༄༅། །སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནས་སྐུ་ཡིག་བརྒྱུད་བཀའ་སྤྱི་ཕེབས་པ་ལྟར་བཙན་བྱོལ་བོད་མིའི་བཅའ་ཁྲིམས་དགོངས་དོན་དམིགས་བསལ་ཚོགས་ཆེན་ཐེངས་དང་པོའི་ལས་རིམ་གྲོས་ཆོད་ཀྱི་དོན་ཚན་བཞི་པ་ཚོགས་མིའི་ཡོང་ཁུངས་ཁག་གི་ཐད་གཤམ་གསལ་ལམ་སྟོན་ཁག་ཞུ་རྒྱུར།
༡ སྤྱི་ཟུར་དང༌། བཀའ་ཟུར་ཚོགས་བཅར་བ་རྣམས་ཀྱི་ཁོངས་ནས་ལམ་གྲོན་གཏོང་རྒྱུར་སྐུ་ངལ་ཡོད་རིགས་ནས་དམིགས་བསལ་རེ་བསྐུལ་གནང་ཚེ་དགོངས་བཞེས་གནང་རྒྱུ་དང༌། དེ་མིན་ཚོགས་བཅར་བ་གཞན་ཡོངས་རྫོགས་ནས་ཕར་ཚུར་ལམ་གྲོན་ཁྱབ་ཁུངས་སོ་སོ་ནས་ཞུ་ལེན་དགོས་རྒྱུ།
༢ སྤྱི་ཟུར་དང༌། བཀའ་ཟུར། ཕྱི་རྒྱལ་ཡུལ་གྲུ་ཁག་གི་བོད་རིགས་སྤྱི་མཐུན་ཚོགས་པ་རྣམས་ཀྱི་སྐུ་ཚབ་རྣམ་པར་ཚོགས་འདུའི་ཆེད་རྡ་སར་བཞུགས་རྒྱུན་རིང་ཉིན་དོད་དང༌། ཁང་དོད་འབུལ་རྒྱུ་ཡང་བཞུགས་འཚེར་སོ་སོས་ཐབས་འཚོལ་གནང་རྒྱུ་ལས་འདི་ནས་གྲ་སྒྲིག་ཞུ་རྒྱུ་མིན། དེ་བཞིན་ཚོགས་མིའི་ཡོང་ཁུངས་གཞན་རྣམས་ནས་ཀྱང་རྡ་སར་བཞུགས་གནས་སོ་སོས་གྲ་སྒྲིག་གནང་དགོས་རྒྱུ།
༣ ཚོགས་འདུའི་རིང་ཉིན་གུང་གསོལ་ཚིག་དང༌། གསོལ་ཇ་ཐེངས་གཉིས་གཞུང་འབྲེལ་གྲ་སྒྲིག་ཞུ་རྒྱུ་ལས་དེ་མིན་ཉིན་དོད་ཁུངས་སོ་སོ་ནས་ཞུ་ལེན་དགོས་རྒྱུ།
༤ ཆོས་བརྒྱུད་ཆེན་པོ་བཞི་དང༌། གཡུང་དྲུང་བོན་བཅས་སོ་སོའི་གྲྭ་བཙུན་སྐུ་ཚབ་གཏོང་ཕྱོགས་ཐད་ཆོས་བརྒྱུད་སྤྱི་འཐུས་རྣམས་ནས་ཐུགས་འགན་རྐང་བཞེས་ཀྱིས་གྲ་སྒྲིག་འཐུས་གཙང་གནང་དགོས་རྒྱུ།
༥ རྒྱུན་ལྡན་བོད་དོན་ཐོག་ཐུགས་སྣང་དང་འགན་འཁུར་ལས་འགུལ་གནང་མཁན་དགོངས་འཆར་གནང་འདོད་ཡོད་རིགས་ནས་དང་བླངས་ཕེབས་མཁན་གྲངས་རྒྱ་བལ་འབྲུག་གསུམ་ནས་ ༢༥ དེ་མིན་ནས་ ༢༥ ལས་མ་མང་བ་ཞེས་པའི་ཁོངས་ཚོགས་བཅར་བློ་ཡོད་རིགས་ནས་རང་གི་ལོ་རྒྱུས་མདོར་བསྡུས་དང༌། ཞལ་བྱང་བཅས་ཕྱི་ལོ་ ༢༠༠༨ ཟླ་ ༡༠ ཞེས་ ༢༠ འགྱངས་མེད་འདི་གར་སྙན་ཞུ་གནང་འབྱོར་ཐུབ་པ་དགོས་རྒྱུ་དང༌། དེ་མཚམས་དོ་བདག་སོ་སོར་བརྡ་ཐོ་འབུལ་རྒྱུ།
