རྒྱ་ནག་གིས་ལོ་ངོ་བཅུ་གྲངས་ལ་རེ་ལྟོས་བྱས་པའི་ཨོ་རྩེད་འགྲན་ཚོགས་ཕྱི་ཚེས་ ༢༤ ཉིན་གྱི་དགུང་མོའི་རྒྱ་ནག་གི་ཆུ་ཚོད་ ༨ ཐོག་རྒྱལ་ཁའི་ངང་མཇུག་སྒྲིལ་བའི་བཟོ་ལྟ་བསྟན་ཡོད་ལ། གླིང་ཆེན་ལྔ་རྟགས་ཅན་གྱི་ཨོ་ལིམ་པིག་གི་དར་ཆ་དེ་ཡང་པེ་ཅིན་གྲོང་ཁྱེར་སྤྱི་ཁྱབ་པས་སྤྱི་ལོ་ ༢༠༡༢ ལོའི་ཨོ་རྩེད་འགྲན་ཚོགས་ཚུགས་ཡུལ་དབྱིན་ཇིའི་རྒྱལ་ས་ལོན་ཊོན་གྱི་གྲོང་ཁྱེར་སྤྱི་ཁྱབ་པའི་ལག་ཏུ་རྩིས་སྤྲོད་བྱས་སོང༌། ཐེངས་འདིའི་རྩེད་འགྲན་སྟེང་རྒྱ་ནག་ལ་གསེར་གྱི་རྟགས་མ་ ༥༡ དང༌། དངུལ་གྱི་རྟགས་མ་ ༢༡། ཟངས་ཀྱི་རྟགས་མ་ ༢༨། སྡོམ་པའི་རྟགས་མ་ ༡༠༠ ཐོབ་ཡོད་ལ། ཨ་རི་ལ་གསེར་གྱི་རྟགས་མ་ ༣༦ དང༌། དངུལ་གྱི་རྟགས་མ་ ༣༨། ཟངས་ཀྱི་རྟགས་མ་ ༣༦། སྡོམ་པའི་རྟགས་མ་ ༡༡༠ ཐོབ་ཡོད། ར་ཤི་ཡ་ལ་གསེར་གྱི་རྟགས་མ་ ༢༣ དང༌། དངུལ་གྱི་རྟགས་མ་ ༢༡། ཟངས་ཀྱི་རྟགས་མ་ ༢༨། སྡོམ་པའི་རྟགས་མ་ ༧༢ ཐོབ་ཡོད། ཐེངས་འདིའི་ཨོ་རྩེད་འགྲན་ཚོགས་སྟེང་གསེར་གྱི་རྟགས་མ་ཆེས་མང་བའི་རྒྱལ་ཁབ་རྒྱ་ནག་ཆགས་ཡོད་ལ། རྒྱལ་སྤྱིའི་ཨོ་རྩེད་འགྲན་ཚོགས་ཀྱི་ལོ་རྒྱུས་སྟེང་ཟིན་ཐོ་གསར་བ་སྐྲུན་ཡོད་ཅེས་འཛམ་གླིང་ལ་ངོམ་སོ་བྱེད་ཀྱིན་ཡོད།
སྐྱག་རྫུན་ཆེན་པོ་བཞི།
ཐེངས་ཉེར་དགུ་བའི་རྒྱ་ནག་ཨོ་རྩེད་འགྲན་ཚོགས་སྟེང༌། རྒྱ་ནག་གིས་འཛམ་གླིང་ལ་སྐྱག་རྫུན་ཆེན་པོ་བཞི་བཤད་ཡོད་པ་དེ་རྒྱལ་སྤྱིའི་གསར་ལམ་དང་དྲ་ཚིགས་ཁག་ཏུ་སླེབས་མ་ཐག