༄༅། །མཚུངས་མེད་ས་གནས་མདོ་སྨད་རྒྱུན་ལས་རྣམ་པ་གཙོས་མདོ་སྨད་མི་མང་ལྷན་རྒྱས་དྲུང་དུ།
ཆེད་ཞུ། གསར་འཕྲིན་བརྒྱུད་ལམ་ཁག་ནས་མཁྱེན་རྟོགས་བྱུང་ཡོད་ངེས་ལྟར། ད་ལམ་སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་ཐོག་བཀའ་སྤྱི་ཕེབས་བཞིན་དཔལ་ལྡན་ྋསྐུ་སྒེར་ཡིག་ཚང་ནས་ཕྱི་ལོ་༢༠༠༨ ཟླ་ ༩ ཚེས་ ༡༡ འཁོད་བཀའ་ཡིག་ ངོ་བཤུས་ཟུར་འཛར་ཀ ཆེད་ཕེབས། ༼བར་ལམ་བོད་ནང་ཛ་དྲག་གི་བྱུང་རྐྱེན་དང༌། རྒྱལ་སྤྱིའི་གནས་བབ་བཅས་ཀྱི་འོག་བོད་ཀྱི་རྩ་དོན་ཐོག་གོ་བསྡུར་བགྲོ་གླེང་ཞིབ་ལྷོད་གནང་ཆེད་བཙན་བྱོལ་བོད་མིའི་བཅའ་ཁྲིམས་དོན་ཚན་ང་དགུ་པའི་ནང་གསེས་ཁག་གི་ཆ་རྐྱེན་འོག་དམིགས་བསལ་ཚོགས་ཆེན་འདི་ལོ་ཕྱི་ཟླ་ ༡༡།༡༢ གང་རུང་ནང་བསྡུ་སྐོང་དགོས།༽ ཞེས་ཕེབས་དགོངས་ལྟར། སྐབས་ ༡༤ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་ཐོག་ཕྱི་ལོ་ ༢༠༠༨ ཟླ་ ༡༡ ཚེས་ ༡༧ ནས་ ༢༢ བར་ཉིན་དྲུག་རིང་བཞུགས་སྒར་རྡ་སྟེང་བོད་ཁྱིམ་ཚོགས་ཁང་དུ་དམིགས་བསལ་ཚོགས་ཆེན་ཞིག་ཚོགས་སྐོང་གནང་རྒྱུར་གྲོས་ཆོད་ཨང་ ༢༠༠༨།༡༤།༦།༡༠ ངོ་བཤུས་ཟུར་འཛར་ ཁ སྤྱི་མོས་ཀྱིས་གཏན་ལ་ཕབ་པ་ལྟར། ད་རེས་ཀྱི་ཚོགས་ཆེན་འདི་བོད་ཀྱི་མ་འོངས་པའི་འཐབ་རྩོད་ལས་རིམ་ནང་གལ་འགངས་ཧ་ཅང་ཆེ་བའི་ཆབ་སྲིད་ཀྱི་དམིགས་བསལ་ཚོགས་ཆེན་ཞིག་ཡིན་པར་བརྟེན་དེའི་ནང་མདོ་སྨད་མི་མང་གི་དགོངས་འཆར་གང་ཡིན་པ་སླེབས་ཆེད་མདོ་སྨད་དམིགས་བསལ་ཚོགས་ཆེན་ཞིག་ཕྱི་ལོ་ ༢༠༠༨ ཟླ་ ༡༡ ཚེས་ ༡༠ ནས་ ༡༢ བར་ཉིན་གསུམ་རིང་གངས་སྐྱིད་ལས་བྱེད་གསོལ་ཐབ་ཡང་སྟེང་ཚོགས་ཁང་དུ་ཛ་དྲག་གིས་འཚོགས་རྒྱུར་མདོ་སྨད་དབུས་རྒྱུན་ལས་སུ་བཀའ་བསྡུར་ཐག་གཅོད་བྱུང་སོང་ན། དེར་ས་གནས་སོ་སོའི་མདོ་སྨད་རྒྱུན་ལས་་ནས་འཐུས་མི་གཉིས་རེ་དང༌། ས་རྒྱུན་མེད་པའི་ས་གནས་སོ་སོས་་མི་མང་ནང་ཁུལ་ནས་ས་གནས་མདོ་སྨད་མི་མང་གི་འཐུས་མི་རེ་དྲག་འདེམས་ཀྱིས་རྒྱགས་རང་འཁུར་རམ་ས་གནས་ནས་འགན་འཁུར་གྱིས་ཕྱི་ལོ་ ༢༠༠༨ ཟླ་ ༡༡ ཚེས་ ༩ ཉིན་བཞུགས་སྒར་རྡ་སར་ཚོགས་བཅར་ཆེད་ངེས་འབྱོར་གྱིས་མདོ་སྨད་དབུས་རྒྱུན་ལས་ཁང་དུ་འབྱོར་ཐོ་བཀོད་དགོས་རྒྱུ་དང༌། གལ་ཏེ་ས་གནས་ལ་འགྲོ་སོང་གཏོང་དམིགས་གཏན་ནས་མེད་རིགས་དབུས་རྒྱུན་ལས་སུ་སྙན་འབུལ་བྱུང་བསྟུན་ཞིབ་འཇུག་གིས་འབུལ་འཐུས། མདོ་སྨད་དམིགས་བསལ་ཚོགས་ཆེན་དུ་ས་གནས་སོ་སོའི་མདོ་སྨད་མི་མང་དང་གནད་ཡོད་མི་སྣ་བཅས་པ་ཚང་མའི་དགོངས་ཚུལ་སླེབས་ཆེད་ཚང་འཛོམས་ཀྱིས་ྋགོང་ས་མཆོག་ནས་བསྩལ་བའི་གྲོས་གཞིའི་ཐོག་གོ་བསྡུར་སྦྱངས་བཤད་མཐིལ་ཕྱིན་གནང་སྟེ་བོད་ཀྱི་རྩ་དོན་སྒྲུབ་ཕྱོགས་ཀྱི་འཆར་སྣང་ཙམ་མ་ཡིན་པར་དོན་ཕན་ལྡན་ཞིང་སྒྲུབ་ཐུབ་པའི་དངོས་འབྲེལ་ལག་ལེན་བསྟར་ཐུབ་པའི་དགོངས་འཆར་ས་རྒྱུན་སྐུ་ཚབ་འཐུས་མི་སོ་སོ་བརྒྱུད་ཡིག་ཐོག་ནས་ཀྱང་ངེས་པར་སྣོམ་འབུལ་ཐུབ་པ་དགོས་རྒྱུ་བཅས། མདོ་སྨད་དབུས་སྤྱི་ཁྱབ་རྒྱུན་ལས་ཁང་ནས་ཕྱི་ལོ་ ༢༠༠༨ ཟླ་ ༩ ཚེས་ ༢༢ ལ།། །།
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།