རྒྱལ་བ་རིན་པོ་ཆེ་གདན་ཞུ།

ཡུ་རོབ་གྲོས་ཚོགས་ཀྱིས་རྒྱལ་བ་རིན་པོ་ཆེ་ཡུ་རོབ་གྲོས་ཚོགས་ནང་ཕེབས་ཏེ་གསུང་བཤད་གནང་བར་གཞུང་འབྲེལ་གདན་འབོད་གནང་ཡོད་པ་རེད།

ཕྱི་ཚེས་ ༢༦ ཉིན་གནས་ཚུལ་སྤེལ་བ་ལྟར་ན། ལོ་འདིའི་ཕྱི་ཟླ་ ༡༢ པའི་ཚེས་ ༤ ཉིན་རྒྱལ་བ་རིན་པོ་ཆེ་ཡུ་རོབ་གྲོས་ཚོགས་ནང་གཞུང་འབྲེལ་ཐོག་གདན་འབོད་ཀྱིས་བོད་རྒྱ་ཞི་མོལ་ཐད་ཁོང་གི་དགོངས་ཚུལ་ཅི་ཡིན་སྐོར་གསུང་བཤད་གནང་རྒྱུ་ཡིན་ཚུལ་ཡུ་རོབ་གྲོས་ཚོགས་ཀྱི་ཚོགས་གཙོ་ Hans-Gert Pöttering ཡིས་བྷར་སི་ལོ་ནར་ཡོད་པའི་བོད་ཀྱི་ཐེབས་རྩ་ཁང་གི་འགན་འཛིན་ཐུབ་བསྟན་དབང་ཆེན་ལགས་ལ་བརྗོད་ཡོད་པ་རེད།

ཡུ་རོབ་གྲོས་ཚོགས་ཀྱི་ཚོགས་གཙོ་ལགས་ཀྱིས་ཕྱི་ཚེས་ ༢༣ ཉིན་ཐུབ་བསྟན་དབང་ཆེན་གཞུང་འབྲེལ་གྱིས་སྣེ་ལེན་བྱས་ཡོད་པ་དང་། ཐུབ་བསྟན་དབང་ཆེན་གྱིས་ཕྱིར་ཚོགས་གཙོ་ལ་དོན་ཕན་ལྡན་པའི་བོད་རྒྱའི་ཞི་མོལ་ཞིག་ཡོང་ཆེད་རྒྱབ་སྐྱོར་དང་འབོད་སྐུལ་གྱི་མཚན་རྟགས་སྟོང་ཕྲག་ ༣༠ བསྡུ་རུབ་བྱས་པ་ཞིག་ཕུལ་ཏེ། མཚན་རྟགས་དེ་དག་རྒྱ་ནག་གི་སྲིད་འཛིན་ཧུའུ་ཅིན་ཐའོ་ལ་འབུལ་རྒྱུའི་ཞུ་སྐུལ་བྱས་ཡོད་པ་རེད།

གཞན་ཡང་ཡུ་རོབ་གྲོས་ཚོགས་ཀྱི་ཚོགས་གཙོས་སྐབས་དེར་ཁོང་ཉིད་ནས་བོད་ཀྱི་ད་ལྟའི་གནས་སྟངས་ལ་ཐུགས་ཁྲལ་ཡོད་ཚུལ་དང་། བོད་ཀྱི་གནད་དོན་འདི་ཞི་བའི་སྒོ་ནས་ཐག་གཅོད་པར་ཁོང་ཉིད་ནས་རྒྱབ་སྐྱོར་གནང་གི་ཡོད་ཚུལ་གསུངས་ཡོད་པ་རེད། སྐུ་ཞབས་ Hans-Gert Pöttering ནི་ལོ་འདིའི་ཕྱི་ཟླ་ ༤ པའི་ནང་ཡུ་རོབ་གྲོས་ཚོགས་ནང་མང་མོས་གྲོས་ཆོད་ཅིག་བཞག་སྐབས་ཀྱི་གྲོས་གཞི་འདོན་མཁན་ཡིན་ད་དང་། གྲོས་ཆོད་དེའི་ནང་རྒྱ་ནག་གིས་བོད་མིའི་ཞི་བའི་ངོ་རྒོལ་ལ་དྲག་པོའི་རྒོལ་ལན་སྤྲད་པར་ཤུགས་ཆེ་སྐྱོན་བརྗོད་བྱས་ཡོད་པ་རེད།

ཐུབ་བསྟན་དབང་ཆེན་ལགས་ནས་ཁོང་དང་ཡུ་རོབ་གྲོས་ཚོགས་ཀྱི་རྒྱབ་སྐྱོར་ལ་ཐུགས་རྗེ་ཞུས་པ་མ་ཟད། བོད་མི་རིགས་ཀྱིས་རང་གི་མངོན་འདོད་སྒྲུབ་པའི་ཐབས་ལམ་ནི་འཚེ་མེད་ཞི་བ་དང་བདེན་པ་ཡིན་ལ། བོད་མིའི་འཐབ་རྩོད་འདི་མཐའ་གཅིག་ཏུ་འགྲུབ་ཐབས་བྱེད་གི་ཡིན་ཅེས་བརྗོད་ཡོད་པ་རེད།