འཛམ་གླིང་མི་དམངས་ཀྱིས་རྒྱ་ནག་ལ་སྐྱོན་བརྗོད་དང་འཕྱ་སྨོད་ཤུགས་ཆེན་བྱས་ཡོད། སྐྱག་རྫུན་དང་པོ། ཨོ་རྩེད་དཔལ་འབར་ཇོ་མོ་གླང་མའི་རྩེ་རུ་འཁྱེར་ཡོད་ཟེར་པ་དེ་རེད། འཛམ་གླིང་ས་ཁམས་བརྟག་དཔྱད་པ་དང༌། གནམ་རིག་བརྟག་དཔྱད་པས་བརྗོད་ན། རྒྱ་མཚོའི་ངོས་ནས་མཐོ་ཚད་སྤྱི་ལེ་ ༥༩༩༥ ཡོད་སར་ཡང་དབུགས་མེད་སྟབས། མེ་སྤར་ཐབས་མེད་ལ་བརྙན་འཕྲི་ནང་དཔལ་འབར་ཁྱེར་མཁན་གྱི་ཁ་རླངས་མཐོང་ཐུབ་པས། ཇོ་མོ་གླིང་མའི་རྩེ་ནས་ཁ་རླངས་འཁྱགས་པའི་ངོ་བོར་འདྲེས་འགྲོ་བས་མཐོང་ཐབས་མེད་ཟེར། ཕྱི་རྒྱལ་གསར་འགོད་པ་གཅིག་ཀྱང་དཔལ་འབར་ཁྱེར་མཁན་དང་མཉམ་དུ་བཏང་མེད་ལ། བལ་ཡུལ་མཐའ་སྲུང་དམག་མིས་ཀྱང༌། དཔལ་འབར་ཇོ་མོ་གླིང་མའི་རི་རྩེར་འཁྱེར་མེད་ཚུལ་བརྗོད་ཡོད། སྐྱག་རྫུན་གཉིས་པ། ཨོ་རྩེད་དབུ་འབྱེད་སྟེང༌། ལོ་དགུ་ཅན་གྱི་རྒྱ་རིགས་བུ་མོ་ལེན་མེའོ་ཡིས། མེས་རྒྱལ་ལ་བསྟོད་གླུ་ལེན། ཞེས་པའི་སྙན་འཇེབས་ཀྱི་གླུ་དབྱངས་དེས་འཛམ་གླིང་མི་དམངས་ཧ་ལས་སུ་བཅུག་ཡོད་མོད། དོན་དངོས་ཐོག་གླུ་དབྱངས་ལེན་མཁན་ལེན་མེའོ་མ་ཡིན་པར། ལོ་བདུན་ཅན་གྱི་བུ་མོ་ཡང་ཕེ་ཡུའུ་ཡིན་འདུག གོ་སྒྲིག་པས་བུ་མོ་ཡང་ཕེན་ཡུའུ་ལ་རྣམ་པ་མེད་སྟབས། ཐེངས་འདིར་གར་སྟེགས་སྟེང་འབུད་མ་ཐུབ་པ་རེད་ཅེས་བརྗོད་ཡོད། སྐྱག་རྫུན་གསུམ་པ། མེ་ལྕེ་ཡིས་གྲུབ་པའི་རྐང་རྗེས་ཉེར་དགུའི་མཚོན་རུས་དེ་ངོ་མ་མ་ཡིན་པར། གློག་ཀླད་ནང་སྡེབས་སྒྲིག་བྱས་པའི་པར་རིས་ཡིན་ཚུལ་པེ་ཅིན་ཨོ་རྩེད་ཚོགས་ཆུང་གི་ཚོགས་མི་ཞིག་གིས་བརྗོད་ཡོད། སྐྱག་རྫུན་བཞི་བ། རྩེད་འགྲན་སྟེང་ཀྲུང་གོའི་གྲངས་ཉུང་མི་རིགས་ང་དྲུག་གི་འཐུས་ཚབ་ཀྱིས་ལྟད་མོ་བ་མང་པོའི་མདུན་ནས། ཞི་བདེ་དང་འཆམ་མཐུན། རྒྱལ་ཁབ་ལ་དགའ་ཞེན་དང་ཨོ་རྩེད་ལ་དགའ་ཞེན་གྱི་རྣམ་འགྱུར་བསྟན་ཡོད་ཀྱང༌། འཐུས་ཚབ་དེ་དག་ཁྲོད་དུ་གྲངས་ཉུང་མི་རིགས་གཅིག་ཀྱང་མེད་པར་རྒྱ་རིགས་ཁོ་ན་ཡིན་འདུག
