་གཉེར་མཁན། དམངས་གཙོ་དོན་གཉེར་ཅན། ལྟ་གྲུབ་སྨྲ་བ་བོ། ཆོས་འཁོར་རྩ་རླུང་བ་བཅས་དོགས་ཟོན་བྱ་ཡུལ་ཁྱབ་ཁོངས་ལྔ་རུ་བགོས་ཏེ་གནས་དུས་ངེས་མེད་ཀྱིས་བཙན་འཁྲིད་འདྲི་གཅོད་དང༌། ཐ་ན་ཁྲིམས་མཐུན་བརྡ་ཁྱབ་མེད་པར་དུས་བཀག་བཙོན་གཉེར་བྱེད་པ། གཞན་ཡང་གྲོང་ཁྱེར་ཁག་གི་མི་མང་འདུ་འཛོམས་བྱེད་སའི་ཚོང་ར་དང༌། རླངས་འཁོར་ས་ཚུགས། མེ་འཁོར་ས་ཚུགས། གནམ་ཐང་བཅས་སུ་སྤྱི་བདེ་མི་སྣས་བཙན་ཤུགས་དང་རང་སྣང་གང་ཤར་གྱིས་མང་ཚོགས་ཀྱི་ལག་ཁུག་དང༌། རྒྱབ་ཁུག་སོགས་ལ་བསྔོགས་བཤེར་བྱས་ཏེ་མི་མང་ལ་སུན་གཙེར་བཟོ་བའི་སྐྱུག་བྲོ་བའི་སྣང་ཚུལ་དེ་རིགས་ཀྱིས་མི་མང་ལ་བློ་ཕམ་དང་ཁོ་ཁྲོང་ཚད་མེད་བསླངས་ཏེ། འཛམ་གླིང་གཅིག་ལ་རྨི་ལམ་གཅིག་ཅེས་པའི་གུང་ཁྲན་ཏང་གི་སྦྱར་བྱང་སྣུམ་པོ་དེ་ལས་ལྡོག་སྟེ། “པེ་ཅིང་ཨོ་རྩེད་ནི་དྲག་སྤྱོད་ཅིག་རེད། ང་ཚོར་ཨོ་རྩེད་མི་དགོས་རང་དབང་དགོས”ཞེས་རང་གི་འདོད་འདུན་དང་འུ་ཐུག་ཐབས་ཟད་གྱི་རྣམ་པ་མཚོན་པའི་གནས་ཚུལ་འདྲ་མིན་སྣ་ཚོགས་ཤིག་རྒྱལ་སྤྱིའི་རང་དབང་ཅན་གྱི་གསར་ལམ་ཁག་ཏུ་སྤེལ་ཡོད་པ་རེད།

དེའི་ཐད་ནེའུ་ཡོག་དུས་བབ་ཚགས་པར་སྟེང་རྩོམ་བྱང་ལ་ ༼ཀྲུང་གོའི་དངོས་བདེན་མ་ཡིན་པའི་བརྙན་འཕྲིན༽ ཞེས་པའི་སྤྱི་ཚོགས་དཔྱད་གླེང་གི་རྩོམ་ཡིག་ཅིག་ཀྱང་སྤེལ་ཡོད་པ་དེར། རྒྱ་ནག་གིས་དེ་སྔོན་ཨོ་རྩེད་མགྲོན་བདག་ཐོབ་ཆེད་རྒྱལ་སྤྱིའི་ཚོགས་སྡེ་ཁག་ལ་རྒྱ་ནག་གི་གསར་འགོད་རང་དབང་དང༌། འགྲོ་བ་མིའི་ཐོབ་ཐང་ཡར་རྒྱས་གཏོང་རྒྱུ་སོགས་ངེས་ལེན་དམ་འབུལ་བྱས་ཡོད། ང་ཚོས་རྒྱ་ནག་གི་མགོ་ཁྲིད་རྣམས་ཀྱིས་དམ་ཚིག་དེ་བརྩི་སྲུང་བྱ་རྒྱུ་ཡིན་མིན་བཤད་དཀའ་ན་ཡང༌། རྒྱལ་སྤྱིའི་ཨོ་རྩེད་ལྷན་ཚོགས་དང༌། ཨོ་རྩལ་ཐེབ་རྩ་ཚོགས་པ། འཛམ་གླིང་གི་རྒྱལ་ཁབ་ཁག་གི་སྲིད་གཞུང་བཅས་ནས་རྒྱ་ནག་གིས་སྔར་གྱི་དམ་ཚིག་སྲུང་དགོས་པར་རེ་སྐུལ་དང་རྣམ་