༦ རྒྱ་བལ་འབྲུག་གསུམ་གྱི་ས་གནས་འགོ་འཛིན་རྣམས་དང༌། ས་གནས་འཐུས་མིའི་ཚོགས་འདུ་ཁག ས་གནས་རང་བདེན་ཚོགས་ཆུང་ཁག ས་འཐུས་མེད་པའི་ས་གནས་ཁག་ནས་མི་མང་གི་སྐུ་ཚབ་བཅས་ནས་ས་གནས་སོ་སོར་ཁུར་མཉམ་ལེན་གྱིས་ཚོགས་ཆེན་གྱི་གྲོས་གཞིའི་སྔོན་ཚུད་ནས་ཁྱབ་ཁོངས་མང་ཚོགས་ཀྱི་བསམ་འཆར་བསྡུ་རྒྱུའི་ལས་རིམ་ཞིབ་པར་བཀོད་དེ་མ་གོ་མ་ཐོས་མེད་པར་བརྡ་ཁྱབ་ཐོག་དགོངས་འཆར་ཁག་ཚོགས་ཆེན་སྐབས་ཡིག་ཐོག་འགོད་འབུལ་ཐུབ་པ་དགོས་རྒྱུ། གོང་མཚུངས་སློབ་གྲྭ་ཁག་གི་འགན་འཛིན་རྣམས་དང༌། ཆོས་བརྒྱུད་ཆེན་པོ་བཞི་དང༌། གཡུང་དྲུང་བོན། རང་སྐྱོང་སྡེ་ཚན་ཁག་བཅས་ནས་ཀྱང་ཁུངས་སོ་སོའི་དགོངས་འཆར་བསྡུ་རུབ་སོགས་གནང་གལ།
༧ ཕྱི་རྒྱལ་སྐུ་ཚབ་དོན་གཅོད་རྣམས་དང༌། བོད་རིགས་སྤྱི་མཐུན་ཚོགས་པ་ཁག་གི་རྒྱུན་ལས་རྣམ་པས་ཁྱབ་ཁོངས་ཀྱི་དགོངས་འཆར་བསྡུ་ཕྱོགས་ཐད་གོང་བཞིན་ཐུགས་འགན་བཞེས་གནང་དགོས་རྒྱུ།
༨ ཚོགས་བཅར་བ་ཡོངས་རྫོགས་ནས་ཕྱི་ལོ་ ༢༠༠༨ ཟླ་ ༡༡ ཚེས་ ༡༦ འགྱངས་མེད་ཚོགས་དྲུང་ལས་ཁུངས་སུ་འབྱོར་ཐོ་བསྐྱོན་གནང་ཐུབ་པ་དགོས་རྒྱུ་བཅས། ཚོགས་དྲུང་ལས་ཁུངས་ནས་ཕྱི་ལོ་ ༢༠༠༨ ཟླ་ ༡༠ ཚེས་ ༨ ལ།
གསར་འགྱུར་འདི་སྤེལ་མཁན་རྒྱ་ནག་གཞུང་རེད་དམ་བོད་པ་སྐྱབས་བཅོལ་ བའི་སྲིད་གཞུང་རེད། ང་ཚོས་རྒྱ་ནག་གཞུང་གི་གསར་འགོད་རང་དབང་སྤྲོད་ཀྱི་མེད་རབས་དང༌། རང་དབང་དང་ལྡན་པའི་གསར་འགོད་ལྷན་ཚོགས་ཤིག་བོད་དུ་གཏོང་དགོས་རབས་སོགས་ཁ་གསོན་པོ་ལུང་བ་གང་དང་གཞུང་བ་གང་ལབ་བབཞིན་ཡོད་པ་མ་རེད་དམ། ད་ངན་རྟགས་ནང་ནས་ལྟོན་རྩིས་མ་རེད་དམ། སྐུ་མཁྱེན་འདི་འདྲ་མ་བྱེད། དེ་ལས་རྒྱ་ནག་གཞུང་གི་གསར་ཁང་གྲགས་ཆེན་ཤིན་ཧྭ་གསར་ཁང་གི་གཙོ་བྱས་ནས་གསར་ཁང་གང་མང་ཞིག་སྐད་གཏོང་རོགས། འདི་གནས་ཚུལ་ཆུང་ཆུང་ཞིག་དང་། ཁྱིམ་ཚང་ཞིག་གི་གནད་དོན་ཐག་གཅོད་དང ་གྲོས་བསྡུར་བྱེད་ཀྱི་ཡོད་པ་མ་རེད། འདི་བོད་སྤྱིའི་བདེ་སྡུག་གི་གནད་དོན་ཞིག་དང་། ལྷག་པར་དུ་བོད་ཀྱི་རྩ་དོན་བསྒྲུབ་ཕྱོགས་ཀྱི་མ་འོངས་པའི་ཁ་ཕྱོགས་དང༌། དམིགས་ཡུལ། སྲིད་བྱུས་བཅས་ཀྱི་་ལངས་ཕྱོགས་ཅི་འདྲ་ཞིག་འཛིན་དགོས་མིན་གྲོས་མོས་བསྡུར་གསུམ་བྱེད་སའི་འཚོགས་འདུ་གལ་ཆེན་ཞིག་རེད། དེ་འདི་ལྟར་ལྐོག་ལྐོག་སུབ་སུབ་ཅིག་གི་ནང་ཐིམ་ག་མ་འཇུག་རོགས་ཞུ་རྒྱུ་ཡིན། མྱི་ཆུང་ང་ལ་དབང་མེད་རུང་སེམས་མི་བདེ་གི།