བྱེའུ་ཚང་མཐའ་ཡི་ངོ་རྒོལ།
ལྟད་མོ་བ་ས་ཡ་དུ་མས་རྒྱ་ནག་གི་དཔལ་འབྱོར་འཕེལ་རྒྱས་དང༌། ངོ་མཚར་བའི་རྩེད་འགྲན་ལ་རེ་བ་ཆེན་པོ་བཅིངས་ཡོད་ཀྱང༌། ཕྱིར་ལོག་ཁར་སེམས་ནང་ཡིད་མ་ཆེས་བ་ཞིག་ཡོད་པ་ནི། ཞི་བདེ་མཚོན་དོན་ཨོ་རྩེད་བྱེའུ་ཚང་མཐའ་འཁོར་ན། དྲང་བདེན་གྱི་སློང་མོ་རྒྱག་མཁན་དེ་ཚོ་རེད། བོད་པ་དང་བོད་དོན་རྒྱབ་སྐྱོར་བ། རྒྱལ་མཚམས་མེད་པའི་གསར་འགོད་ལྷན་ཚོགས་བཅས་ཀྱིས་ཕྱི་ཚེས་ ༨ ནས་ ༢༤ བར་པེ་ཅིན་གྲོང་ཁྱེར་དང་བྱེའུ ་ཚང་ཉེ་འཁོར་ཀུན་ནས་རྒྱ་གཞུང་ལ་ངོ་རྒོལ་མཚམས་ཆད་མེད། ཕྱི་ཚེས་༨ ཉིན་ཨོ་རྩེད་དབུ་འཛུགས་མ་བྱས་གོང་དུ་བོད་དོན་རྒྱབ་སྐྱོར་བ་ ༣ གྱིས་ངོ་རྒོལ་བརྗོད་ཚིག་བཀོད་པའི་སྟོད་ཐུང་གྱོན་ཞིང༌། ལག་ཏུ་བོད་གྱི་རྒྱལ་དར་བཟུང་སྟེ། བྱེའུ་ཚང་མཐའ་ནས་ངོ་རྒོལ་བྱས་ཡོད་ལ། ཨ་རི་དང་འཇར་མན། ཁེ་ན་ཌ་བཅས་ཀྱི་བོད་རང་བཙན་སློབ་ཕྲུག་ཚོགས་པའི་ཚོགས་མི་ཚོས་ཕྱི་ཚེས་ ༩ ཉིན་པེ་ཅིན་གནམ་བདེ་སྒོ་མོ་ཆེའི་ཐང་ཆེན་ནས་གཟུགས་པོར་བོད་ཀྱི་རྒྱལ་དར་གཡོགས་ཏེ་ཤི་ཡོད་པའི་རྣམ་པ་བསྟན་ཡོད། རྒྱལ་མཚམས་མེད་པའི་གསར་འགོད་ལྷན་ཚོགས་ཀྱིས་རྒྱ་སྐད་དང་དབྱིན་སྐད། ཧྥ་རིན་སིའི་སྐད་ཐོག རྒྱ་གཞུང་གིས་འཛིན་བཟུང་བྱས་པའི་གསར་འགོད་པ་དང་རྩོམ་པ་པོ་ཡོངས་གློད་གྲོལ་གཏོང་དགོས། རྒྱ་ནག་ནང་སྨྲ་བརྗོད་རང་དབང་སྤྲོད་དགོས། ཞེས་པེ་ཅིན་གྲོང་ཁྱེར་ནང་ཁྲོམ་སྐོར་བྱས་ཡོད། ཞི་བདེ་བྱིའུ་ཚང་