འགྱུར་སྟོན་དགོས་ངེས་ཞིག་རེད་ཅེས་དང༌། རྒྱ་ནག་གིས་གསར་འགོད་པ་རྩེད་འགྲན་ར་བར་འཛུལ་ཞུགས་ཆོག་པའི་ཆོག་མཆན་དཔང་ཡིག་སྤྲོད་ཀྱིན་མེད་པ་དང༌། གསར་འགོད་པས་མི་མང་འདུ་འཛོམས་ཀྱི་ཚོགས་ར་ནས་པར་དང་གནས་ཚུལ་མཁོ་སྤྲོད་བྱེད་པར་སྤྱི་བདེ་མི་སྣས་བཀག་འགོག་བྱེད་བཞིན་པར་མ་ཟད། ཨོ་རྩེད་སྐབས་གནས་ཚུལ་འདྲ་མིན་ཕྱིར་གཏོང་མི་ཡོང་བའི་ཆེད་དུ་རྒྱ་ནག་ནང་ལོག་གི་བརྡ་འཕྲིན་གསར་འགོད་ལས་སྣེ་ཁག་ལ་འཇིགས་སྐུལ་བཀའ་རྒྱ་བཏང་སྟེ་ཕྱོགས་གང་ཐད་ནས་འགོག་སྡོམ་བྱེད་བཞིན་ཡོད། དེ་བས་ང་ཚོས་རྒྱ་ནག་ལས་གཞན་ད་དུང་སྐྱོན་བརྗོད་བྱེད་དགོས་ངེས་ཤིག་ནི་རྒྱལ་སྤྱིའི་ཨོ་རྩེད་ལྷན་ཚོགས་རེད། ཨོ་རྩེད་གོ་སྒྲིག་ཚོགས་ཆུང་གིས་རྒྱ་ནག་གི་ཁྲིམས་འགལ་གྱི་བྱ་སྤྱོད་དེ་དག་སྣང་མེད་དུ་བཞག་ཡོད་པ་རེད། ཨོ་རྩེད་ལ་འདི་འདྲའི་ཚད་བཀག་ཆེན་པོ་བཟོས་རྐྱེན་རྩེད་འགྲན་སྐབས་རྒྱལ་སྤྱིའི་ཐོབ་ཐང་གཙོ་གཉེར་བ་དང་ལུས་རྩལ་མི་སྣའི་ཁྲོད་ངོ་རྒོལ་གྱི་རྣམ་པ་སྟོན་མཁན་འབྱུང་ངེས་པས། རྒྱ་ནག་གིས་འཛམ་གླིང་མི་མང་གི་མིག་མདུན་ནས་བརྙན་རིས་དེ་དག་ཇི་ལྟར་ཐག་གཅོད་བྱ་རྒྱུར་སྔོན་ནས་བསམ་ཞིབ་གནང་དགོས་པ་ཞིག་ཀྱང་རེད་ཅེས་བརྗོད་ཡོད་པ་རེད།

ཨོ་ལིམ་པིག་རྩེད་འགྲན་ལ་སླེབས་ལ་ཉེ་བའི་དུས་སྐབས་འདིར་རྒྱ་ནག་ནང་ཁུལ་གྱི་མི་མང་ལ་སྔར་མེད་ཀྱི་དཀའ་ངལ་མང་པོ་ཞིག་བྱུང་རྐྱེན། རྒྱལ་སྤྱིའི་གསར་ལམ་ཁག་ཏུ་རྒྱ་ནག་ལ་སྐྱོན་བརྗོད་ཀྱི་རྣམ་པ་འཐོན་བཞིན་ཡོད། ཉེ་བའི་གནས་ཚུལ་ལ་གཞིགས་ན་ཨོ་རྩེད་སྐབས་རྒྱ་ནག་གི་ངོ་གདོང་བཤུ་བའི་གནས་ཚུལ་འདྲ་མིན་སྣ་ཚོགས་ཤིག་འབྱུང་རྒྱུ་ཡིན་པ་ཐག་གིས་གཅོད་ཐུབ་ལ། དེ་ནི་གུང་ཁྲན་ཏང་གི་དབང་ཆ་གཅིག་སྡུད་ཀྱི་སྒེར་གཅོད་ལམ་ལུགས་དེ་དུས་རབས་ཉེར་གཅིག་པའི་མིའི་རིགས་ཀྱི་སྤྱི་ཚོགས་ཁྲོད་གནས་ཐབས་བྲལ་བའི་སྔོན་རྟགས་གལ་ཆེན་ཞིག་ཀྱང་ཡིན་ནོ།