འཁྲིས་ཀྱི་གློག་སྡོང་རྩེ་རུ་བོད་རང་བཙན་གྱི་འཕྲེད་དར་དཔྱངས་ཤིང༌། ཧོང་ཀོང་ཨོ་རྩེད་རྟ་རྒྱུགས་ཐང་ནས་ཁེ་ན་ཌའི་སློབ་མ་འགས་བོད་ཀྱི་རྒྱལ་དར་ཕྱར་ཡོད། བྱེའུ་ཚང་འགྲམ་གྱི་མི་རིགས་སྤྱི་གླིང་དུ་ལྕགས་རྟ་འཁོར་ལོས་སྐོར་སྐྱོད་བྱས་བཞིན་བོད་རང་བཙན་གྱི་འབོད་སྒྲ་སྒྲོག་ཡོད་ལ། སྤྱི་གླིང་ཟམ་པའི་སྟེང་བོད་རང་བཙན་གྱི་འཕྲེད་དར་ཕྱར་ཡོད། རྒྱ་ནག་དབུས་བརྙན་འཕྲིན་ལས་ཁུངས་མདུན་དུ་བོད་རང་བཙན་གྱི་འཕྲད་དར་འཕྱར་ཏེ། རྒྱ་ནག་གིས་བོད་ནང་དྲག་གནོན་བྱས་པའི་གནས་ཚུལ་འཁྱོག་བཤད་མཚམས་འཇོག་གིས་བདེན་པའི་གནས་ཚུལ་ཁྱབ་སྤེལ་དགོས་བའི་བརྡ་ལན་སྤྲད་ཡོད། དེ་བཞིན་ཨ་རིའི་མི་སེར་དྲུག་གིས་བྱིའུ་ཚང་སྟེང་ལ། བོད་རང་བཙན་ཞེས་པའི་གློག་འོད་སྤར་ཏེ། པེ་ཅིན་གྱི་མཚན་མོའི་ཡུལ་ལྗོངས་ལ་བདེན་དོན་གྱི་འོད་སྣང་སྒྲོན་ཡོད།
ཨོ་རྩེད་ཀྱི་ནང་དོན་ལྷག་མ།
ལོ་ངོ་སྟོང་ཕྲག་གི་ལོ་རྒྱུས་ལྡན་ཞིང༌། གནའ་བོའི་རྒྱལ་ཁབ་གྷི་རི་སིའི་མི་སེར་རྣམས་དམག་འཁྲུག་དང་འགྲན་རྩོད་ལ་ཞེན་པ་གཏིང་ནས་ལོག་སྟེ། ཞི་བདེ་འདྲ་མཉམ། རང་དབང༌། དམངས་གཙོ། འཆམ་མཐུན་བཅས་ཀྱི་ཆེད་དུ་སྒྲོན་པའི་ཨོ་རྩེད་དཔལ་འབར་དེ། རིམ་གྱིས་རྒྱལ་སྤྱི་རང་བཞིན་གྱི་རྩེ་ད་མོའི་རྣམ་པར་གྱུར་ཏེ། རྒྱལ་ཁབ་དང་མི་རིགས་རེ་ཟུང་གི་རྩོད་རྙོག་འདུམ་སྒྲིག་བྱུང་ཞིང༌། གཡོན་ལྷུང་ཆབ་སྲིད་མགོ་རྟིང་སློག་ཅིང༌། མི་དམངས་དཀའ་སྡུག་ལས་གྲོལ་ཏེ། ཨོ་ལིམ་པིག་དཔལ་འབར་གྱི་དམིགས་ཡུལ་མངོན་འགྱུར་བྱས་ཡོད་ཚུལ་ཆབ་སྲིད་དབྱེ་ཞིབ་པ་དང༌། ལོ་རྒྱས་ཉམས་མྱོང་ཅན་ཚོས་བརྗོད་བཞིན་ཡོད་ཀྱང༌། ད་ལོའི་རྒྱལ་སྤྱིའི་རྩེད་འགྲན་ལ་ནང་དོན་གཞན་དང༌། དཔལ་འབར་ལ་མེ་ལྕེ་གཞན་ཞིག་འབར་ཡོད། དེ་ནི་ ༡༩༩༨ ལོར་འཛམ་གླིང་རྒྱལ་ཁབ་མང་པོས་ཐེངས་ཉེར་དགུ་བའི་ཨོ་རྩེད་ཧབ་ཐོབ་རྒྱག་སྐབས། རྒྱ་ནག་གཞུང་གིས་འགྲོ་བ་མིའི་ཐོབ་ཐང་དང༌། རྒྱ་ནག་ནང་ཞི་བདེ་བརྟན་ལྷིང༌། སྨྲ་བརྗོད་རང་དབང༌། གསར་འགོད་རང་དབང་བཅས་ལ་འགན་ལེན་བྱས་ཏེ། རྒྱལ་སྤྱིའི་ཨོ་ལིམ་པིག་རྩེད་འགྲན་ཚོགས་ཆུང་གི་ཚོགས་གཙོས་ ༢༠༠༨ ལོའི་རྩེད་འགྲན་དར་ཆ་རྒྱ་ནག་ལ་སྤྲད་ཡོད་ཀྱང༌། ཐེངས་འདིའི་ཨོ་རྩེད་དཔལ་འབར་སྒྲོན་པའི་ཉིན་དང་པོ་ནས། བོད་པ་དང་བོད་དོན་རྒྱབ་སྐྱོར་བ། རྒྱལ་མཚམས་མེད་པའི་གསར་འགོད་ལྷན་ཚོགས། འགྲོ་བ་མིའི་ཐོབ་ཐང་ཚོགས་པ་ཁག རྒྱ་གཞུང་དང་ཆབ་སྲིད་ལྟ་བ་མི་མཐུན་མཁན་ཡོངས་ཀྱིས་རྒྱལ་ཁབ་སོ་སོའི་རྒྱ་ནག་གཞུང་ཚབ་དང༌། མཉམ་འབྲེལ་རྒྱལ་ཚོགས། མི་དམངས་སྤྱི་གླིང་བཅས་སུ་རྒྱ་ནག་ལ་ངོ་རྒོལ་མཚམས་མ་ཆད་ཅིང༌། དམིགས་བསལ་སྦྱོང་བརྡར་ཅན་གྱིས་སྐོར་བའི་ཨོ་རྩེད་དཔལ་འབར་དེ་ཡང་འབྲོ་དགོས་པ་དང་གཞའ་དགོས་པ། ཐ་ན། ཐེངས་དུ་མར་བསད་པའང་བྱུང་ཡོད། ཨོ་རྩེད་དངོས་སུ་མགོ་འཛུགས་བྱས་མ་ཐག རྒྱ་ནག་ཡོངས་སུ་དྲག་སྡོམ་བྱས་ཏེ། སྨྲ་བརྗོད་རང་དབང་ཕར་ཟད། འགྲོ་སྐྱོད་རང་དབང་ཡོངས་སུ་བཀག་ཅིང༌། རྒྱ་ནག་དྲིལ་བསྒྲགས་ལྷན་ཁང་ནས་དོན་ཚན་ ༢༡ ཅན་གྱི་སྒྲིག་གཞི་བཟོས་ཏེ། གསར་འགྱུར་བརྒྱུད་ལམ་བཀག་སྡོམ་བྱས་ཤིང༌། དབྱིན་ཇི་དང་ཨ་རིའི་གསར་འགོད་པ་འཛིན་བཟུང་ཉེས་རྡུང་བཏང་ཡོད་ལ། ཡུ་གར་དང་རྒྱ་ནག་ཉེན་རྟོག་པ་གདོང་ཐུག་གིས་ཉེན་རྟོག་པ་ ༡༦ དམར་གསོད་བྱས་ཡོད། འདིའི་ཐད་༧གོང་ས་མཆོག་ཧཕ་རིན་སིར་ཆིབས་སྒྱུར་སྐབས། ཨོ་ལིམ་པིག་རྩེད་འགྲན་རིང་བོད་ནང་གི་གནས་སྟངས་ཐད་སེམས་འཚབ་ཆེན་པོ་ཡོད་གསུངས་ཤིང༌། རྒྱལ་མཚམས་མེད་པའི་གསར་འགོད་ལྷན་ཚོགས་ཀྱི་ཚོགས་གཙོས་ཀྱང༌། རྒྱ་ནག་ནང་ཁུལ་གྱི་འགྲོ་བ་མིའི་ཐོབ་ཐང་ཡ་ང་བ་ཞིག་རེད། དེ་དག་གསལ་སྟོན་ལ་མཐུན་འགྱུར་བྱས་མེད་པ་མ་ཟད། གསར་འགོད་རང་དབང་ལ་རྡོག་རོལ་ཚབས་ཆེན་བཏང་སོང་ཞེས་བརྗོད་ཡོད།
བཀུར་འོས་པའི་ཨོ་རྩེད་སྐུ་མགྲོན།
ཐེངས་ཉེར་དགུ་བའི་རྒྱ་ནག་ཨོ་རྩེད་འགྲན་བསྡུར་སྟེང༌། རྒྱལ་ཁབ་ ༨༠ ལྷག་གི་དབུ་ཁྲིད་དང༌། རྩེད་འགྲན་པ་གཅིག་ཁྲི་ ༡༠༠༠༠ ལྷག་མཉམ་ཞུགས་བྱས་ཡོད་ལ། གཞུང་སྒེར་གྱི་གསར་འགོད་པ་ཉིས་ཁྲི་ ༢༠༠༠༠ ལྷག་སླེབས་ཡོད། དྲང་བདེན་དང་ཞི་བདེ་ལ་དགའ་བའི་མི་མང་ཚོས། གལ་སྲིད་ཨོ་རྩེད་མཛད་སྒོར་༧གོང་ས་ཏཱ་ལའི་བླ་མ་ཕེབས་ཡོད་ན། ཐེངས་འདིར་རྒྱ་ནག་ལ་ཐོབ་པའི་རྟགས་མ་བརྒྱ་ལས་གཟི་བརྗིད་ཆེ་ཞིང༌། ནང་དོན་ལྡན་ཚུལ་བརྗོད་ཀྱིན་ཡོད། རྒྱ་ནག་གཞུང་གིས་ཐེངས་འདིའི་ཨོ་རྩེད་སྟེང༌། རྒྱ་ནག་ནང་གི་ཆོས་ལུགས་འདྲ་མིན་གྱི་སྐུ་ཚབ་གདན་ཞུ་བྱས་ཡོད་པ་ལས་ནང་པའི་སྐུ་ཚབ་ལ། དོལ་རྒྱལ་ཚོགས་པའི་གཏེ་བོ་གངས་ཅན་བླ་མའི་ལག་རོགས་ཁོ་ཚེ་ཚུལ་ཁྲིམས་ཟེར་བ་གདན་ཞུ་བྱས་ཡོད་འདུག དེ་བཞིན་མཇུག་སྡོམ་མཛད་སྒོར་དབྱིན་ཇིའི་སྲིད་བློན་གྷོལ་ཌན་བྷི་རོན་གྱིས། ཐེངས་འདིའི་ཨོ་རྩེད་ལ་ཁ་གཡང་ལྟ་བུའི་ཚིག་འགའ་བཤད་ཡོད་ཀྱང༌། དེ་ནི་ ༢༠༡༢ ལོའི་དབྱིན་ཡུལ་ནང་ཚུགས་གཏན་འཁེལ་བའི་ཨོ་རྩེད་ལམ་ལྷོང་ཡོང་ཆེད་ཡིན་ཚུལ་རྗོད་བཞིན་ཡོད། རྩེད་འགྲན་ནང་རྟགས་མ་ཐོབ་མཁན་ཨི་ཊ་ལིའི་གྲི་རྩེད་པ་བུ་མོ་མ་གྷི་རུ་ཟི་ཡིས། ང་རང་གི་ཐེངས་འདིའི་གདོང་ཁྲབ་ཏཱ་ལའི་བླ་མར་འབུལ་རྒྱུ་ཡིན། གྲི་རྩལ་སྐབས་ངའི་གདོང་པ་སྐྱོབ་པ་ལྟར། ཏཱ་ལའི་བླ་མས་བོད་པ་སྐྱོབ་ཐུབ་པར་སྨོན་ཞེས་བརྗོད་ཡོད་ལ། ཁུ་ཚུར་འགྲན་མཁན་ཁུ་ལོ་མན་གྱིས་དངུལ་གྱི་རྟགས་མ་དང༌། གྲུ་གཏོང་མཁན་རྗོ་སེ་ཧཕ་ཡི་དངུལ་གྱི་རྟགས་མ་བཅས་ཀྱང་༧གོང་ས་མཆོག་ལ་འབུལ་འཆར་ཡོད་འདུག ཨི་ཊ་ལིའི་སྲུང་སྐྱོབ་བློན་ཆེན་གྱིས། ཐེངས་འདིར་ཨི་ཊ་ལིའི་རྩེད་འགྲན་པ་ཚོས་མ་སྐུལ་དང་བླང་གིས་བོད་མིའི་དབུ་ཁྲིད་ཏཱ་ལའི་བླ་མ་མཆོག་དང༌། བོད་མིར་གདུང་སེམས་མཉམ་སྐྱེད་ཀྱི་རྣམ་འགྱུར་གསལ་སྟོན་བྱས་པར། ང་རང་དགའ་སྤོབས་ཆེན་པོ་བྱུང་ཞེས་གཞུང་འབྲེལ་གསལ་བསྒྲགས་བྱས་ཡོད། ཨོ་རྩེད་མཇུག་སྡོམ་གྱི་སྐབས་དང་བསྟུན་ཏེ། ཐེ་ཝན་བོད་ཀྱི་གྲོགས་པོ་ཚོགས་པ་དང༌། འགྲོ་བ་མིའི་ཐོབ་ཐང་ཚོགས་པ་ཁག་གིས་ཐེ་ཝན་རྒྱལ་སར། ཁྲག་དྲི་དྲོ་བའི་ཨོ་ལིམ་པིག་མཇུག་སྡོམ། ཟེར་བ་ཞིག་འཚོགས་ཏེ་རྒྱ་ནག་སྲིད་འཛིན་ཧུའུ་ཅིན་ཐའོ་དང༌། ཐེ་ཝན་སྲིད་འཛིན་མཱ་ཡོན་ཀྱོ། ཨ་རིའི་ས་ཁང་བདག་པོ་ཊ་ནོ་ཀྲི་གསུམ་གྱིས་འགྲོ་བ་མིར་ཚད་ལས་བརྒལ་བའི་དྲག་གནོན་དང༌། སྲིད་དབང་སྒེར་གཅོད་བྱེད་པར་ལག་སྐྱེས་སུ་གསེར་གྱི་རྟགས་མ་རེ་སྤྲད་དེ། འཛམ་གླིང་ནང་ད་ལྟ་བདེན་དོན་ཞིག་གནས་ཡོད་ན། ཨོ་ལིམ་པིག་གི་མཛད་སྒོའི་སྐུ་མགྲོན་ཡོངས་ཀྱིས་ཁོ་ཚོར་འདི་ལས་ལྷག་པའི་རྟགས་མ་གཞན་ཞིག་སྤྲོད་སྲོལ་མེད་པ་མཁྱེན་གསལ་རེད་ཅེས་བརྗོད་ཡོད།
བཀུར་འོས་པའི་ཨོ་རྩེད་སྐུ་མགྲོན།